#زوجي_الكبير
#الحلقة_53_والاخيرة
آقف علي حافة الهاوية أمام التعب علي وشك سقوط كا غريق 💔
#وصال
وخرت بصدمة و كلام أيهم ايمر في بالي كا صدى صوت يتردد " ربي ايرده ليا
ربي ايرده ليا
ايرده لي في بنتي الوحيدة يا أوس
ايرده لي في بنتي الوحيدة يا أوس
بنتي الوحيدة يا أوس
بنتي الوحيدة يا أوس "
وصلت عند الدروج و حسيت ب كيف الدوخة اللي جتني فجآة .. قربت قعمزت علي اول درجة و انا حاسه ب أنفاسي يتسارعن " ياربي كيف هكي
معقول هو عنده بنت .. يعني هو متزوج من قبل
بس رتاج كانت خطيبته " و تجمدت من الفكرة
اللي جت في بالي فجآة " معقولة ايكون صار
بينه و بين رتاج شي وهي " و بلعت ريقي" وهي
بنت غير شرعية " و فجآة هزيت راسي بقوة نبعد
في هالافكار " مستحيل قصدي أيهم مش هك
مستحيل طبعا .. لو متلا صار هك .. مستحيل أيهم
ايخلي بنته غير شرعية .. مهما صار كان حا يتزوج
رتاج حتي لو فترة بسيطة عشان بنته " و خديت
نفس عميق " يعني هو متزوج من قبل .. و عنده بنت
و انا .. و انا مانعرفش " و طول نزلن ادموعي بقهر حسرة معاش فهمت شعوري في هداك الوقت " الله ايسامحك يا بابا علي هالدوامة اللي حطيتني فيها كل يوم قاعدة نتأذي اكتر من اليوم اللي قبله " : وصال
و رفعت راسي و نلقاه أيهم
طول قرب مني و كان وجه مرعوب : خيرك تبكي شن صار .. و حط يده علي خدي : اتحسي في حاجة ؟؟ طول بعدت يده : مافيش بس هك حسيت ب ضيقة
أيهم ب حنان : ربي يبعد عنك كل ضيقة يا روحي .. و يمسك ايديا بين ايديه : بس انا عندي إحساس أن الموضوع أكبر من هك قوليلي يا وصال ؟؟ بعدت يده و صبيت و بتعصيب : مافيش شي يا أيهم ليش مصر ايكون في حاجة ما نقدرش يعني متلا نضايق من اللا شي حرام كفرت
و التفتت ركبت فوق نجري
وصلت لدار .. خشيت و سكرتها ورائي بالمفتاح و قربت قعمزت علي السرير دهشانة و قلبي ايدق ابقوة .. لحظات و حسيت بحد ايحاول يفتح
في الباب : وصال افتحي ؟؟ بلعت ريقي وانا نسمع في صوته ولا اراديا طلع صوتي مبحوح : مانبيش
أيهم بهدؤ : وصال افتحي خلينا نتفاهموا شن اللي صارلك فجآة
حكيت بتعصيب و بدون حتي ما انفكر في كلامي حسيت روحي تعبانة من الوضع اللي قاعد ايصير
واجد بكل علي بنت في عمري : اللي صار انك
تصدم فيا يا أيهم كل مرة .. كل مرة تصدم فيا
اكتر من المرة اللي قبلها .. في البداية انصدمت
بزواجي منك بعدها بعمرك بعدها ب جيتنا لطرابلس
عشان حياتك هنا
بعدها ب معاملة اختك اللي كانت زفته ليا بعدها بان كان في حد في حياتك قبلي بعدها ب اللي درته امعايا و وجعني و حرقني بعدها بأنك كنت متزوج
و انك عندك بنت .. عندك بنت يا أيهم .. و انا ما نعرفش .. كنت نحكي بصوت عالي ؛ تقريبا كنت انصرخ ماكنتش نحكي : انا انسانة راهووو و
و الله و الله و الله انا انسانة عند طاقة نتحمل لحد معين بعدها خلاص .. انا بس عمري 17 سنة .. 17 سنة يا أيهم .. و بصوت عالي : 17 حرام انعاني
هذا كله .. انا مادرتش شي في حياتي عشان انشوف هذا كله .. و ضحكت بهزو و شهقاتي يرتفعن و ادموعي ملن وجهي : أساسا ما لحقتش اندير شي
في حياتي .. و بلعت ريقي بغصة : انا معاش نبي ننصدم يا أيهم معاش عندي طاقة انعيش ظروف صعبة اكتر من هك .. انا تعبت والله تعبت .. مش قادرة
بالله عليك .. بالله عليك .. لو فعلا كيف ما قلت تحت انك خايف ربي فيا طلقني و ريحني .. طلقني يا أيهم معاش قادرة انعيش حياتي امعاك .. سألتك بالله
و بأغلي ما عندك طلقني
كنت نحكي بيأس لأن عارفة أن مش حا ينطقها لأن عارفة روحي نتمسك ب .. ب أمل مستحيل .. أمل النجاة من ها المعناة
