انقلاب حياة (روايات ليبيه)

الحلقة 7

انا واقفه مصدومه
جو شاب فكو يوسف علي الولد ورفعو الولد شبه ذايخ مش واعي علي روحه

جا يوسف مسك ايدي هو متعصب ويمشي بيا جيهة السياره
انا: وربي مانعرفه ولا عندي بيه علاقه مانعرفش من وجا بعد امشيت
يوسف: اركبي بس الباقي ساهل
انا:يوسف
يوسف: خلاص قلنا اركبي
انا سكتت وصلنا لي السياره وركبنا
قعد يوسف ايسوق بسرعه لعند اوقف علي محل مجوهرات
يوسف فتح القجر السياره وطلع افلوس : انزلي هيا
انا: عليش خلاص نبي انروح
يوسف: ماتعصبيني انزلي قلت
نزلت وانا خايفه بنموت كان يوسف عكس الي امبدري لمه كان ايهدرز ويضحك وتوا عاقد وجه واضح راقيله
خشيت انا ويا لي المحل وانا عقلي يرفع وايجيب علاش نزل
يوسف: ممكن اطلعلي تشكيلة الدبل
الولد: تمام
طلعله مجموعة دبلات
يوسف: تعالي اختاري
صبيت جنت يوسف ❤️: عادي اختار انت
يوسف ضحك: توا من بيلبسها انا ولا انتي
انا افرحت بعد ضحك: عادي انشوف ذوقك
يوسف: هيا اختاري انا انقولك حلوه او لا
الولد: عندنا تشكيلات جديده توا نازله في السوق عباره عن دبله رجاليه ونسائيه نفس النقش والتفصيل غير الرجاليه فضه والنسائيه ذهب حاليا مزال ماعرضناهن
يوسف: اعطيني انشوفهن
الولد: طلع ثلاثه ادبل وكان لون الفالصو ( الالماسه) اخضر و احمر واسود كانو ايجننو تشكيلتهم ملكيه
انا: محلاهم يهبلو
يوسف:اي
الولد: حاليا جبنا ثلاثة بس لو مشا سوقهم حا انزلوهم
يوسف: قعد ايشوف فيهن شن رايك اما لون عجبك
انا: الاخضر عجبني
يوسف ضحك: عاد اعيونك وتوا الدبله ربي ايصبرني وبس
انا ضحكت عليه: امال اختار ابروحك
يوسف: لالا خلاص لون الاخضر لون الاخضر شن تامري تاني ورفع الدبله وجربها في صبعي وكانت اكويسه كانها صنعوها لصبعي
يوسف:تمام مش ضيقه
انا: لالا اكويسه
جيت بنسلحها
يوسف: رد بالك اتنحيها انقص راسك
انا تحشمت: ما بتخلص انت
يوسف: توا انخلص من غير مااتنحيها
انا: تمام
يوسف: خلاص خدينها كم الحساب
الولد: 1200
يوسف: تمام وخلص
الولد: امعوضين ان شاء الله ربي ايهنيكم واضح حبكم لي بعض واعطا الكيس في دبلة يوسف بعد ماجربها
يوسف: تسلم وعقبالك
الولد ضحك: لا انا بصغاري 3
يوسف: ربي يحفظهم ليك
الولد:تسلم ويحفظك
اوقف جنبي يوسف وشافلي انبحت في سلسله
يوسف:عجباتك
انا متحشمه: اها حلوه (كانت عباره علي سلسله فضه بسيطه عليها فراشه اصغيره تهبل انحب الحاجات زي هكي 😍😍)
يوسف: ممكن تعطيني هذي
الولد: حاضر هذي صح
يوسف:اي
خلص يوسف
انا: شكرا ❤️
يوسف: العفو علاش تشكريني انتي خلاص وليتي مرتي اي شي يعجبك قولولي تمام
انا هزيت راسي
طلعنا انا ويوسف وكنت فرحانه ❤️
ركبنا في السياره
يوسف: اسف امبدري عصب عليك شكلي
انا: لالا عادي
يوسف: معاش تسلحيها دبلتك تمام
انا: تمام
اعطاني ويوسف الكيس
فتحته كانو لي زوز بكوات امتاع السلسله والدبله
فتحت امتاع الدبله القيت دبله يوسف فيه
انا: علاش مالبست دبلتك
يوسف: انراجي فيك انتي الهانم اتلبيسها ليا
انا: ماقلت انلبسها لك
يوسف ضحك: توا قلتها
انا طلعت الدبله من الباكو ومدلي يوسف يده كانت كبيره يدي طشه جنبه 😂😂😂😂
ولبسته الدبله
انا ضحكت: حتي انت لو سلحتها انقص رقبتك 😂😂😂
يوسف:اتردي فيها ليا يعني
انا: حاجه زي هك
يوسف: امرك مش حاتنسلح من ايدي نهائي لعند ايحطو عليا الثراب
انا: بعيد السو 💔
طلع يوسف ايهدرز لعند اوصلنا قدام القصر
يوسف: اليوم امك تدبحنا الساعه 1
انا: انت ماما مابتوصل فيك حي عليا انا بنحصل هزايب بس من وراك
يوسف سند راسه علي الكرسي: بس كان يوم حلو وان شاء الله باقي الايام احلى وايقدرني نسعدك وما نظلمك امعايا
انا ابتسمت وجيت بننزل
يوسف: راجي اترا عطيني تليفونك
انا اعطيته تلفوني فتحته كان منغير رمز كتب رقمه و اتصل شرين تليفونه
يوسف: انسجلا و لا انتي تبي اتسجلي ابروحك
انا: عادي زي ما تبي
يوسف: شن رايك انسجلو نحنا الاتنين نفس الاسم
انا: تمام
يوسف: يابنت انتي مافيش علي السانك خاطي حاضر تمام زي ماتحب لدرجه هذي هاديه ومطيعه هكي 😂😂
انا: مش هكي بس
يوسف: لا خلاص افهمتك شن انسجلو ياربي وقعد ايفكر في اسم
يوسف: شن رايك في فرصتي الجميله ❤️
انا: حلوه
يوسف: تمام وسجل روحه في تليفوني فرصتي الجميله
وحتي في تليفونه
يوسف: فعلا فرصتي الجميله
انا ابتسمت علي كلامه وكانه فيه امل انه بنعيش امعا احلى ايام عمري ❤️
نزلت كنت فرحانه عكس الاسبوع الي فاتت كان كله حزينه