هنة ذني
عيونك الكل مره احلف
جرحي بيهن
ليش هاي المرة مايقبل يطيب
حتى اصابيعك نفسهن
ليش احس چفك غريب.
باسل
فزيت علئ وجع راسي موتني اخ يامحمد شبية فتحت عيوني وبديت استوعب شوية شوية واذكر ضغطت علئ
راسي بوجع وكلت شلون تشرب باسل شلون شوداك لهذاك الطريق استغفرالله ياربي كمت اطوطح بمشيتي
بعدني دايخ دخلت للحمام فتحت الدوش ودخلت جواه صحصحت ورة مدري شكد سحبت المنشفة
وطلعت من الحمام فتحت الكنتور وطلعت شورت وكيمونة لبستهم ومشطت شعري ونزلت صحت يمة
حبوب وجع رأس رأسي موتني ماجاوبتني يامحمد نزلت الدرج اباوع ابوي كاعد علئ القنفة ومخلي رجل
علئ رجل وساحب جكارة ويباوع علية بتك عين وبعصبية عدلت وكفتي وبلعت ريكي وتقدمت كتلة
صباح الخير بوية مارد علي بس اشر بمعنئ اكعد كدامي كعدت القنفة مسحت كصتي وكتلة هاا بوية
شبيك خلة الجكارة بالنفاضة وكال بعصبية هسة مال اكوم اكسر راسك وهيج دك وين المكان الي يوجعك
واخذك اشمرك بالتوقيف وهم غليلي مايشفة ! بس عيب اكول كبير دخل بـ30 زحمة امد ايدي المفروض
انتَ تعرف الصح من الغلط بس وين اخ الة تتعبني ولك شكلت لنفسك من اجيتني شارب بنص الليل ! من
شوكت انتَ تشرب ؟! ويباوع علية بعتب ويستغفرالله كتلة تدري بية مااشرب ! وتدري بية ماعندي هيج
سوالف ولا رايح لهيج اماكن بس البارحة مادري شجاني ورحت ماحسيت علئ نفسي كال بهدوء ادري
بيك بوية ادري ماعندك هيج سوالف وهم عوزها عندك ،انتَ الرزن الفاهم العاقل موتروح تسوي هيج
شتكل لربك بعد كم يوم ?! مخنوك ورحت شربت لو شنو بوية اني اعرف الي يتعب والحزين والي يحس
روحه مخنوك يروح يصلي يقرا قرآن ! مو يـروح يشرب هزيت راسي وكتلة بحدة هاهية بوية ماتنعاد
بعد غلطة وصارت كال بتحذير ومااريدها تنعاد صدك المرة الجاية يحرم علية الكلام وياك ياباسل اذا تنعاد !
كمت بست راسة وكلت السموحة بوية هز راسة بتعب رجعت كتلة لعد وين امي ؟ كال اي حقك شيذكرك وين
امك امك عد بيت جدك اليوم تجي ،وبعدين تعال شمسوي لريحانة ! تذكرت الصار بلعت ريكي وكتلة
كلشي مامسوي ليش ؟ كال ضاربها ! صفنت بوجهة كال من شوكت احنا نضرب مرة باسل من شوكت ؟
موحرام تاذيها؟ لوهذا كله جاي تسوي لين كتلك اخطبها تريد تسويها وياي سالفة عناد مو !كتلة بسرعة لا
وكلام الله لا عناد ولا هاي بس هيج سالفة بيناتنا وانحلت لا تشيل هم كال وهوة يورث الجكارة الثانية
اي هيج سالفة اذا تكررت مرة ثانية اني ارجعها لابوها بيدي واخرب كلشي خليها ببالك يعني التصرفات
المتهورة ماحبها هزيت راسي ماحجيت متعود ابوي دائما ردودي وياه مختصرة من الصغر معلمني ماارد
بوجه كبير والاحترام واجب وهوة تعب علية وسوة كلشي تردوني اصيح عليه ?! مع العلم اغلب الي
بالشغل وياي لسانهم فالت مايحترمون لاكبير ولاصغير ومايخلون قيمة لاحد ! بس مو كل الضباط هيج !
