زنيبة وخواتها

نوريه عمرها ٥١ سنه تزوجت وهيه عمرها ٩ سنوات جانت تلعب بالشارع هي والجهال واجه عليها ابوها كاللها بويه اليوم تعرسين والليله عرسج....
اخذني ابوي لامي كاللها ام فليح بنتج اجو عليها بيت عمها خطابه ويردونها وانه كلتلهم تعالوا بويه الليله اخذوها بعبايتها والابنيه اعتبروها بتكم فما اوصيج بعد يا ام فليح هالله هالله بويه بالبت اكعد وياها علميها زوگيها شوفيلج صرفه وياها حتى ما نتفاشل ويه الوادم عيب بويه فشل گباحة علينه يو صار شي ...
عاد امي ما قصرت عمت عيني عليها سبحتني وطلعتلي هدوم جديدة مخيطتهن وحاطتهن على كتر ومشطتلي شعر وزوگتني وسوده عليه طلعتلي ذهيباتها حتى اكشخ بي بالليله عرسي جدام الوادم انه جنت فرحانه ومكيفة عبن امي حاطتلي حميره وكحيله ولبالي العرس بس هيج صفكة وهلوله واحطن احمر واخضر المهم جابوني عروس لبيت عمي وحبايبنا يهوسنلي (( يلوكلهه الدلع مرتك صغيرونه يلوكلهه الدلع هلااااا هلااااااا )) نبت عليهن بت عمي (( علوان لا تشعل ضوه خدها والكلوب سوه )) (( فرح كلبي يوم اندكن طبوله وياااااا علوان تستاهل الهلهولة فرح كلبي يوم اندكن طبوله كلللللووووووووش )) وخلص العرس واتزوجت ابن عمي علوان.....
جانت عيشتنا بسيطة عايشين على الفلاحة بس لمتنا حلوه ريحة خبز عمتي وجدرها يفور على ٣ طابوكات وحطب جواه انه ما اجيت الهم كلشي ما اعرف اسوي عمتي ينطيها العافية علمتني على كلشي
احلى شي جان كبل الي تسويه النه جنه راضين وحامدين الله كلشي متوفر عدنه...
ابيتنه صاير بنص بستان وعمي هو المسوول على البستان بي عنب اسود وشجرة تكي جبيره حيل ما اعرف منو زارعها قديمة كلش بس كل سنه تثمر تكي شحلاه طعمه وجانت اكو ساگية صايره بكتر البستان جان يجي عمي ومخلي كونيه المسواك وراه وكلمن جايبله شغيله انه مدرسه ما دخلت هيج عايشه على الفطرة جنت اطلع للزرع الهي نفسي جنت انه حلوه بكل معنى كلمه حلوه بس ما جنت اهتم بسوالف العشك والحب وهاي الشغلات وابوي انطاني لعلوان وانه بعدني احديثة المهم وره فتره حبلت وجبت بنتي الجبيره زنيبة زنيبة اجت متيريسة وعدها لغود سمره بس حليوه معانيها حلوه طلعت على اهلي همزين ما طلعت على اهل ابوها خشومهم كبار وشعرهم عكش جانت زنيبة اول فرحتنه ادور وراها حبلت مره الاخره وهم جبت ابنيه جبت سويره وبعدها جبت اثنين بنات توم عمتي سمتهن حميده وسعيده على اسم امها وخالتها الله ما رزقني بوليد وصارت خلفتي بس بنات وعلى كوله المثل (( يا جايبه البنات يا شايله الهم للممات )) ومرت سنين وعلوان تمرض وصار بي الخبيث الله يچفيكم الشر ب اخر فتره علوان تدهورت اوضاعه حيل حتى ما يكدر يكوم ويتحرك جان حيل تعبان الى ان توفه وراح لربه الكريم وضليت انه وبناتي وحدنه انه الي تكفلت بعيشه بناتي اختي كاعده ابغداد ضلت تلح عليه حتى اجيب بناتي ونستقر ابغداد اخيرلنه من عيشتنه غاد بالبدايه جنت مستصعبه الشغله عبن بغداد موش مثل العماره بس فكرت بمستقبل ابنياتي وكلت لزوم يحصلن شهاده ويتعلمن ويشيلن ارواحتهن... شلنه كعدنه ابغداد بعد ما جنه كاعدين بالعماره ومتعلمين على جو الريف ..
بناتي درسن ودخلن جامعات واتعلمن على بغداد وجو بغداد وعيشه بغداد
.............................................................................
انه زنيبة هو انه اسمي زينب شحلاه اسمي بس اهلي من العماره وما يعرفون اله يصغرون اسم الوادم انه هسه عمري ٣٢ سنه ولحد هسه ما متزوجة بداية قصتنا تبدي من يمي وانه احلم يصير عندي بيت ورجل وفروخ*واعيش حالي حال النسوان البحلي بس شسوي راضيه بقسمه ربي والكاتبه اليه....

