لاجل عينيك سقطت في المنفى

البارت الخامس والعشرون

الكاتبة : عليا الناصر

لأجلِ عَينيكِ سَقطتُ في المَنفىٰ

البارت ال : 25

يمينة : فزت وإبتعدت عن جراح بسرعة من سمعت صوتهن لماريا ومنيرة وعائشة اللي صعدن وجني عليهم وناظرت بي بهلع هاي أني شسويت ولطمت على خدودها يا ربي دخيلك وطفرت من يمة وراحت تركض لغرفتها دخلت وسدت الباب وقفلتة وراها

ماريا : خير خوية شصايروا هنا شمينا ريحتوا الحرك والشياط لأن الريحة ترستوا البيت ترس

جراح : ماكو شي صار طبگ بكهرباء الحمام وطگ فيوز وفصلتها للكهرباء والظاهر الڤيز عاطلة ومن الحر ولحد تدخلوا بي منا لباچر لما أجيبوا الكهربائي يشوفو شنو السبب

ماريا : زين ويمينة چانت تغسل هدوم جوى خوما صار بيها شي

منيرة : تقربت عليه وناظرته بريبة من شافتة گام يدگم بالدگم مالت صدر دشداشتة صدوگ الخوينسة شبلاها شبيها ركضت وچنها الملدوغة إنتَ شسويتلها لو لأن شافتنة شردت والظاهر قاطعناكم مو بالله

جراح : يولي إنچعمي ولا تظلينوا تمسلتين وتحچين حچي بلا معنى ماريا مثل ما گتلچ لا تفوتن للحمام لما نصلحوا الكهرباء وعافهن ونزل جوى

عائشة : همزين الله سترها لعمة لو متكهربة ومحروگة جان هسة شسوينه وشگلنة

ماريا : اي والله همزين الله ما يگطعوا وخلصها بس شلون طگت الكهرباء وشمعنا بس بالحمام مو بالبيت كلو

منيرة : هو من زمان بي طبگ وأني مو گتلكم جم مرة ما سمعتوا مني وهي الخوينسة شعدها فايتة تسبحوا بهالليل وصايرتلي نادرة تغسلوا هدوم چان خلتهن للصبح قابل ما عدها هدوم

ماريا : صار بيها زفر مالت السمچ من گلتوا وفاتت تسبحوا خوما تظلوا بريحتها الخايسة وراحت دگت الباب مالت غرفتها ليمينة هاي أني خوما بيچ شي يمينة .. يمينة شو إفتحي الباب ومن فتحت الهن يمينة الباب ورجعت گعدت بالگاع وفاتت ووراها منيرة وعائشة  شهگت إسم الله الرحمن شبيچ وركضت على يمينة اللي كانت مخلية السلة مالت الزبالة گدامها وتتقيء بيها

عائشة : بهلع وخوفه شبيچ عمة يمينة مريضة لو إختنگتي من الدخان راح أروح أصيحوا لعمو جراح حتى يجي يوديچ للطبيب لو للمستشفى أحسن

منيرة : شتصيحن منو أوگفي لا تصيرينوا ملگوفة خلينا نفتهموا بالأول شبيها وتراها ما بيها شي هاي عيارة نسوان تعلميني بيها وإنتِ مالچ شغل وما تفهمينوا بهالسوالف هذني

ماريا : تقربت على يمينة ومسكتها من كتفها عيوني گولي شبيچ شنو يوجعچ تروحين للطبيب نصيحوا لجراح

يمينة : رفعت راسها وعيونها مزوغلة من كثر ما تقيأت لا بس ساعديني حتى أمددوا بفراشي وإطلعن وعوفني وحدي تعبانة وحيلي بايد أريدوا أرتاح

ماريا : ماشي حبيبتي يله گومي وسندتها هي وعائشة وگفنها يمينة وجهچ إنگلب أصفر ومبينوا عليچ مو زينة لا تعاندين وخلينه نوديچ للطبيب لا تروحين تتخربطينوا علينا بتالي الليل

يمينة : من شافت منيرة تناظرها بريبة وخباثة وهي تتفرس بملامحها وخاصة من تخزرها وعبالك تريد تاكلها بعيونها من شافت الأثار اللي على رگبتها وشفايفها المورمة ووحدة مثل منيرة ما يخفى عليها شي نزلت عيونها بالگاع ومثل واحد مقترف ذنب عظيم وبحدة صاحت بماريا لا تلحينوا علية گتلچ ما بية شي بس تعبانة وعوفني وحدي وإطلعن كلچن برى يلة ما أريدوا أي وحدة تظلوا يمي وبعدت إيديهن عنها ودفعتهن طلعتهن برى الغرفة وسدت الباب وراهن وقفلته من جوى حتى بعد ما يدخلن عليها ورجعت تتقيء من جديد

ماريا : صاحت عليها من ورى الباب بالله هسة شنحاچيچ وهذا عنادچ شلون بي ماشي ظلي وحدچ وعود لو متي وحدچ من الألم هذاك الوكت تعرفينوا الله حق وتگولينوا يا ريت لو سامحتوا لوحدة منهن تبقى يمي وتداريني وتهتموا بيه

عائشة : هي عمة يمينة شبيها وشصايروا وياها ليش معصبة وهيچي جاي تتصرفوا ويانا

ماريا : مابيها شي عوفيها هسة من تناموا وترتاح تصير زينة إمشي خلينة ننزلوا جوى هسة تلاگينهم جراح الصغير ومحمد لا عبين طوبة وأصلاً ماما ما بيها تگوم وتركض وراهم ولا تصيحوا عليهم وعلى هاي تخليهم براحتهم ونزلن

منيرة : اي يا الخوينسة والله عبالي تحترگين لو تتكهربين وأخلصوا منچ بس دومچ محظوظة ومبخوتة وهسة هذا جراح شجابوا بهالوكت هذا حظي الأسود وخلصها والله چنت متأملتوا تتكهربوا وعود أني خربت النقطة وزلغت الواير مالت الغسالة وخربت الڤيز حتى يصيروا طبگ وتطگوا الكهرباء وتحرگها لا والنوب المصگوعة الشفايفو مورمة والرگبة مطگعة والله يعلموا شصار بينها وبينو لجراح لأن هو حالوا مو أحسن منها هم الدشداشة دگمها مفتحة ومدلع وشعراتوا منكوشة وراساً شرد ونزلوا جوى يعني أني ما أخلصوا من الخوينسة وحتى الحرگ هم ما فادرا بيها وهاي ثاني مرة تنجو من الحرگ هذيچ المرة بالتنور وهالمرة بالكهرباء والله گرنها قوي وعبالك عدها گرن من حديد وكل شي ما جاي يفيدوا وياها يعني شأسوي بعد حتى أقلعها منا وأخلصوا منها ما كو غير أصيروا مجرمة وقاتلة وأذبحها بليلة ظلمة وأخلصوا منها ...