يعني اشوف اغلب الناس عبالهم السلك العسكري كلهم موزينين ومادري شنو وهذا الشي غلط ممكن اكون
انسان فكاهي او عصبي بس بالحالتين مااتجاوز حدودي لين كل شي واله حد مثل مااني مااحب احد
يجاوز علي ميصير اجاوز علئ الناس هذا المفهوم رابي وياي من الصغر لين كلما الواحد يكبر كلما تزيد
المسؤلية وكلما زاد الوعي فدائماً تصرفاتي تكون رزنة مناسبة لين محد يحب يطلع عليه عيب ! وكل
التصرفات والافعال الها دخل بسمعة الشخص فالوعي مطلوب بكل وقت وكلشي يتعوض الا السمعة اذا
راحت بعد ماترجع ! فزيت علئ صوت ابوية وهوة يكول نسيت ماصورتك وعلي فد تضحك استغفرالله
يالله بس سز اجيت تضربني راشدي تريد تشوف ضربتك قوية لو لا ضحكت وكتلة بصدمة اني اضربك !
لابوية مستحيل هز راسة وكال ادري بيك ماتسويها ولا راح تسويها بيوم وجنت موبوعيك انتَ باسل تربات
ايدي ! وحيدي كل الصفات الحلوة بيك ضحكت بصوت عالي كال باع تدري بروحك عار وصفاتك مدري
شلونها من عبنك ضحكت هزيت راسي بضحك وابوي يضحك ويهز بايدة كتلة هستوك جنت عصبي
وماتتحاجة سبحانه مغير الاحوال اي هيج اضحك وضحكنا وياك كال شماقسيت عليك كلبي ماينطيني
بس صدك كل شي اكوله لمصلحتك وراح يجي يوم وتتذكر كلامي وسكت وكال وهوة يسحب نفس من
الجكارة يالعاشك ابتسمت وكلت ياعاشك وين العشك بوية ؟ نفث دخان الجكاير وكال باع هذا انتَ تنكر
وماتعترف ولاتتغير ابد كتلة واني امسح كصتي شنو عدنا اكل لو اروح للمطعم ?! كال اي غير الموضوع
غيره اني متريك بالدوام شوف الثلاجم بيها خير من الله واكل لو متعود امك تطبخلك وتدللك ابتسمت
وكتلة باع حتئ تحجيها بغيرة تغار لين امي تحبني يالعاشك شمر النفاضة وكال تكوم لابارك الله بيك كوم
ضحكت وكمت كتلة اي غير الموضوع غيرة ضحك وكال الله يهديك روح بوية روح دخلت للمطبخ فتحت
الثلاجة اخذت تفاحة غسلتها وطلعت من المطبخ صعدت للغرفة اووو اليوم ماوصلتها شلون ماكعدت !
استغفرالله ياربي اجيت ادك عليها بس مادكيت كلت خاف بعدها مقهورة ومااريد ازيدها عليها اعوفها ترتاح شوية ويصير خير .
