#مـنـحـرف_وأحـبـبـتـه
الـحـلـقـة (35)
گـتـابـتـي #Koka_Saleh
"""""""""""""""""""""""""
سراج بعصبية:هدى اطلعي احسن ماانكلم الامن ايطلعوك
هدى بصوت عالي:اي امن يابابا انا ماليوم معش يقدر حد ايطلعني من هنا
سراج بعصبية:وعليش مايقدر حد ايطلعك بالك فيلة بوك وماعنديش علم
هدى:لا مش فيلة بويا بس حتقعد فيلة ولدي
سراج;كيف كيف مافهمتش
سندس سمعت الهرجة ونادت كم مرة سراج بس سراج ماسمعهش ونزلت بتشوف شن فيه
أما محمد وعفاف وصلو للفيلا وجو شور حوش سراج عشان يطمنو علي سندس وايشوفو حالتها
هدى;مش عساس تفهمها وهي طايرة ليش مافهمتهش توا
سراج بعصبية;شنو بنفهم احكي وماادرهيش كبدي
هدى:تفهم اني حامل بولدك
سراج فنص عيونه زين:شنووو
سندس كانت نازلة عالدروج وبعد سمعت الكلمة شهقت وحطت يدها علي فمها وسراج لف وشافها وجاها يجري #Koka_Saleh
محمد وعفاف خشو للحوش وهما مصدومين
محمد:صح اللي سمعناه
سراج:سندس مااتصدقيهش هذي وحدة كذابة
عفاف:اصلا من هذي
هدى خشت:انا وحدة من ضحايا سراج اللي ضحك عليهن
سندس شافت هدى وقعدت امبلمة عيونها ومصدومة شن لم هدى علي سراج الدرجة تحمل منه
هدى تبكي:سراج ضحك عليا وبعد خذا اللي يبيه مني مشى اجوز ولما كلمته بنحكي معاه هددني لو انقرب منه او انجي هنا مش حنشوف خير ولان هو يده طايلة وماايخاف من حد ولا ايخاف من ربي بعدت ومعش كلمته لعند لما اكتشفت الحمل
سراج بعصبية;هذي وحدة كذابة اللي تحكي فيه كله كذب
محمد:يعني البنت تكذب وانت ماتعرفهش بكل
هدى تبكي:بتنكر اللي صار بينا ياسراج حرام عليك
عفاف:انت مادرتش شيئ مع البنت ياسراج
هدى:لو بتنكر انا حنذكرك كويس امتى وليش درنا هكي
سراج كان مايبيش هدى تحكي اتفاقهم علي سندس
سراج:انا مش ناكر اللي صار بس الكلام هذا له شهور من قبل حتى مانجوز توا خطرلك تحكي بحملك عشان تعرفي انك وحدة كذابة
هدى;انا مانكذبش لما روحت مالسفر وكلمتك ماكنتش عارفة بالحمل بس لما هددتني خفت وبعدها بابا مرض وسافرنا بيه كنت انحس باني تاعبة بس مافكرتش ان ممكن انكون حامل لين اطمنت علي بابا وروحنا هنا قررت امس نمشي للعيادة وانشوف كني وانصدمت بالحمل وان من شهور واليوم مالصبح قررت انجي نحكيلكم لان لو بابا وماما يعلمو حيريحو فيها
وانا جيت هنا لان اللي دار فيا هكي ولدكم واللي في بطني حفيدكم وهذينا كل التحاليل والاوراق اللي امس درتهن تقدرو اتأكدو بروحكم من كلامي
سراج:لا تحاليل لا كذب عدي شوفي روحك من من حامل لان زي مابعتي روحك ليا اكيدة بعتي روحك الغيري وخذيتي الثمن
هدى تبكي:انت واحد حقير انا مابعتش روحي الوحيد اللي سلمته روحي انت وتهيالي الشيئ هذا انت شفته بروحك واني كنت بنت #Koka-Saleh
سراج بعصبية:يعني بتوحلي اول عملية اديريها واتردي اصدار جديد عشان تاخذي مبلغ كبير مرة اخرى
محمد بعصبية;سراااج اسكت شنو هالكلام😡
سندس كانت ساكتة طول الوقت ومصدومة مالحوار اللي عمرها ماسمعت زيه في حياتها