-----------------

أروى : عمو عمر همزين جيت أخذتنا وطلعتنا

عمر : خوما رجعت ضربتكم بيبيتچ وخالتچ هناء

أروى : لا عمة روعة ما تخليهن وتحبنه هواية وخالة چانت كلش عصبية من إجى خالوا مروان ورجعهن للبيت وأخذنا وياهن وتگوللها لبيبي ليش قبلتي ترجعين چان رفضتي

عبدالله : عمو عمر لا ترجعني لبيت خوالي أني رجال أظلوا وياكم خلي بس أروى تروح هناك

أروى : ماكو إذا رجعت أني هم أرجعوا وما أظلوا هناك بيت خوالي عمو يوسف شوكت تطلعونوا من المستشفى والله ضجنا من بيت خوالي ونريد نرجعوا لبيتنا

عمر : مو تگولون خالكم مروان ومرتو زينين عليكم ويحبونكم وما يخلون أحد يمد إيدوا عليكم بعد ليش ضايجين بعدين تراكم ما صارلكم غير يومين من رحتوا شبسرعة ضجتوا منهم

أروى : اي يحبونه بس إحنة نريد نظلوا بيتنا أحسن ونرتاح أكثر

عمر : عمو إصبروا بس هاليومين ظلوا يم خوالكم ومن نطلعوا ليوسف ترجعون

عبدالله : أهووو وهم يرجعن بيبي وخالة هناء يگعدن يمنا لأن يگولن إحنة نهتموا بوسف

عمر : لا يوسف لگيتلوا ممرضة متقاعدة وهي مره چبيرة بالعمر راح تجي يومية من الصبح للعصر تبقى يموا وتهتموا بي وإحنة مو بحاجتهن لبيبيتكم وخالتكم والله الغني عنهن وعن خدماتهن

أروى : بس عمو هنه گالن من يطلع يوسف نجي نگعدوا عدكم بالبيت

عمر : وين يگعدن عدنا ما يصيروا هالحچي هذا يله خلصوا أكلكم حتى أخذكم أوديكم تشوفونوا ليوسف ووراها أرجعكم لبيت خوالكم

عبدالله : عمو يعني يوسف بس يومين ويطلعوا من المستشفى

عمر : إي عمو إن شاء الله فلا تلحون ورن موبايلة هلا خالد شلونك اي وشكراً جزيلاً الك رحت عليها وإتفقنا وراح تجينا يومية الصبح وورى العصر تروح مو مشكلة الفلوس تروح وتجي وخلي شگد تاخذوا تاخذ المهم سلامتوا ليوسف وأهم شي تهتموا بي وتداري بغيابنا عزيز لا بعدوا ما يدري ما خبرتوا عنها لأن گلت خليني أتفق وياها بالأول يله أخبروا تسلم خوية وما قصرت الله يسلمك وسد الخط

أروى : عمو لا تزعلوا بس صدوگ إنتَ راح تتزوج

عمر : عمو عوفچ من سوالفها لخالتچ وبيبيتچ الماصخة والف مرة گتلچ ما أتزوجوا أني وحتى أبوكم هم معندو وما يتزوج

أروى : يعني ما واح تتزوجها لخالة هناء هم

عمر : أستغفر الله شأتزوج منها هاي هي گالتلچ هالحچي هذا

أروى : لا بس سمعتها تحچي هي وبيبي وتگوللها لو تزوجني عمر أطلع أني وياه بيت وحد لو عبدالعزيز ياخذ جهالوا ويطلع من البيت قابل أني أبقى خدامة الهم

عبدالله : عمو حباب لا تتزوجوا من خالة هناء والله هي بس تضربوا بينا لو تطردنا من البيت وبعد ما تخلينه نشوفك لأن شريرة

عمر : لا عمو ما أتزوجها لو تبقى أخر مره بالدنيا وشحدوا اللي يمد إيدوا عليكم لا هي ولا غيرها وإنتو وليداتي ومستحيل أتخلى عنكم وورى ما أكلوا أخذهم للمستشفى شافوا يوسف وخبره لعبدالعزيز عن الممرضة اللي إتفق وياها ينطيها راتب شهري مقابل تبقى يم يوسف وتهتم بي وعبد العزيز ما إعترض ورحب بهالشي بعدها رجعهم لأروى وعبدالله لبيت خوالهم ومن نزلهم بالباب ظل بالسيارة ما نزل

هناء : طلعت عليه وقبل ما يحرك السيارة فتحت الباب وصعدت وياه بالصدر عمر عيني شدعواك ليش هيچي شايلوا لخشمك علينه وحتى نزلة ما كلفتها لنفسك ونزلتوا حتى تسلموا علينه وهاي لوما أني أطلعوا بالصدفة وأشوفك چان رحت ومحد درى بيك

عمر : هناء مشغول وما عندي وكت للتفاهات

هناء : بحدة اي بس عندك وكت لولد عبدالعزيز ولو غرگان بالشغل بس تسمعوا بواحد منهم لو إصبعوا مجروح تجيهم تركض

عمر : يولي شبيچ إنتِ ليش شادة عليهم وتكرهينهم لوما جهالوا أختچ الله يرحمها يصيرون ومو غريبين عليچ المفروض هسة إنتِ بمكانتو أمهم الله يرحمها تهتمينوا بيهم وتحبينهم

هناء : صاحت لأني أكرههم وما أحبهم تدري ليش من وراها لأمهم الحقيرة لأن كل اللي جاي يصيروا هسة هي السبب بي ولوما هي سبقتني ورضت تتزوجوا من عبدالعزيز چان هسة أني وإنتَ متزوجينوا ومن زمان وشچان راح يصيروا عليها لو ما موافقة ورافضة تتزوج عبدالعزيز ها لما نتزوجوا أني وياك نسيت لو أذكرك من أبوك خطبني من أبوية و راد يزوجني الك وإتفقوا على هالشي

عمر : يووه لساعج متذكرة وما ناسيتها هاي السالفة صارلها كومة وأكل الدهر وشرب عليها

هناء : اي لساعني متذكرتها وما أنساها ولساعها الحرگة بگلبي وتاكلوا وتشربوا ويايا لأن چان هسة أني وياك متزوجينوا وعدنا بيت وأطفال ومكونينيوا أسرة بوحدنا

عمر : هناء لا تظلينوا عايشة بالوهم وتكذبينوا الكذبة وتصدگينوا بروحچ ترى أبوية وأبوچ الله يرحمهم إثنينهم من إتفقوا ما خطبچ الية بالإسم وگالوا إنطيني هناء لعمر بس مجرد من گالوا أبوچ ليش ما تزوجهم للولد وترى بناتي موجودات گدامك طب وتخير ياهي اللي تريدها أخذها وإحنه مو بس أصدقاء إحنه أهل وأبوية رحب بإقتراحوا لأبوچ وما حب يفشلوا ويكسروا لأن چان يعزوا ويقدروا هواية ووافق وگالوا ما الگى أحسن من بناتك أزوجهن لولدي بعدين توفى الله يرحموا وورى وفاتوا بسنين أبوج فتحوا للموضوع ويانا وأني گتلوا عمي أعذرني ما أگدر أتزوج ووضحتلوا أسبابي وهو إقتنع وصرف نظر

هناء : لا إنتَ غلطان لأن قبلها حجى ويانا وخبرنا على إتفاقهم هو وأبوك وأسماء الحقيرة بعنادي راساً گالتلوا موافقة وراح زوجها لعبدالعزيز هي لو رافضة بهذاك الوكت جان قنعك وغيرتوا رأيك وتزوجتني لأن أدري بيك مستحيل تنزلوا كلمتوا لأبوك ولا تفشلوا لأبوية وما تاخذها لبنتو

