قدري الاسود

الحلقة(21)

الحلقة(21)من القصه الحقيقيه #قدري_الاسود  بقلمي  #الكاتبة_شهناز_الخزعلي  #جيمن_جلال

غادة/ابويه واخويه يمكن همه سبب ميلان احنه البنات لنترك بيت الاهل ونلتجأ للزواج كل ضنا نلكه الخلاص بس شيء اسوء من شيء ...الاب والاخ هم الكتف الي نستند علية ... بس بظروفي وحياتي ابوية
ينهش باللحم اني وخواتي ومنا اخويه عامر .....

كلت  احسن حل اتزوج واطلع من البيت وهذا اكبر خطأ اتخذته
خابرت عمتي سامية وبلغتها بموافقتي بالزواج هاربه من جحيمي بس للاسف شمرت نفسي بجحيم اكبر مااعرف وين موديني مصيري وتبعات موافقتي الي محد يعرف اصلا بالخطوبه كانت سر بينا......

ثاني يوم صاحتني امي :

امي:ادخلي وسدي الباب وراج ...

...سديته واجيت يمها...

امي: اكعدي يمي.....

كعدت وانا بداخلي فهمت شتريد تكول....

امي:عمتج سامية خابرت وخطبتج لاخوها ..  

انا مدنكه بس القهر ماليني ملي...  

امي: اشو متفاجئتي ولاسألتي منو اخوها .

غادة:حسن اعرف.

امي: منين تعرفين ؟

غادة:خابرتني ووافقت .....

ضلت امي  فاتحه عيونها متفاجئه!

امي:شنو شكلتي شلون وافقتي من وحدج يعني بدون متاخذين رأينا ؟

انا ساكته ........

امي: وج ماما متزوج ويحب زوجته اخذها عن حب شتسوين بهيج زواجه وج ماخذج عمود الاطفال.. هاي انتي الرفضتي كل الخطابة تالي تقبلين بمتزوج ليش ياامي ... 

انا بسكتي ضليت  شااكوللها اريد اطلع من هذا البيت شلون ماكان بس حتى ابعد واخلص نفسي .....

امي:ترا ابوج ماقبل وكال كوليلها ماموافقين .

غادة: ليش مو اني انطيتها كلمه ...

أمي: ها لعد روحي لابوج وكوليله هذا الكلام ....

عفتها وطلعت وانا اطحن ناار جوايه صرت مثل بلاع الموس لايكدر يطلعه يجرحه ولايكدر يبلعه .. رحت كملت شغلي وغديت ابني حمزة طلع للمدرسه وانا بديت اغسل بالطرمه اطلع حركت كلبي والقهر البيه بالشغل اشطف وارجع اخلي ماي من جديد اشوف الكاع انضف من ايامي والامر بي..

مرت ساعه واجتني لينا .

لينا:  بابا يصيحج طفي الماطور وروحيله ...

طفيت ورحت غيرت ملابسي لان ناكعه ..

دكيت الباب صاح تعالي"

دخلت بس اشوف ابوي عيونه دم من الغضب تشجعت وتقدمت يمه...

غادة: نعم بابا صحتني