مدحت_وسمر الجزء الحادي عشر
مدحت: لازم نعوض الفترة المظلمه دي بقي ونخرج ونتفسح وننزل الميه
حمادة: عندك افكار جديده يا مودي
مدحت: بفكر ناخد مركب ونطلع رحلة انا وسمر وميبقاش فيه غيرها هي والقمر والنجوم
حمادة: قمر ونجوم انت هتطلع بالليل متاخر كده
مودي: لا هطلع في الصباح الباكر بس بسمعهم يقولوا كده
حماده: سيبك لازم اجي معاك هتسوق المركب لوحدك ازاي افرض البنزين خلص منك
مودي: صح مين اللي هينزل يزق
حماده : شفت يبقي لازم اطلع معاك
مودي : خلاص بس بشرط ملكش دعوه بسمر
حمادة: انت خايف مني علشان هي عينها عليا وده واضح جدا
مودي: لا طبعا دي معجبه بيا انا شفت يوم الخناقه كانت مبهوره بيا ازاي وانا بتضرب
حماده : صح فرحت لما سبتلهم المايوة
مودي : شفت خلاص انا هقولها يلا بينا
....... سمر يا سمر
سمر: كفاره يا برنس سمعت ان اتعمل عليكم حفله بس عجبتني انك اتمسكت بالشراب بتاعك ياض يا مودي
مودي: كان لازم تشوفي موقفي البطولي ده مكنش ممكن استسلم ابدا
سمر: لا ما انا عرفت ابويا حكالي وبالذات حضره الظابط باين على قفاه اول مره اشوف ظابط رايح يقدم بلاغ يتحبس انتم بصراحه ابهرتوني كميه بهارات محطتهاش علي اكل قبل كده
مودي: بقولك يا سمر احنا هناخد مركب. انا وحماده ايه رايك تيجي معانا
سمر : بس كده اووي اووي يلا بينا يا رجاله مع اني اشك في الكلمه دي بس معاكم
حماده : خلاص نص ساعه ونجهز
سمر: مش محتاجه زي ما احنا كده لسنا هنجهز
مودي : محتاجه اجيب العوامه البطه بتاعتي ومايوه جديد
سمر : طب يلا بسرعه احسن اغير رايي
مودي : لا نص ساعه يعني اقل من عشر دقايق ونكون عندك
سمر: نص ساعه اقل من عشر دقايق!!!
على العموم يا مودي زي ما تحسبها يلا بقي
حمادة : استنينا هنا
سمر : انا هقعد على الرمله اهو موريش غيركم النهارده
نوفي: بت يا سمر ايه اللي مقعدك كده
سمر: هااا لا ابدا بتفرج علي البحر انت ايه اللي جابك
نوفي : نعم
سمر : اقصد يعني صاحي بدري ليه
نوفي : اصل باكينام عاوزه تنزل الميه هي وعيلتها قلت ميصحش اسيبهم لوحدهم
سمر: لا واجب بردوا
نوفي: مشوفتيش الواد مدحت وحماده
سمر: اهاا طلعوا يجهزوا هياخدوا مركب وهروح اتفسح معاهم
نوفي : بجد طب حلو نفسي اركب مركب من زمان
سمر: بقولك ايه الرحله دي بتاعتي ملكش فيها خليك مع الست باكينام بتاعنك
نوفي: وفيها ايه لما اجي معاكي
سمر: لا يا عم
نوفي: مش مرتاحلك على فكره
سمر: كل الحكايه شباب مع بعض هيبقي منظرك وحش
نوفي: هبلعها بمزاجي بس اوعي يكون اللي في دماغي
سمر: لا كفايه انا عاوزه انبسط يومين بقي
نوفي: ايه كده طمنتيني اها باكينام جت وعيلتها كلها
سمر: بجد عاوزه اسلم علي طنط رشا ام حماده .... يا ام حماده ام حماده
رشا: ايه ام حمادة اللي بتقوليها دي بيئه اووي اووي
سمر : خلاص متزعليش سمعت انك كنتي خارجه مع واحد صحبك الموضوع ده صح وعمو هاني كان فرحان اوووي
رشا : اهاا تقصدي هيثم صحبي قضينا يوم محصلش بصراحة
سمر: والخروف متأثرش
رشا: مش فاهمه وايه الخروف ده انتي جعانه يا سمر
سمر: لا اقصد يعني اونكل هاني مش بيغير عليكي
رشا: لا خالص انا كمان بسيبه يخرج مع صحباته
سمر: اها انتم اخدين توكيل قرون بقي
نوفي: بس بقي يا سمر ربنا ينتقم منك
سمر: يا خوفي باكينام تقولك خارجه مع صحبي وتبقي انت ......