عمر : هناء أسماء الله يرحمها ما شفنه منها غير كل الخير والمسكينة چانت فقيرة وكل صوت ما الها وإذا على النفور والحزازيات اللي چانت صايرتوا بينچ وبينها فهاي إحنة ما مدري بيها ولا نريدوا نعرفها لأن إنتن خوات ومحد يتدخلوا بيناتچن ويا بنتو الناس عوفيني بحالي ولا تظلينوا تركضين ورايا ودگي ثگل شوية وإهجدي تراچ بنية ومو حلوة بحقچ هالتصرفات هذي وأني وياچ مالنا نصيب سوى ويا ريت تفهمينوا هالشي وتروحين تشوفينوا نصيبچ ويا غيري وما تضيعينوا عمرچ بالأنتظار ورى سراب وأحلام مستحيل تتحققوا وبلا ما نتفاضح من ورى شي مالو كل ذكر وهسة تفضلي إنزلي من السيارة من غير مطرود

هناء : عمر لا تگولوا هيچي أني والله أحبك ومستعدة لو تزوجتني أصيروا خدامة جوى رجليك وشتريدوا أسوي الك وإذا على جهال عبدالعزيز رغم كرهي لأمهم بس راح أحطهم بعيوني وأدريهم لخاطرك بس خلينا نتزوج ولا تعوفني لأن والله ما أگدروا أعيش بلاياك اني وإنتَ الهوى اللي أتنفسوا عمر ما أسمحلك تعوفني وللموت ما أتخلى عنك وغافلته وهي تتقرب عليه وسحبته من ياخة قمصة وباسته يقوة من شفايفة

عمر : بعد ما إستوعب اللي صار دفعها عنه وصاح بيها ولچ كلبة تخبلتي إنتِ ما تسحينوا على عمرچ تبوسيني وفوگاها باب أهلچ عجل شخليتي للمراهقات واللي ما عدهن عقل ما تخافينوا يشوفچ واحد من أخوتچ ويذبحج على هالتصرف الأرعن مالت الساقطات

هناء : ما يهمني لو يگطعوني ومستعدة هسة أنزلوا وأصرخ بالشارع وگدام كل العالم وأگوللهم أحبوا لعمر وأريدوا أتزوجوا وهو الرجال الوحيد اللي يحلالي من بين كل الزلم

عمر : بعصبية نعلا على .. أستغفروا الله العظيم ونزل من السيارة وإفتر عليها فتح باب الصدر حيل وجرها من متنها وصاح بيها إنزلي طايحتوا الحظ لا هسة أحطچ جوى السيارة وأمردچ مرد وأنعل أبو اللي يطلع وراچ ونزلها بالگوة وشمرها عالباب مالتهم ومن وگعت بالكاع تفل عليها تفو عليچ وعلى قلة أخلاقچ يا أدبسزز وراح ركب سيارتة وطلع طاير خلاها تنشال وتندگ

روعة : بهالأثناء چانت راجعة من بيت مدرسة وياها ودتلها فضل وشافت گدامها اللي صار خاصةً من سحلها من السيارة وشمرها بالگاع تقربت من هناء اللي جانت لساعها گاعدة بالباب بالگاع وتبچي هاي ليش هيچي سوى بيچ هذا ترى مو من حقوا وشايف نفسوا هو وشلون يمد إيدوا عليچ والله العظيم هسة أتصل على مروان وأبلغوا حتى يطح حظو وطلعت موبايلها

هناء : وگفت بسرعة وعاطت بيها وسحبت الموبايل من إيدها وشمرته بالگاع ولچ لا تتصلينوا بصخام وشعليچ إنتِ شدخلچ عسى ما يذبحني مالچ شغل فاهمة مااااالچ شغل ويا ويلچ لو جبتي سيرة لأي أحد ودفعتها وفاتت جوى للبيت

روعة : هاي شبيها يا الله وليش هيچي صارت خانعة وما تريدوا أحد يدري باللي صار وياها يعني بالعادة لسانها يلعلع وشطولوا بس الظاهر هي الغلطانة بحقوا هالسكتت وحسب اللي سامعتوا عنو من مروان هو خوش رجال وما عندو مكسرات وسوالف تعبانة ومبين محترگ منها والله يعلم شسوتلوا هالسوسة هذي رن موبايلها دنگت شالته من الگاع ونفظتة همزين ما إنكسر چان شخلصني من مروان وراساً يزعلوا مني ويگولي ما حافظتي على هديتي وناظرت بالإسم هاي يمان جاي تتصلوا خيرها وفتحت الخط ودخلت جوى للبيت هلا وغلا عاش من سمع صوتچ الحلو هاي وين هالغيبة

ميان : أني لو إنتِ اللي من يوم أخذتيه للمحامي حبيبوا الگلب وإختفيتي بس مرة ورحتي وگلتي عدولي وبعد محد شافچ

روعة : يولي شأسوي عطلة وحتى من أروح لأهلي ما يرضى يخليني أباتوا يمهم وحتى أمي تگولي بعدچ عروسة جديدة ما يصيروا تعوفينه رجلچ وتباتين يمنه وتحودني وعبالك گاعدتوا على گلبها شخبارچ ما راح نفرحوا بيچ عن قريب ماكو واحد منا .. منا

ميان : لا حبي ماكو وبعدين منو يتجرىء ويجي يتقدموا حتى يخطبني من يسمعون بخوالي يشردون وماكو زلم حوك كلهم جبناء

روعة : الله كريم حبي يجيلچ نصيبچ لا تستعجلين وإذا على خوالچ فإنتِ شعليچ بيهم والله هذولة العالم ما أدري شلون يفكرون

ميان : مو يگولون ثلثين الولد عالخال فعلى هاي همه يخافون المهم هسة عوفينا من سيرتوا الزواج الغثة وگوليلي هاي وفاء شبيها شو منزلة عالستوري كلو حالات حزن وكأبة شصايروا وياها راسلتها بس ما حچت وگالت نفسيتي تعبانة وأني ما لحيتوا عليها بعد

روعة : أني هم ما أدري وما حاچية وياها لأن خلي تولي ما تستاهل ما تقدر وشايفة نفسها هي من تزوجت أني حضرت حنتها وبعدين أخذتلها هدية ورحتلها ومن عزمتها بحنتي ما رضت تجي ولا قدرتني وسمعت من أمي لان بيت خالتي جيرنها يصيرون ومسولفتلها مرتو وتگول عدها مشاكل هي وزوجها بعد صدوگ چذب ما أدري

ميان : إنتِ شايفتوا لزوجها شلونو يخوف عتوي شضخماتوا وأسود مفدعس يسد النفس ويلاعبوا ستين نفس وأخذتوا والله شنو لان زنگين وبيت وحدها وحتى من إنجمعنا ورحنا عليها ودينالها الهدية ورى ما تزوجت بإسبوعين شكد لحن عليها المدرسات حتى تشوفهن صور عرسها ما قبلت وگامت تتحججوا يا بعدهن ما طالعت ونوب تگول ماخذيهن أهلوا لزوجها بس چذب ما شوفتهن حتى لا يعبين عليه لو شافنوا مو حلو

روعة : ما أدري والله أني ما شايفتوا لأن ما إجى بالحنة وحتى من رحت وديتلها الهدية عالسريع چنت مستعجلة وما دققتوا وياها بس إنتِ وين شفتي ولگفتي

ميان : عگاب إبن خالي مرة وصلنا للسوگ أني وأمي ويعرفوا وراح سلم عليه وگال هذا ماخذوا مدرسة وياكم بنت فلان عاد عرفتوا هو هذا زوجها وگلت من ظنه ما رضت تشوفوا النا المهم حبي إتصلتوا عليچ حتى أبلغچ عالمراقبة مالت السادس الدور الثاني وطالعنا نراقبوا سوى  أني وياچ والمديرة الخبيثة بلغتني وطلبت مني أبلغچ

روعة : يبو على حظي بهالحر والله لا ننسلگوا غير سلگة شيظلوا بينا وتعال أوگف 3 ساعات أگولچ راح أشوفو مروان بلكي عندو عرف منا .. منا ويگدروا يلغيها الية والچ هم ويا

ميان : الله وإيدچ يا الشيخة وأجلبوا بذيالچ علواه والله لو يگدروا ويلغيها النا ويخلصنا

روعة : تمام إتفقنا هسة أگولوا وأردلچ خبر يله مع السلامة حبي ..

