وعصفت بنا الاقدار... البارت الواحد والثمانون
للكاتبه زهراء ( روزايه)...
وشنهو ضنّي ؟
الچنت اتانيهن جزنّي !
لا لگيت شويّه منها ولا لگيت شويّه منّي !
ضايع
وكل الوجوه استغربنّي !
.....
عقيق.. مااستوعبت شيحجي الخاولي يمي بسرعه خليته على راسي وطلعت اركض حافيه بس شافني سكت وحاول يغير الموضوع كتله وين السبع ؟؟
اواب.. عنده شغله كال اتأخر فوتن جوه ويأشر بعينه لفجر حته تسكت
عقيق... سمعتكم لاتجذبون عليه وين السبع بالسجن؟ منو سوه هيج بي كول اواب بداعه امك
اواب.. والله ماادري ابوي خابرني كال اجيكم فوتن وعلى كيفج موزين على صحتج هسه نفتهم السالفه يجوز اشتابه لاتخافين قابل صغير السبع هسه ضرغام جاي بالطريق ...
عقيق.. طبيت دموعي تجري تلكتني لبابه وفجر لازمه ايدي واواب بالاستقبال ربي لاتفجعني بي اخذ عمري ولاتفجعني ساعه وحده مااتحمل افاركه
لبابه.. كولي يالله هسه نفتهم شصاير واكيد غلط شنو حبوب شنو هالسوالف اهدي عقيق موزين عليج
عقيق.. شلون اهدء والسبع مااجه هو مايعوفني والله
اموت وراه لبابه كولن راح يرجع اخاف صدك ياخذوا
خاف واحد تهمه فجر احجي ليش ساكته موزين السبع موو؟؟
فجر.. ياما بالسجن مظاليم !!! تنهدت ومسحت دمعتهه
تعالي عقيق الله من يخلقنه يكتب اقدارنه على جبينه
وشمكتوب انشوف اكو قضاء واكو قدر واحنه بدعائنه نگدر نغير القدر
عقيق..لاتحجن هيج كولن مابي شي والله هو كالي مشتاقلج وراح اوصل هو وصل قريب شلون ياخذوا منو يسوي هيج جبار وبالسجن الله عليجن كومن انصلي لايبات بره واحنه وحدنه
لبابه.. فدمره عقيق ماتقبل تسكت حته كلبهه اوجعهه ومانعرف شننطيهه مانعرف شكو واواب مايحجي يكول ماادري اندك الباب حيل طبت ام جراح عيونهه حمر حضنت عقيق وهاي رادتهه حجه وكامت تبجي...
للصبح احنه كاعدين فجر وعقيق بدون السبع لاشيء
وحده نايمه على رجلي ووحده على رجل ام جراح
ويبجن ووحده دكول لثانيه لاتبجين هسه يرجع.
صار الصبح وعينه على الباب اواب طلع حته بدون ريوك من الفجر وبس نسوان فجر تخابر على جراح مايرد اعصابنه تلفت وعقيق بدت تنهار حته صوتهه انبح من البجي والعياط وبس تكح وتصيح كلبي ينغزني ...
ب10 صارت واحنه من البارحه لا اكل ولا شرب اجه الشيخ ياسين وطلعنه كلنه بدموعنه نسأله وهو يكول بويه على كيفجن ترى السبع مايرضاهه اذا مريته تگدر خاطرهه
ام جراح.. فهمنه ياشيخنه زلمتنه بالسجن ومظلوم شنهي الصاير؟؟؟
ياسين... ماندري من راجع موكفته سيطره ومبينه اخباريه واكو علاكه حبوب وابر ممنوعه بالجنطه وحته صندوگ مخضر وهو يكول ماتركت سيارتي غير بباب البيت بليل البارحه والصبح طالع بيهه ...
ام جراح.. وشفتو لوماخلوكم ؟؟
ياسين.. من البارحه لليوم ماخلونه الضابط موخوش ادمي ومبين مرتشي وحته ماقبل يرفع الاوراق للقاضي يريد يماطل بيهه بس ابو ليث وصل ب9 وخلانه انفوت انشوفه
ام جراح.. شلونه زين؟
ياسين.. زين السبع مؤمن بكل ابتلاء يعتبره نعمه بس باله
يم مريته وصانه بيهه وكال صحتهه ديربالكم عليهه وفجر ولبابه امانه عدنه ....
