حلقة(27) من القصه الحقيقيه #قدري_الاسود
بقلمي #الكاتبة_شهناز_الخزعلي #جيمن_جلال
قالتْ: أتهوى ؟ قلتُ: أهوى أي نعمْ
بَسمَتْ وقالت: مَن ؟ فقلتُ: مَن أبتسَمْ
***
ضحكت وقالت: مَن ؟ فقلتُ مؤكِّداً:
مَن مِن شفاهٍ أخرجتْ هذا النَّغَمْ
***
قالتْ: أتسمعُ نغمةً ؟ فأجبتها:
ألحانُ ضحكتكِ التي عُزِفَتْ بِفَمْ
***
قالتْ: تُغازِلُني أراكَ . أجبتُها:
غزلي فديتُكِ بوحُ شاكٍ قد ظُلِمْ
***
قالتْ: أمظلومٌ تُراك ؟َ أجبتها:
اي والذي بدراً بوجهكِ قد رَسَمْ
***
وجلالِ مَن نثرَ النجومَ بمقلةٍ
فيها دجتْ ليلاتُ أسدافِ الظُلَمْ
***
اي والذي سواكِ مظلومٌ أنا
أوَ تُنصفين معذباً مِنكُم ظُلِمْ ؟
***
قالت وقد بهتت: أنا .. منّي أنا ؟!
فأجبتها: قسماً بسحركِ أي نعم
غادة/ بتاريخ .....( ٢٠٠١١/٢/٢٣)
اجه عليه سامي ساعه ٧ صباحا اخذت جنطتي الي محظرتها من اسبوع ،اهلي كلهم كاعدين حتى يودعوني سلمت عليهم وصيت سارة على ابني حمزة وطمنتني
طلعنا بسيارته لكربلاء ... الطريق كله اول مشغل السيارة رجيت راسي على الجامه وجني جوعانه نوم غفيت بدون مااحس على روحي
ماحسيت الا واحنا بسيطره كربلاء المقدسه والشرطي يطلب منه اوراقه راواه باج سلم عليه وطلعنا عدلت كعدتي.....
غادة: شنو هاي حيييل شكد نايمه ليش خليتني انام
....ضحك ......
سامي: عادي حبيبتي المهم ارتاحيتي يعني تسهرين اليله ماتكولين انعس ...
درت وجهي للجامه ......وابتسمت .......
غادة: ليش شعندك اليله ؟
سامي: لا سلامتج ماعندي بس اريد اصفي حساب سنه عذاب .....
غادة: الله اليستر .....
سامي:يستر يستر لاتخافين........
ضحكنا اثنينا
وصلنا قريب الامام الحسين سلام الله عليه حجزنا فندق مرتب.....
خلينا جنطنا وارتاحينا ...
سامي: اطلب غدا من المطعم حتى وراها ننزل نزور ناخذ بركه زواجنا من اباعبدالله (ع)
غادة: ياريت..
كلامه حسسني بالامان والاطمئنان .....راح جاب الغدا وتغدينا سوة جان جايب وياه كامره كل لحظه يصورها حتى وانا اكل اكول ليش تصورني اطلع موحلوة يكولي انتي شعليج انا اريد اشبع شوف بيج
يخجلني بطريقه غزله....
خلصنا غدا وسبحت وتوضيت ولبست تنورة سوده وقميص بيجي وعباتي توجهنا لابا عبدالله الحسين عليه السلام.
زرنا وصلينا وكعدنا بالصحن الشريف....
سامي: غادة جبتج اول للامام الحسين حتى اشكره على الهديه
غادة:ياهديه ؟
سامي: من اول ماشفتج وعشعشتي بدماغي وكلبي كلت لو اخر يوم بعمري اتزوجها وطلبتج وكالو رجعت لزوجها خابت كل امالي وكانو اسودت الدنيا بعيوني
صدفه اصدقائي عزموني زيارة لكربلاء ليله الجمعه واجيت هنا وكفت بهذا المكان وطلبتج منه كتله طالبها منك بجاه ابنك الرضا الراحت تزوره . اذا رجعت لزوجها الله يسعدها وتنسيني اياها واذا لا تجمعني بيها طالبك ياابو عبدالله وعهد عليه بس تصير الي اول يوم زواج قبل لااتممه اجيبها واجيك اشكرك ....
