مدحت: اسمعوا انا عندي ليكم مفاجاه مش هتصدقوا نفسكوا لما تسمعهوها
حنفي : خير قول يا جلاب الخير ربنا يستر
مدحت: أنا روحت ل تيتا تسنيم
حنفي : ثواني تيتا مين ؟
مدحت: تسنيم
باكينام : دي مامتي يا نوڤي
حنفي : مكنش فيه تسنيم ايّام ثوره ١٩
ولا انتم الاسامي بتنزل عندكم قبليها بميت سنه علي العموم نعديها كمل يا بني
مدحت: عرضت عليها المشروع بتاعي ووافقت جدا
حنفي : اااه بتاع البلاي استيشن
مدحت: لا ما انا قررت اشتغل في السياحه واعمل رحلات
حنفي : اه ده المشروع التاني وتيتا تسنيم دخلها ايه بالموضوع ده
مدحت: ازاي ما هي ادتني تلاته مليون جنيه ابدأ بيهم
باكينام: اووه لازم اتصل أشكرها علي اللي عملته ده يا مودي
حنفي: اديتك تلاته مليون جنيه ؟
مدحت: ايوه كتبتلي شيك معايا اهو وقالتلي لو بقيت شاطر يا مودي هجبلك حاجه حلوه وانا هبقى شاطر علشان تجبلي حاجه حلوه
حنفي: هو انت عاوز كمان حاجه حلوه ده انت اخد تلاته مليون جنيه ده انا اشتغلت طول عمري ما ممسكتش تلات الاف جنيه ع بعض
مدحت: وعلشان كده هعملكم رحله ونروح فيها كلنا
حنفي : قلبي ااه ده انا اللي هروح فيها
باكينام : هتودينا فين يا مودي
مدحت: هنروح الساحل انا حجزت اتوبيس خلاص وعملت إعلانات لحد ما التسريح يطلع
حنفي: تسريح ! انت هتسرح شعرنا كمان
مدحت: لا يا انكل نوڤي دي الوثيقه اللي هشتغل بيها عمو المحامي قالي هيطلعها
حنفي: التصريح اااه .. وانا عمال أقول مودي هيجيب مشط ويسرحنا ... هو فيه عمو المحامي كمان ؟
مدحت: ايوه طبعا هو مختص بالقواضي دي
حنفي: قواضي !!!....انت يا بني بتهبد وخلاص
ايه يا ربي البني ادم ده ...وعلى كده المقر هيبقى فين
مدحت: يعني ايه مقر؟
حنفي: المكان اللي هتفتح فيه الشركه ؟
مدحت: هو لازم مكان مينفعش أباشر اعمالي بالتليفون
حنفي: اعمالك ...يا بني اللي هيقطع تذكره علشان يسافر هتدهاله ازاي
مدحت : اون لاين يا اونكل وهما كمان هيبعتولي الفلوس كده
حنفي : يعني هتباشر شغلك من علي السرير وبالتلفون
مدحت: عارف ان الموضوع مرهق شويه بس انا لازم استشقى شويه
حنفي: ت ايه
مدحت: استشقي يعني اعمل مجهود جبار ده معناها
حنفي : تشقى يعني بعد التجويد بتاعك لا هتتعب انا عارف بس ليه كميه الإرهاق النفسي دي يا مدحت كنت تشوف حاجه خفيفه شويه
مدحت: لا طبعا علشان اعجب سمر ممكن تخليها تطلع معانا الرحله هي وطنط ارداف
حنفي : أرداف عارف لو سمعتك كان زمانك ميت من تلات ايّام اسمها انصاف والكلمه دي متقلهاش تاني
مدحت: ليه يا اونكل هي عيب ؟
حنفي : اسأل مامي
باكينام : اهاا يا حبيبي بلاش
مدحت : ليه هي معناها ايه ..انا كبرت وعاوز اعرف كل حاجه
بالكينام: دي المنطقه الخلفيه يا مودي
مدحت : اها في الشارع اللي ورانا يعني
حنفي : بص يا مدحت انا لو طلقت امك هيبقى بسببك انا بقيت بحس ان ساعات مش قادر اخد نفسي حرام عليك يا بني هتموتني