ريحانة
اي وردة جاوبيني ليش تبقين ساكتة ؟ كالت شنو ريحانة تتهميني ! متثقين بية يعني لهل درجة متوقعة
انو اني يمكن اسوي هيج مع الاسف عليج يعني ! كتلها بسرعة لا لا شسالفة وردة مستحيل اشك بيج
تدرين بية بس هذني الصور اني بس الج راسلتهم فاستغربت ؟ كالت اي واني شعلية شوفي روحج خاف
راسلتهم لغيري كتلها بصدمة شبيج وردة شتحجين شنو هذا الكلام ! كالت اقصد خاف يعني راسلتهم لغير
صديقة كتلها تدرين بية ماعندي غيرج بعد علئ شنو هذا الكلام ؟ سكتت نوب رجعت كالت اكلج شنو رايج
اجيج ونغير جو شوية وتطلعين من جو الكآبة كبل كتلها اييي تعاليلي هلا بيج كالت تمام خلي اكل لبابا
واجيج سدت الخط مسحت وجهي متوترة مااصدك مااصدك لا تنخدعين ريحانة اختبريها وشوفي لا دائماً
تصدكين وتعوفين كل شي علئ حالة وترحين بستين داهية ! شغلي عقلج هالمرة وشوفي شنو تسوين
صفنت بس شنو غاية وردة مثلا اذا طلعت هية ?! رجف جسمي وكلت بعد مااكدر اتحمل صدمات
انخذلت بما بيه الكفاية اتمنئ وردة ماتطلع من هذا النوع وخادعتني ! خطرت ببالي فكرة اسويها شوية
ودزت رسالة بابا راح يجيبني نص ساعة واني يمج دزيت الها رسالة هلا بيج كمت كلت لماما راح تجيني
صديقتي كالت هلا بيها يمة شنو تردن اسوي كتلها لا تعبين نفسج راح اروح للمعجنات الي يمنا هاية الي
براس الشارع اجيب واجي كالت يمة وين طالعة خلي اني اروح كتلها لا ماما اخذ علاوي وياي كالت وهية
تكوم لا ماتطلعين بحدج امشي اني وياج كتلها خوش ماما رايحة البس عباتي كالت وهية تكوم استاذني من
باسل موتنسين ميصير تطلعين بدون ميدري بلعت ريكي وكتلها ان شاء الله صعدت لغرفتي شنو والله ولا
اتصل بيه اطلع وهوة شعليه بية والله يالله لبست عباية علئ الكتف وشيلة وخليت حمرة وتنت لخدودي
سارة جانت تكرس حب كالت طالعة حلوة السز ضحكت كتلها عابتلج كالت بتوسل فدوة ريحانة
موتنسين جيبي الي كنافة داتنسئ عليها نجبي لا اصيح ماما بطلي هالسوالف تتنسئ هية ام كرش
وبعدين تعالي بوسي ايدي واجيبلج ومديت ايدي كالت وهية تغمز دروحي واني عود اكل لباسل ريحانة
تطلبني بوسة مايصير انتَ توفيها شلت المخدة وضربتها وكلت ماتستحين والله طلعت من الغرفة
وهية تصيح موتنسين الكنافة كتلهة صار صار نزلت شفت ماما لابسة عبايتها الخليجية ولافة الشيلة
وبيدها الجنطة صاحت علئ علاوي يروح ويانة حسين ومحمد موهنا وهية خابرت بابا وكلها اي عادي روحوا
طلعنا نمشي وماما لازمة علاوي من ايده ونمشي وهوة كالساعة يكلها احبج يوم وهية تكلي يروح امك انتَ
نمشي وصلنا لمحل المعجنات اخذت قطع كيك وبقلاوة وكنافة وزنود الست وهالسوالف دفعت ماما
الحساب وطلعنا شايلين العلاليك وحسين شاف محل العاب كال لماما خلي ندخل اريد اشتري كلتلة ماما