نورية/خايبه زنيبه يمه كومي خايبه كومي اكعدي فلشج كون نايمه ومتوثه نوم كومي ويو كعدتي فچچ صاير هالعلوه محد يريدني ومحد دك بابي وين يشوفونج يلمطومه وانتي كاضيته نوم كوووووومي

زنيبة/ها يمه ها صباح خير ان شاء الله شكو شصاير مكعدتني بصباحية الله بصريخ شجايبتلج من علوم وجايتني

نورية/ فلك صابج وصاب لسانج خايبه البنوات الاحديثات عرسن وانتي ضلتي على افادي بت جيرانه ام حسين الصغيرونه اليوم خطبتها وامها من الفجر دكت عليه خايبه هاي البت الي بكد زرج عرست وانتي لا ولج هيه مو هاي نفسها الي جنتي تسولفيلها قصص وحزايات جيره وخفت كون لا والوعد

زنيبة/ ياااااع يمه شمالج الله وريدها جا احنه شنريد من الوادم حاطه عينج على هالفرخه حلوه وصغيره جا ليش ما يمشي سوكها بالعافية عليها
نورية/ اووي كون سنيفره لهل خشم خايبه جا انتي شمالج بيمن اخير منج هيه يمدهوره شني عليها العين جلگه

زنيبة/يمه فدوه اغديلج شكم دوب اكلج الزواج قسمه ونصيب وكلمن ويومه وكلمن قسمته جا شوكت تفضين مني مو موتيني

نورية/ لا والله يا يمه هذا حظج وحظي وحظ خواتج يمفلوكات هلبت وحده بيجن مشت قسمتها وجرت اخيتها ورها ضالات وجوهجن صفر مكابلاتني وكاعدات من عابت لهل الشوفه و ولت

زنيبة/ يمه هسه شني المطلوب كليلي اذا على هاي الاسطوانه تره ما يحتاج اتعبين بلاعيمج ويطبك حسج انه حافظتها اذا عندج غير شي كولي

نورية/ كومي يا عله كلبي المره تريدجن ترحن تساعدن بتها وتجهزنها بلكي الله واحد بالعرس وينعمي على عيونه وياخذ وحده منجن واخلص

زنيبة/ خوش يمه خوش هسه اكعد
كعدت وغسلت وبديت البس حتى نروح واني البس ضليت افكر بحجي امي شمالني من دون البنات محد دك بابي وخطبني ما عندي شهاده؟ شو معلمه ومتعينة وعندي راتب ما اعرف اطبخ؟! شو طبخي ينحلف بي وهاي بشهاده اي واحد يضوك طبخي اخلاقي ينضرب بيها المثل جا شمالني ما تزوجت...
ضليت اسئل نفسي هذا السؤال بكل مناسبه سئلته لمن تزوجت صويحبتي بالجامعه وهيه جانت جنهه بنغلاديشية سئلته لمن تزوجت وحده وياي بالدوام وهاي اسم الله ما خلت زلمه يعتب عليها وبالاخير لكتلها وحيد فقير وسوت نفسها الطاهره العفيفة كدامه وخذاها وهسه كاعد اسئل نفسي واني كاعد اجهز نفسي حتى اروح اخطبه فرخه بعدها حديثة عمرها كله ١٧ سنه بطلت من المدرسه والله كولتن جايني واحد حالته زينه وعنده فلوس ومفلفله على العرس ....