مدحت : خلاص يا اونكل انا هدخل اكلم سمر سلام
حنفي: غور جتك داهـيه في رخمه امك
باكينام : بتقول حاجه يا نوڤي
حنفي : لا ابدا ده انا بدعيله
مدحت : سمر يا دكتوره سمر
سمر: لا حول ولا قوه الا بالله نعم عاوز ايه
مدحت: ممكن تغمضي عينك عاملك مفاجاه
سمر: ههههههههه وهشوف المفاجاه ازاي يا هبل
مدحت: ما انا هكتبها بس غمضي ومتفتحيش عينك غير لما اقولك فاتحي في الرساله
سمر : ولاااااااا انت غبي هشوف ازاي وانا مغمضه كلمه فاتحي
مدحت: صدقي صح طب عدي من واحد لعشره وفتحي
سمر : حاضر يارب نخلص
مدحت : انا اشتغلت يا سمر هي دي المفاجاه
سمر : بجد يالهوووي انا قلبي هيوقف من السعاده عملت إنجاز انت كده محدش عمله في التاريخ لا براڤو واشتغلت ايه يا نانوس
مدحت: فتحت شركه سياحه وهعمل رحله وعزمك فيها انتي وطنط اللي بتلخبط في اسمها دي
سمر: هتودينا فين الاهرامات ولا جنينه الحيوانات
مدحت: لا هروح الساحل
سمر : مش هينفع اروح الساحل داخله على امتحانات ومش هينفع اسيب الشغل
مدحت : لا يا سمر انا الرحله دي حياه او موت بالنسبه لي لازم تيجي
سمر: طب سبني افكر كده واقولك ابويا وامك جايين
مدحت : كلنا هروح عيله مع بعض
سمر: خلاص روح دلوقت علشان بذاكر ونتكلم بالليل
مدحت: اوك يا سمر ذاكري اسنان كويس
سمر: اذاكر ايه ؟
مدحت : اسنان مش انتي في كليه اسنان
سمر: دماغي لفت ايوه في طب اسنان مش فاهمه السؤال
مدحت: يعني تجمعي معلومات عن الأسنان كام سنه وكام ضرس وموجودين فين وبيعملوا ايه علشان تنجحي
سمر: مدحت
مدحت: ايوه يا سمر
سمر: أقفل دلوقت بدل ما اذكر الست اللي خلفتك بأحلى الألفاظ غور من قدامي
مدحت: حاضر سلام هكلمك باليل باي
سمر: باي ...... ايه ده مش بني ادم... ال ذكري اسنان ال وبيقولي معلومات قيمه هتجيلي في الامتحان عبو شكلك
مدحت : مامي انا خارج عاوزه حاجه
باكينام : ميرسي يا روحي متتاخرش بس هتروح فين
مدحت: شوفت كولكشن مايوهات اسبيدو تجنن هنزل انا وحماده نجيب علشان لما ننزل البحر ..اجبلك معايا يا اونكل نوڤي ؟
حنفي: اها ياريت بس انا عاوز موديل معين
مدحت: قول ومتقلقش هعرف اجيبه
حَنفي: عاوزه يكون شرعي لحد الركبه كده وانت عارف المقاس
مدحت: مستحيل يا اونكل ده كده مش مايوه
دي برمودا
حنفي : بجد اومال لما كنت بروح بلطيم كان اخر صايحه
مدحت: دي بلد سياحيه بطليم دي
حنفي: بطليم!!!! اها بلد سياحيه في كفر الشيخ
مدحت: ههههههههه حضرتك تقصد شرم الشيخ
حنفي: لا كفر الشيخ حاجه ...وشرم الشيخ حاجه
مدحت: ايوه يعني دول دولتين كل واحده في جزيره لوحدها
حنفي : انت بتقول ايه صحيح يا مدحت انت خريج ايه
مدحت : جامعه امريكيه يا اونكل
حنفي : ومتعرفش كفر الشيخ من شرم الشيخ المهم هاتلي البرمودا وبلاش المايوه ده
مدحت: ليه يا اونكل...ههههههه....ده هيبقى تحفه عليك بكرش حضرتك المميز ده
حنفي: انت بتتريق عليا بس عارف مش هرد عليك علشان انا راجل لكن انت ...