نجي غير مرة ازدحام كلها لا يعني لا اريد هسة كلتلة امشي يمة امشي دخلنا للمحل ساعة يباوع ويختار اخر
شي شاف سفينة كلش حلوة حجمها متوسط وبيها جروخ من جوة يعني يكدر يمشيها بريمون كلها اريد
هاية كلتلة يلة اخذها وبعد شنو تريد كلها بس هاية اخذتها دفعنا الحساب وطلعنا وهوة فرحان بالسفينة
يمة غرفته راح تطك من ورة الالعاب وصلنا للبيت يمة هلكنا وماما تعبت من المشي سودة علية رتبت
الحلويات ولكيت مريومة محضرة الاستقبال ورتبنا الحلاوة وسارة مسوية عصير برتقال طبيعي اول
مشافتني كالت ها جبتيني العفوا جبتي الكنافة كتلها اي جبتلج عيني فديتني كريمة كالت وهية تاكل نجبي
بفلوس ابوي ضحكت ورجعت ارتب بالحلويات خليناهن بالصالة وصعدت بدلت واشعارات تجي
لمبايلي فتحته شفته كاتب شلون تطلعين بدون ماتكليلي اني الج ! بلعت ريكي وكلت عزا العزاني
شمدريه وبعدين شنو مخايفة هههه صحت سارة كتلها سارة منو لاعب بمبايلي كالت وهية تاكل كنافة محد
بس دك عليج باسل وكلت عيب اعوفه يدك وبما انو هوة نسيبنا دزيت اله رسالة ريحانة راحت لمحل
المعجنات شهكت وكتلها عزا العزاج ولج مايدري رايحة شكو تصخمين من يمج ! هزت ايدها وكال خاب
دروحي اني شعلية كلشي يطيح تذبوها براسي لازم تشكريني لين كتلة اصلا كتلهة دمشي دمشي اشكرها
هية ام راس عصبت كتبتلة ميحتاج استأذن منك استأذنت من بابا وسديت التليفون وشيسوي
يسوي علمود العب بيه طوبة والله ومااسكت واطلع لساني عليه بس كون اخخخ مااضعف كدامه ويطير كل
الكلام نزلت علئ صياح مريم وهية تكول اجت صديقتج نزلت ركض وطلعنا بالكراج استقبلنها اني
وماما والبنات دخلنا للاستقبال وهية خجلانة كعدنا وسارة قدمت المي واباوع عليهة شلون هادئة ولا
عرفتها كعدنا نسولف والبنات ويانة رادن يطلعن بس وردة كالت لا عادي ابقوا نتعرف واندمجنا بالسوالف .
طالب
رجعت من الدوام معصب وطالعة روحي من ورة الشغل كاليومية طالعتلي سالفة وصلت للبيت دخلت للمطبخ
شربت كلاس مي ودخلت جوري للمطبخ وشافتني كالت بفرح اجيت طالب ابتسمت بتعب وكتلها اي
ياروحي تقدمت باستني وكالت اوي سودة علية تعبان كتلها بيضة عليج يبعد حيلي باوعت لباب الاستقبال
مسدود كتلها منو عدنا ؟ كالت مو اجت صديقة ريحانة كتلها هاا هلا بيها نسيت عود كتيلي كالت اصب
الك غدا ?! كتلها لا متغدي بالدوام بس تسوين اذا تسويلي كلاس جاي لو تعبانة؟ كالت لا شسالفة روح
غسل وبدل ويجيك اطيب جاي ابتسمت الها ورحت للغرفة اخذت ملابس ودخلت سبحت وطلعت مشطت
ورشيت عط ر وتمددت دخلت هية شايلة كوب الجاي وحلويات ابتسمت كمت كعدت بالكاع خلت كدامي
الجاي والحلويات واشرب جاي واسولف الها علئ المشاكل والجرائم الي تصير بالشغل واحجي بعصبية
ومنفعل وهية كاعدة كبالي كالت بهدوء فديت العصبي اني مسحت كصتي وكتلها يروح العصبي انتِ ،يكلب