نوفي : بت احترمي نفسك انتي عارفه ان ابوكي شخصيه قوية وغير الناس دي كلها
سمر: والله من ساعه ما لبست الهوت شورت ده وعليه التي شيرت البينك القصير اللي مبين نص كرشك ده بقيت اشك فيك
مودي : يلا يا سمر احنا جهزنا
باكينام : رايحين فين يا مودي
مودي: هناخد مركب ونتمشي شويه في البحر
حماده: انا جبت كتفات بلاستك وزمزميه مايه
مودي : بس محتاجين مرطب بشره وصن بلوك علشان الشمس
سمر : بقولكم ايه اخلصوا لحسن اغير رايي
مودي: لا يا سمر مش مهم انا استحمل اشاعه الشمس الحارقه دي عشانك حتى لو جالي تشقق في الاحبال الصوتيه
سمر : انت بتقول ايه
حماده : وانا يا سمر مستعد اقعد من غير نضاره عشان خاطرك
سمر : ايه التضحيات دي كلها يلا بينا
باكينام : خلي بالك يا مودي متلعبش في زراير المركب
مودي: متخفيش بعرف اسوق هي اوتوماتك
سمر: انا مني لله اني جيت معاكم
مودي: انا اللي هسوق
حماده : لا محدش هيسوق غيري
مودي: انت عاوز تاخد كل حاجه لوحدك لا انا اللي هسوق
سمر : اقسم بالله انتم سايقين الهبل دي مركب بمجداف كل واحد فيكم يمسك واحد ويقدف بيه ال تسوق ال هو ميكروباص
مودي: خلاص موافق
حماده : وانا كمان موافق
سمر : عاوزين نجيب اخر البحر ده
مودي: ايوه انا موافق
حماده : اها بس دراعي وجعني
سمر : يا حبيبي معلش
مودي : وانا كمان تعبت العضله الخلفيه وجعاني
سمر: هي العضله الخلفيه في دراعك علي العموم هانت خلاص وترتاحوا شويه
مودي : احنا بعدنا اووي الشط معدش باين
حماده: انا خايف نكون توهنا وروحنا بلد تانيه
سمر : ياااارب والنبي يا هما يرجعوا يارجع انا
مودي: سمر انا عاوز اعرفلك بحبي ليكي
حماده: اسكت يا مودي بصراحة انا معجب بيكي يا سمر وبحبك اووي
سمر :طيب انا هختار بينكم بس هعمل مسابقه هرمي الخاتم بتاعي في البحر واللي هيجيبوا انا هوافق بيه موافقين
مودي: انا موافق مع ان الميه سقعه
حماده: وانا كمان موافق
سمر : واحد اتنين تلاته
مودي : انا هنط
حماده : وانا وراك
سمر : وانا بقي هرجع الشط وارجعوا انتوا بقي عوم
مودي: استني يا سمر خديني معاكي
حمادة : سمر احنا كده هنبات في الميه
سمر: يلا باااااااي مستنياكم هااا متتاخروش
نوفي: بت يا سمر فين حماده ومودي
سمر : هااا اه دول بيصتادوا وجايين علي طول
نوفي: يصتادوا ايه دول شبه الطعم زمان السمك اكلهم