------------------

منيرة : عاطت وعرج إگعدوا عاد بس تگمزون فوگ روسنا شنو نازلين علينا من السما محد يحاچيكم ولا يگوللكم على عينكم حاجب قابل ولد السلطان سليمان وشدعوى هالدلال هذا والعين اللي منطينها الكم ومفلتينكم بس مرة تاليتها شراح تطلعون الهم هم تطلعون عارت ودايحين مثل أبوكم

ماريا : صاحت بيها منيرة ما تستحين إنتِ حاطتوا عقلچ بعقل الجهال شمسوين همه خطية جاي يلعبون وإذا بيت أبوهم ما يلعبون وياخذونوا راحتهم عجل وين يرحون وبعدين حتى الميت ما سلموا منچ وتسبينوا مو عيب عليچ أبوهم مات الله يرحموا والميت لو شما كان مسوي ما تجوزوا عليه غير بس الرحمة

منيرة : عشتو وينها هالرحمة اللي تجي على أبوهم والله هي بصوب وهو بصوب وهسة تلاگينوا جاي يرگص بجهنم وناكر ونكير جاي يشعلون بي بعدين عيني لا تحسسيني أني كافره وبس إنتن امهاتوا الدين التقيات والورعات وخليها أمهم تجي تگابلهم وتديروا بالها عليهم شوية لو تاخذهم توديهم لبيت أبوها وخلي يريحونه شوية من دوختهم وبدل ما متعلكتوا فوگ العيارة وحابستوا نفسها

صالحة : طلعت من غرفتها وجتي تمشي على كيفها وجراح ومحمد من شافوها راحوا يركضون عليها وكل واحد گادها من إيد يمه أروحوا فدوة ونذر أنة للوليدات الحلوين اللي گبروا وصاروا عگاز لجدتهم تعكزوا عليه

ماريا : گامت عليها بسرعة ولكم لا تجرونها حيل لا توگعونها وتكسرونها على كيفكم حبايبي وياها لبيبي وسندتها من ورى وجابتها گعدتها عالقنفة ماما شفتچ نايمة گلت خليها ترتاحوا وعلى هاي ما جبتچ للصالة مثل كل يوم وگعدتچ ويانا

صالحة : گعدتهم لمحمد وجراح بحظنها اي صحيح غفيتوا شوية ورى صلاتوا الضحى وهسة من سمعتوا صوتچن گعدت وگلت خلي أروحوا يمهن عجل يمينة وينها شو ما مبينة

جراح : بيبي ماما مريدة ونايمة فوك

صالحة : يمة إسم الله الرحمن شبيها صدگ يولي ماريا

منيرة : عيارة نسوان كل شي ما بيها وعرج ما يطگها شبيها قابل خوما راح تموت وهي مشتهية ومستحية

ماريا : إسم الله عليها كون بعدوها وأي واحد يكرهة الموت ياخذوا ماما يمينة محمومة ومصخنة ولازمتها الرجافة خطية وحتى الجهال نزلتهم جوى وگالت لا يصعدونوا يمي لا أروحوا أعديهم

منيرة : اي عاد هي ما صدكت جاها المطر وبللها حتى تخلصوا من الشغل ومنهم وبعد ما تهتموا بيهم وتذبهم على گلبونا

ماريا : أستغفروا الله العظيم عود لو إهتميتي بيهم إنتِ هذاك الوكت إعترضي وگومي إحچي

جراح : دخل ومن شافوا نزلوا من حظن صالحة وراحوا يركضون عليه ويصيحون جي بابا .. جي بابا ومنيرة راساً عوجت حلگها فخزرها وشالهم إثنينهم بحظنة هلا بحبايبوا أبوهم الحلوين وبوسهم بلهفة واضحة وهو يشمهم

محمد : بابا إمشي خلي نروح نشتري ونجيبو چبس وكاكو ونجيبوا لعيوشة هم ويانا

جراح : اي ميخالف هسة نروح وعيوشة هم نجيبوا الها الله يساعدهم وگعد بصف أمه وباسها من راسها وگعدهم بحظنة

صالحة : هلا يمة اليوم راد من وكت من شغلك وما طولت

جراح : ما عدنا شي وحسن أخذ الوصولات حتى يسلمهن وأني گلت حارة الدنيا شعندي ظال فرجعت لهنا

منيرة : عجل خلي أگوم أصبلك غدى وكوم غسل وإرتاح وهذولة ذبهم من حظنك هاك شوف شلون دمروها لدشداشتة همه ورهاويلهم وگلگهم

جراح : ولچ خافي الله همه مو چنهم العافية وشوكت چان بيهم گلگ لو رهاويل وهاچ شوفيهم شلونهم نظيفين ويلمعونوا لمع وواحدهم ينكرطون گرط وريحتهم تردوا الروح ورجع يبوس بيهم 

جراح الصغير : بابا أني نظيف اليوم وما وسخت روحي حتى ماما لا تسعلوا مني وتگوم تسيح عليه  وهي مريدة ختية

جراح : صفن على كلامه لا بابا محد يصيحوا عليك أمو شبيها صدوگ مريضة

منيرة : نطت من يمها لا كل شي ما بيها تچذبوا وهاي عيارة نسوان وتتعاجزوا من الشغل وحتى لا تنزل وتشتغلوا وهذا هم چذاب مثل أمو ويحچي بكيفوا

محمد : مسك جراح من ذقنة ودار وجهة عليه لا بابا ماما ما تچذب وجراح هم لأن الچذب حرام وهي والله مريضة هواية

صالحة : يمة أمو مالها خلك مصخنة ومحمومة وعلى هاي نايمتوا بالفراش وما تگدروا تنزل

جراح : وليش ما كلتلي الصبح حتى أخذها أوديها للدكتور گومي ماريا عليها نزليها خلي أوديها هسة

ماريا : ما ترضى تروح وخالة هاشمية جابتلها علاج من الصيدلية إبر شرب وكبسول وشربت منو وشوية هسة فكتها الصخونة عود منا للعصر إذا رجعت صخنت نخبرك حتى توديها

جراح : بحدة أدري شهالعناد هذا مالتها ليش ما ترضى تروحوا للدكتور وإحنة قابل نبقى نمشي على كيفها

صالحة : يمة ميخالف دامها شربتوا للعلاج هسة تصيروا زينة بإذن الله وما بيها شي

ماريا : اي عيوني والله هاي الإبر الشرب زينة بس شربت وحدة منهن راساً فكتها الصخونة

