ကျောင်းဆင်းခါနီးတော့ ယယ်ဂျင်းအတန်းရှေ့သွားစောင့်ရင်း အကျိုးအကြောင်း ပြောတော့ ပူပန်စိတ်နဲ့အတူ မဆိုင်းမတွဘဲ ထယ်ယောင်းနဲ့ တွေ့ချင်ပါတယ်ဟု ယယ်ဂျင်းက ဆိုလာသည်။ ယယ်ဂျင်း တောင်းဆိုတော့ ဂျီမင်းက ဖြည့်ဆည်းပေးရသည်။ ယယ်ဂျင်း အဆင်ပြေမယ်ဆို ဂျီမင်းက အနစ်နာခံရလည်း ပျော်ပျော်ပါပဲ။
ခပ်လှမ်းလှမ်းက ဆန်ပြုတ်ဆိုင်ရှေ့ရောက်တော့ ဂျီမင်း ကားကို လမ်းဘေးချရပ်ပြီး ဆင်း၀ယ်ဖို့ပြင်သည်။
"ယယ်ဂျင်း ခဏစောင့်နော်"
ဂျီမင်း ကားပေါ်ကဆင်းပြီး ဆိုင်ထဲလှမ်းအကဲခတ်ကြည့်တော့ လူသိပ်မများတာကြောင့် စိတ်သက်သာရာရသွားသည်။ ကျောင်းဆင်းချိန်မို့ လူများပြီး ယယ်ဂျင်းစောင့်နေရမှာစိုးသည်။ လက်မနဲ့ လက်ညှိးထိပ်ကို ကုတ်ခြစ်နေတဲ့ ပုံကိုကြည့်ရင် ယယ်ဂျင်း ဘယ်လောက် စိတ်လောနေမှန်း ဂျီမင်း ခန့်မှန်းမိသည်။ ရဲတက်နေတဲ့ လက်ထိပ်ကလေးတွေမြင်တော့ ဂျီမင်း ရင်ထဲကလည်း ဆစ်ခနဲ ဆစ်ခနဲ။ စာမေးပွဲအောင်ဖို့တောင် ဆုမတောင်းတတ်တဲ့ ဂျီမင်းက ဆန်ပြုတ်မြန်မြန်ရဖို့ကိုတော့ လက်နှစ်ဖက်ယှက်ရင်း ဆုတောင်းရသေး။ ကြာသွားရင် ယယ်ဂျင်း လက်ကလေးတွေ ဒဏ်ရာရမှာစိုးလို့လေ။
ဂျီမင်းကို စောင့်ရှောက်တဲ့ နတ်သိကြားတွေက သဘောကောင်းသည်ထင်သည်။ ခဏအတွင်းမှာပဲ မှာထားတာရလာတဲ့အခါ ဂျီမင်းက ဆိုင်ရှင်ကို ကျေးဇူးစကား အခါခါဆိုရင်း ကားဆီ ခပ်သွက်သွက်ပြေးလာခဲ့သည်။ ကားပေါ်ရောက်တော့ ထင်ထားတာထက် ပိုမြန်မြန်ရောက်လာလို့ ယယ်ဂျင်းက ကျေနပ်ပြုံးနဲ့ တုံ့ပြန်တဲ့အခါ ဂျီမင်း ရင်ထဲ စမ်းချောင်းလေး ဖြတ်စီးသွားသည်။
အကွာအဝေးတွေကိုသာ နှုတ်လိုက်ရင် ချစ်ခြင်းတရားတွေက ပျော်ရွှင်ဖွယ်ပါ~
ထယ်ယောင်း တိုက်ခန်းဆီရောက်တော့ ယယ်ဂျင်းခြေလှမ်းတွေကပဲ မြန်နေတာလား ဂျီမင်း ခြေလှမ်းတွေကပဲ မသိမသာ နှေးသွားလားမသိ။ ဂျီမင်းက ယယ်ဂျင်း အနောက်မှာကျန်ခဲ့သည်။ ဓါတ်လှေကားက အထပ်တစ်ထပ်ရောက်တိုင်း တိုးသွားတဲ့ ဂဏန်းတွေကို ကြည့်ရင်း ဂျီမင်းရဲ့ တိတ်တခိုး ချရတဲ့ သက်ပြင်းအရေအတွက်လည်း စိတ်လာလေ။ ပြောင်းသွားတဲ့ တိုက်ခန်း လျှို့ဝှက်နံပါတ်ကို ယယ်ဂျင်းအတွက် ဖွင့်ပေးရတဲ့အခါ ဂျီမင်းလက်တွေက တုန်တုန်ယင်ယင်။ ဒီတံခါးကို ဖြတ်သွားပြီးတဲ့အခါ တစ်ယောက်သူက သူချစ်တဲ့သူရဲ့ ရင်ခွင်ထဲရောက်ပြီး တစ်ယောက်က အပြီးတိုင် ကျန်ရစ်ခဲ့ရတဲ့သူဖြစ်မှာ။ ကျန်ရစ်ရမယ့်သူဟာ ဂျီမင်းကိုယ်တိုင် ဖြစ်နေတဲ့အခါ ကိုယ့်ဆုံးဖြတ်ချက်အတွက် မချင့်မရဲဖြစ်မိလာလေပါပဲ။ စိတ်ထဲမှာ ကြိုတင်ပြင်ဆင်ပြီးသားပေမယ့် တကယ်တမ်းကြုံရတဲ့အခါ နှမြောတဿစိတ် ဖြစ်ရပြန်သည်။
VOUS LISEZ
In a Long Dream
Fanfictionတစ်ယောက်တည်းမက်ပြီး တစ်ယောက်တည်း ဖြိုဖျက်ပစ်လိုက်ရတဲ့ အိပ်မက်ပါပဲ... Kim TaeHyung x OC
Episode 16
Depuis le début