Masayang ipininta sa lihang hawak ang ating larawan,
Ang bukas na ating itinakda ay sabay kukulayan.
Hawak mo ang sagwan at ako'y nakasulyap sa buwan,
Nasabi kong sang-ayon nga sa ating dalawa ang kalawakan.
Sabay din nating nalagpasan ang malalakas na alon,
Hinarap ang suntok ng masamang panahon.
Sinaksihan ng buwan kung gaano tayo katatag ngayon,
Naiguhit na sa isipang hindi lilihis ang pagkakataon.
Ngunit, sa katagalan ng paglalakbay, natagpuan ko ang kirot,
Barko ang pinalayag habang ikaw sa kaniya'y nakapulupot.
Kapitan akong nangangatal sa lamig na nangingilabot,
Habang ang mabayang buwan, saksi sa aking pagkalungkot.