طالب انتِ ،يعيون طالب انتِ كعدت يمي وباستني بجتفي وكالت يحيلي انتَ ابتسمت وحاوطتها بادية
ومديت ايدي وكلتها بقلاوة كتلها بحب اني اول مرة اشوف واحد بقلاوة ياكل بقلاوة اويلي يابة ضحكت
بخجل واني هيج كلبي يفرفح علئ ضحكتها مادري شلون تجمع الكلام وهمست الها لا اردياً شفتيني شكد
فرحان من انتِ يمي؟شفتي شلون جانت حياتي بدونج وشلون هسة صارت وانتِ بيها ! اني بوية احبج
حيل احبج ومرات هوة الحب چتالك همست يم اذنها اني الجنت بكل صلاة ادعي واكول اعوذ بالله من فراق
يحول بيني وبينها شلون افترقنا هلكد؟! غليلي وحركتي وشوكي وكلشي يوجعني بهل دنيا بشوفتج
ينمحي كل شي يوجعني ! همست بهدوء وعيونها مدمعة وتباوع بعيوني بس انتَ كلت تنساني كتلي اذا
طلعتي من هذا الباب حب الج ينمحي ! بلع ريكه وكال اعذريني اليحب حيل كلشي يكول لمن يحترك دمه
كلت هيج وهية بجت وضميتها لحضني حيل وكلت اويلي يابة عليمن هالدموع يابة بعدج بالكلب رغم
الخلافات هوة هالكلب كلة مسجل باسم جوري وينبض باسم جوري ! رفعت راسها وتباوع بعيوني كالت بهدوء
تدري بية جنت اكدر استمر وياك رغم كل شي احارب الكل علمودك بس تدري بأخوي اول ماسمع ضـربتني
اجة اخذني ومن شاف حالتي منع بعد علية الرجعة الك وهذا حكم القوي علئ الضعيف ولا اني لو جنت
اكدر للموت مااعوفك لو مدري شتسوي ! ادري بيك جنت موبوعيك وبلعت ريكها وكالت السحر مسيطر
عليك لين اعرفك انتَ طالب ومستحيل تسوي هيج اباوع عليها شلون تحجي ونار وتسعر بداخلي وغليلي
مااضن يجي يوم ويطفئ وهاية الـ6 سنين راح تبقئ حسرة بكلبي لحد مااموت بستها براسها وكلت هاهية
نسد الموضوع بعد ماينفتح ونحمد الله ونشكره علئ كل حال وهسة نجمعنا وكاعدة بحضني جابعد شنو
تردين ؟ ابتسمت بخجل لزمت بطنها بحنين وكتلها شلونه شلون الحلو مدري الحلوة الي هنا ابتسمت وكال
زينين كتلهة واني اباوعله بتك عين شربتي دوة لو لا كالت اي والله شربت تقربت بستها بخدها وكلت وهاية
مكافاة لين شربتي الدوة بعد كلما تشربين ابوسج ضحكت بصوت عالي وكالت كايمة اشرب بعد ضحكت
حيل وكلت موتدللين متوفر 24 ساعة ضلينا تضحك واحاول اغير من نفسيتها واضحكها وكالساعة اباوع
بوجها يوم عن يوم تحلئ اكثر انفتح بابا الغرفة عدلت كعدتي دخل علاوي يلعب بسفينة كال بفرح بابا شوف
ماما شنو جابتلي ابتسمت وكتلة بالعافية بعد ابوك ويحرك بيها بالريمون جوري كالت كايمة اشوف البنات
خاف محتاجات شي كامت وكعدت علاوي بحضني وادغدغ بيه واضحكه كتلة وين اخوانك كال بعدهم
ماجايين جنت منتظرهم بالباب بس تاخروا وبردت ودخلت ابتسمت بسته وكتلة بوية اروح فدوة للينتظر
اخوانه جيب مبايلي من الجيب خلي نخابرهم علمود من يجون الزم الك حسين واخليك تكتلة ونضحك عليه ضحك وكام يركض يجيب المبايل .