منيرة : والله عيارة كل شي ما بيها بس إنتو دومكم منطينها قدر وقيمة أكثر من حجمها وهاي وشدعواك هيچي إحترگت عليها وإنخطف لونك وبس ما تريدوا تبچي عليها هاي إذا صخونة وهيچي تخبلتوا عليها عجل لو يصيروا بيها سرطان شچان سويت هاا ولو منيرة لو تموتوا  بفراشها محد يگوللها الله بالخير وگامت من يمهم

جراح : صاح وراها يولي إنتِ أبد ما تصيرينوا أدامية  وجلدچ يحكچ وراسچ الخايس هذا يردلوا تكسير وأدوسوا عليه بالقندرة يله ترتاحينوا وراد يگوم وراها يكفخها

صالحة : مسكتة من متنة دخيلك يمة عوفها وخلها تولي ليش هو إحنة كلنا ما نعرفها راعيتوا مشاكل وتشتريهن شروة وتخبطوا مثل السمچة عالكل

جراح : أدري يا أمي بيها وبسوالفها الخايسة بس مو مالت تحچي هيچي عليها وتريد يصيروا بيها سرطان النوب وهي ما ضارتها بشي وكافيتوا خيرها شرها

ماريا : إسم الله عليها ليمينة ولعلمچ يوم منيرة صدوگ تستاهلوا واحد يگوملها ويكسرها لأن لسانها حداد نجار وما عدها حرمة لأي أحد ومحد يسلموا منها

صالحة : ماريا گومي إصعدي شوفيها ليمينة ولا تحطينوا عالنار حطب وإنتَ يمة تهدى ولا تظلوا ورى النسوان وسوالفهن وذيل الچلب يظلوا أعوج وما ينعدلوا للموت ومنيرة مثلوا ولو گمت هسة وكسرتها تكسره زينة هم ما توب ولا تجوزوا من سوالفها وبس تحرگلك بأعصابك ولا تروح النوب تنجلطوا من وراها وعي ما تستاهل فخلوها تولي وچفونة شرها

محمد : بابا خلي نروح نشتري گوم يله وجره من إيده

جراح : گام والله أحسن شي الوحد يطلعوا من البيت وما يظلوا هنا ويشوفوا خلقتها لمنيرة وأخذهم وطلعوا

ماريا : الله يحفظكم كلكم ماما شفتيهم شلون صلاوات كبرانين وحچيهم حلو ويخلون الواحد غصباً ما عليه يحبهم وهاي كلو الفضل يرجعوا لجراح وتربيتوا المعدلة والزينة وأكيد راح يتصرفون مثل الزلم وهمه صغار

صالحة : اي يمة شافيتهم وما شاء الله عليهم صدگ اللي يسمعوا سوالفهم ينطيهم أكبر من عمرهم والحمدلله اللي الله سخرلهم جراح وإهتموا بيهم وصدگ لا گالوا الله ما يگطعوا ويوجه يعني حرمهم من أبوهم وجراح إنحرم من الخلفة وإثنينهم عوضهم بعضهم ....

-------------------

وداد : أسراء والله عيب جايين عالعالم بدون ما ننطيهم خبر فشلة والله

أسراء : أوي شبيچ ترنا أهل إحنة وياهم وماكو داعي للرسميات بيناتنا

وداد : وين أهل يا نعم أهلها لزوجة أخوچ الله يرحمه

أسراء : تراچ والله ما تعرفين شي همه ويانا أصدقاء من زمان وحتى مرتو لجدي تصيروا گرايبها لأمهم أم جراح فديتوا الحب مالي يعني مو غربة ويله إمشي خلينا نفوت أحسن ما نظلوا واگفات هنا صمطتينا بالحر هاچ شوفي حتى زيوني حبيبي شلون صارن خدودوا حمر مثل الدم

وداد : غير من وراچ گتلچ ما نطلع هسة حارة الدنيا خلي شوية الشمس تروح ما رضيتي

أسراء : اي غير حتى أشبعوا گعدة وسوالف خوما أبقى گاعدة بس شوية وكل شي ما أستفادوا ودفعت الباب اللي كان مفتوح ما مسدود وشوية مفتوح وفاتت تعالي يولي إدخلي لا تستحينوا ومن شافت جراح واگف يم سيارتة هو وعمة محمد وأبوه يا يمة .. يايمة دخيلكم گلبي راح يوگف وگامت تهفي على خدودها

وداد : ولچ أسراء فضحتينه هسة الرجال شيگولوا علينة ومو كافي مشيت وراى خبالچ وفتت بدون ما ندگ الجرس مالت الباب

حجي عبدالرحمن : من شافهن جي عليهن يا هلا وچثير الهلا بأسراء وبأم زين شلونچ يابا شلون صحتچ

وداد : من شافت أسراء فاصلة وبالها رايح يم جراح ندستها وهي ردت عليه هلا بيك عمو الحمدلله إنتَ شلونك صحتك وإعذرنا فتنا هيچي چفت بس على مود زيوني مو زين عليه الحر

حجي عبدالرحمن : صدگ چذب يابا إحنة أهل وهذا هم بيتكم ولا تگولينوا أنة غريبة وما عندي أحد هانه هذا بيتچ وإحنة أهلچ وخاف يوم أم وسام تعيلوا عليچ وحجي رشيد ما ياخذلچ حگچ منها بس تعالي عليه وشوفي شأسويلچ بيهم

وداد : تسلم عمو ما تقصر والله

حجي عبد الرحمن : تعالن يابا فوتن تفضلن منا ووداهن دخلهن للإستقبال ورجع شفتوها لهاي البنية هي هاي مرتوا لحجي رشيد وهذا الوليد إبنوا الصغير

جراح : شو أشوفك شايگلك الوضع وبس لا گمت تغاروا من صاحبك وإنتَ هم تريد تخلفوا تالي عمرك وليد صغيروني مثلوا

حجي عبدالرحمن : يول لا تصيرلي أبو زريديم وتوگفلي مثلوا الشوك اللي بالبلعوم تراني هيچي حچيتوا حچي عادي

حجي محمد : الله يستروا عليها مبينة محتشمة وبنت أوادم

حجي عبدالرحمن : اي فوگ ما تتصور وأهلها خوش ناس ولو ما هي بنت أوادم چان ما جرعتها لأم وسام

جراح : ما عدها إخت حتى نزوجك ياها حتى تصيرون عدايل إنتَ وحجي رشيد مو إنتو ما شاء الله عليكم كل شغلكم سوى .. سوى

حجي عبدالرحمن : بضوجة لا ما عدها كلهن متزوجات خواتها وعلى طاري الزواج ليش ما نزوجك إنتَ أفرضوا مني

جراح : شتزوج مني نسيت عندي إثنين شنو طلابة قابل وتريدني أجيبوا وأسفط بهالنسوان

حجي عبدالرحمن : خايب إثنينهن ما براسهن حظ ومشيباتوا گلبك إنتَ دطگهن بالثالثة وشوف شلون يجرنوا  عدل ويصيرن أدميات

حجي محمد : دامك حچيت هالحچي معناتها أكيد لا گيلوا عروس

حجي عبدالرحمن : والله بس إنتَ يا خوية تفهمني اي العروسة موجودة وهسة بس أفكوا حلگي أبوها من الصبح يگلي گبعها وأخذها

جراح : اي مو خبل أني وأرضى بكلامك وناقصني تجيبلي علة ثانية مثل منيرة وتحطها على گلبي