ام جراح.. سوده عليه ياوليدي وانت بالضيم وتفكر بينه
سمعتي ياعقيق ترى اذا سمع بيح متخربطه يزعل ويضوج وتعرفي يرتفع ضغطه العليج تكومين تصلين وتدعيله
ياسين.. بويه لاتخافين اخوته مايعوفو ابو ليث تسودن على الضابط وراد يضربه وجاب امر من القاضي بنص ساعه وطبينه شفناه وحته اخذناله اكل وملابس واكو ناس نعرفهم بالسجن خوش ناس الله يفرج عنهم ..
عقيق.. ادري يقنعوني بالحجي وادري السبع بورطه
وماعدنه احد غير الله والدعاء بجيت ولطمت
وكلبي رجع بنفس الالم ومابرد كلبي وماشفت نتيجه
يومين واحنه على نار افوت للغرفه اشبع بجي حته علاج
مااخذ اشم بهدوه واحضن بمخدته شلون هاي الليله الثالثه وانت بعيد عني ماسمعت صوتك ولا سلمت عليه ولا كتلي شلونه كليبج ؟!! ماسألتني اكلتي؟! خوماضايجه!! اطلعج شويه تفترين!! بنيتي عقيق من تضوجين يتگدر خاطري خليني اشوف ضحكتج الحلوه
وينك ياجمره ابوس ايدك لاتعوفني وحدي اني انتهي بدونك اني منو الي وين اعيش وين اروح شلون اخلي راسي على المخده ويصبح عليه صبح وانت ماكو وصوتك مختفي من البيت !! شلون ابجي وحدي وماالكه ايد تمسح دمعتي وتضمني
ليش هيج اني وياك جبناهه تعب بتعب ليش انت بالذات
هيج المصايب على راسك انت الصايم والمصلي والكافل ايتام والتنطي من ايدك والله لسه ماادري شكم يتيم كافل والمن ينطي صدقه وشكد هذني كلهن ماشفعلك؟! هلكد الله يحبك ويبتليك يختبرك ويقلل من ذنبك؟؟
مسحت دموعي وطلعت على صوت فجر وهي تصيح عقيق اجت رانيا طلعت خشمي وعيوني مورمه بس شفتهه حضنتهه ياربي ماعندي احد لا ام ولا خاله وين اذب حملي والمن اشكي وابجي بحضن منو؟؟
رانيا.. كافي يابنات اذا بجينه ماراح يتغير شي والله
ندعي الله يستر وينجي من هالكرب مبينه مكيده والضابط معاند ومتلاغي ويه ضرغام والقاضي بعد احقر ناس كلهه حرام بحرام ويكولون شايفين واحد من ربع جبار يحوم يم المحكمه ...
عقيق.. الله ينتقم منه شيريد منه مودمرنه موكافي السبع
بعين وحده ونظرهه ضعيف موكافي السواه بي وحرمه
من اهله وكتلهم شوكت الله يعاقبه كليلي شوكت ؟؟
رانيا.. الله ماينسه عبده هسه بهذا البجي مانغير شي
كومن اقرن قران صلن على الاقل نفوسجن تهدء
بين ماتنحل ...
لبابه.. اسبوع مر ومر الثاني ومر الثالث واليوم صار شهر
والسبع بالسجن وعقيق حالتهه للاسوء وفجر ماتحجي بالعه اللسانهه وضرغام وجراح ماخلو مكان ماركضوا بي بس المعروف تهمه الحبوب خطيره وتاكل اقل شي 7 سنين هذا الي افتهمناه من ضرغام ...
ماخذين عينه من السبع يتاكدون خاف يتعاطى وكايلين
لزمنه مجموعه مراهقين وبعدين طلعوا جذب مالازمين
اثنين ولد جايين مسلمين نفسهم وكايلين السبع يبيع النه
كولت ضرغام هي دوله وقانون ويمشون على الادله والاعترافات والظاهر السبع راح بيهه..
هذوله المراهقين هم سجنوهم واصلا متسولين حته اهل ماعدهم الظاهر الاحزاب والماعدهم مخافه الله يستغلون هيج شباب وتاليتهم للهاويه الي ينسجن والي ينتحر وغيره وغيره ياما لفت المقابر شباب مظلومه
طبيت للغرفه اريد اصلي لگيت فجر ساجده طولت بسجودهه هواي واني كاعده اباوعلهه رفعت راسهه وهي مغمضه عيونهه ودمعتهه تجري ماقاطعتهه واني اباوعلهه شويه وكامت جان توكع ...