نورية/ ها يمه شني كضيتي نروح يو لا

زنيبة/ اي يمه كضيت ما عندي شي امشينه

نورية/ خوش يمه جا بس خلي نتاني خواتج المايله والمعدوله يجن ويانه.. ياااااارب وين الله وتمشي قسمجن بجاه الزهره ام الحسين وعليه نذر يا بيت ام حسين اروحن احني بابها واطشن واهليه فوك راسها

زنيبة/ ياااااع يمه شني فلمج تسودنتي تردين تشهرينه هيج احنه موغفات على كلبج

نورية / خاب يمه لا تحچيني فدوه اروحلج انه افادي موجر بس ما اكدر احجي

زنيبة/ ياااع يمه كل هذا وما حاجيه جا يو حجيتي شلون طركاعة اللفتني كون

نورية/ دبسج بسج اشوف لسانج هالطوله طلع داومتي كليه اربع سنين هلبت كربستيلج وحيد منا منا مطلعه لسانج عليه يا عرمة*

زنيبة/ يااااااا خاب شوف الفلك هههههههههه خوش الدور انه ادري الام تعلم بتها على المستحه والخجل وانتي تعلميني اكربسلي وحيد من الجامعه خوش والله ... شني سويره ما تجي ويانه بلكت تكربسلها وحيد منا منا هيه الاخره ههههههههه

نورية / سويره راحت للدوام وهاي كود الله تحصللها رجل من جيره بهلخلفة فالحات يدورن شهايد

سعيدة/ يمممممممممه

نورية/ خاب يمه صمه من الله شتردين دولاب دولبج انتي وخواتج

سعيدة/ يمه حميده بايكه تراچيي وما ترضى تطلعهن

حميدة/ احاااا خاب يمه العباس عليه اذا ماخضتهن يمه هيه هاي تضيع اغريضاتها وتذب عمايلها براسي صكد يو كالوا (( تجيك التهايم وانت نايم ))

سعيدة/ جا وهذا الاسوار اللابسته شني مو مالتي يخبگه انه اضيع غراضي مو خوش دجيبي

حميدة/ لااا لااا جا هذا انه خضيته منج دين شني البسنه واردنه الج بعد اخيتج

نورية / خااب تميلن مني يو بالعباس ابو فاضل اخلي النعال يلعب على ضهورچن امشنه سووووودنتني ...
.............................................................................
((بيت ام حسين ))

نورية /كللللللللللوووووش صلوات على محمد يمه (( وتعالي تباركي يا من تحبين اعبر يا هلا ويه المجبلين )) الف مبروك خيه ام حسّين بالعباس خيه فرحانه لبنيتچ الله يسعدها ان شاء الله

ام حسين/ صلت على نبيج داده فدوه لعمرج عيوني والله هيج تحبج وتحب البنات وكالت لازم يجون اول الناس ويفرحون ويايه

نورية /بعد كلبي چا هيه هم ابنيتي اذا ما اجيها وافرحلها المن اجي ما تكليلي

ام حسين / فدوه لكلبج حبيبة ... روحن خاله اصعدن فوك يم اسراء منتظرتجن لا تستحن اخذن راحتجن البيت فارغ

حميدة/ خايبه سريوة بس كولي بلي بيج خير وادللي

اسراء / هههههههههههه هلا بريحة خوالي

زنيبة/ الف مبروك حبيبتي تستاهلين وشايفه كل الخير

اسراء /الله يبارك بيج خاله ان شاء الله يوم الالج

زنيبة/ يااااا دهر لفاج ولج خاله شني خاب انه لو احلن شعري اصيرن اصغر منج اععع خاب والله وكت

اسراء / هههههههههه مو قصدي عيوني اعذريني والله ما اعرف احجي اخربط من الفرحة

سعيدة / خاب سريوه حاجيني شلون عرفج شلون اجاج منين شلون انطيني الوصفه بعد اختج

اسراء/ جنه طالعين بالمول وشافني وعجبته ضل يفتر ورايه لحد ما ذبلي الرقم وضلينه ٤ اشهر نتخابر ونتراسل وبعدين جاب اهله وخطبني

