منحرف واحببته

مشاهد إضافية من الرواية❤️

ليا فترة طوييلة منزلة المشاهد عالفيس بس تلبية الطلب فانزاتي نزلتهن هنا 💛

/
/

#مـنـحـرف_وأحـبـبـتـه
"
گـتـابـتـي #Koka_Saleh
"""""""""""""""""""""""""""""""""""""
"
"
#مشاهد_اضافية_طلبوهن_مني_الفانز_وقررت_وانحطهن_ومعاهن_فيديو_من_تصميمي😍
"
"
بعد كملو اتهدريزهم كلهم الشباب صبو وخشو للبحر ايعومو والبنات مشن شور شاليه سندس لان اقرب واحد مالبحر عشان ايدوشن لعيالهن وايغدنهم وايجهزن الغداء
""""
وبعد ساعة
البنات رقدن العيال في شاليه سندس وقررن ايتغدو مع بعضهم كلهم وقعدن ايوتن في الغداء وروحو الشباب ودوشو كل واحد في الشاليه متاعه وبعدها جو الشاليه دوسة وسيرجو و لقوهن موتيات غداء قدام الشاليه وقعدو يتغدو مع بعضهن
وبعد الغداء لمن البنات الحوسة وقعدن يغسلن في العوايز
والشباب برا اايأرقلو في ارقيله
البنات كملن الحوسة وطلعن مالمطبخ
سندس:شن رايكن نمشو انكسدو اشوية عالبحر
رانيا ضحكت:لالا انا راجلي يبيني توا
سندس:خزي ياسخيفة😂
رويدة:مازال عندكم فيت عيل واحد بعد اديري كيفي ماعاد اتلحقو بكل😢
رانيا:اس مااتخوفينيش يستر الله انا الثاني وخايفة بعد ايجي نهمل فيصل ونهمل روحي
سندس:اللي اتنظم روحها ووقتها مش حتهمل شيئ
رويدة:والله بعد يكثرو مش غير تمهلي روحك اصلا اتملي ومعش يقعد عندك جهد اديري شيئ
رانيا:باهي يادودي حتي انتي عليش مستعجلة همدي اشوية كبري هذوما وبعدها زيدي لكن هكي حرام حتي علي صحتك
رويدة:كان عليا هذوما ساديني بس شن بندير معاذ يبي عيال وايقولي انا وحيد وماعنديش خوت ونبي عيالي يكبرو معايا ويقعدو زي خوتي وفوق هكي عمتي طاير عقلها وكان تلقي كل سنة انجيبلها عيل
سندس:تفكير غريب والله اهو سراج وحيد هله ماعنده لا خوت ولا خوات وعادي موضوع العيال عنده يعني يحكيش هكي
رانيا تضحك:انتي بروحه مازال كيف العيل الصغير وايغار من عليوة اخري
سندس:خليها ساكتة غيرته من عليوة وغيرة عليوة منه مهبلتني قريب اتخليني بلا عقل كل واحد يبيني له بروحه
رويدة تضحك:مسكينة كلا انتي بس شفتن كيف معاذ وفيصل شافو للبنت وسراج المنحرف ماشافلهش بكل
رانيا تضحك:من قال المنحرف يقعد هكي
سندس:اس يابردات حبيبي معش تمى منحرف خلاص دا كان زمان توا معش ايشوف الا الدوسته
رانيا:مش منه اكيدة مخوفتيه بالسانك
رويدة:لا حبيبتي هذا حب حب لا خوف لا شيئ
سندس:ها سمعتي كلام الناس اللي تفهم
رانيا تضحك:باهي خلاص خلوني نمشي الراجلي 🤣
سندس:اجري بسرعة بالك ايخليهم توم بنات🤣
رانيا تضحك:باهي ياحقيرة وطلعت
سندس;هيا دودي تمشي معايا للشط دبين الشياطين راقدين