سراج:مش ساكت عشان انا اكثر واحد عارف الاشكال هذينا شن يبن بزبط
هدى تبكي:والله ياعمي ماعمري بعت أو ورخصت روحي لاي شاب بس كلام سراج ومعاملته ليا خلتني وقعدت تبكي
سراج:وانا متأكد انك مش حامل مني شوفي من اللي دار فيك هكي وعديله
هدى تبكي:والله والله اللي في بطني ولدك
عفاف ومحمد كانو يسمعو في الكلام ومش عارفين كيف يصرفو صح سراج منحرف بس ماكانو حاسبين حساب حاجة زي هكي
سراج:قولي الرقم اللي تبيه معاك ما الألف للمليون وتاخذيهن وعدي نزلي اللي في بطنك وديري عملية وردي زي ماكنتي
سندس بعصبية:انت شنو مش أنسان للدرجة هذي الشرف رخيص عندك البنت تبكي واتقولك حامل منك ومش قادرة اترد الهلها وانت بتصلح غلطك بالفلوس
سراج:سندس افهميني والله تكذب والله ماهي حامل مني
سندس:معش تحلف بالله عشان انت ماتعرفش وبعدين انت توا اعترفت باللي صار بينكم كيف تنكر الحمل
سراج:انا مش ناكر اللي صار بس انا متأكد انها مش حامل مني
محمد:البنت جايبة تحاليل وتقارير بحملها
سراج:يعني ماتقدرش اتزورهن
محمد:خلاص يبقى مافيش حل الا ان انديرولها تحاليل جدد وتحت اشرافنا نحن
سراج:نمشو توا انديروهن عشان اتبان الحقيقة وانا متأكد انها مش حامل مني
عفاف كانت حاسة بضيقة في صدرها وتبكي;واذا طلع كلادمها صح شن بيصير
محمد بعصبية:بنجوزوها له اكيدة
سراج بصدمة:شنووو😳
محمد:اللي سمعته مالا تبي ولدك ايتربى بعيد عنك
سراج:بس انا متجوز ولا انسيت
سندس بعصبية:اي زواج قصدك زواجنا ماللحظة هذي اعتبره انتهى انا تحملت قرفك وقذارتك لين مليت معش عندي قدرة انتحمل اكثر من هكي ارجوك طلقني
سراج بصدمة:انتي شن تحكي ياسندس معقولة بتسيبيني علي حاجة مازال مش متأكدين اذا صح او لا
سندس:انا متأكدة ان كلامها صح لان مهما صار الحاجة هذي بذات مافيهش كذب #Koka_Saleh
محمد:باهي انتي اصبري بس لين انتأكدو وبعدها خوذي القرار اللي ايريحك
سندس:لا ياعمو هذا هو القرار اللي المفروض خذيته من زمان هكي ومازالت في بداية حياتي معاه امالا بعدين شن بيجيني منه خلاص انا خذيت قراري ارجوك ياعمي اتخليه ايطلقني ورقت فوق الدارها ومسكت فونها وبترن علي باتها ايجيها
سراج خش عليها وكر منها الفون
سراج:علي من اترني #Koka_ Saleh
سندس:بنرن علي بابا ايجيني انا هنا معش عندي مكان
سراج;كيف ماعندكش مكان وانتي عارفة كويس ان مكانك في قلبي اللي عمره ماخشتله وحدة
سندس بعصبية:تقدر اتبطل كذب انت نفس ماانت مش حتغير وكل اهدافك مالبنات معروفات
سراج:الا انتي عشان تفرقي عنهن انتي حبيتك وكل هدفي انك اتحبيني زي ماحبيتك
سندس:مااتحاولش تضحك عليا زي كل مرة لاني هالمرة مش حنصدقك وخلينا نطلقو بكل هدوء
سراج مسك ايديها:من جدك بتطلقي بعد كل اللي صار بينا
سندس كرت ايديها منه:نحن ماصار بينا شيئ والحمدلله اللي ربي بينلي حقيقتك قبل مااتصير بينا حاجة
سراج:كيف ماصار شيئ واعترافي بحبي لكي ووعدتك اني بنتغير عشانك كل هذا مالش قيمة عندك
سندس:لا واضح انك تغيرت واللي تحت وحملها منك هذا شنو اتفسره
