قدري الاسود

الحلقة(10)

الحلقة(10)من  #قدري_الاسود  بقلمي #الكاتبة_شهناز_الخزعلي  #جيمن_جلال
ملاحظه/القصه حقيقيه وبطلتها تتابع وياكم

لتصاحب شمس وتزاعل .......الليل
لان تشبع مذله بوكت .......الغرووب
ولتصاحب شمع وتأمن ..........بسااع
تره الشمعه تغدرك لمن .........تذووب
ولاتعشگ شخص وتصدك ......الينكال
امشي بشور عقلك مو ..........بالگلوب
ولاتجرح شخص دير بالك انته ...بهاي
حط نفسك بمكانه شلون.شوفه.. يلوب
ولاتمشي غلط درب الغلط .......معروف
تظل بعلتك جنك طفل ...........مصيوب💔

غادة/بقيت كل يوم اقرا الدعاء واردد بي
بس كثرت احلامي المزعجه وصارت عندي حاله احلم بالشي يتحقق يعني شغلات بسيطه ....

بده عندي تجاوب بالعصب كمت اكدر احرك اديه وارفعهن احك جسمي من يحكني الزم شغلات بس يرجفن يعني اذا الزم كلاص تبقى ايدي ترجف واذا اطول يوكع  ...
ميخالف هذا بحد ذاته تطور واحمد الله واشكر على النعمه بدت رجليه شويه شويه احركهن بس بقت اصابع كف الارجل مايتحركن يعني اذا ارفع رجلي يبقن مكفيات لجوة وهذا يسموه سقوط بالقدم تكون الاصابع مكفيات لجوه صرت احبي مثل الطفل من يخطي اول خطواته يمشي خطوتين ويوكع اني هيج الفرحه ماسايعتني يعني اكدر امشي واترك الكرسي وجانت هديه شفائي دشداشه كشمير ستوه نازل تركوازي مشجر اشجار وردي وحجاب الاميره هم ستوه داخل.

يوم من الايام حلمت كانو زايره ضريح امير المؤمنين علي ع وحاضنه الضريح وابجي كعدت سولفته لامي كالت خلص نروح نزور صار هوايه مزايرين وكالت لابوي وافق اني ستوني يسموها انجل يعني اخطي خطوات المهم اجرنا سيارة للكراج ومناك صعدنا للنجف جانت كل الناس تباوعلي شلون لازميني اهلي من اديه واني رجل اقدمها ورجل اسحلها كوة بس ماهتميت بنضراتهم لان خلص رب العالمين نضرلي بعينه التي لاتنام
حركت السياره وانطلقنا للنجف مدينه ابو الحسنين ع وصلنا كانت السيارات توكف اباب الصحن العلوي مو مثل هسه كبل نزلنا من السيارة دخلنا للصحن العلوي مشوني اهلي للامام اول خطوات من تهب رائحه الصحن والعطور السماويه تفتح النفس علاج نفسي فضيع وصلنا لباب الي يوصل للضريح...

كلت لامي :اتركيني اني الزم الباب وامشي.

امي: خاف توكعين؟

غادة: يمي ابو الحسن مااوكع 

لزمت الباب جان عباره عن باب جبير مرصع بالذهب مغطى بالزجاج اليده مالته فضيه الشكل

دخلت وفرغت كل همومي شاكيه باكيه شاكره لهذا الانسان العظيم لشأنه العظيم عند الله عز وجل خلصنا زيارة وكعدنا بالصحن الشريف حتى نتغدا جانت امي جايبه وياها اكل عبارة بتيته مسلوكه وبيضات وخيار جانت اكله فاخره بالنسبه النا كعدنا ناكل واباوع للعائلات شلون مجموعين كل عائله وحد ومخلين كبالهم سفرة اكل واشكال الاكلات دولمه ودجاج وعصاير وبرياني اباوع لسفرتنا شكد بسيطه حمدت الله على كل حال يكفي الصحه الي انطانياها رب العالمين لمينا اكلنا وكمنا نكمل طريقنا للكوفه وكربلاء .. زرنا باقي المراقد الشريفه بس تعبت كلش لان بدون كرسي والمشي تعبني وتعب اهلي لان يمشوني خطوه خطوه رجعنا لبيتنا...