رويدة:اي راقدين هنودي واعي بنمشي انغيرله وانرضعه واشوي وبيعولي لخرين
سندس:باهي براحتك
رويدة طلعت ومشت هي ومعاذ للشاليه متاعهم
سندس طلعت لقت سيرجو مقمعز وايأرقل برا
سندس:حبيبي
سراج:عيونه
سندس جت وقمعزت عالكرسي جنبه
سراج بخبث:تعالي قمعزي عندي
سندس;حي والناس شن بيقولو
سراج:مراتي عادي شنو فيها كان قمعزتي عندي
سندس بخبث:باهي انجي انقمعز بس بشرط
سراج:عيوني لكي
سندس:تعطيني انجرب انأرقل زيك
سراج عقد حواجبه:عينك ماناقص الا هذي خلاص خليك في مكانك
سندس قعدت تضحك:مجنون تخيل انديرها
سراج:عشان نقتلك بعدها😡
سندس:عينك تقتلني😒
سراج ابتسم;نقتلك اللي ايقرب منك ياهبلة
سندس ابتسمت:شن رايك نمشو انتمشو عالبحر اشوية
سراج:والله كنت بنقولها لكي
سندس صبت;معناها هي
سراج صبى ومسك يدها ومشو شور البحر وقعدو يتمشو عالشط ويلعبو عالمية برجليهم وايبخو علي بعضهم في المية وبعد لعب وجو سمح سراج حظن سندس مالخلف
سراج مبتسم:تذكزي غرقتك هنا
سندس ابتسمت:في نفس المكان هذا
سراج:تعرفي اني ماكنت بنخش ننقذك لولا فيصل وكنت نبيك اتموتي
سندس:لو متت راه ماصار هذا كله
سراج:بس الحمدلله اللي نقذتك عشان هذا كله صار
سندس بعدت ايديه من عليه ولفت عليه
سندس:يعني لو ردن السنين بتعاود نفس التجربة معايا اخرى
سراج:اكيدة لان عمري ماندمت اني حبيتك بالعكس هذي احسن حاجة صارت معايا في حياتي كلها السنين اللي عشتهن معاك هذينا بس اللي ينحسبلي اما اللي قبلك كله مش حاسبهن حياة
سندس ابتسمت وقعدت اتشوفله
سراج مسك ايديها:تعرفي احسن حاجة دارها ليا جدي ان دار خطة زي هذي وجمعني بيك ديما ايقولي عندي لكي هدية مش زي اي هدية وطلع يحكي عليك وعلي حبك وبجد ان هداني أحلى هدية في الدنيا
سندس:جدي علي لو يقعد فيه منه في الدنيا اثنين اخرى تقعد الدنيا بخير ان شاءلله عليوة يقعد زيه
سراج:ان شاءلله وربي ايطوللنا في عمر جدي
سندس:يارب
سراج:علي سيرة عليوة شن دايرة فيك حبيبة باتها
سندس ابتسمت:متعبتني اشوي
سراج حط يده علي بطنها:ليش حبيبة بابا متعبة ماما هكي
سندس ابتسمت وقعدت اتشوفله
سراج شافلها ويده علي بطنها:مازال مااخترنالها أسم صح
سندس:مازال
سراج:معناها شورك انتي اتسميها انا سميت عليوة
سندس:انا امفكرة بنسميها وتين
سراج:حلو وتين(على فكرة هذا اسم بنوتي في المستقبل😍😂)
سراج:عندي اهم شيئ تطلع تشبهلك في كل حاجة ملامحك شعرك جسمك طولك والسانك أهم حاجة تطلع زي السانك وعنادك
سندس ضحكت:لا معناها هكي بتتعب معانا واجد
سراج:عادي متحمل
سندس:عارف شن معنى تقعد نسخة مني
سراج:عارف بيقعدن عندي اثنين هنا الاثنين السانهن طويل ومعندات وهنا الاثنين بنقوللهم ام السان
سندس ابتسمت:حتحبها زي ماحبيتني
