مْنْوُعٌآت وُحِڪمْ آلُحسيَنْيَ

عـاشـوراء 💙

السلام عليكم
.

في كل عام تعودنا من يجي محرم يبدأ الاعلام بالاهانة والتسقيط
بس مو بطريقة مباشرة
يعني يجيبلك مقطع لسيد يكول الحسين الحسين عليه السلام سفينة النجاة حتى لو جنت غارق في بحر من الذنوب
(وهل شي واقع حال اهواي حتى من الوهابية الي مخلصيها شتم لاهل البيت او لاتباع اهل البيت عندما قرأوا او سمعوا بواقعة الطف تغير حالهم)
المهم يجيلك واحد (فيطي)
يكلك خلاص الشرب وغيرها حلال تكدر بعدين تتوب عنها والحسين يشفعلك عفية عليك سيد
.

وبالتعليقات تلكة المراهقين مأيدينه
هي مو هنا المشكلة بالله ناس عاوية وخليهم بحالهم
بس ذولة المراهقين غير همَ شباب المستقبل؟
يعني مستقبلنا بيد هيج ناس ابسط كلام من السيد ما فهموه"!!
المشكلة هسة صارت تلقائيا تطلع منهم أي معمم يشوفوه لازم يغلطون ويتجاوزون ومن تسألة يذكرلك بالكثير 3 معممين مو زينين
خوب احجي ع ذولة الثلاثة تتعاجز تذكر اسمائهم؟؟
لو جبان حضرتك
هو صح جبان اني عليمن اسال اصلا
جبان وعديم شخصية يتحكم بيك منشور 😂
.

المهم وبعد من الحالات
من تلكة شخص يكلك يووو انتم شبيكم مخلصيها تلطمون ع حادثة صارلها 1400 سنة والحسين بالجنة شيسوي بهل لطم
ع كيفك يابة هنَ شهرين بالسنة نحزن بيهن و10 اشهر خليناهن الك
هسة عاتبين عليك إلا تحزن ويانا؟
لو جابريك تلبس الاسود؟
هسة ليش نروح بعيد
القس او رجل الدين المسيحي يعني يلبس اسود دائما
حزنا ع عيسى ابن مريم عليهما السلام (لان حسب الدين المسيحي انو عيسى صُلب ومات)
ليش متحجي عليهم وتكول هو عيسى بالجنة لو هو عيسى اصلا ما ميت عليمن حزنانين لو مالها داعي حزنانين ع شخص هو مرتاح يم ربه
متكدر تكول صح لان احترام لدينهم؟
بس متحترم معتقدنا
لو تكول لا شعلية بيهم بس اني احجي ع شيعة لان اسمهم ع المسلمين
زين هو انت بنفسك تكول الشيعة مو مسلمين وخارج الاسلام؟
لو ها الشيعة يسمون نفسهم مسلمين وكدام العالم همَ مسلمين وجاي يشوهون صورة الاسلام؟
حلوو گلي انت شقدمت من صورة للاسلام حتى ضايج لا يتشوه؟
.

وهسة نجي للموضوع الي حير العلماء (علماء السوشل ميديا طبعا)
وهو موضوع التطبير هذا اليحلل وهذا اليحرم وصايرة بالنعال (اكرمكم الله)
.

نجيلها وحدة وحدة
المهم بعد اطلاعي شفت اكثر العلماء الي يأيدون التطبير ذاكرين تأيديهم هكذا
(نعم من المستحبات اذا لم يكن فيه اذى للنفس)
وما شاء الله هسة اليطبر يسبح بدمه وتاليتة يخسر المستشفى بطل بطلين دم لو خياط وشاش واصلا هي مستشفياتنا ناقصهن هل شغلات ويجي مريض وميلكولة هل ادوات ويموت
الحجي مو من جيبي ابوي يشتغل بالمستشفى وكال
لكن ع الطرف الاخر هناك مطبرين محترمين يكتفي بخروج القليل من الدم وهاي هي لا يحتاجلة خياط ولا بطل دم
وسامع انو يخرج الدم الفاسد او هيج شي بعد مدري بصحة هل معلومة
.

اما الطرف الاخر من العلماء الي نابذين التطبير فـ ما نبذوه الا بسبب الهمج الي ذكرتهم اني
الي شوهوا صورة المذهب بصورتهم الدامية والتطبير بشكل همجي"!!
وهم لان اهواي حجي صار ع شيعة من وراهم
لذلك هل علماء فضلوا ان المطبرين يحضرون مجالس حسينية ليتفقهوا قليلاً بقضية الحسين عليه السلام افضل من يطبر وهو جاهل
ركزوا وياي ما كالوا كل اليطبرون كفار
لذلك انتوا لتكفرون كل المطبرين لان متدري بالناس مكانتها عند الله شنو
(والاعمال بالنيات)
واذا تريد تطبر او تطبر بصورة محترمة لو لا تطبر
.

خل احجيلكم شوي ع الهمج مال تطبير حتى توضح الصورة
يمنا ناس (بمنطقتي)
يجيبون سلاسل يشبچوهن ببعض ومشكلين بيهن عدة سكاكين ويضربون ع ظهرهم"!!
ذولة تكدر تكول عليهم كفار لان سالفتهم متدري شتكول عليها 🤦‍♂️
.

اما بعد فـ اكو ناس تكول
-شهل تبذير بالاكل وبعدين ينذب بالزبالة لو تطون للفقراء مو احسن"!!
-زين خوية انتَ تدري شهر محرم هو الشهر الوحيد الي يكون فيه الفقير شبعان؟
وليش ينذب بالزبالة ماكو شي ينذب الي يوزع حريص انو يوزع لاكثر عدد ممكن غير مبالي بأي خسارة 👊
بعدين تعال اكلك انت منطي شي للفقير وجاي تحجي؟
-ها شسمة تظل هاي خرافات الشيعة الله اكبررررر 💣💥
.

وفي النهاية
ما السر في الحسين عليه السلام حتى رب العالمين يكرمه بناس تبكي عليه كل عام وكل شخص ع الكرة الارضية سمع بقضيته؟
وجعل اكبر تجمع سكاني هو حول مرقده الشريف
واوقف كل شيء بهذا الوباء الا زيارة الحسين عليه السلام
وجعل اكثر الاماكن وقاية من الوباء ونظيفة هي مجالس الحسين عليه السلام 
المعروف اذا تنطي شي لوجه الله الله راح يرده ضعفه لان الله هو الكريم
فكيف لا يجزي الحسين عليه السلام بكل هذا والحسين اعطى كل ما يملك في سبيله؟
والسؤال هنا
ماذا قدمت انت لله حتى تعترض لما قدمه الله للحسين؟
.

في امان الله ❤️
.