سراج:اللي صار معاها صار قبل مانجوزك وقبل ماانحبك انا والله قررت انتغير من لما تاكدت من حبك ارجوك مااتسيبينيش حياتي قعدت متعلقة بيك انتي
سندس قمعزت عالسرير وسكتت
سراج قرب ونزل علي ركبيه ومسك ايديها:الكلام هذا عمري ماقلته البنت ولا عمري تخيلت روحي ايجي يوم ونحكيه البنت انتي تفرقي ياسندس والله حبيتك من كل قلبي
سندس:انا وانت حياتنا مع بعضنا مستحيلة عشان هكي طلقني راه انا مش قادرة انكمل معاك
سراج:ليش اتعاقبي فيا علي حاجة صارت في الماضي قبل مانعرفك
سندس:عشان هذينا اخطائك ولازم اتحمل عواقبهن وصبت
سراج;مااتسيبينيش
سندس:أنا توا بنمشي الحوش هلي ياريت اطلقني برضاك وبدون مشاكل لاني نبيش ايكونن بينا محاكم ولبست وشاحها وطلعت وسراج قمعز في مكانه وحط راسه بين ايديه #Koka_Sale
سندس نزلت ولقت محمد يحكي مع هدى وعفاف مارال مصبية في مكانها
عفاف:قصدك بتمشي خلاص
سندس:حاولت واجد اتكون حياتنا زي اي اثنين بس ماقدرتش لاهو نفسي ولا انا نفسه
محمد:بس مازال ماتاكدنا من شيئ
سندس:حتى لو طلع هذي مظلوم فيها الف قصة حتطلع بعد هذي وانا والله مانقدر انتحمل كل هذا مانقدرش انعيش مع واحد وانا كل يوم نرجى في مصيبة شكل
عفاف كانت اتنفس بصعوبة:بس هذا كله ماضي
سندس:والماضي حيقعد حاظر لان سراج مستحيل ايتغير
عفاف بتحكي ومعش قدرت وحطت يدها علي قلبها
سندس بخوف:كنك اعميمة
عفاف بصعوبة:مش قادرة انتنفس
محمد بخوف:كنك شن صارلك
عفاف قعدت بترد وضاق نفسها اكثر وفقدت الوعي
قعدت سندس تبكي ومحمد ايحاول ايوعيها
سراج سمع الهرجة ونزل يجري ولقى امه فاقدة الوعي وقعد ايحاول ايوعيها بس ماوعتش شالها سراج وحطها في سيارته وركبت معاه سندس ومحمد لحقهم في سيارته وهدى قعدت في الفيلا
وصلو للمستشفى وسراج نزل عفاف وخذوها منه في الاسعاف وخشو بيها للعناية والباقي قعدو قدام العناية ويرجو سراج وسندس ومحمد كانو متوترين وخايفين علي عفاف
وقعدو يرجو في الدكتور يطلع وبعد نص ساعة الدكتور طلع وجوه يجرو
محمد:طمنا يادكتور
الدكتور:عندها انسداد في جميع الشرايين
سراج:وشن حالتها توا يادكتور
الدكتور:مش حنكذب عليكم الحالة خطيرة ولازم من عملية قلب مفتووح وانفضل اتكون بكرا لان الحالة مااتحملش القلب تاعب بكل
سراج:معناها حنطلعوها برا
الدكتور:صدقوني تطليعتها برا تبي اقل شيئ يومين والوقت مش في صالحنا لان القلب تاعب
محمد;بس يادكتور هي عمرها ماحست قلبها
الدكتور;اكيدة حاسة بمضاعفات بس انتو مش ملاحظين لين تعب القلب فجأة
محمد:ونجاح العملية هنا مضمون
الدكتور:نحن حنديرو اللي علينا بس الاعمار بيد الله
محمد:خلاص يادكتور حنديروها هنا احسن ماانأجلوها كم يوم لين نطلعو ولا قدر الله ايصير الامك حاجة قبل ماانسافرو بيها
سراج:بعيد السو عليها
الدكتور:خلاص تقدرو توا تروحو وانا حنستدعي الدكاترة كحالة طارئة وبكرا حتكون العملية الساعة 9 بس لو اتفضل ياحاج محمد معايا عشان الاجراءات واتوقع عالعملية