حميدة/ يااااااع هيج عيني عينك وامج تدري ؟ بالعباس ذابه فلك سريوه

اسراء/ ههههه لا طبعا ما كلتلها على اساس شايفني بالمنطقة ودز امه وخالاته يجن يشوفني

زنيبة/ يمه منجن بنات هالوكت تذبن فتوك نمرات ما تنكدرن ..
انه راح انزل جوه وخلي المايله والمعدوله يمج وانتن يالمفهيات ديرن بالجن تسمعن كلامها تذبجن بتوهكه وامي تكضجن تكصبچن بعلي

اسراء / هههههههههه احنه راح نطلع للصالون وراح اخذهن وياي نتلاكه العصر
...................................................................................
وخلصت الحفله ورجعنه روسنه صايره طبل من الدك والركص وامي ماقصرت ما ضلت مره ما كالتلهه ذني بناتي ما يطلعن من الدوام للبيت ومن البيت للدوام طلعت الحفله من خشومنه كلساع كومي سلمي على هاي ابنها محامي كومي ركصي يم هاي ابنها دكتور وشهرتنه وخزتنه

<< بعد مرور اسبوعين >>
عفاف / ههههههههه ما سولفتلجن شصار البارحة بالليل

هديل/ شصار شصار سولفيلنه خوب انتي ورجلج ما تخلين من السوالف قابل مثل رجلي كوه تطلع منه الحجاية

عفاف / تعالي اشاورج اكو هنا بنات ما متزوجات

هديل/ ههههههههههههههههههههه عزه العزاج اي والله هيج كالج بالخط العريض

عفاف /ههههههههههههه اي والله هو اول مره يسوي هيج حتى اني انصدمت

زنيبة/ انه اكومن احسن حتى تاخذن راحتجن ولا عبالك كاعده وياجن ضالات تتبسبسن ابيناتجن

عفاف / يا زعلتي حبيبي مو قصدنه بس انتي ما متزوجة ما ردت اسولف كدامج

زنيبة / وانتي ياهو كالج اريد اسمع سوالفجن انتن ورجولتجن هيج انه فارغه واضل اسمع شكالت فلانه وعلانه عابتلج وعاب حالج
...................................................................................
(( البيت ))

زنيبة/ انعل ابو العرس لابو خيره انه تقهرني عفاف ام النغف والسلاج امداني وتف عليه

سويرة/ ها خيه شني شبيج ياهو مضوجج جايه وجهج بي سبعين لطامه

زنيبة/ خاب انه كاعده اليوم بحجره المعلمات وعفاف ام النغف وهديل العوجة يقهرن بكلبي عبن انه ما معرسه وشني ما يصير اسمع حجيهن خايبه انه شمسويه بدنياي لَيش هيج يعني فوك ضيم الله حجاية المسعدات

سويرة/ خاب صكد جذب خية خايبه يروحنلج فدوة ونذر هالخايسات هذني وهسه على اساس انتي ميته على سالفتهن

زنيبة / خيه تردين الصكد انه اموت واعرف شكالتلها صار بيه حگلگ بس اريد اسمع شكالت وضحكت هيج وهاي هديل العوجة من شاورتها بالسالفة ركبتها صارت هاكدها جنهه ركبه نعامه خايبه وحواجبها تشنطن وصارن بالطول تبهرزت احوالها

سويرة/ ههههههههههه دهر لطمجن كوّن يمگيرات

زنيبة/ شني شو البيت يصفر وين امي وين المايله والمعدوله
شو مالهن حس

سويرة / والله خواتج تكولين حاطات نقش الحنه برجليهن رجعن من الدوام وطكنها نومه خاسن من النوم وامي كاعده بحجرتها بس مدري شمالهه ضاله صفنه تجيبها وصفنه توديها حاجيتهه ما ردت عليه

زنيبة/ يااااع شمالها امي امشينه نروحلها
...................................................................................
زنيبة/ هاا يمه مسيه العافية عليج شني خيرج حاطه ايدج على خدج بله انه ضايجة من ريا وسكينه الوياي انتي شني شبيج ياهو المزعلج ياهو الغاثج ؟