ريحانة
كاعدين نسولف وبعدين كالت وردة ارسليلي الملفات مال ملازم تبع المحاضرة الثالثة كتلها ارك خلي اجيب مبايلي واجي صعدت لغرفتي جبت مبايلي
ونزلت رجعت كعدت يمها ودارتب الملفات علمود ارسلهم وصاحتني ماما
وبيدي المبايل كالت وردة خلي يمي اني انقل وجانن مريم وسارة يباوعن علئ التلفزيون مادري شلون
خطزت علئ بالي وشغلت تسجيل الشاشة وانطيتها المبايل وطلعت من الاستقبال الشي الوحيد الي خطر
علئ بالي هوة ! راح ترسل شي وية الملازم لو بس الملازم الي تريدهم ! رحت لماما كالت القهوة كملت
صبيتها بالفناجين واخذتها دخلت وردة جانت تسولف وية البناا وعايفة مبايلي كل ضني من راح تشوفني
تتوتر ياللة معقولة ضلمتها قدمت القهوة وكعدنا نسولف ونضحك ورة ساعة اجة ابوها وراحت وياه
عزلنا الاستقبال ودخل بابا بوسته وكعد يسولف ويانة ويضحك ودخلوا حسين ومحمد وبدلوا واجو كعدوا
يمنة وعلاوي يكلهم شوفوا سفينتي شكد حلوة وحسين يكلة جنها طاسة ويخلي علاوي ينقهر وبابا
بس يخزر بيه اخر شي علاوي اجة لحسين كلة حسين سؤال كلة جواب قبطان علاوي كلة منو اكبر سفيتني
لو سفينة النبي نوح لو سفينة تايتنك يمة خربنة ضحك كلة حسين سفينة ابوك اكبر دروح من يمي
يقارن سفينته ام الجروخ بباقي السفن جان استحيت ابو راس اني منك حتئ استحي تكوا هاي سفينتي
مونوب اقارنهة ماما كلتلة علئ كيفك وية الولد يمة صفك حسين وكال حجت مدام نفيخة يمة شبعنا
ضحك وماما ماتحب احد يكلها هيج ويضوج بيها وبابا يخزر بيه اخر شي حسين جان ياكل كنافة صاح علاوي
انطا كنافة ومدري شنو شاوره اخذ علاوي الكنافة واكل وكلة حسين شجاي تاكلي علاوي ?! كلة حسين
وهوة يباوع علية جاي اكل بزنود ريحانة كال هيج واني كمزت من مكاني وكلت بابا شوف حسييين
شيكول لعلاوي حسين ضحك وكال شجاي تاكل علاوي علاوي هز راسة وكال زنود ريحانة كتلة اني
موسمينة وماعندي زنود ومتضوجني بكلامك ههههه كال حسين اي خطية ماعندج زنود انتِ عندج زنود
زنود وتعاركنا وبابا ساعة يضحك ساعة يرزل نوب اخذت مبايلي وصعدت لغرفتي فتحته ودخلت
للتسجيل مال شاشة وعدته من البداية واباوع وانصدمت صدمة عمري رسلت وية الملف 5 صور الية
بدون حجاب خليت المبايل علئ الميز وماعرفت شنو احجي وردة هيج تسوي ؟ شنو غايتها؟ وليش؟
دموعي رادت تطيح عصرت عيوني وكلت بعصبية لا لا ماابجييي ماابجييي موكلة بجييي صيري قوية
ريحانة صيري قوية البجيييي ميفيد شغلي عقلج جريت نفس علئ كيفي سحبت مبايلي وفتحت بابا
الغرفة صعدت للسطح علئ كيفي هواء بارد وحلو يرد الروح كعدت بالكاع ويطير شعري وية الهوة وحسيت
برودة الجو هذي تعتذرلي علئ حركان روحي وطلعت رقم باسل ودكيت عليه وكل شي بداخلي يرجف شلون