سراج:لا حنحبك انتي أكثر
سندس قربت منه ولفت ايديها ورا ارقبته:معقولة هذي بنيتك
سراج لف ايديها ورا خصرها:وانتي حبيبتي ونور عيوني ودنيتي وسعادتي وحياتي كلها وقعد ايقرب بشويش من شفايفها بيبوسها
ولما قريب يوصل في شفايفها سمعو صوت وليد صغير يبكي وايقول ماما
سندس بعدت من سراج:حي هذا عليوة
سراج:عليوة راقد في الشاليه شن بيجيبه هنا
سندس:وحق الله صوته ومشت وسراج لحقها وفعلا لقاته عليوة واعي وهو خايف ويبكي لان مالقش حد معاه وطالع مالشاليه ايدور في امه ووصل في الشط وهو يبكي سندس جاته تجري ورفعاته وحظناته وعليوة يبكي وحالته حالة
سندس;خلاص ياماما اهو انا قاعدة اسكت
عليوة يبكي ويشهق:انا القيتكش ياماما ويبكي
سراج بعصبية:انت كبير معقولة تبكي هكي
سندس:اسكت ياسراج انت عارفة لما يوعى ومايلقنيش يقعد يبكي
وقعدت سندس حاظنة عليوة واتسكت فيه واتحرك في يدها علي شعره وظهرة عشان ايحس بالأمان ويسكت وسراج كان جنبها وغامتله بكل لان عليوة ديما يقطعلهم في لحظاتهم الحلوة
عليوة بعد اشوي سكت
سراج جا بياخذ عليوة من حظن سندس وعليوة مسك فيها زين
سراج:هي يابابا انزل العب مع العويلة عالمية
عليوة:لالا انا نبي ماما
سراج مسكه وبينزله وعليوة قعد يبكي
سندس:سراج انت كنك معاه
سراج;خلاص هو سكت نزليه اشوية انا نبيك
سندس:حرام عليك مازال العبرة فيه وانت بتنزله وبعدين انت عارف لما يوعى لازم يقعد في حظني اشوي وبعدها يقعد يلعب عادي
سراج بعصبية;راه زودها بكل انا معش انحصل فيك منه اول مايوعى بيقعد في حظنك وقبل مايرقد بيقعد في حظنك ولما بيقمعز بيقعد في حظنك ووقت الوكال في حظنك وانا امتى دوري
سندس اتشوفله زين;سراج انت بعقلك اللي تحكي هكي
سراج بعصبية:اها عليوة قعد اهم مني وانا خلاص معش تبيني
سندس:سراج هذا ولدنا راه انت كنك
سراج بعصبية وصوت عالي:وانا راجلك على فكرة
عليوة بعد سراج عصب هكي قعد يبكي
سراج بعصبية:اهو ولع سفارته من جديد خليك معاه اصلا اتحبيه اكثر ومشى وسيبهم
وسندس قعدت اتسكت في عليوة لين سكت ولعبت معاه اشوية وبعدها سيباته يلعب ومشت للشاليه بتشوف سراج اللي زعل ولما خشت لقاته مقمعز وايتفرج عالتلفزيون جت قمعزت جنبه وقربت منه بس هو ماشافلهش بكل وكان باين عليه معصب
سندس:حبيبي قصدك زعلت
سراج:لا عليش بنزعل هذا ولدك وأهم مني
سندس;اولا هذا مش ولدي بروحي ولدك حتى انت والمفروض اتحبه
سراج:ومن قالك انا نكرهه حتى انا انحبه بس ماانحبش انحس ان اهم مني عندك
سندس;ومن قالك هو اهم منك يعني
سراج:قاعد واضح من تصرفاتك مايبيش حد يحكيها ليا
سندس:معقولة للدرجة هذي عقلك اصغير
سراج بعصبية:عشان انحبك وانغار عليك يبقى عقلي اصغير تم ياسندس وصبى