كمت اصيح اجت رانيا تركض ذبينه عليهه مي انتبهت
ومن هذا اليوم صارت فجر من تضغط على نفسهه تحس
لو يتهيئلهه شي تتخربط وتتعب من كثر الضغط النفسي...
مرجعه راسهه على الكنتور وكالت السبع مايطلع منهه
صحنه فال الله ولافالج كالت مايطلع اني شفته ينسجن
البارحه هسه يحكمو وهسه نشتت وراه حته انتي يالبابه
تصير شوفه اختج حسره عليج
جانت تحجي وتباوع بالفراغ ملامحهه تعبس وتنفتح
من جديد هزت راسهه وكامت تلزم الحايط يله تمشي
ياربي تعبنه شوكت نرتاح اذا فرحنه اسبوع ندفع كفارته
شهر ...
....
2016 /12/3 الساعه ب11 الظهر جنت واكفه اسوي غده وفجر وعقيق بالدوام كوه راحن بس هاي سنه اخيره
وحرامات تروح رغم سوء صحه عقيق بس خاف يترقن قيدهه بالغياب ...
رانيا رجعت لبغداد انفتح الباب اجن البنات بعدهن
هستوهن يبدلن وصوت ام جراح وهي تصيح يايمه
يالسبع اويلي على اليتيم المتعوب طلعنه نركض
هي والشيخ ياسين جايين
ياسين وجهه اسود ومدنگ وعمتي كاعده بالطرمه تملخ
بنفسهه لزمت عقيق وكالت عمتي هااا ولجن صفيتن
من ايد لأيد راح عزجن وسندجن راح الحاميجن
وصفيتن يابنات ساهره وجن...
السبع انحكم 6 سنين ولجن 6 اسنين ماانشوفه
ولا نسمع صوته اشفت من عمرك يعمه وانت
من ضيم لضيم وتاليتهه تخلصهن بالسجن مظلوم
حسبي الله ونعظ الوكيل بيك ياجبار عسه نهايتك
نهايه المطرود من الرحمه...
لبابه.. ماانحس غير عقيق توكع بالكاع مااتذكر شي
من كدما جنه مصدومين ومفجوعين غركناهه بالمي
يله انتبهت واحنه نبجي بس فتحت عينهه تخبلت
تركض مثل المجنونه وتصيح لاتجذبون عليه السبع
مايعوفني والله مايعوفني 6 اسنين مايعوفني وحدي
اخذوني اله ابوس ايدك شيخ اخذني ...
ياسين.. يابنتي موهيج الحجي بجي وصياح اسم الله
علي موهيج كومن من الكاع وكولن يالله لابيدج ولابيدي
ناس ماعدهه مخافه الله اخوته مايعوفو هسه ضرغام يشوفله واسطه ويرفعهه تمييز بس اذكرن الله وادعن...
لبابه... من هذا اليوم راحت عقيق وفاركتهه الضحكه
اذا واحد كالهه شلونج تبجي انطب لغرفتهه نلكاهه حاضنه مخدته ومغركتهه بدموعهه لو فجر الكطعت الاكل
وكوه حابسه دمعتهه ...
اسبوعين مرن بعد الحكم الكل يسأل علينه الكل يتفقدنه
وره الاسبوعين قلت جياتهم كام يمر اليوم مايندك بابنه نحتاج مسواك لو شي محد يمنه ونستحي انخابر
بيوم منهن علاج عقيق خلصت ومحد يمنه ووحده تباوع
للثانيه وتالي خابرنه الشيخ جابلهه...
بليل تجي ام جراح تبات يمنه ومرات ماتجي تجي
ام اواب اسبوعين فقط بدت ملامح الذل تنرسم على وجوهنه كل اليدخل بيتنه يشوف كسره يتامى
وحده تباوع بوجه الثانيه...
رحت للدوام تعبانه حيل امشي ودموعي تجري على حالتنه ماكو وحده بينه قويه افراك السبع هدنه كلنه
موجان جرح جراح والمريت بي بكفه بس هسه فراك السبع بكفه ثانيه غطت على كل حزني...