مدحت: وانا كمان راجل وبكره هيطلعلي كرش سلام
حنفي: انتي كشفتي على مودي قبل كده علشان تتاكدي
باكينام : بعمله شيك اب كل ست شهور صحته كويسه اتاكد من ايه ؟
حنفي: لا ولا حاجه وانا بس مش مطمن
مدحت : يلا بينا يا حماده نجيب المايوهات
حماده: واهم حاجه عاوزين نجيب بدي لوشن للشمس لحسن تلسوعنا
مدحت : اها صح وانا بشرتي حساسه هتجيب المايوه بتاعك لونه ايه يا حماده
حماده: موف او بنفسجي
مدحت: لا انا هجيبه مشجر طالع موضه السنه دي
بس لو سمر مش هتيجي هجيبه اسود علشان هبقى زعلان
حماده: انت كلمتها
مدحت: اها هترد عليا بالليل
حماده : وهيسافر امتى
مدحت: بكره الصبح هنهار لو رفضت يا حماده
حماده: وانا هتعب نفسيا واحتمال اعيط كمان احنا هنقعد كان يوم
مدحت : أسبوع كامل
حماده: طيب علشان اشوف ظابط يكون فاضي يقعد مكاني لحد ما أرجع
مدحت: احسن طبعا بدل ما تقفل القسم أسبوع الناس هتروح فين بس متدلوش نسخه المفاتيح الأصليه. طلعله نسخه عليها
حماده : اكيد طبعا هعمل كده بيعجبني تفكيرك يا مودي بقيت ناصح
مدحت: حبي لسمر فتح عيني على حاجات كتير مكنتش اعرفها
حماده : اسكت بقى انت بتقطع قلبي متنساش اني كمان بحبها
مدحت: خلاص الرحله دي هتحدد من يفوز بقلبها
سمر: ماما
انصاف : ايوه يا سمر
سمر : الواد مدحت كلمني عاوزنا نطلع معاهم رحله
انصاف : رحله ايه دي وامتى
سمر: تقريبا بكره وهنروح الساحل
انصاف : طيب والنبي فرصه بدل الكتمه دي
سمر: خلاص اتصل بالشغل اخد اجازه واخد معايا كام كتاب اذاكر فيهم محتاجه اغير جو وبالمره انتقم من العيله دي
انصاف : يلا بينا خلينا نعلمهم الادب
سمر : طيب انا نفسي انزل كده اعمل شعري وأجيب هدمتين وابقي شبه البت لولو اللي بعتلي صورتها دي
انصاف: وماله يا حبيبتي بس متنسيش امك هاتيلي حاجه معاكي
سمر : من عيوني حاضر الواد السمج تقريبا بعتلي رساله هروح اشوف
مدحت : يا تري قرقرتي يا سمر
سمر: اهاا قرقرت خلاص هاجي معاكوا ....قرقرت يا بن العبيط
مدحت : بجد دي احلى صدفه حصلتلي في حياتي
سمر: صدفه ايه ؟
مدحت: انك وفقتي يعني
سمر: اسمها احلى خبر انا هنزل اجيب شويه حاجات ابقي ابعتلي رساله بقي علشان تعرفني هنتجمع فين والساعه كام
مدحت : حاضر هبعتلك كل التفصيلات
سمر: هموووت خلاص منك لله ..غور جدتك داهيه ...........عيل لوحه تلج ...ال هيبعتلي كل التفصيلات ده محتاج مدرس عربي يديله على قفاه
يوم الرحله
حنفي: فين يا بني الأتوبيس بقالنا ساعه واقفين
مدحت : ما لسه على ميعاد الإقلاع ساعه
حنفي : هو اتوبيس جاي من مطار القاهره
مدحت: انا كلمته وجاي في السكه ثم سمر وطنط ارتجاف لسه مجوش
حنفي: بقولك ايه كفايه طنط لحسن تلبسك حاجه في دماغك انا مش مسئول
مدحت : لا خلاص هحفظ اسمها اهي سمر جت اهي
حماده: انا سو هابي انك هتطلعي معانا الرحله يا سمر شكلك حلو خالص وشعرك طويل
سمر: شكرًا وخد شيل الشنط دي بدل ما انت عمال تتنحنح كده
مدحت: الله يا سمر انتي لبسه باروكه
سمر: الباروكه دي تلبسها......