سندس صبت في جرته ووقفت قدامه
سندس:أسفة والله ماقصدي
سراج:ولا قصدك معش تفرق اهو عليوة عندك وخليه واخذ كل حبك
سندس ابتسمت:مانحسبش اتحبني الدرجة اتغار من وليدنا عليا
سراج:ماانحبش انحس ان حد واخذ حبك اكثر مني
سندس قربت منه وباساته علي خده
سندس:أسفة حبيبي
سراج:تمام حبيبي حصل خير
سندس:بعدين نحن المفروض اليوم وبكرا مانزعلوش من بعضنا
سراج:عليش
سندس:كيف عليش يعني مش عارف
سراج:شن فيه دوسة
سندس رفعت حاجبها:لا مافيش شيئ
سراج:باهي المهم بنطلع اليوم انا والشباب نصيدو
سندس:تمام
سراج قرب وباسها علي خدها وطلع ووصل عند الباب
سندس:سراج جديات مش متذكر ولا تستعبط
سراج:تي احكي شن فيه شن مش متذكره
سندس:خلاص خلاص شيئ
سراج:ماتبيش حاجة انجيبها لكي
سندس:لا سلامتك
سراج:سلام وطلع
وسندس قمعزت عالكنبة وهي غامتلها من سراج لان مش متذكر عيد زواجهم
"""""
سراج طلع ومشى الشاليه فيصل ورانيا وقعد ايعيط من برا
سراج بصوت عالي:يانصي يانصي
فيصل كيف طالع مالحمام كان ايدوش ورانيا مازال متمددة عالسرير
رانيا:اطلع شوفه راه صدعني
فيصل طلع مالروشن;تي كنك اتعيط ازح
سراج:أطلع سادك من بدري وانت
فيصل:سكر فمك ينعن شكلك حشمت بينا الناس كلها عرفت في شنو اندير خلاص اهو جايك
سراج يضحك:باهي نرجى فيك
لبس فيصل عالسريع وطلع السراج
فيصل:تي شنو اللي درته هذا لنقنك بارد
سراج:لو رديت عالخارب متاعك راه مادرتلكش هكي
فيصل:لنقنك اشورخ كلا انت
سراج يضحك:عشان اتعلم لما انرن عليك اترد دغري
فيصل يضحك:واطي يامان
سراج:عارف روحي ومسك فونه وقعد ايرن
فيصل:علي من اترن اخرى
سراج:او معاذ شن الجو
معاذ;تمام
سراج:كان فاضي تعال عاالشط نبيك
معاذ:تمام اشوي وانكون عندك وسكر
فيصل:شن فيه عليش لامنا بربطت المعلم هكي
سراج:ايجي معاذ وتوا انفهمك
فيصل:يستر الله منك ومشو وقمعزو عالشط واشوي وجاهم معاذ
معاذ:شن جوكم
فيصل وسراج;تمام
معاذ قمعز جنبهم:شن فيه
فيصل:الاخ هذا شكله ايخطط الحاجة حتى انا مازال ماقالي عليها
معاذ:انشاءلله خير
فيصل:انشك ان خير اصلا هذا مستحيل ايجي من وراه خير
سراج شافلهم;كملتو
معاذ وفيصل قعدو يضحكو
معاذ:شن فيه ياراجل
سراج:كل القصة ان بكرا عيد زواجنا انا وام السان وهي تحسابني ناسيه
فيصل يضحك:الاول ولا الثاني
سراج:فيصل القراج اللي فاتحة مش وقته ياسكره ياانسكره بطريقتي
فيصل:والله نحكي جديات زواجكم الاول ولا الثاني
سراج:الاول تريحت هكي
معاذ;العمر كله مع بعضكم لكن شنو المطلوب
سراج:تسلم وهذا كلام الناس اللي تفهم المهم نبي انديرلها مفاجئة ونبي مساعدتكم