حجي عبدالرحمن : خايب شبلاك إنتَ كل ما ضجت وجبتلي سيرتوا لزواجك من منيرة هسة غلطة وصارت وإنضحك علينة بيها وسبحانوا اللي ما يغلط وبعدين لا هاي العروس اللي أريدوا أخطبها الك بنت أودام وزنگينة وكاملة مكملة

حجي محمد : ومنو هاي بنت الأوادم اللي تريدوا تجيبها وتحطها فوگ بنتي وضرة الها

حجي عبدالرحمن : المره ما تاكلوا مره والرجال المعدل ياخذوا أربعة وبنتك خليني ساكت منها ولا تفتحوا لساني عليها وإحنة محشمينها لخاطرك ولخاطروا ولدها والله لو عد غير ناس چان من زمان چلقوها وأنة من سمعت منيرة هذاك اليوم توطوط وتحچي والله تخبلت عجل هي هاي هم سواية سوايتها تشترط على جراح ما يگربوا منها وزواجهم بس بالإسم وعوفونه منها شرايك بهاي بأسراء بنتو لحجي رشيد والله خوش بنية وحبابة يول طاوعني وإخذها وخليني أخطبها الك ما تخسروا والله العظيم ويدبهن لنسوانك إثنينهن بيها

جراح : بربك يابا هي هاي وحدة خبلة ورعنة ومخفوگة هم مالت زواج شأخذوا منها وشأسوي بيها تريدني أتهريفوا وياها

حجي عبدالرحمن : إنتَ عقلها وعدلوا تصرفاتها على إيدك ومثل ما گتلك ما تخسروا عليها شي لنها جاهزة وباچر عگبة يجيك ورث من وراها شي وشويات وتستفادوا منها مثل ما إستفاديتوا من زواجك من يمينة خو إنتَ متعلم

حجي محمد : ما عجبة الحچي وقبل لا جراح يرد على أبو وتعلگ بيناتهم لا يا خوية هاي ترى كلش ما مقبولة منك ومو جراح اللي يتزوجوا النسوان حتى ياخذوا ورثهن وكلنا ندري بكرار الله يرحموا هو اللي خلى ورثوا وولدوا  ومرتو أمانة عندو ووصاه يتزوجها ويصونها هي وولدوا بعدين يا خوية الله يرضى عليك شكم مرة جاي نگولك جوز من سوالف الخطبة هاي وتوحيدوا الروس بالحلال

جراح : بقهر وهو يگز على سنونة عوفة عمي لا تدوخوا راسك وياه ويكون بعلمك يابا ورث ولد أخوية أني وصي عليه لما يكبرون لا أكثر ولا أقل ولو أعرفوا أموت من الجوع ما أمدوا إيدي عليه وبعدين مو أني اللي أخونوا الأمانة ووصيتوا لأخوية وهاي عود إنتَ أبوية وهيچي تحچي علية عجل ما أعتبوا على الغربة وركب سيارتة وراح

حجي عبدالرحمن : بالله هسة هذا أنة شگتلوا وعفص وزعل وبعدين أنة غير أريدوا مصلحتوا ويعني الى متى يظلوا ما عندو ظنى وولد يشيل إسموا وعلى هاي أريدوا يتزوج وبعدين ما يضروا لو تزوج وحدة ميسورة حال وما تكلفوا بشي وحتى الرسول ( ص ) گال  (تنكح المرأة لأربع لمالها، ولحسبها ولجمالها، ولدينها، فاظفر بذات الدين تربت يداك) وأنة لكيتلوا وحدة بيها كل هالمواصفات هذني بعد شكو معترضوا هو

حجي محمد : عوفو بحالوا ولا تدخلوا بعد بحياتوا ولا تفسروا الدين والشرع وسنة رسول الله ( ص) على كيفك والله گال لا تلقوا بأيديكم الى التهلكة وجراح ما ناقصوا مصايب وبلاوي يكفيه اللي هو بي أنة فايت لبيتي تجي ويايا

حجي عبدالرحمن : لا رايح للبيت لني أريد أدزوا الگهوة  لحجي رشيد اللي وصاني عليها ويا بنتو ومرتو وراح لبيته دخل للمطبخ شافها ليمينة ها يولي شلون صرتي هسة

يمينة : الحمدلله أخذتوا علاج ورفعت راسي عمو تريدوا شي

حجي عبدالرحمن : اي زين يولي الگهوة اللي جابها البارحة حسن ودزوها الية من اليمن وينها ولو إنتِ مريضة ما تدرينوا بروحچ شمدريچ بيها صيحي ماريا خلي تجي وتقسمها وتنطيها لمرتو لحجي رشيد وبنتو ياخذنها وياهن گبل ما يروحن أگول يولي لو جراح تزوجوا عليچ إنتِ ةما عندچ إعتراض مو لنو ما يهمچ وتزوجتيه بس حتى يكون أب لوليداتچ ويربيهم ولن هاي وصيتوا لكرار الله يرحموا هم وأنة لگيتلوا خوش عروس بس هو معاندوا ومنطي رجلي للحايط ولشوكت نعوفوا هيچي على الأقل تخلفلوا ولد يشيل إسموا فلو رجع للبيت إحچي وياه وفهمي ويا ريت تگدرين تقنعينواً يرضى والله يصيبچ أجر وأنة حاچيتچ إنتِ لنچ عاقلة ومو مثل هذيچ الحية أم اللسان الطويل منيرة وأسراء خوش بنية وبلا ما يفوتها جراح من إيدوا

منيرة : دخلت بهالأثناء عاطت شنوووو .. شنوووو وجرت يمينة وخرتها ودفعتها وجتي تخوصرت ووگفت گدامة منو هاي اللي ما تريدوا جراح ما يفوتها من إيدوا هاي أم اللسان الطويل العرمة اللي الله ما يجرعها بنتو لحجي رشيد وأني أگولوا شبيها ويايا بس تسمعني بهالحچي وتخوزروا بيه من أول ما گعدت ثاريها راسمتوا على جراج وطلعت ماخذتوا الأوكي منك

حجي عبدالرحمن : عوذة .. عوذة منچ ومن صوتچ اللي يلعلعوا هذا وچنچ الدلالة وطگي وموتي جراح راح يتزوجوا أسراء بنتو لحجي رشيد وأريدوا من الله من عبدالله إسمعوا بيچ مسويتوا هوسة وتعترضينوا لو متعاركة ويا البنية وهادة على أهلها والله دقيقة وحدة ما تلفينوا بالبيت بعد وعافهن وطلع

منيرة : ولچ الخوينسة سمعتي شگال هذا شايب إبليس والله لو سواها صدوگ لا أگلبوا البيت فوگ راسوا وراس هاي الحية ولا عبالهم من أخذوچ وحطوچ فوگ راسي وسكتت هالمرة هم أسكتلهم

ماريا : خيرچ منيرة على شنو هالصياح هذا يمينة شصاير

يمينة : ماكو شي خوما راحن الخطار إقسمي من الگهوة اللي جابها حسن وإنطيها الهن عمو گال

منيرة : ليش عيني شتريدين يصيروا بعد يجبها عروس ويحطها فوگ روسنا وخو إنتِ ظلي بالعتوا لسانچ وچنچ موافقتوا لعمچ الخرفان بخبالوا وتكفينوا على هجيمة بيتي وطبعاً شيهمچ إنتِ لو صار وجراح گلب عليچ كلش .. كلش عندچ بيت أبوچ تروحين بي والفلوس اللي ورثتيهن ونايمات على گلبچ تعيشين بيهن بس أني وين أولي وين أنطي وجهي