غادة:عيوني دمعت لكلامه واشوفه شلون يوصف لهفته وطلبه اني اكون اله..... لزمت ايده وكتله "
غادة:ان شاء الله اليقدرني واسعدك
.....لزم ايدي ......وكال"
سامي:يله ل.....عد نكمل العهد يم ابو الفضل العباس سلام الله عليه
ونروح للغرفه شنو حلتلج الكعده ويغمز بعيونه
غادة: مو ستوك شحلاتك ومطمئنه
سامي:وشكالولج مخوفج وراح اكلج
غادة: لا بس ...
سامي :لاتبسبسين يله حبيبتي
طلعنا زرنا ابو الفضل ع .
ورجعنا للغرفه تمم مراسيم العشق والاشواق وهو يطرز قبلاته وحرارة الهيام على جسدي حسيته كانو ممعاشر امرأءة من قبل وجني اول مرأءة يلمسها ....
نمنا اثنينا وكعدنا المغرب وقت الاذان كعدته ورحت للحمام فتحت الماي دفو الماي وي حرارة جسمي تنغامن سوة كاعده جوة الدوش واتذكرت حياتي السابقه كلها ولحظات الجاي اعيشها
حمدت الله على النعمه الي الله عوضني بيها
.......
(جان يصورلي الدنيا ضحكتلي مادري الدنيا معاديتني وعدها وياي ثار ) .......
صلينا المغرب وجاب عشا كملنا ..
سامي: نرجع نزور ونتسوك
طلعنا زرنا وطلعنا للسوك اشترى لاخواته كل وحده شكل ولجهالهن واخوته وحتى اخواتي مانساهن انا اكوله كافي يكول لابعد ....
دخلني لمحل مجوهرات ...
سامي:اريد تختارين كلاده حلوة اريدها هديه...
طلع الصايغ انواع الكلايد وكلها حلوة اختاريت وحده على شكل كلب وبيها ايه الكرسي سلسلتها ناعمه شي على شي مرتبه بدون مااساله المن الهديه
رجعنا للغرفه صفطنا الغراض الي اشتريناها وصاحني اتمدد بصفه رحت لبست احلى ماعندي واجيت
ابتسم وابتسامته نابعه من كلبه وهو يأشرلي افتر حتى يمتع نضره
فتحلي اديه وغمرني بحضنه الي حسيته يفوق الدنيا بحنانه
ثاني يوم رجعنا للبيت او بالاحرى بيته
اول ماوصلنا المنطقه كلبي انقبض مااعرف ليش جني داخله سجن مو بيتي فتح الباب وكال"
سامي: اتفضلي لبيتج ومملكتج
دخلت للطرمه جانت جبيره حييل ومسكوفه فتحو الباب الداخلي اخواته واخوته والهلاهل ترست الكون الي يهلهل والي يركص والي يطش جكليت نوعا ما حسيت براحه اخذني اخواته لغرفتي الي هيه بالطابق الثاني عباره عن شقه كامله بس متصله بالطابق الجوة يعني ممعزوله
تصميمها الغرفه كلش حلو ومرتب ونازك حيل عجبني الترتيب خليت جنطي وغيرت ملابسي لبست فستان تركوازي ومكياج خفيف كلش وبديت ارتب بملابسي
دخل سامي للغرفه وسد الباب من شافني تنهد...
سامي اخيرا صرتي بغرفتي.
. ..ضحكت ...
غادة: كل هذا وتكول اخيرا ؟
سامي: لاخر يوم بعمري تبقين امنيتي التحققت حظني تعالي ننزل جوة نتغده وقبل لاننزل اطلب منج طلب طلب مو امر
غادة: اامرني
سامي:اختي ليلى زعلانه صارلها شهرين وشغلتها مطوله هيه معلمه وشويه خشمها يابس يعني مدلله حيل اي كلمه تسمعينها منها طنشي وخلي عقلج اكبر
غادة:ليش ياستار اكو بوادر كلام ومشاحنات ليش تخوفني ؟
سامي:لامااخوفج بس الحذر مطلوب
ليلى صديقه انعام طليقتي وماقابله بزواجي وزعلت عليها وقبل اسبوع يله تراضينا .....
فااي شي تسمعينا لاتحسبين حسابه ماشي بطوطتي
.....خليت اديه على خدوده.....
غادة:ها النوب بطوطتي ترا جاي ادللي وتالي اتعود..
سامي:ادللي انا اريدج تتددليين عليه
....بسته .....
غادة: الله لايحرمني منك .