نورية /والله يا يمه اجاني خبر بهذل احوالي وجسمي تبريد من سمعته

سويرة / يا ستار ياربي شني يمه شصاير

زنيبه/ شو يمه اتنوعيلي انه اعرف هذا الخبر شني كليلي ياهي العرست مني الانخطبت

نورية /خاب يمه بنت خالتج ملكية اخر وحده من بنات خالاتج انخطبت وانتن ضليتن وانه يمه خايفه يصير بيه شي وتضعين عكب عيني خايبه يمه خالتج ملكيه عدها ١٠ بنات وكلهن مشت قسمتهن وانه عندي بس انتن الاربعه

زنيبة/ ومحد اجه علينه مو يمه خاب يمه هو شنو العرس نمونه فدوه اغديلج اصلا انه الزواج كله بعد ماريده جزت روحي منه...
رحت لغرفتي ودخلت وسديت الباب بكل قوتي هذا الباب لو عنده لسان جان ضَل يصرخ من كد ما ذابه قهري بي  نزعت ملابسي بدلت وتمددت على فراشي وانه اتحسر واكول بكلبي

صدك انه مقهوره وهيج تحز بكلبي يعني كل هذني عرسن وبس انه ضليت هاي اليوم انخطبت وباجر تعرس وكله يصيحولهه ام فلان وام علان وانه ابقى

زنيبه الما معرسه زنيبه الخاست عد اهلها وضاله اضحك مثل المنغوليه كل ما جابوا طاري وحدة عرست لو وحده حبلت
طلعت من غرفتي ورحت للمطبخ حتى اشربلي كلاص ماي طلعت
واشوفن امي تدور ورايه

زنيبة / ها يمه شني عدج شي تردين تكولينه شني بعدج ما زعتي بطنج

نورية / اكلج يمه جا هسه شلون ما تكليلي يعني تضلين هيج

زنيبة/ يمه جا شبيدي فدوه اروحلج شلون بله ادك اعلان على باب حوشنه تعالوا خطبوني

نورية/ يمه خاف وحده ما تخاف ربها مسويتلج سحر وهالچابستج وهالضاله لا تمشي قسمتج ولا قسمه خواتج

زنيبة/ يمه جا هو هذا الاكتشاف الوصلتيله صكد عود ؟!!!!

نورية / اي والله يا يمه جا كلشي يصير جا ما تسمعين سوالف النسوان هاي التسوي سحر لرجلها وهاي الساحره لعمتها وهاي الجابسه حماتها والسحر موجود يا يمه وحتى نكطع الشك باليقين اكو خوش شيخ اليوم ام حسّين الصبح جانت يمي وتسولف بي يكلج ينطي المراد باليد وبلكي بجاه الله واهل البيت وتنفك الچبسه

زنيبة/ خوش يمه خوش شيخ وام حسين الجايبته لا هايهيه ربحنه خايبه يمه شمالج لا يقشمرنج بهالسوالف الما منها فايده الي لا تجيب ولا تودي سوالف السحارات والدجالات كلها هيج ماكو شي يصير الا اذا الله كاتبه على الابن ادم.

حبيتها من راسها واتغدينه ورحت لحجرتي انام شويه انه. طالعه من الصبح وضيجة الخلك العندي ما راحت كلت بلكي يو نمتلي شوي اكعد كواكه
والله نمت والنومه نومه فزيت وچن مره لابسه ابيض بابيض واكفه فوك راسي وتعاين عليه وتضحك وحلكها واصل لاذاناتها من الضحك وعيونها تلمع

زنيبة/ دخيلك يا علي يابو الحسينين شني ياهي انتي

نوريه / اجااااااااااچ اجاااااااااچ اجاااااااچ

زنيبة/ اسم الله الزهره ياهو الاجاني شني متت وملك الموت اجه ياخذ روحي يا حاظر الشدات احظرني

نورية/ خايبه عريس اجااااچ عريسسسسس

يتبع............

وهذه كانت الحلقة الاولى من قصه زنيبة وخواتها
#محمد_ابو_الفضل