جنت كاعده بالمكتبه دك تليفوني اسامه فتحت خط
كال وين انتي كتله بالمكتبه كال اطلعي اخذج لمكان
صرت احتاجه بكل وقت اذا هيج ذره حزن وتفكير
تصيبني اركض احجيله ...
طلعت من المكتبه تلكاني بالطريق رحنه للسياره
وطلعنه من الكليه التفتت علي كتله وين تاخذني
اسامه.. اشوفج بيت اشتريته اريد نسكن وحدنه
مااريد يم اهلي احسن
لبابه.. ليش؟؟
اسامه.. حلو الانسان يستقر اني عندي خير من الله ليش اكعد يم اهلي واخويه الجبير بلبيت نتقيد
لبابه.. اسامه ترى فاهمتك اني احجيلي بشنو تفكر؟؟
اسامه... الصراحه لبابه ماعاجبني وضعكم يوميه واحد
يبات يمكم الي اكدر اعلي اقدمه راح اقابل السبع
واحجيله اريد اقدم زواجنه وانتي واختج ماتظلن هيج
لبابه.. اسامه راح يقبل السبع نتزوج بس ماراح يقبل
تعيش فجر يمنه واصلا فجر ماتقبل وحته اذا صار
لاتنسه مرته عقيق ومستحيل فجر تعوفهه ...
اسامه.. بهاي الحاله شنو الحل اني ماعندي شي وخطوبتنه هذا الشهر الرابع ..
لبابه.. التقي بالسبع وهو شيكول اوافق وصلنه للبيت
نزلنه بيت صغير مرتب بس بعيد عن اهله ومنطقه جديده ماادري شلون اعيش وحدي وبعيده عن اختي وعقيق
افترينه بالبيت وانسولف اسامه بالنسبه اليه امان
وملاذي الوحيد
من ردنه نطلع شافني شكد تعبانه لزم ايدي وصرنه قريبين حيل وجه بوجه استحي اباوعله لان علاقتنه
بحدود وغير مره وحده باسني بالمكتب مد ايده على خصري وضمني لصدره حيل
شمني بقوه وهو يكول شكد احبج يالبابه احب روحج
وهدوئج ورفع حجابي من جهه رگبتي وباسني
برقه كزبر جلدي وميلت راسي كل احساسي وياه مندمجه وياه بالكامل حته اذا تذكرت الماضي بسرعه
اتعوذ من الشيطان بس مايأثر بمشاعري...
رفع راسي بايده واخذ شفايفي ببوسات رقيقه
مداريني حيل يعرف كل قصتي يعرف من شنو اخاف
ودائما يكول انتي شفافه لازم نتعامل وياج بدقه ...
حضنته حيل واني احمد الله واشكره على النعمه
الي وهبهه الي حاسه بحبه بحنانه حاسه يعشقني
مدللني كلشي بي حلو وراقي النعمه الي عندي
وهي تأقلمت ودست على شي اسمه ماصي هاي
كفيله تخليني اسجد شكر لله...
اخذ ايدي وطلعنه وصلني للبيت قبل لا انزل
شال ايدي باسني من كفي وكال ليش ماتعبرين
عن مشاعرج ابتسمت بخجل وكتله موتعرفني
استحي عليك بداخلي الحجي مايأثر...
ضحك وكال اذا احتاجيتي شي خابريني
سلمت علي ونزلت طبيت لكيت عقيق وفجر جايات
عدهن امتحانات اخر السنه البيت كئيب
الروح طافيه بيه وايامنه تمشي بطيئه بدون معنى...
وره ايام اجه الشيخ ياسين بليل ووياه ام جراح وام اواب وعاصم عاصم الوحيد يجينه ويتسوك النه بس هذا
من ولد جبار براسه حظ كعدنه يمهم وبده يحجي
ياسين...
ياسين.. يابناتي كعدتكم هنا مالهه معنى ودفع ايجار
تريدن تردن لبيتجن يم جراح تريدن تجن يمي
بس هنا ماتكعدن السبع اليوم رحتله وكال توصلهن
كلامي كدامهن هالخيارين
لبابه.. اني ماارجع لذاك البيت
ياسين.. تجن يمي بين ماتزوجين والبنات يرجعن
لبيتهن
لبابه.. ان شاء الله نحضر غراضنه ونجي
عقيق.. اريد ازوره الله عليك شيخ خليني اروح
ياسين.. ان شاء الله المواجهه الجايه اخذج هو هم كلبه طاك عليج ...