حنفي : خلاص ابوس ايدك امك حقك عليا
سمر: عيال ملزقه صحيح
تيتا تسنيم: انتي بقى سمر ؟
سمر: ايوه ومين حضرتك
حنفي : دي تسنيم هانم جده مدحت
سمر: جدته ازاي دي لبسه ليجن وبدي
تسنيم: انا بحب احتفظ بمظهري بيفتكروني اخدت باكينام الصغيره
سمر: وَيَا ترى يا بابا لسه في تحف في العيله دي اشوفهم قبل ما اتشل
حنفي : في بقى الدبدوب اللي هناك ده اسمه مدحت بردوا يبقى جوز تسنيم
سمر : هي العيله دي مفيهاش راجل
مدحت: عمو الأتوبيس جه كنت متاكد انه مش هيخذلني وهيجي انا عملت صفقه معاه
حماده : براڤوا يا مودي بقيت رجل اعمال ناجح
حنفي: انا خايف يكون اجر الأتوبيس ده ب تلاته مليون جنيه اللي اخدهم من تسنيم
مدحت: يلا يا جماعه نركب كلنا الباص
سمر: استر يا رب
مدحت : يلا يا عمو كلنا جاهزين نبدأ الرحله
حنفي: انا جعان
سمر: اجبلك سندوتشات يا بابا انا عامله كتير
حنفي : ياريت يا سمر لسه مفطرتش عامله سندوتشات ايه
سمر: جبنه بالقوطه ، وطعميه بالسمسم، وفول بالزيت الحار، وبيض مقلي، وبطاطس محمره، وبتنجان وفلفل ده الفطار وعاملين حليتين كرنب علشان الغدا
حنفي: خلاص هاتيلي اتنين من كل صنف
مدحت: ممكن سندوتش يا سمر
سمر : متاكد ؟
مدحت: ايوه طبعا
سمر: يا بني انت مش اخد ع الاكل ده
مدحت: للدرجه دي خايفه عليا يا سمر انا علشان اكل كلوسلو وسلطه فاصوليا مع اني مش بحبهم
سمر: يا سلام ايه التضحيه دي
حماده : وانا يا سمر عاوز سندوتش فول بالزيت الحران
انصاف :دي شكلها هتبقي رحله مزيكا
مدحت: طبعا يا طنط نصين هتبقي رحله رائعه
حنفي: طنط نصين والله خايف تخنق
مدحت: صدقي يا مامي نسيت العولمه البطه بتاعتي
باكينام : معلش يا حبيبي هجبلك واحده من هناك
حماده: وانا نسيت الجردل الأصفر اللي بحط فيه الرمل
تسنيم: هجبلك يا حماده متزعلش
سمر: ماما انا بفكر انزل ومكملش مع ولاد المجانين دول عوامه بطه ايه وجردل ايه بس
حنفي: وعلى كده حجزت في فندق ايه يا مودي
مدحت: ايه ده هو انا لازم أحجز فندق
حنفي: نعم يا حبيبي اومال هنام فين الأسبوع ده
مدحت: ما انا نسيت
سمر: نسيت ايه عامل رحله من غير ما تحجز فندق يادي المصيبه
باكينام : متزعقوش للولد كده يتخض معلش يا حبيبي انا هتصرف هو محتاج وقت علشان ياخد خبره
حنفي: خبره !!!!
حماده: معلش يا مودي بس أوعى تنسى تاني هاا
سمر : وده ظابط .... الصبر من عندك يارب