تجرأت مادري !شوي ورد علية كال الو غمضت عيوني بتعب صوته يطيح كل ذرة قوة عندي سكتتت ردت
اكله علئ وردة بس لا ارداياً كتلة واني مبرطمة وعيوني مدمعة ،شلون نمت ليلك وانتَ مسوي بية
هيجي؟! رجف جسمي وكلت بعصبية ياريتني اي والله ياريتني هيج مثلك ماعندي كلب وانام وكلش عادي لا
اتاثر ولا انقهر بس !المشكلة اني مونفسك !اني عندي كلب واحس بس انتَ ما مااعتقد عندك، همس بصوت
حنين وصوته يرجف لعد شلون ماعندي كلب واني وسكت بلعت ريكي وكتلة كمل؟ كال هيج ماكو شي
سكتنا ثنينا ودموعي مادري شوكت ضلت تنزل امسح بيها وترجع تنزل، كال بهدوء اعرف تصرفي متسرع
واسف بس مااكدرت اتحمل مادري شلون اكلج بس فهميني ! استغربت شلون يعني افهمه، تنهد ورجع كال
لاتضمين علية اي شي ! كليلي بكلشي وباج خطوة بخطوة مااعوفج بلعت ريكي وكتلة واني ارجع كذلتي
ورة اذني دومي ساندة نفسي بنفسي مااعتقد يجي يوم واحتاج لاحد؟ كتلة علئ العموم حبيت اكلك
لاتستغرب اذا وصلت الك بعد صور الي !وسولفت اله تخبل كتلة بهدوء مالك حق تصرف اي تصرف باجر اني
اتصرف وياهة وانهي كلشي مابية حيل تصير مشاكل واتعذب فوك مااني متعذبة، بس الشي الوحيد الي
اتمناه انو متخذلني مرة ثانية مثل ماا الكل خذلني وسديت الخط ومسحت دموعي حسيت شي بداخلي
ارتاح شلون هموم وحجيتها لاحد صفنت وتذكرت بحة صوته وهوة يحجي ضلت بأذني شلون احس صوته
يتردد بذهني غمضت عيوني وبلعت ريكي شديصير ؟ اني ليش خابرته ؟ ليش شكيتله؟ ليش حجيت وياه؟
وليش وليش مجاي الكة تصرف مبرر لكلشي؟ لاول مرة حسيت تصرفي صحيح وداخلي اطمئن ،من اليوم
بدأ كلشي من اليوم ماتتت ريحانة ،وبديت بداية جديدة ،بس ! بداية وية منو مااعرف ! نزلت لغرفتي
مكبل تغطيت ونمت ماردت افكر واسهر مثل كل يومية هاهية بعد الماضي مايفيدني واذا بقيت هيج
كلها تستغلني واتقشمر بساع واعرف شلون احاسب وارجع حق كل دمعة واخذ حقي بنفسي ! بديت اغفئ
وفزيت علئ صوت اشعار مبايلي مديت ايدي بنعاس سحبت المبايل شفتها رسالة من باسل داز صورة لباب
بيتنا وكاتب تطلعين لو ادك الباب ؟ فزيت من فراشي بخوف عزا العزاني شجابه بنص الليل باوعت من
الشباك شفته منتجي علئ السيارة ويدخن وصافن علئ البيت دزيتله رسالة انتَ تخبلت لو شنو تريد
تفضحني !شاف الرسالة رجع دز اطلعين لو لا ! راح ادكه والله وعود يطلعلي عمي اكلة اريد ريحانة مابيهة
كتلة بسرعة لا هاي هية جاية والله جاية لبست روب فوك ملابسي ونزلت علئ كيفي خايفة فتحت باب
المطبخ واضوي بمبايلي تقدمت لباب الكراج فتحته علئ كيفي شافني شمر الجكارة وتقدم رجعت ليورة
كال بهمس خرب يومج اوكفي يم الباب مااكدر ادخل تقدمت بخوف وكتلة واني اهمس بعصبية شجابك
تخبلت انتَ تخبلت كال اي تخبلت من ورة كلامج عندج مانع استغفرت الله وكتلة شنو رايد هز كتافه