ماريا : يا الله أكلتينه حاصل فاصل ما تفهميني شكو

منيرة : أوي دطيري النوب عليه الفاهية خلي هاي الخوينسة تفهمچ وطلعت تردم من يمهن

يمينة : الله يستروا وما تروح تتعارك وياها لحماتج وتضربها وتفشلنا

ماريا : قصدچ أسراء ليش شمسويتلها لو لأن سمعتها حچي وما سكتت الها وعيبت عليها

يمينة : اي هي من أول ما گعدت ما فكت ياخة منها لمنيرة وگلبتها عالبطانة والنوب سمعتوا لعمو يگول أريد أزوجها لجلمود وهاي تخبلت وإنچلبت وگامت تملخ

ماريا : عزى جراح يتزوجها لأسراء هذا أبوية شبيه وين توالموا هي ووين هو يتحملها ولو الحچي بيناتنا هي من زمان ناصبتوا عليه وعاجبها وهسة لو سمعت بحچي أبوية تنجلط من الفرحة وتطبوا بغيبوبة هاي شنو الصياح عزى سوتها منيرة وتعاركت وياها وطلعن راحن عليهن لگن هاشمية مچلبة بمنيرة اللي تريد تهجم على أسراء وتدفع بيها

أسراء : هاي شجاي تگول منو اللي يريدون يخطبونها يولي وداد هاي جاي تقصدني أني يعني الشيخ جراح المزيون فديتوا أني راح يخطبني مو شو إگرصيني حتى أصدگوا

وداد : ولج لا تفضحينه إثگلي ما بينا حيلچ

أسراء : ولچ شأثگل دگولي گومي هلهلي ودگي وإرگصي

منيرة : فلتت من هاشمية وچيتت عليها كفشتها من شالها وخمشتها من وجهة ومكيفة الساقطة العايقة الگ .. بواگة الزلم وتريدوا تدگوا وترگص وما مصدگة اليوم أنعل أبوچ لابو الخلفوچ لابو هذولة  أهلچ الگوا .. اللي مديحينچ ومخلينچ تچلبينوا بزلمنا

أسراء : ولچ هاي علي من هالحچي هذا وتنعلين أبومن إنتِ وجاي تسبيني أني وتضربيني والله اليوم ولا أخليچ عايشة هاي إنتِ ويامن إندگيتي وهجمت عليها كمزت وركبت فوگها وگامت تكفش بشعرها وتضرب بيها چلاليق وعضتها من كتفها ومن إيدها ومنيرة هم گامت تعيط وتخمش بيها تريد تخلص نفسها من عدها ومن گامن وداد وهاشمية يفازعن بيهن وسحبنها بالگوة لأسراء اللي ملختها لمنيرة بعد ما شالنها من فوگاها صاحت بيهن عوفني خلي أبردوا كلبي بيها وأجززوا هذني عطوبها الصفر اللي صابغتهن جديد ومتباهية بيهن وشچلت ردان عبايتها الكتف وتريد تهجم عليها بس وداد  مرت أبوها چلبت  بيها وبالگوة لزمتها ومنعتها 

صالحة : يولات صلن عالنبي مو هيچي منيرة تچفي الشر وروحي إصعدي بغرفتچ وإنتِ خالة إحسبيها علينة إنتِ ضيفتنا وترانا ما يهونوا علينا تنهانينوا بيتنا

هاشمية : ولچ منيرة إمشي إنگلعي فوگ لغرفتچ لا والله هسة من يسمعوا جراح بيچ يجي يكسرچ

منيرة : أم حسن وخري وحليني عليها ولچ كلبة أدبسزز هيچي أني تخبلت وأخليچ تاخذينوا لجراح وتصيرين ضرتي شنو خلصوا الزلم من الدنيا وبس جراح رجال وياهي اللي تجي وتريد تاخذوا مو كافي جاب هاي الخوينسة وخلها فوگاي النوب إنتِ الحية العايقة ال .. ال .. وگامت تفشر عليها فشار غطي وجهك منه

أسراء : طگي وموتي يا السحلية العجوز إذا ما أخذوا عليچ وأجي أگعدوا هنا على گلبچ والا لأخلي جراح حبيبوا گلبي يخليچ خدامة جوى رجليه فلا أكون أني أسراء

منيرة : والله دسويها الا لا أحرگچ بعدين أني أصيروا خدامة الچ تخسين يا أم الوسخ يا الجربة

وداد : ولچ أسراء كافي عيب فضحتينة مو هيچي يا ربي أني شورطني وجيت وياچ ومن رن موبايلها فتحت الخط عالسريع هلا حجي وينك اي .. اي طلعتلك وسدت الخط وعافت أسراء تردح هي ومنيرة خالة أم جراح إعذرينا وسودة بوجهي عالجية هذي وشالت إبنها وطلعت طايرة

ماريا : أسراء حبيبتي كافي عاد هاي بردتي لگلبچ إطلعي عاد إجى عمو

أسراء : اي رايحة ويجي يوم يالسحلية الشمطاء ونتواجه من جديد وأعلمچ منو أسراء وطلعت ورى وداد وهاشمية هم طلعت وراها

منيرة : اللي گعدت عالدرج مسكت بإيدها ومتنها اللي عضتها منهن أسراء وكانت منفوشة وشعرها عبالك صاعقته الكهرباء وكل شعراية گامزة وطايرة وحدها هلگد ما كفشتها أسراء أويلي يابا أويلي شسوت بية الكلبة بنتو الكلب سگطتني

صالحة : بحدة تستاهلين يولي هاي لو مهما تكون خطار وجاية علينة ضايفتنا شلون من هوى الراس تهجمينوا عليها تضربينها ولسانچ شطولوا يلعلعوا عليها بعدين البنية حتى ما عدها خبر بالسالفة ومن سمعتچ حچيتي تفاجئت وإنصدمت

منيرة : اي إنتن كل شي تذبنوا براسي وما شفتيها شلون اول ما إجتي وهي تسمعني حچي وتستصغرني وكيفت من سمعت وطارت من الفرح معناها هاويتوا لجراح وما صدگت بعد شجاي تحچينوا إنتِ ومو زين  من عندي ما ذبحتها وفوگها تكولوا على جراح حبيبي وگلبي وفديتوا بعد شلون أسكتلها أني

صالحة : يولي والله العظيم سوت هذا كلوا بعنادچ وبعدين جراح مو جراح الاولي وقرارت أبو وخاصة مالت الزواج ما يرضى عليها مثل گبل ولا يطاوعوا بيها والحجي بكيفوا يصيرح وعلى هواه وعبالوا مثل گبل من جبروا ياخذچ هالمرة هم يجبروا وياخذها لهاي بنت حجي رشيد رفيجوا فلا تصيرينوا رعنه وتضيعينوا حگچ بالعرك والفشار والمضارب وتطلعين إنتِ اللي مو خوش أدمية وإخذي الحچي المضبوط مني جراح ما يتزوجها لهاي البنية وتشوفين

منيرة : والله حچيچ غير موثوق ودام رجلچ حجي إبليس حط خشموا بالسالفة الا لا يسويها وإذا مو هاي يزوجوا من غيرها بس والله ولا أسكتلوا وأهجم البيت هذا على روسكم وعافتهن وصعدت لغرفتها 