فيصل;تحكي من جدك مازال بتحتفل وادير مفاجأت راكم اكبار توا عالجو هذا وعندكم عيل اشوي وايخش المدرسة وانت مازال تصرف زي المراهقين
سراج:وكان كبار انا بنقعد كل سنة نحتفل بزواجنا حتى لو قعد عمرنا 100 سنة الحب مالش عمر يانصي
معاذ;كلامك صح وانا معاك في اللي بديره
سراج:تسلم يامعاذ وهذا العشم فيك
فيصل:تي كنك يانصي زعلت انا معاك في كل شيئ وانت عارف حتى عالموت معاك غير كنت انبصر بس
سراج ضحك:عارفك يانصي والله
فيصل:باهي شنو المطلوب منا
سراج;توا انقوللكم كل حاجة بنديرها عشان انجيبو كل حاجة اليوم عشان بكرا عالمغرب يقعد كل شيئ واتي للإحتفال
معاذ:بديره كبير
سراج:أها
فيصل;ووين بديره
سراج:هنا عالشط
معاذ:جديات تحكي والناس اتشوف عادي
سراج:عادي يعني شنو المشكلة
فيصل يضحك:لا هذا بارد ماايتحشمش
سراج:المهم اللي بنقوله كله ايكون في سرية تامه مانبيش ام السان تعرف شيئ نبيها اتحس اني ناسيه
فيصل ومعاذ:تم ماحد يعلم بشيئ
سراج:نصي الله الله راه عارفك كل حاجة تحكي فيه الرانيا
فيصل يضحك:لا والله كون هاني مش حاكي شيئ
سراج:تم وبدى يحكيلهم في اللي بيديره
'""''
#عند_سندس
مازال غاملها ووخشن عليها رانيا ورويدة ولقنها قالبة وجها
رانيا:شبو القمر زعلان
سندس شافتلها ونزلت راسها
رويدة:لا شكلها الحكاية كبيرة ودبينها فيها تطريم شوراب معناها سيرجو في القصة
رانيا:معقولة سراج ايزعل دوسة لو انشوف بعيوني ماانصدقش
سندس ساكته ومااتردش عليهن
رانيا بحوف:حبي كنك شن صاير راك شغلتينا
رويدة:دوسة كنك احكيلنا معش انتحملو راه
سندس شافتلهن والدموع في عيونها
سندس:سراج ناسي عيد زواجنا
رويدة:هذي بس فجعتيني مرض وشنو المشكلة يعني
رانيا تضحك:انا وفيصل اللي اجوزنا بعدكم له سنيتن ينسى فيه وانا اللي انذكر فيه بيه
سندس:بس سراج عمره مانساه هذي أول مرة وديما هو اللي يذكره قبل ماانا نذكره والله سراج لما نحتفلو بيه يقعد يحسب للسنة لخرى و لليوم اللي ايجي فيه وهو اللي يقعد يحكيلي عليه قبله بشهر بس المرة هذي حتى بعد لمحتله ناسي بكل😔
رانيا:وانتي عليش مركبة بالك مش ناسي بالك يستعبط عليك
سندس:لالا سراج عندش في حركات الاستعباط اصلا هو ايحب جو نقعدو انجهزو للحفلة مع بعضنا بس توا مش معدل وشكله ناسيه جديات
رويدة:توا انتي مش علي كل الأحوال كنتي انتي بتفاجئيه بحفلة حلوة ومن غير مايعلم واقتحرتي فكرة الشاليه ونحن انكونو معاك عشان تقعدي طول الوقت معانا وهو معاه معاذ وفيصل واتقوليله انك تبيش تحتفلي هنا ومابعدين اتفاجئيه
سندس:صح انا قلت هكي بس اقل شيئ يذكره وايقولي شن بنديرو وكنت بنقوله انأجلو الاحتفال لما انروحو عشان انفاجئه
