شلونكم چيچاتي المحتحتات مشتاقين ♥️
شسمة هالفترة اكو فد سالفة تفتر براسي مثل الذبانة
بس قبل لا احجي حابة اخبركم باني واخيرا خلصت قصتي الجميلة المحتحتة مال سأنتقم .. 🐸
فاللي جان متانيها يخلص ويقراها روح اقراها حبيبي شمتاني ؟؟
شسمة السالفة هية انو احنة دايماً نتفاخر بروحنة واحنة بلد الحضارات اكثر من 7000 سنة من الحضارة ومدري شنو
بس شو مجاي اشوفهة وينهة هالحضارة وين بلد اول حرف وصار افشل بلد بالنسبة للتعليم وعدد الناس الأميين يزداد
وين بلد الجنائن المعلقة وأسد بابل وهسة تبليط مال شارع ميدبرونه وعود رادو يسوون تمثال أسد النجف وصرفوا عليه مدري جم مليون وتاليهة هيج مسلوع
وين بلد القيثارة والوتر السابع مدري السادس وهوة عزفة مال كمان بملعب خماسي بكربلة سووه انتهاك قدسية
وين بلد مسلة حمورابي واول قانون تشريعي بالأرض وهسة اصغر طفل ما يحترم القانون وصايرة كلمن لهُ لا شايب ولا مرة ولا رجال ديحترمون القانون ولا هيبة الدولة
مدتشوفون دول العالم اللي تاريخها ما يتجاوز الميتين سنة من مثل اميركا ودول الخليج شلون مزدهرة ومتطورة والكويت هاي اللي كلهة تحشش عليهة وصدام دش الديرة مدري شنو من هالخريط شوفوها هياتها عملتهة تعتبر اكبر عملة بالعالم هاي الدولة اللي مساحتها بكد البصرة احسن من عدنا بالأعمار والأقتصاد والحكومة مالتهة منطية حقوق للمواطنين
لو مثلاً الأمارات وقطر والبحرين اللي قبل كم مية سنة جانت مجرد صحراء قاحلة شوفوا هسة التطور العدهم طبعا ما احسدهم ولا شي اصلا ربي يزيد عليهم النعمة بس شوفوا اللي عدهم وشوفوا اللي عدنا
لا عدهم نفط كد اللي عدنا
لا زراعة مثل اللي عدنا
لا موارد طبيعية وتغير مناخي واقليمي
بس شوفوها شلون صارت ايقونة عالمية والاف الناس تجيلهة وتسكن بيهة من مختلف البلدان
فهنا السؤال اللي يطرح نفسه
هل هذا التاريخ والحضارة اللي الله انطانياها هية نعمة لو نقمة ؟؟
تركولي اجوبتكم وآرائكم هنا لان كلش تهمني 🦦♥️
ءختكم ءلمفكرة #فطفوطة