غادة/بس ماادري ليش نغزني كلبي وكلت يارب سترك من الجاي ويطيني الصبر اتحمل واسكت
راسا تذكرت وفاء اخت اسعد طليق اختي لينا ومكايدها .......
.... نزلنا ادينا متشابكه والابتسامه تارسه حلكه اخوته شافو فرحان كامو يصفكون ويهوسون كعدنا كلنا على سفره وحده انا خجلانه لان ناس اول مره اشوفهم اكعد وياهم على سفره وحده هم ابد ممحسسوني غريبه بالعكس يضحكون ويصنفون
بس ليلى تباوعلي تصفح وجن معاجبها سويت مثل مكالي سامي وطنشت
خلصنا غدا وكمت وي البنات حتى اغسل المواعين مثل ماتكول سارة عليه موجه نعمه ودلال هسه انا بعدني عروس من دخلت للمطبخ وي البنات وجان عباره عن مطبخ راقي وبناء حديث واثاث راقي ....
ليلى: شعندج داخله للمطبخ مو انتي عروس روحي لغرفتج ...
حسيت كلامها امر
واخر كلمه كالتها من بين سنونها
ليلى:ولو انتي مال دلال وعرس بس شسوي لاخوي
غادة: نعم
ليلى: انعم الله عليج روحي حبيبه روحي ارتاحي..
عفتها وصعدت لغرفتي وانا ادعي رب العالمين يعدي ايامي على خير.......
_________________
مرت الايام عادي ورا اسبوع زواجي اجت امي حتى تزورني وجابت وياها حمزه ...
طرت من الفرح لشوفتهم وجانت جايبتلي وياها حلويات وكليجه مسويتها ...كالت"
أمي: يوم ابوج يسلم عليج ويكول خلي تدير بالها على نفسها ومو تفشلنا وي الرجال.
دنكت من قهري هاي وصيته الي ..
غادة:ليش انا يايوم مفشلته ليش هيج يمه ..؟
أمي:يمه والله يريد مصلحتج وماقصده بيها اهانه الج وان شاء الله الخميس الجاي غدانا يمكم .
غادة: صدك !!
أمي:اي شنو متعرفين رجلج عزمنا على الغدا هنا يمكم.
غادة:لا والله فلااعرف مكلي
أمي: يله ان شاء الله خير عود اسالي
من رجع سالته على عزومه اهلي ...
سامي:عود ردتها مفاجأة الج منو كلج ؟
غادة: امي اليوم زارتنا وكلتلي ....
...ضحك .....
سامي: حركت الفلم عمتي انا الها
هاي الايام ليلى ابد مااحتك بيها بس قدر الامكان اكون لطيفه وياها يعني من تروح للدوام تخلي ابنها بالبيت عمره سنتين اله شهرين تبقيه نايم
من يكعد انا اهتم بي لان انا بطبعي احب الاطفال ابدله واريكه والعبه مرات من ترجع من الدوام تسال عمتي على ابنها اشو منشنش ويضحك مرات يتلكاني يبجي
تكوللها غادة مداريته احسها ترتاح نوعا ما..
مرات عمتي اذا تطلع لمكان سوك او غيره او زياره اتلكاها بالباب اخذ منها اذا شي شايلته او اجيبلها ماي احسسها بالاهتمام الي فاقدته من اولادها وهذا طبع كل الامهات يحسون اولادهم من يكبرون ويستقرون يبطلون يهتمون بيهم
اشوف الامتنان بعيونها.. عمتي طيبه ومايوم سمعتني كلمه خشنه وحتى شغل البيت تحاول ماتثقل عليه
وبيوم عزومه اهلي ... سامي مخله شي مااشترا بحيث صارت سفره ملكيه ...
ليلى ابد ممرتاحه وتنافخ وتصيح شدعوة هالكد منو جايينا قابل ......
انا اسمع واطنش
اجو اهلي وفرحتي بيهم ماتنوصف تغدو وكعدو سوالف وتحشيش سامي وبسام على عامر لان يريد يقدم على كليه عسكريه وهو ثالث متوسط ....
خلصت العزومه وراحو اهلي وامتناني لسامي جان مبين من فرحتي
طلعو اهلي واجاني للمطبخ وانا اعزل بي
سامي عنده اخ مزوج ويانا بس زوجته حامل وتدرس عند اهلها ماشفتها لحد الان
حضني وخله راسه بركبتي وكال"
سامي:حياتي فرحانه .
.درت وجهي عليه .