رانيا:توا اهو جت منه لا سألك لاشيئ عشان اتفاجئيه واتبينيله حتى لو هو ناسي انك انتي متذكرة احلى يوم جمعكم
رويدة:وانا مع كلام رنوشة هكي بيعرف قديش اتحبيه
سندس:قولكن هكي
رانيا ورويدة;هكي ونص
سندس:بس انا بجد زاعلة منه
رانيا:عاتبيه بعد الحفلة😏
رويدة تضحك:بعد الحفلة مافيش عتاب فيه حاجات اخرى
رانيا قعدت تضحك
سندس:بلا صماطة ياباردات
رانيا توا خلينا مالموضوع هذا وقوليلنا شنو بديري من تجهيزات عشان نبدو مع بعضنا ولو نبو حاجة من برا نحجزو فيها ماليوم
رويدة:صح لان ماتقدري ادريه كله بكرا
سندس:رنوشة الحاجات اللي قتلك جيبيهن ليا امعاك واشموع جبتيهن
رانيا:اها جبتهن
رويدة:وانا جيتلك زينة وضوايا قلوب وحاجات هكي
سندس:تمام الحاجات هذينا بكرا ناخذهن منكن بس اليوم بندير كم نوع موالح ونحجزو في القاتو والحلو
رويدة:والهدية كيف بديري فيها
سندس:شريتها من فترة وقاعدة عند رنوشة راك تطلعي انسيتيها
رانيا:تي جبتها يابنتي وحطيتها في شنطة بروحها وطول الطريق فيصل ساكن شن فيها الشنطة هذي 😂
رانيا:مجهزة شنو بتلبسي
سندس:شريت يومتها فستان قصير ايجنن تعالن انوريه لكن ومشن مع بعضهن
"""""""""
مشى الوقت عادي
سندس وصحباتها ايجهزن للحفلة وسراج والشباب ايجهزو للحفلة
سراج تعمد ايروح في الليل متأخر عساس انهم كانو يصيدو وسندس لما سراج روح دارت روحها راقدة عشان مااتحاولش اتجيب سيرة عيد زواجهم وتزلق في الكلام ويعرف اللي اتخططله
سراج خش للدار لقى سندس مرقدة عليوة جنبها وحاظنته جا من جنبهم وابتسم وقرب منهم ونزل علي ركبيه وقعد يمسح علي شعر عليوة وبعدها باسه علي خده وقعد ايشوف السندس ومبتسم وبعدها قرب وباسها علي راسها وصبى لف مالجيهة لخرى وتمدد عالسرير ولف وجه جيهة سندس وحظنها مالخلف ومسك يد عليوة ورقد
"""""""""
صباح ثاني يوم وعى سراج علي صوت فونه ولما شافه لقاه فيصل
فيصل:تي نوض يانصي عازمك علي شوايات
سراج:مبرد دمك عشان عازمني اتوعيني مالصبح
فيصل:اي صبح الساعة 12 توا
سراج:عالعموم صبح
فيصل:بلا تكثير دوة وجيب سندس وعليوة غدامكم هنا اليوم ولا انخربلك المفاجئة متاعك
سراج:تم توا انجي واللي توا حسابك عليها غير انجيك انكان ماشويتك بدال اللحم مانبقى سراج
فيصل يضحك:غير تعال وساهل وسكر
سندس طبعا وعت من صوت سراج
سندس شافت للساعة لقتها 12
سندس نطت:حي معقولة نوم للساعة 12 ليش ماوعيتني
سراج:انا بروحي هذي وعيتي
سندس صبت وسراج مسك يدها
سراج بإبتسامة تسحر:مافيش تصبيرة عالصبح هكي
سندس ابتسمت:اس عليوة راقد وطلعت للحمام وسراج لحقها وخش معاها والباقي طبعا #مششششششفففففر
""""""""""