محمد:حاظر يادكتور ومشى معاه
سراج لما عدى الدكتور قمعز عالكرسي وقعد يبكي
سندس جاته وقمعزت جنبه
سندس:اهدى سراج حتقعد كويسة باذن الله
سراج يبكي:اي كويسة وهي بكرا عندها عملية كبيرة زي هذي انتي عارفة كان صارلها شيئ انا شن حيصير فيا
سندس:باذن الله مش حيصيرلها شيئ
سراج:ربي بيعاقبنا عاللي اندير فيه فيهم ياسندس اهو باتي مريض ومافيش امل من علاجة وتوا عفوفه قلبها تاعب بسببي وبكرا بدير عملية ومش عارف شن بيصير فيها
سندس:انت بس ادعيلها وهي حتقعد كويسة
سراج يبكي:نطلب منك طلب
سندس:شنو
سراج:صلي وادعيلها يمكن ربي ايحبك اكثر مني حيقبل منك انتي
سندس:لا ياسراج مااتقولش هكي كلنا عباد ربي وايحبنا تعال انصلو انا وانت وندعولها
سراج:خايف ربي مايقبلش مني بعد كل اللي درته
سندس:انت استغفر ربي واطلب ان ايسامحك وادعيلها
سراج:باهي
سندس:هي صبي وصبى سراج ومشو توضو وخشو الدار من ديار المستشفى وصلو سندس صلت ودعت وكملت وصبت وسراج مازال عالصلاية ويدعي سندس حبت اتخليه بروحه وطلعت
سراج قعد يبكي:يارب انا عارف اني غلطت واجد ودرت حرام واجد بس ياربي انا مالقيتش حد ايوجهني للطريق الصح انا مش عارف اذا اتحبني او لا بس انحس انك اتحبني لو مااتحبني ماكنتش حطيت في طريقي وحدة زي سندس واتنزل حبها في قلبي عشان انتغير هي اللي ورتني حاجات واجد ماكنتش عارفهن يارب يارب انت اللي عالم بنيتي واني نويت انتغير يارب اذا بتعاقبني عاقبني في نفسي بمرض او موت اوي شيئ يرضيك بس مااتعاقبني فيهم ماعنديش الا هما يارب احفظلي أمي يارب ماتقهرني فيها يارب ياربي هي مش بس امي هي امي وصاحبتي واختي وحبيبتي يارب دير فيا اللي يرضيك بس ماتحرمني ماللي انحبهم ماتحرمنيش من باتي ولا عفوفة ولا سندس ياربي وكمل استغفر وطلع لقى سندس ترجى فيه عند الباب
سندس:تقبل الله
سراج;منه ومنك العمل الصالح
سراج:هي عشان انشيلك اتريحي في الحوش
سندس:مش مروحة انا اليوم بنقعد مع اعميمة لين بكرا ادير عمليتها
سراج:بس انتي بروحك مازال تاعبة مالحادث
سندس:انا مافيا شيئ لو تبي اتروح انت روح انا حنقعد معاها
سراج:اي انروح مش متحرك من هنا لين نطلع انا وهي مع بعضنا
سندس:ان شاءلله
سراج:حنمشي نحجزلك سرير عشان تقعدي مرافقة وانجيبلك بطانية ودبش لكي والعفوفة وانجيب غداء
سندس:ماشي بس انت وين بتقعد
سراج:انا ماعليك فيا حنقعد تحت في سيارتي
سندس:باهي
سراج:ديري بالك علي روحك اشوي وانجي وباتي قاعد في المستشفى ولو صار اي حاجة رنيلي
سندس:خطرها فوني في الحوش
سراج:خلاص حنجيبه لكي معايا
سندس;ماشي وهي قعدت في المستشفى وسراج طلع
بعد اشوي جاها عمها وحكتله اللي خططوه هي وسراج وحتى هو ماتكلمش وقاللها ان حتى هو مش حيروح وحيقعد تحت مع سراج ونزل
""'
عند سراج وصل للفيلا وقال للخدامة في الحوش اتوتيله دبش الامه واتجيبله بطاطين وخشت اتوتي في اللي يبيه سراج
هدى كانت مقمعزة في دار الضيوف وبعد سمعت سراج طلعتله
هدى;هاطمني شن صار في امك