غادة:كلش فرحانه الله لايحرمني منك .
رفع ايده لفوك ... وكال" اميين
راح اصعد خمس دقايق وتلحكيني.
غادة: لافدوة هاي المواعين ماتخلص بخمس دقايق .
سامي:ليش بس انتي وين ليلى
راد يطلع يصيحها ماقبلت....
غادة:لا فدوة لاتصيحها المواعين غدا اهلي وعيب اخليها تغسلهم وبعدين ماعندي شي روح ارتاح واعوضك باليل ...
ابتسم وكرصني من خدي كال "
سامي:فدوة للطيبه المعدله ......
باسني وصعد
كملت المطبخ الصاير هوسه نضفته ورتبته وطلعت انطي عمتي ماي متعوده قبل لااصعد اخذلها صلاحيه ماي و حتى اصعد غرفتي قبل لااوصل اسمع ليلى ودتحجي و تكوللها "
ليلى:اي دريت بس تدافعيلها شحال لو ماااليوم غدا اهلها صاير ملوكي
عمتي: ولج ليلى من شوكت عينج تضييك على اكل اشو انتي عيونج مليانه شبيج تفورين من الصبح
ليلى:اي افور من اشوف اخوي ذابح نفسه على وحده ماتستاهله .
عمتي: وليش ماتستاهله اشو جمال وادب واخلاق وكايمه بينا صلاوات مو احسن من ست انعام الجانت مانشوفها من الوجبه للوجبه وحتى سلام الله ماتعرفه
ليلى:اي انعام تسواها ليش جهالها شنو ذنبهم يبقون بلا اب ويتبهذلون ......
عمتي: ليش يمه منو بهذلهم لو هيه جرورتهم بليله ضلمه شكد توسل اخوج بيها بس دكت رجل اله بيت وحدي لو نسيتي ...
ليلى لاتخربين على اخوج تشوفيه مرتاح وسعيد لاتخلينه يزعل عليج وتعرفين زعله ..
.....ساد سكوتهن ....
....دكيت الباب...
عمتي: اتفضل؟
فتحت الباب ضلت ليلى باهته خافت اكون سمعت حديثها خليت المي يم عمتي ...
عمتي: الله يرضا عليج بنيتي
صعدت لغرفتي وانا كلام ليلى يدك براسي لحد هاي للحظه ماسالت سامي على طليقته وليش انفصلو
بالليل تعشينا وكملت كلشي وصعدت لبست ثوب قصير فانيلا ربع ردن ومخصره على الجسم ورتبت نفسي مكياج وعطور وبخرت الغرفه ردت اعوضه عن الضهريه الضاعت عليه وكعدت اكلب بجهازي خابرت امي...
أمي: ابوج يمدح بسامي واخلاقه ويكول عاشت ايدها اليوم الطبخ يجنن يعرف طبخج.
.... ضحكت .....
غادة: الف عافيه
اندكت الباب ودخلت راسا قبل لااكول اتفضل اتفاجأت. ليلى استحيت من منضري مع العلم مستور. .
كامت تباوعلي من فوك لجوة.
ليلى: هاي شلابسه عيب استري نفسج ..
استفزني كلامها
غادة: اولا انا بغرفتي عسا مااانزع كل ملابس محد يشوفني وبعدين الي يدخل لغرفه احد يدك الباب....
راسا دارت عيونها تتفحص الغرفه ....
ليلى:دكيييت ....
غادة:بس ماانتضرتي اكولج اتفضلي.
نطت ....
ليلى: عاي هم العايزه ماتكوليلي اتفضلي وبعدين انا داخله لغرفه اخوي مو الج
غادة: واخوج عنده شريكه وياه بالغرفه المفروض تحترمين هالخصوصيه وانتي مزوجه وتعرفين هذا الشي .
احجي باسلوب حتى لاتحسبني طاردتها لان عرفت طريقتها ...
ماعجبها كلامي...
ليلى: اريد المكص مالتي .
غادة:بالنسبه الي مماخذه شي من اغراضج واذا سامي ماخذ فاتكدرين تسالينه من يرجع
ضاجت طلعت وركعت الباب
غادة:توترت وخفت من الايام الجايه الله يعديها على خير وترجع لزوجها واخلص.....__________يتبع
رايكم....اترك التعليق الكم ؟؟؟؟؟؟؟؟؟
لاتنسوا لايك...نجمه
تحياتي الكم #الكاتبة_شهناز_الخزعلي #جيمن_جلال