فاطمة:دي قوانين اللعبة.
تارا اتأففت وفي ادتها التلفون وقالت:هاك ضربت ليهو.
تارا شالت التلفون وهي عاضة على شفتها...سمعت صوتو وهو بقول ليها الو...
تارا:احم آسر.
آسر باستغراب:نعم في حاجة.
تارا كانت بتعاين للبنات وهي شايفة في عيونهم الحماس همست ليهو:ممكن تجي.
آسر استغرابو زاد:ليه في شنو؟!
تارا:اوووف ياخ ما ممكن تجي وانت ساكت.
آسر:والله انتي انسانة عجيبة....اسمعي هنا احسن يكون عندك موضوع لاني لو وصلت هناك وما لقيت عندك موضوع ما ح يحصل خير.
تارا بقهر:ياخي ما تملانا فقر ح تجي ولا لأ.
آسر:خلاص ما تصرخي متزفت جاي 😤.
قفلت الخط وهي بتعاين للبنات كيف كانوا بعاينوا ليها بشوية استغراب...بس طنشتهم...شوية كدا وآسر ضرب ليها تلفون وقال ليها هو برا...شالت نفس وطلعت ليهو برا...البنات كانوا بعاينوا ليهم بالشباك اللي كان الجوة بشوف البرا بس البرا ما بشوف الجوة...
آسر:نعم خير.
تارا كانت واقفة قدامو وهي مغمضة عيونها...استغرب منها وقرب عليها وهو يقول:هيييه مالك انتي؟!
تارا كانت بنفس وضعيتها...قرب منها زيادة وخت يدو في كتفها وهزاها بخفيف:بت تارا.
تارا فتحت عيونها وبسرعة باستو في خدو وجات عشان تمشي بس آسر مسكها من يدها ولفاها عليهو بقوة وهو مصدوم...رفع حاجب وقال ليها:دا شنو العملتيهو دا؟!
تارا بتوتر:عملت شنو انا ما عملت اي شي.
هز راسو وهو مبتسم بخبث:امممم تمام...طيب انا عايز اعمل حاجة.
تارا حست بقشعريرة سرت في عمودها الفقري من ابتسامتو والطريقة القال ليها الكلام دا...بلعت ريقها وهي بتقول:آسر بليييز لا.
آسر:وليه انتي تعملي وانا ما اعمل.
بدون شعور قالت:خلاص آسر لمن نمشي الغرفة بس اسي انا كنت بلعب مع البنات واتحدوني اعمل ليك كدا...يعني هم شايفيننا اسي.
آسر رفع راسو وعاين بالشباك وشافهم لانو الممر كان ضلام وجناحهم كان منور عشان كدا قدر يشوفهم...ابتسم وهو بغمز وبقول:الوعد في الغرفة ما تنسي القلتيهو.
شتمت البنات الف مرة ونفسها دغشلمية مرة...دخلت ليهم الغرفة واستلموها ليك...
_____________________________________🦋
جناح بكري...
بكري:في شنو أن شاء الله خير.
آسر:لالا خير بس كانت بتلعب مع البنات واتحدوها...اها ما قلت لي مالك منفسن من الصباح.