لبابه... لمينه غراضنه ورحنه يم الشيخ ياسين ابيته
اااخ يادنيا شسويتي بينه يوميه بمكان من مات ابونه
لسه واحنه من بيت لبيت من مكان لمكان وتاليتهه
صفينه بدون والي وسند...
عقيق... اخذني الشيخ ياسين للمواجهه لبست نقاب
لان زلم هواي ودخلني بوجبه النسوان من وره الحديد
اشوفه ابجي وصوتي يسمعه البصفي وهو يكلي عقيقي
بنيتي حبيبتي روحي عمري المتعوب شلونج ياكليبي...
عقيق.. شلوني ياجمره شلوني شلوني بدونك
انكسرت بغيابك يا حبيبي يا ابو بيتي انكسرت
السبع.. ماتنكسرين راسج مرفوع اتسمعين كلامي
ماتنكسرين مدام مرت السبع ماينخاف عليج
بس توعديني تهتمين بصحتج وتفكرين بيه وتخلص الايام تدرين بيه اني قنوع وراضي بكلشي
عقيق.. جمره يوميه بمكان احنه بدونك مانسوه
يا حبيبي الدنيا لفت بينه
السبع... اتحملو تخلص هسه ياعقيق مااريدج تظلين هنا
على اعصابي قبلت بس ادري تأذين نفسج بس تقربي
شويه
عقيق.. تقربت على الحديد كال ارفعي النقاب شويه
خليني اشوفج تدرين هسه يله عرفت انه موبس احبج
انه ميت بيج صورتج بمحفظتي يوميه اصفن عليهه
واتذكر سوالفج
عقيق.. رفعت نقابي شويه اخذ نفس عالي وكال نزلي
اروح فدوه هالعيون اهتمي بنفسج واذكريني بدعائج
ازعل عليج اذا سمعت هامله صحتج ودراستج
انتهت الزياره ودموعي ماوكفت صحيح ارتاحيت من شفته وزين وحته حليان وسمنان وصاير ابيض ماكو شمس الشغل رجعت للبيت واحجي لفجر علي وهي
تبجي وياي وتسكت بيه ودكلي خلصن 3 اشهر وتهون عليه..
تجي ام جراح بين يوم يمنه لبابه انسانه ثانيه
ماادري تمثل لو صدك قويه كل حياتهه اسامه
وهو زين وياهه حته تسلم على ام جراح وتروح
للغرفه تقره لان مناقشتهه قريبه
جنه كاعدين وام اواب سألت ام جراح على مروه
ردت عليهه عمتي وهي دكلهه مااتوب لا والله
حته مرات اكول ماانقهر عليهه لان منين مااجيبهه مااتوب تعبت يا ام اواب تعبت منهه والولد كاسر ظهري اهدد بيهه ماتخاف واذا احجي لاجراح يكتلهه خلاص...
ام اواب.. ماتتعض هاي موراحلهه طير يخبل
شوكت تخلي الله بين عيونهه مو هجمت بيت البنيه
واخذته وراحت بحال سبيلهه شتريد بعد؟؟
ام جراح.. شحجي انتي مثل اختي سوالفهه ماينلبس
عليهه ثوب اجن البنات يشوفني قبل سالفه السبع
ونزلت مطبعه الرگبه والزنود انه من يمي استحيت
وبكلبي تحلفت بجراح يردهه ويشوفلهه صرفه لان جزعتني وادري غايتهه تغث لبابه
تالي بس طلعن البنات واسمع صياحهه ركضت واشوفه
يسحل بشعرهه يضرب براسهه بالحايط وتلاسن
فكيتهه منه وهي دكله اي حته اشوفهه على اساس رجلي
بي حظ ومزوركني مايدرون مايدبرهه داده غير رادت
تموت بيده وماتبطل اللسانهه
صح جسمهه طري وبيضه كلشي يبين بي طلعت
مدري شمسويه بالمكياج مااعرفه شسمته ورد
خدود مدري شنهي وحمره وتالي هو شايفهه من جاي
والبنات كاعدات وساكت ومن طلعت هاج عليهه
عايشه بالحيله سوت هاللعبه كلهه حته تغث لبابه
هي ماتدري بسوايتهه خلت لبابه تضحك على كرامتهه
وهاي هيج افك بيهه وماكو مايتقربلهه وهي متسودنه
اشوفهه ترش بلبيت ومن اسألهه دكلي تحصين وتبطيل
جراح مايريدني معناتهه اكو عمل الحمدلله انه مره جبيره
واقره قران واسال الله يحفظنه بس تاليتهه ابني يتسودن
شلون بيه اكله يموتهه ويطلكهه والولد متعلق بي
اسكت خاف تمرضه ماجاي تتعض من احاجيهه دكلي مو سحر لاتخافين...
