သူမှလွဲ၍" Except Him " (BL-OC) Completed

Ep.27

အချစ်က ဘာလဲဆိုတာ သူမသိပေမဲ့
ကိုကောင်းကိုတော့ သူတို့ သားအဖနှစ်ယောက်နှင့်အတူ အသက်တွေကြီးသွားသည့်အချိန်ထိ ရှိနေစေချင်သည်။

ကိုကောင်းနှင့် အတူနေကြသည်မှာ
တစ်နှစ်တောင် မပြည့်သေးပေမဲ့ ကိုကောင်းကို အလွယ်တကူ ထိတွေ့လို့ရသလို ထိတွေ့လိုက်တိုင်းလည်း အသန့်ကြိုက်သည့်စိတ်တွေ၊ မထိတွေ့ ချင်သည့်စိတ်တွေက လုံးဝ ဖြစ်ပေါ်မလာပေ။

ကိုကောင်းနှင့် အတူနေခါစမှာ ညဘက်တွေဆို ကောင်းကောင်းအိပ်မပျော်နိုင်ဘဲ ခဏခဏ လန့်နိုးလာတတ်ပေမဲ့ ကိုကောင်းက သူတို့သားအဖအပေါ်မှာ အရမ်းကောင်းပေးခဲ့သလို ကြောက်ရွံ့ထိတ်လန့်စိတ်တို့ပါ မရှိတော့သည်အထိ ဂရုစိုက်ပေးခဲ့သည်။လပိုင်းလေးနှင့်တင် ရှင်မင်းသက်၏ အတွင်းစိတ်ထဲကနေ ကိုကောင်းကို ယုံကြည်လာရတော့သည်။

ထို့အပြင် သူ့မှာ မိသားစုဆိုလို့ သူကိုယ်တိုင် လွယ်မွေးထားခဲ့သည့် ခလေးငယ်တစ်ယောက်ကလွဲရင် ဘယ်သူမှ မရှိတာကြောင့် အခုလို သူ့အပေါ်မှာ အဖေတစ်ယောက်လိုရော၊ အကိုကြီးတစ်ယောက်လိုပါ၊အခုဆိုရင် ချစ်ကြောင်းပါ ဖွင့်ပြောထားတဲ့ ဒီအမျိုးသားကို သူ လောဘတက်မိပါသည်။

သူ့အနေနှင့် မိန်းကလေးတစ်ယောက်ကဲ့သို့ ခန္ဓာကိုယ်တည်ဆောက်ပုံ ရှိနေပေမဲ့လည်း ကိုကောင်းနှင့် မတွေ့ခင်တုန်းကအထိ မိန်းကလေးတွေကိုသာ စိတ်၀င်စားခဲ့တာဖြစ်သည်။ခလေးငယ်က သူလေးကလွဲပြီး တစ်ပါးသူကို အလေးပေးဆက်ဆံသည်ကို မကြိုက်တာကြောင့်သာ ဘယ်မိန်းကလေးနှင့်မှ မရှုပ်ခဲ့တာ ဖြစ်သည်။သို့ပေမဲ့ ကိုယ့်အကြိုက်ကိုတော့ ခွဲခြားသိနိုင်ပါသည်။

သို့သော်ငြားလည်း ယခုအချိန်မှာတော့ သူတို့သားအဖအပေါ် နွေးထွေးသည့် ချစ်ခြင်းမေတ္တာတွေနှင့် ပျော်ရွှင်စရာ မိသားစုဘဝလေးကိုပါ ဖန်တီးပေးနေသည့် ဒီအမျိုးသား​ကို လောဘတက်မိတာ မမှားဘူးဟု သူထင်သည်။သူတို့သားအဖနှင့်အတူ အကြာကြီး ရှိနေစေချင်သည်။ရှိနေဖို့ကိုလည်း နေ့ရက်တိုင်းမှာ ဆုတောင်းနေမိသည်။

ဒါပေမဲ့လည်းပေါ့ ကိုကောင်းကသာ သူတို့အနားမှာ မနေချင်တော့တဲ့အခါ ရှင်မင်းသက်အနေနှင့် ဆွဲထားမှာမဟုတ်။မိမိဘက်က ဆွဲထားမှ မြဲနေမည့် ဆက်ဆံရေးကို သူ မလိုလားပေ။