كمل التشفير 😂وطلع سراج ودوسة ولبسو وسيرجو قعد ايجهز في الفطور ودوسة خشت وعت عليوة ودوشتله عالسريع ولبساته ومشو يفطرو مع بعضهم وبعد الفطور طلعو شور شاليه فيصل ورانيا ولقو معاذ ورويدة غادي ولقوهم ايجهزو للغداء ودايرين جو ايهبل قدام الشاليه وجو ضحك واتهدريز وبصاره من عين عينه(والله تمنيت نقعد معاهم😍)والعويلة يلعبو مع بعضهم وجو مالآخر
وقعد فيصل يشوي والبنات ايجهزن في الصلاطات ومعاذ وسراج مقمعزين جنب فيصل وايهدرزو وسراج كل اشوي ايذوقله طاب ولا لا 😂
وبعدها وتن الشوايات وحجو وتغدو مع بعضهم في اجواء بصارة وجو سمح وخصوصا بين فيصل وسراج ودمهم الخفيف وصحبتهم القوية اللي واضحة من طريقة كلامهم مع بعضهم
وبعد الغداء الشباب خذو شاهي وارقيلة ومشو عالشط والبنات قعدن ايلمن في الحوسة وماصدقن افتكن منهم عشان ايلمن بسرعة ويمشن الشاليه دوسة وايجهزن للحفلة
وفعلا كملن حوستهن في شاليه رانيا ودغري مشن شور شاليه سندس وماكانن الشاليعةهات بعاد من بعضهن المهم خشن وسكرن الباب وبدن وحدة اتزين في الشاليه ووحدة اتجهز غي الطاولة ووحدة اتوتي في الحاجات في المطبخ واتنسق فيهن وبعد اشوي جا الحلو والقاتو اللي طالباته(خدمة توصيل😉) وحطهن عالطاولة وبدن ايجهزن في الطاولة وحطن اشموع واجد في كل مكان في الشاليه وزينن دار النوم بالورد والشموع ودارن اضاءة حمرا وجو خيال بكل😍 وبعدها خشت دوسة وقعدت تلبس واتجهز في روحها وصحباتها ايساعدن فيها في الاختيار
""'""""
#عند_سيرجو
تعالو انشوفو شن دار
اول حاجة حكو مع الناس وفضو الشط اليوم عشان يقدر ايدير كل اللي يبيه (فضاهم مش عساس خلاهم في شاليهاتهم لا عادي قاعدين الناس بس خذا جزء معين مالشط عساس ايدير فيه اللي مقررة)
المهم اول دار زي اللافتات معلقات 3وحدات وحدة مكتوب فيها كل سنة ونحن مع بعضنا ووحدة ربي مايحرمني منك ياام السان ووحدة انحبك ياحلالي
وطاولة حاط عليها قاتو كبييييير وعصير وحاط شموع وورد عالطاولة ومجهز اسبيكرات كبار ومايك لان كان بيغنيلها😍🤤
وكتب الرملة اسم دوسة بالنار ودار ممر ورد من عند الشاليه متاعهم لعند الشط وطبعا هذا كله من غير ماسندس تفطن لانها كانت غاطسة في تجهيزاتها جوا وطبعا الاسم اللي بالنار وممر الورد هذينا اخر حاجة اندارت وبعدها باب شاليه سندس ايدق وبقوة وطلعت رانيا بتشوف من ولو اي واحد من رجالتهن بتوزعه لين ايديرن اخر تشطيبات
رانيا فتحت الباب ولقاته وليد اصغير
رانيا:نعم يابابا شن تبي
الوليد بصوت عالي:عمو سراج غرق
رانيا بخوف:شنو
الكلمة رنت في وذن سندس وطلعت تجري وطلعت في جرتها رويدة بالعباية ولبستها الها لانها كانت لابسة فستان قصير بكل وطالعة تجري وماركزتش لا عالورد ولا شيئ مافطنتش الا وهي قدام سراج