ام اواب.. ليش هيج جراح اكعدي احجي وياه خلي يقتنع
صح غلط وتزوجهه بس لبابه راحت وعلى ذمه رجال
وزواجهه قريب خومايظل هيج غير تستمر حياته
ام جراح.. حجيت والله ودزيت على ضرغام اجه
وكعدنه وياه كال كلمتين غيرهن ماعندي تريد تطلك
اطلكهه مااريدهه اتزوجتهه باتفاق ويه خالهه ويدري مؤقت وبرضاتهه وامهه وافقت ماعندي اي شي اقدمه
الهه
ام اواب.. الله يهدي سرهم جراح راح يظل يعاني
لبابه لا اول وحده ولا اخر وحده راح تعيش وتخلف
وهو راح يظل ياكل بروحه وياريت مرته تتعض
ام جراح.. خيه جان يستخطيهه واكله يمه خطيه
من كدما تبجي على ابنهه بس يطب تكوم تبجي وهو
يستخطيهه لان محمل نفسه الذنب طلعت تمثل بس يطلع
تتجبرع وحمرتهه ومكياجهه وابنهه لسه ماطلعت سنته ..
عقيق.. همزين لبابه ماكاعده حته لاتحن لو تتاثر بالكلام
عفناهن وكمنه فجر طلعت بره واني رحت يم لبابه
اعرف فجر راحت يم اواب لان مرات اشوفهه تبجي
يمه وهو يكعد بالكاع ويتوسل بيهه تسكت...
فجر... طلعت اتمشه بالحديقه تطلع على البستان يصير
القصر كدامي شكد اكرهه واكره البي درت وجهي اواب
واكف ومرتجي على الحايط ويباوعلي كعدت بالعشب ومديت رجليه لاحت المي اجه بصفي كال موكافي
حزن يافجر ...
فجر.. مقهوره على وضعنه درسنه وراح نتخرج ومحد فرح النه لا ام ولا اب وهاي تاليتنه من بيت لبيت
اواب.. عوفج عن الموضوع كله خلينه نحجي بالجد
اليوم افتح الموضوع ويه ابوي اخطبج اذا كلتي لا
اخلي راسج بهذا الطين...
فجر... باوعتله بطرف عيني روح كول للسبع اذا قبل
اقبل واذا ماقبل هم اقبل....
اواب...ليش رفضتيني جان هسه عدنه 3 جهال
فجر.. مو بزونه اني رفضت السبع رفض لان ماراد
يدخل مشكله ويه العار
اواب..من رفضتي ثاني يوم رحت للسبع كتله اريدهه
انتظرهه بس كول الك عوفك من حجيهه لان ادري
بيج وبمشاعرج والصراحه احب عقلج هواي
كال الك هي بس جبار مايعوفكم وبعده بقوته
وراح يأذي فجر سكتت بس وراهه فجاه حصلت
بعثه للخارج. صرت بين نارين حجيت للسبع
ولابوي كالو روح وبالك بارد هي الك
فجر.. وليش ماراسلت حجيت ماخفت اتزوج
اواب.. لا ماخفت لان اخذت الكلام من السبع ومن سمعت
سويتيهه وصدك راح تزوجين موهاي اجيت اركض
فجر.. ليش اجيت
اواب... لان احبج احبج يافجر
فجر.. شكرا يله راح اروح لا تفقدني لبابه...
عفته وطبيت جوه لليل سواهه ابو اذان واجه ياسين
يخطبني رسمي منين يخطبني من لبابه ومخابر ضرغام
واسمع ضرغام يحجي ويه لبابه يكلهه كولي لهاي
ام اللسان حافظ دروبهه موتبيع ثگل هي تريده خلي تزوج وتخلصنه ...