وكال مااعرف ! فتحت عيوني بصدمة وكتلة بهمس باع تصرفاتك المتناقضة باع كال وهوة يمسح وجهة
انتِ موهم متعرفين شنو تردين وشبيج؟ اني هم مااعرف يعني انتِ اكبر متناقضة باوعت علئ باب
المطبخ وكتلة بخوف باع والله باجر عود نتعارك من توصلني موهنا بباب الشارع وهسة بهيج وقت همس
ماجاي اتعارك اني ؟ اجيت علمود اشوفج مقهورة لو تبجين لين نبرة صوتج مدري شلونها كتلة موعلية
هالسوالف من شوكت اني اهمك؟ كال بسرعة تهميني تهميني بس اسكتي ماردت اتنازل وانطي مجال كتلة
بأبتسامة تدري شكد اكرهك كال الحمدالله والشكر شعور متبادل وجاي يحجي وسديت الباب بسرعة
وهوة كال بعصبية كرفس اني الج ! كتلة ريحانة موكرفس باسل كبسولة ودخلت ركض للبيت وعلئ
وجهي ابتسامة انتصار سديت باب المطبخ وشربت مي وصعدت لغرفتي فتحت مبايلي شفته دازلي
حسابج بعدين ابتسمت وكلت بداخلي بمكر بلا خلي نشوف تكدر تحاسبني لو متكدر مارديت عليه وقت
المبايل باجر عندي دوام وكبل نمت ونسيت انو كامرة البيت الخارجية مشتغلة .
باسل
متمدد علئ الجرباية ودك المبايل استغربت
شفتها ريحانة شعجب دكت !جاوبت عليها وشوية وردت صوتها بوية صوتها تتبهذل احوالي من
اسمعه اسمعها شنو تحجي وكلبي ضل يوجعنا عليها حسيتها متاذية كلش ! واني زيدتها عليها من كالت
ماعندك كلب اجيت اكلها شلون ماعندي كلب تنهدت مووكتها ابد وبدت تحجيلي علئ صديقتها تخـبلت
ماسمعت هيج مسوية بيها شلون سويت هيج اني !جنتزبكل بساطة اكدر اروح لصديقتها واتصرف بكلشي
واندمها علئ الساعة الفكرت تسوي هيج بس سكتت لخاطرها مااردت ازيدها مادام هية تريد تصرف مااريد
امنعها ! و حسيتها انهارات ومن ختمت المكالمة وهية تكول اتمنئ ماتخذلني مرة ثانية مثل ماخذلني الكل
وسدت الخط افتر بالغرفة وحسيت نار واشتعلت بداخلي هسة شلونها؟ جاي تبجي ؟ شبيها انهارت لو
اختنكت؟ بدون وعي سحبت سويج السيارة وطلعت شغلت السيارة ومادري شلون وصلت لبيتهم نزلت
وكفت ادخن كدام الباب ودزيت الها وسالة وردت ودزيت رسالة ثانية يالة طلعت تقربت رجعت ليورة
كلتها مااكدر ادخل تقربي ضلينا نحجي مادري نتعارك تمنيت مااوخر من يمها هية تحجي واني دايخ بعطرها
زين اني ليش اجيت وشنو اريد مااعرف، كل الي اعرفه ماعندي رغبة بغيرها ولا واحد بالمية كلي
يريدها كلي كلبي عقلي تفكيري كلة بيها سدت الباب عصبت وكتلها كرفس سمعتها تكول باسل كبسولة اي
موتدللين باجر نتحاسب علئ سدة الباب وعلئ الطلعة بدون علمي صعدت بالسيارة دزيتلها رسالة وتحركت رجعت للبيت وابتسم ساعة واخفي
ابتسامتي ساعة بس غصباً ماعلية ابتسم شسويتي بية شسويتي !
يتبع ....
ومرحبا رجعنا من جديد، رأيكم بالبارت؟♥
الكاتبة رودة