صالحة : ما أگولوا غير الله يهديچ ويهديه لأبو جراح اللي شعلها وراح مدري وين يولي هاي عليمن جاي تضحكينوا إنتِ هي مالت ضحك

ماريا : طگتها لضحتها اللي چانت حاصرتها هههههههههههههه .. ههههههههههههههه يا الله ماما ههههههههه منظرهن يخربوا من الضحك خاصةً من طفرت فوگاها لمنيرة ومثل المچلوبة گامت تكفشوا بيها وتعضوا وملختها تملخ وبعدين منيرة تستاهل والله بردتوا لگلبي بيها ههههههههههههه

صالحة : يولي لا تتشميتينوا بيها مو زين الشماتة مو حلوة بس والله هاي حماتچ مو قاصرة وهم طلعت عراكة گشرة وخوش تهد

ماريا : اي طبعاً فرخ البط عوام منو أمها وهاي تربية حمدية عجل شلون تريدينها تطلعوا

صالحة : تعالي بنيتي وگليلي شلون صرتي التهينة بالخاطر والهوسة وما سألتچ خوما بعدچ مصخنة

يمينة : لا ماما الحمدلله بس راسي شوية يوجعني والنوب من ورى صايحهن وهوستهن گام والله يوجعني بالزايد وگعدت بصفها

صالحة : شجاچ البارحة چنتي مثل الوردة المفتحة ومن شافت أثر الزراك برگبتها لأن چان شالها ما لا فتة بس هيچي حاطة فوگ راسها لا يكون جراح سوالچ شي وأذاچ

يمينة : بحدة لا ماما ما سوالي شي وشعلية بي أني

صالحة : گولي الصدك ولا تچذبين تگرب منچ

ماريا : من يمينة ناظرت بيها وخزرتها والله العظيم ما علية وكلمة وحدة ما حاچية الها أني

يمينة : عيونها دمعن لا ما تقرب مني أني اللي تقربت منو بس ماما والله ما أگدر أتقبلوا وگامت تبچي وعافتهن وصعدت لغرفتها

صالحة : أستغفروا الله العظيم يولي ماريا يعني ما صار شي بيناتهم مو

ماريا : لو چان صاير چان هسة يمينة بغيبوبة وبالإنعاش ذابينها مو بس صخنت وصابتها حمى ولو تشوفينها البارحة حال الضيم حالها وعبالك مرتكبتوا ذنب عظيم وهاي يمكن بس بايسها جراح عجل لو ينام وياها شيصيروا بحالها

صالحة : لا حولة ولا قوة الا بالله العلي العظيم الوليدات وينهم شو ما الهم حس مو چانوا يلعبون همة وإبنوا الحجي شو إختفوا

ماريا : شفت عائشة  من صارت الهوسة أخذتهم وفلتت لبيت عمي راحت مو تدرينوا بيها ما تحبوا الهوسة والعياط والصوت العالي

صالحة : زين تسوي چان شخلصنة منهم چلبوا بالسالفة وفضحونه ياهو اللي يجي يگولولوا

ماريا : وعبالچ أسراء راح تعديها وتراها هذا كلو ما بردوا لگلبها وهسة بس توصل لبيتهم تكول لأمها وشيخلصنه من عدها هذيچ بعد أضرب من بنتها وفلا تنجرع وإذا أسراء تحط وجل هذيچ تحطوا مية

صالحة : وهذا كلوا منو سببو كلو من ورى أبوچ وسوالفوا ما يبطلهن أبد وهاي النتيجية دتعالي گوميني لغرفتي أتوضى وحتى أصلي المغرب ما ظل شي ويأذن ...

--------------------

يوسف : عمو عمر منو هذي المرية وليش كلو تظل تگولي لا تاكل هيچي ولا تتحركوا هيچي

عمر : اللي كان تعبان وما نايم صارلة يومين لان خفر وعدهم إنذار بعدين راح طلع يوسف من المستشفى تنهد وهو يحط راسة بصفة عالمخدة وينام وياه حبيبي هذي خالة إعتدال ممرضة وراح تهتموا بيك حتى تصيروا زين وتگوم تمشي على رجليك وتلعبوا وتركض مثل قبل

يوسف : زين شوكت أگوم أمشي عمو الدكتور گالي إحسب هلگد وتگوم تمشي وأشر على أصابيعة

عمر : اي إن شاء الله من تخلصوا هالمدة هذي تگوم تمشي

يوسف : عمو بيبي ليش گامت تصيحوا عليك من رجعت إنتَ من دوامك

عمر : حبيبي نام ما عليك بسوالفها لبيبيتك ولا تفكروا بيها

يوسف : عمو أني ما أحبهن لبيبي وخالة هناء لأن يضربني وقبل چنت أگدر أركض وأنهزموا منهن فما يگدرن يلزمني بس هسة بعد ما أگدر أركض وأنهزموا منهن عمو حبيبي لا تخليهن يجن لبيتنا بعد وإقفلوا للباب حتى ما يگدرن يفوتن

عمر : لا تخافوا منهن وشحدوا اللي يمد إيدوا عليك وبعدين خالة إعتدال موجودة وهي راح تمنعهن وأني وصيتها عليك ونبهتها ما تسمح لا لبيبيتك ولا لخالتك يضربنك يلة وليدي نام عاد وغفى هو وياه

أروى : فتحت الباب على كيفها ومدت راسها وعبدالله وراها همستلة شوف عمو خطية شلون غافي ونايم هلكد ما تعبان

عبدالله : عوفي نايم لا تگعدينوا

أروى : لازم نگعدوا شيخلصنة منها والله هسة تضربنا

عبدالله : ما تگدر لأن عمو ما يسمحلها وحتى بابا هم وبس نگولوا عليها يطردها وبعد ما يخليها تفوت لبيتنا

أروى : ميخالف خلي نگعدوا وهو يتفاهموا وياها إحنة ماعلينه وتقربت على عمر عمو .. عمو وهزتة من كتفة على كيفها

عمر : فز ها عمو خير ومن شاف عبدالله واگف وراها أبوكم ما رجع

أروى : لا بعدو ما راجع گال يتأخر رايح هو ويا عمو صادق مدري وين

عمر : وين يولون تلگينهم محمضين بالكوفي وگام شكو ما گلتولي شتريدون

عبدالله : هاي خالة هناء گاعدة برى وتريدك وأني گتلها لأروى لا تگعدينوا لعمو لأن تعبان بس هي تخاف منها تضربنا وإجتي وگعدتك

عمر : أستغفروا الله العظيم هاي شجابها بهالليل هسة وجاية بوحدها لو بيبيتكم هم رجعت وجتي وياها

أروى : لا عمو إجتي بوحدها وگاعدة بالصالة وتنتظرك

عمر : روحوا نامو ولا تطلعون بعد ولا يروح يوسف يگعد خلي نايم خطية وطلعهم وراح على هناء وبحدة ومن بين سنونة صاح بيها هناء خيرچ شجابچ بهالليل وشلون تطلعينوا وحدچ وتجين لهنا

هناء : گمزت عليه وركعت بالگاع ومسكت بإيدة وگامت تبچي عمر .. عمر دخيلك خلصني والله محد يخلصني غيرك والله العظيم أصيروا خدامة جوى رجليك بس خلصني ولا تبيعني وتتخلى عني ..

-------------------

*إنتظرونا البارت القادم *