قبلت بس ماعقدنه بعدنه اواب عنده مؤتمر ببغداد
كال اكمله يله وامه تريد تسويله حفله لان بس هالواحد
ولبابه بدت تجهز بنيشانهه ويجي اسامه ياخذهه
من الباب ويرجعهه من تدخل الضحكه على وجهه ويرجع يخابرهه سمعتهه دكله واني هم. .
فسرتهه اما واني هم احبك اما واني هم مشتاقتلك...
ضرغام... ليش ماكاويه قميصي
رانيا.. شوفلك خدامه اني مالي علاقه
ضرغام... هاااا هيج الحجي لعد شنو واجبج
رانيا.. اكو حديث نبوي مااتذكره بس الفكره المره
ماعليهه الخدمه بس الفراش ...
ضرغام... ميخالف اني اكوي وانطيني الفراش
رانيا.. وخر لاتلزمني لافراش ولاخدمه روح لحبيباتك
ضرغام.. وين اروح اقبال واتزوجت وسليمه اختفت
منين اجيب اصيح بالسماعه رجال كامل والكمال لله
ويدور على ثلاثينيه جاده
رانيا.. ملاحظ كل همك هاي السوالف
ضرغام.. ملاحظه صايره لغويه زايد وينرادلج
جره اذن امشي كدامي واشر بالمسدس احسن
ما اشوفج اخبالي
رانيا.. وانت هسه شنو
ضرغام.. اشو مستفلكه صايره لج رانيااا اكوملج
تركضين وراي موتيني تليفوني وعندج اخذج
وياي للدوام شلون بطلي هالحاله اذا اريد ادور
محد يلزمني بس موانتي الحقيره عندي
رانيا... لاتكول حقيره
ضرغام.. الصبر ياربي كومي اوكفي واحجي
شتردين سولفيلي
رانيا.. مرت صديقك الضابط دكول يرحون يسهرون
ابيت وحده اعوذ بالله موخوش
ضرغام.. شوفي صح السانه زفر وشايف وعايف بس عمري ماخطت رجلي للحرام من جنت اعزب ماسويتهه
اسويهه هسه من عندي رانيا الخبله
رانيا.. قنعني!!
ضرغام.. اني اعرف شلون اقنعج
رانيا.. سحبني حيل وكام يبوس بيه وادفع بي ماانطاني
مجال هجوم مباغت حته راشدي خفيف ضربني على خدي كلما اكله وخر وهاي تاليتهه نايمه بحضنه وناسيه الزعله...
فجر.. ماردت حفله واحترموا قراري لان عقيق طافي
النور بوجهه مومال ادك واركص ودمعتهه بعينهه بس
اجه الشيخ عقدلنه محد غريب ولبست نفنوف قصير
تمنيت السبع موجود بس اراده رب العالمين فوگ كلشي...
لبسني الحلقه واني مدنگه استحي من امه وخالته موجوده شويه وكالت امه تعالي بنتي رحت لغرفه الحجيه جان كاعد سدت الباب علينه التفتت كتله
شنو هاي موبيت شيخ انتو شو علني؟؟؟
فجر.. اول مره!! اول تجربه!! اول حضنه !! شصار بيه
بدون مايرد عليه كام من مكانه وحضني حيل رجفت
اضلاعي بين اديه واخاف ابادله بس اصيح وخر اواب لا احد يجي...
ابتعد مني بس حركاته كلهه سريعه مو اواب الهادىء
خلاني على الحايط وايده بركبتي خفيفه ويبوس
بيه بشراهه لا ايد ولارجل عندي اريد اوكع من طولي
وهو مستمر واني اديه تخردلت
لزمته من قميصه بخفه لان اديه منتهيه وهو مد ايده
على خصري ضمني اكثر علي ورفعني ليفوك وسندني
بالحايط ورجليه ارتفعت عن الكاع وهو بمستواي
يطبع بوساته على كل وجهي...
مااحس شصار بيه شعور غريب سيطر عليه وكمت ارتعش بين اديه مثل السعفه واجاهه هوه عالي
ماادري شلون افترت بيه الدنيا وشلون بادلته بجنون
ومااحس على شي شلون خربت ووكعت بالكاع وفقدت
الوعي .....
.
.
.
يتبببببببببع........ متابعه ممتعه