سندس بخوف ومسكت في سراج وتبكي:حبيبي صارتلك حاجة
سراج يضحك:انا مافيا شيئ بس بحتي جنبك توا تفهمي وهنا سندس لفت وشافت الأجواء اللي دايرهن الها
سندس لفت علي سراج والدموع في عيونها
سراج حظنها:كل سنة ونحن مع بعضنا كل سنة وانا انحبك ربي مايحرمني منك ياسعادتي
سندس تبكي:والله خوفتني عليك
سراج:اسف ياقلبي
سندس:كنت نحسابك مش متذكرة
سراج:معقولة ننسى احلى حاجة صارت معايا لو ننسى الايام كلهن اليوم هذا مستحيل ننساه
سندس زادت حظناته:انحبك انحبك ومانقدرش انعيش بلاك ومتأكدة ربي ايحبني اللي رزقني بيك
سراج:نجك ليا يانبضي
سندس:ربي ايخليك ليا ياراحتي
سراج بعدها:بالمناسبة الحلوة هذي حاب نهديلك اغنية وانغنيها لكي انا
سندس:معقولة هنا والناس
سراج:ماانشوفش في غيرك توا
سندس ابتسمت
سراج مسك المايك وبدى ايغني (الأغنية اسمها #انفاسي للفنان عباس الأمير وهي نفس الأغنية اللي حطيتها عالمقطع امتاعهم اسمعنها اتجنن وشوفن المقطع 😍)
وبعد كمل سراج الأغنية قرب حظنها
سراج:انحبك
سندس:انموت فيك
والكل قعدو ايصفقولهم
سراج مسك سندس من يدها وجو للقاتو الكبير اللي عالطاولة وكلمو الناس اللي اتفرج وقصوه مع بعضهم وبدو ايحطو في التباسي ومعاهن عصير وايوزعو عالحاظرين الحفلة وبعد كملو
سراج خذا قطعة بالشوكة وبيوكل دوسة
سندس:بس نحن مش هنا حفلتنا
سراج:كيف
سندس:تعال معايا ومسكت يده ووصلو عند الشاليه
سندس:حبيبي غمض عيونك
سراج:حاظر
سندس فتحت الباب وخشو
سندس:فتح حبيبي
سراج فتح وشاف الأجواء الحلوة
سراج مبتسم:قصدك هذا كله عشاني
سندس:امالا تحساب انت بس تعرف اتفاجئ
سراج شالها:ناعليا منك انتي
سندس:نزلني توا عشان نحتفلو
سراج نزلها وسندس حولت عبايتها وسراج مات عالفستان اللي كان لونه موف مايل للدمي هكي وجاي ايجنن عليها
وبدو في احتفالهم مع بعضهم وكلو روقصو وهيجو وعطو الهداية
سندس كانت جايبة السيرجو ساعة اتجنن وعطر وفون جديد ومغلفتهن تغليفة سمحة في علبة كبيرة ومعاهن شكولاطات وجو
وسراج كان جايبلها طوق ايهبل فيه اسمه هو 😍ولبسه الها ووعداته ان معش اتحوله من رقبتها بكل
طبعا عليوة قعد عند رويدة يلعب مع عيالها ونعس ورقد عندها 😍وامه وباته راقدين في العسل وقعدو للصبح واعيبن وهما غاطسين في #المشفر لعند ذانهم😂
(#لا_أذكُر_أني_أحببتُ_شيء_في_هذا_العالمّ_المُرتبك_بقدّر_ما_أحببتُ_شعُور_الطمأنينة_الذي_تُهديني_إياه_عيناك ❣
"""""""
ولعند هنا كملن مشاهدنا وانتمنى عجبنكن واستمتعتن معاهن حبيباتي وان شاءلله انكون حطيت كل اللي طلبتنه مني 😍
وياريت تسمعن المقطع بعد انزله واتشوفنه لأن خذا مني وقت واجد بكككل وان شاءلله يعجبكن 😍
مع تحياتي الكاتبة #Koka_Saleh