قصص المشرحة

قصص المشرحة الحلقة الثالثة

مساء الورد🌹و الجمال عليكم و روعة الموت و حكاياته😍

**قبل ما نبدأ عشان الأسئلة المعتادة حابب أثبت نقطتين ☝️
الأولي : إن الأسماء و الأماكن متغيرة
و التانية : إن جميع الصور معدلة و مفلترة و مموهة و مغيرة الملامح ولا يمكن لأهله حتي معرفته...
مستني بأ أسئلتكم عن حرمة الصور و نشر اسماء الناس😁

الزمان: ديسمبر 2013
المكان: مشرحة زينهم
التوقيت: العاشرة والنصف ليلًا
اتصال هاتفى
- ايوا يا زفت
- إيه يا رياسة.. مساء الفل.. أنا عرفت إن انت النبطشى النهاردة بدلت مع هشام.... ، شفت يا رياسة.. قالوا فى المثل.. الخير على قدوم الواردين... عندنا حتتين من العصر و جالهم دلوقت قرارين تشريح... وفى واحدة منهم عليها قلق.. وأهلها كلهم برة قافلين الشارع بالعربيات ولا حنة الشيخ سعيد 😂... وشكلهم باشوات فى نفسهم كده
- طيب اقفل ياشعبان أنا هلبس واجى
لبست و توجهت للمشرحة... واضح إن الشارع مزدحم جدا بعربيات تبدأ من الـ Land Rover وانت طالع😏.... وواضح من الهيئات إن الشخصية ذات حيثية
فتح الشيخ سعيد الباب الخارجى، دخلت ركنت العربية وتوجهت للباب الداخلى وسط نظرات المحيطين....
شعبان واقف بيستقبلنى ع الباب بابتسامة شماتة مفادها اهو نزلتك فى البرد دا غصب عنك.... أول ما قربت قال بشماتة ما قولتلك يا رياسة...قالوا في المثل ( البلد دى أحسن من غيرها)... أصريت ماتاكلش معانا وتاكل فى البيت براحتك... قالوا فى المثل( اجرى يابن آدم جري الوحوش... هييجى جثث وهيطلع نأبك على فشوش)... وبعدين يا ريس دى نبطشية ليا أنا وانت لازم ييجى جثث... قالوا فى المثل... (اتلم المتعوس على.....) فجيت باصصله ومبرق😡... قالى اتلم المتعوس على مهيب الركن الجامد😂.... حاولت ماعلقش عشان مايسوقش فيها كالمعتاد.... زعقتله وقولتله انجز يلا وجهز الجثث و خلى ليلتك تعدى على خير.... وسيبته ومشيت فى اتجاه المكتب وسامعه بيقول.. يعنى أنا طالع ميتين أمى لوحدي... وجايله نبطشيته مخصوص عشانه.... و هو وبيزعقلى... ياخى قالوا فى المثل (اللي عنده دم احسن من اللى عنده فلوس) 😂
كنت وصلت لآخر الطرقة لفيت وقلتله انت بتقول إيه يا شعبان!😡... قال لا يا رياسة بقول قالوا في المثل (المنحوس منحوس لو علقوا على راسه فانوس) 😂
قلتله وهو مين المنحوس؟😡
بصلى بسخرية وهو بيقولى أنا يارياسة... أنا... اتفضل... اتفضل... 😂
طلعت السلم لبست بسرعة ونزلت.... دخلت أوضة المشرحة الخلفية أشوف ورق القضية فوجئت بشعبان قاعد هو والشيخ سعيد وشكلهم متخانقين... كالمعتاد😁
قولت فيه إيه... شكلكم عامل ليه كده ؟!... الشيخ سعيد رد ببراءته المعتادة وقال: شعبان مزعلنى ياريس😞.... شعبان مابيدلهوش فرصة.... بيلقط خيط الكلام على طول... وقال: شوفت يا ريس... شوفت... أهم قالوا فى المثل ( خيرا تعمل شرا تلقى)... يعنى أنا فضلت أقدمله نصايح زوجية عشان أخلى مراته تحبه وتسعده... وارسمله خطط،... و هو مابيفهمش.... الوصفة قلبت عليه.... ورمي عليها اليمين النهاردة.... يبقى أنا غلطان يا ريس ولا هو؟😏
بصيتله باستنكار وقولتله هو يا شعبان... هو😒
بص للشيخ سعيد وقاله: شوفت قالوا فى المثل (  القحــ ** تلهيك..... وتجيب اللى فيها فيك) 😂
ما زلت ماسك نفسى تماماً من الضحك على قصة قالوا فى المثل دى.... لإنى عارف انى لو ضحكت مش هنخلص...
لفيت وشى عشان ماضحكش.... وقولتله فين قرارات التشريح ؟؟
جابلى ورقتين مسنودين على كتاب.... قريتهم بسرعة وباخد الورقتين.... لقيت تحتهم كتاب اسمه الأمثال المصرية الشعبية وأسباب قولها 😂.... عرفت انها ليلة سودة ومش هنخلص يومين تلاتة جايين من قصة قالوا فى المثل لحد مافى حاجة تانية تشغله..... 😂
وكان نص قرارات التشريح كما يلى:
السيد/  مدير عام مشرحة زينهم
تحية طيبة وبعد،
مرسل لسيادتكم جثمان المتوفاة إلى رحمة مولاها / هند.ع.ع.. فى السابعة والأربعين من العمر، حيث تخلص الواقعة فى رصد الأهالى محاولة أحد الأفراد إلقائها فى قطعة أرض صحراوية على طريق القاهرة أكتوبر الصحراوي... وحين شعوره باقتراب الأهالى استقل سيارته.. وأسرع مبتعدًا ولم يتمكن الأهالى من رؤيته بوضوح ، الرجاء من سيادتكم إجراء الصفة التشريحية لجثة المتوفاة إلى رحمة مولاها؛ لبيان ما بها من إصابات، وسبب، وكيفية، وتاريخ حدوثها، وموافاتنا بتقرير طبى شرعى مفصل...