بس كل توقعاتي تدمرن لما سمعت الكلمة اللي ماكنتش متخيله روحي اني نسمعها في حياتي ابدا
نطقها بصوت مبحوح كان واضح من كتمه لدموعه : انتي طالق يا وصال
حسيت ب خطواته يبعدن و قلبي اللي معاش حسيت بيه ايدق في صدري .. لا ايدق في اوذاني قعد .. قربت من الباب و حركت المفتاح عشان يفتح
و فجآة حسيت ب كيف السائل نزل .. بهتت و نصدم من الدم و طووول نشهق : ولدي .. و تطلع مني صرخة عالية .. معاش شلاني رجليا .. طحت و انا
انلم في رجليا و نسكر فيهن و نبكي : ولدي لا ولدي لا .. و بصوت عالي كان أقرب ل صراخ : ياااااااااربي
و دنيا ظلمت و معاش دريت علي شي
#حزينة_يا_حكايتي ... #دارين
نزلت من الدروج و كانت دنيا ظلام إلا من الجنان اللي امقعمزات فيه البنات
تنهدت و كملت طريقي للمطبخ نبي نشرب امياه عطشانة
و صلت للمطبخ و استغربت ان ضاوي جيت بنخش و ننصدم من الكلام اللي جمد الدم في اعروقي .. كلام ذبحني وانا حيه .. سمعته من فم عمتي ل ماما اللي واقفه جنب بابا و اعمامي و صبايهم اللي كانوا قاعدين : وصية المرحوم أن دارين تتزوج عزام ... #آية
تنهدت و انا نتكى علي ظهر الكرسي : يعني هذا اللي صار
أسيل بهدؤ : اها .. و شرطت الشيك
انا هزيت راسي : احسن ما درتي
أسيل بإستغراب : خيره المطعم فضى مش من العادة
انا التفتت وفعلا الدور التاني للمطعم فاضي نهائي
حتي من الشاب الموظف اللي كان واقف وراء المكتب
فجآة حسيت قلبي انقبض و جا اسمه بين اعيوني " يوسف السيوفي " : انا فضيته اصلا ما انحبش الزحمة
طول التفتنا بهتنا نا واعميمة علي اللي فجآة لقيناه امقعمز امعانا ع الطاولة و حط رجل علي رجل و ايدخن
أسيل بلعت ريقها : انت
يوسف بإبتسامة : أهلا بالعمة .. و التفت عليا
انا طول بعدت اعيوني و قلبي ايدق و انبهت حوليا و ننصدم بالمسلاحين اللي ملوا المطعم
طلعت من صدمتي بيهم علي صوته : و أهلا ب بنت خوها
بهتت فيه
يوسف بهدؤ و عينه في عيني : بس بصراحة الأسود مش لايق عليك بكل
انا #انصدمت : انت وقح .. قليل ذوق .. مش محترم
آسيل بتعصيب : آية
بهتت فيها و فطنت لروحي
آسيل بهدؤ : شن تبي يا آستاذ يوسف ؟؟؟ جا يوسف ب يحكي و ايرن موبايل عمتي
يوسف بإشارة : ردي و حا تعرفي .. و بالمرة افتحي المايك
بلعت أسيل ريقها و هي اتبهت في المتصل : ل لا مافيش داعي
و جت بتسكر و يسحب يوسف منها الموبايل و يفتح الخط و المايك .. جت اعميمة ب تسحب الموبايل و يرفع يوسف المسدس في وجها و اللي خلاها تجمد
عهود ببكاء : انتي ليش اديري هكي .. عطيني نحكي مع آية لازم تعرف
عقدت حواجبي بإستغراب و خوف من كلام عهود و بهتت في اعميمة اللي كانت امطبسة و ما حكتش و جيت ب نحكي
عهود و هي تشهق : حرام عليك اياد الله يرحمه غلط واجد في حقها بس صدقني كان آخر وصية له أن آية اتسامحه
حسيت كيف البركان تفجر فيا .. و صوت عهود يتكرر " اياد الله يرحمه
اياد الله يرحمه "
عهود : انتي مالكش الحق تحرمينا من آية و تمسحي ارقامنا انا و بوها و ماما بسمة و اتحطينا في الحظر كا أرقام غريبة .. مالكش الحق آية اختي
و اتجي بين اعيوني صورة عمتي وهي تأخذ مني في موبايلي و مادرتش ليا إلا قبل ما تطلع من المكتب و اتسيبني
عهود و هي اتكمل في كلامها بصوت مبحوح : صدقيني نقدر اندور مية عذر ايخليني انجيها غادي و انقوللها شن درتي .. ما اتخلينش انقول ل بوها
انك ما اتخليش فينا نحكوا مع آية .. آية لازم تعرف
أن اياد مات
و تقرب اعميمة تسحب الموبايل و اتسكر الخط
ماكنتش حاسه علي يد يوسف اللي كان يطرق ب صوابعه فوق الطاولة واللي توا يده بين يدي مسكتها بقوة : اعميمة
و ترفع أسيل رأسها : آية اسمعيني
و فجآة حسيت ب دنيا ادور .. حطيت يدي علي خشمي و كان ينزف .. بعدها معاش حسيت ب شي
... : الحمدلله علي السلامة ..وصلنا ل بنغازي
رفعت روحي بعدت كنت متمددة في الكرسي الأخير في السيارة .. و ابتسمت و انا انبهت من الروشن ل برا : بابا شن اسم المنطقة اللي حا نسكنوا فيها : المساكن
هزيت راسي و التفتت علي اختي اللي حاطة السماعات .. قلبت اعيوني من طلعتنا من الابيار
و الأخت حاطتهن
التفتت انبهت برا و انشوف مكان من برا سور كبير و شبردق من فوق : بابا شنو هذا ؟؟ التفت بابا علي اللي امأشره عليه و ايرد ايبهت قدام : هذا يا بنتي معسكر الصاعقة
كشرت : ما انحبهمش
بابا تنهد و سكت
رديت بهتت في المعسكر علي ما نطلعوا من الزحمة و اطب عيني عليه نازل من سيارة جيش و قميص الجيش حاطه علي كتفه و الدخان في فمه
دق قلبي و انا انشوف فيه .. عضلاته و غمزاته .. لحيته الكثيفة .. بلعت ريقي و فجآة اطب عيني
في عينه
انصعقت من لون اعيونه اللي كان زيتي اقرب للآخضر الهافت .. عجزت انعبر كان لون غريب
و يرفع حاجبه اللي مقطوع جزء منه
انصدمت و انتبهت لروحي و بهتت قدامي .. وانا حاسه ب نظراته عليا نزلت روحي تحت عشان انتواراء علي اعيونه اللي حسيتهن حرقني
تمددت علي الكرسي وتنهدت براحة .. غمضت اعيوني و فجآة نسمع دق علي الروشن .. رفعت روحي .. و نلقاه هو .. ايدق علي الروشن من الكرسي اللي جنب
السواق
فتح بابا القزاز بإستغراب : تفضل يا اوليدي
وحكى بصوته اللي دمر ما تبقى من خلايا عقلي : كنت بنقولك يا باتي لو بتخش للمساكن اطلع من الطريق هاذي لأن هاذي فيها حادث صاير قدام
فا امطوله علي ما تفتح
بابا ابتسم بهدؤ : بارك الله فيك يا اوليدي وربي ينصركم ان شاء الله
طبست و انا حاطة يدي علي قلبي و نسمع صوته وانا حاسه ب نظراته : ان شاء الله يا باتي
و يتحرك بابا ب سيارة من الطريق التانية .. رفعت اعيوني له و نحنا انمروا من جنبه .. نبي انشوف اعيونه من اقريب و نلقاه مبتسم و هو ايبهت فيا .. و صدمتني حركته وقت رفع يده و مررها
علي جبهته و نلمح الدبلة اللي فيها .. تجمد الدم في اعروقي .. حسيت بحاجة انكسرت داخلي .. كيف و عليش ؟؟ مش عارفة
كمل بابا الطريق ب سيارة
و حسيت بيد هزتني .. بهتت وكانت اختي اللي مبتسمه بخبث : اووووووو شكلنا اوقعنا
انا بنرفزة : فكيني من قلة الادب وا قلبي وجهك
قلبت اختي اعيونها و تأففت : مع اني ما قلت شي بس الحق عليا تعرفي و بعدين بشخصيتك هاذي ربي حا يبليك بحب واحد ايمرمدك .. و رفعت ايديها تدعي : يالله ياكريم يبليك ربي بواحد اتحبيه ايغير أم شخصيتك المستفزة هاذي باهي
و بهتت قدام
تنهدت و انا حاطة يدي علي قلبي
لحظة ضعف بس عجبني شكله بس .. حب هه لا طبعا نهدا هكي و نأخذ نفس عميق .. غمضت اعيوني نتنفس بعمق مرة تانية و اطب صورته بين اعيوني
طول فتحت اعيوني بصدمة .. مجرد هلوسة .. انسي .. انسي و طلعت السماعات و الموبايل و شغلت اغنية بصوت عالي و اتكيت لوراء انبهت في السماء
من القزاز الوراني .. و انا أنحاول نمسح في صورته .. شكل اعيونه .. لونهن المغري من بين اعيوني 💔 عيناكَ من أعظِم المَصائب جمالاً .
#النهاية🔥
لايك + كومنت 💚
رآيكم يهمني 🍃
انتظروني في الجزء التاني من رواية #زوجي_الكبير 💓
بعنوان ( #ابتليت_بيك)
#منقولة من صفحة_Kholoud_novels_عل_الانستا
#اتفاعلوا
#as_ab