سراج بعصبية:انتي مازلتي هنا ليش ماانتلفتي الهلك
هدى:كيف بنمشي وانا حامل شن بنقول الهلي
سراج:ياسلام خايفة يعرفو انك حامل ومش خايفة يعرفو انك سيبتي الحوش
هدى:سيبته صح بس جيت الاب الطفل اللي في بطني واللي حيجوزني وبعد يعرفو ان الموضوع انستر حيسكتو اما اذا عرفو اني حامل وانا عندهم حيقتلوني
سراج:عساس انتي خايفة لو خايقة او حاسبة حساب هلك ماكنتيش بعتي روحك وخذيتي مقابلها فلوس
هدى تبكي:انا مابعتش روحي عشان الفلوس انا سلمتك روحي وانا بنت عشان انا حبيتك انت ياسراج ولو ماانحبكش كنت حكيت الهلك وسندس كيف تعرفنا وعلي شنو كنا متفقين
سراج مسكها مع يدها وبقوة
سراج بعصبية;اسمعي لو الكلام هذا يطلع منك الواحد وبذات سندس انا نعرف كيف نصرف معاك
هدى اتألم:اي سراج وجعتني انا مش حاكية بس مش لاني خايفة منك لاني انحبك ومانبيش انضرك
سراج فك يده منها:الله يلعن الحب اللي حتى الرخاص قعدو يحكو عليه وطلع وسيبها
(سراج كانت رايحة من باله بكل قصة جية سندس له للشقة وان هي نفس الشقة اللي وصفتها الها هدى)
وجا الحوشه وخش خذا فون سندس وخذالها دبش وطلع لقى الخدامه موتية الحاجات اللي طلبهن خذاهن وطلع ورد للمستشفى عطى سندس الحاجات وقعد هو وباته برا
""
#عند_رانيا
رنا:رانيا بسرعة تعالي فونك من بدري ايرن
رانيا;اهو جيت ومسكت فونها وردت
رانيا:اهلا فيصل
فيصل:من بدري انرن ليش مااتردي
رانيا:معليش كنت في المطبخ ماسمعتش الفون
فيصل:لو سمحتي رانيا لما انرن ردي طول والله لما مااترديش انخاف ايكون صايرلك شيئ
رانيا:من شن بتخاف شن بيصيرلي يعني
فيصل:انخاف منه هو انخاف ايحاول يخطفك من جديد
رانيا:مااتخفش رؤوف عارفته بعد ايقول كلمة مستحيل ايرد فيها ودبينى قالي بيخليني في حالي يبقى حيديرها
فيصل:للدرجة هذي حافظتيه
رانيا:اكيدة مش حب سنين
فيصل:يابخته
رانيا:نعم
فيصل;ماتخذيش في بالك وطمنيني علي عشاقنا وشن صار معاهم ماكلمتكش سندس
رانيا:لا ماكلمتنيش شكلهم اصالحو لان لو دارت مشكلة راه كلمتني دغري ونكدت عليا لان الاخبار السيئة ماايطولنش عند سند بس السعيدة تبيلك ومانسمعها
فيصل يضحك:يبقى ماعندنش حل الا نرجوهم ايحنو علينا ونعرفو اللي صار
رانيا;قولك سراج ايتغير
فيصل:انا حاس ان تغير فعلا اتصدقي من مشكلته هو وسندس معش جا للشقة بكل
رانيا:وانت مازال تمشيلها الشقة
فيصل:قوليلي توا معش تمشيلها والله ماعاد حتى انخطم عليها
رانيا انحرجت:وانا شن دخلني بيك المهم انا توا بنسكر اندير في كيكة بنكملها
فيصل:كيكة😍مش شوري نبي قرعتي
رانيا تضحك:اكيدة قرعتك محفوظة
فيصل:اسمعي مش كلام نبي جديات منها
رانيا:تحكي جد
فيصل:والله نحكي جديات نبي منها
رانيا:وكيف هذي
فيصل:اول مااتكمليها رنيلي وحنجي الحوشكم وانزل روان وعطيها الها
رانيا:تمام باهي بس لازم نحكي الماما
فيصل:وشن بتقوليلها
رانيا:عادي حنقوللها صديقي ويبي مالكيكة
فيصل:صديقك باهي تمام المهم اول مااتكملي رنيلي
رانيا:حاظر وسكرت
رانيا مسكت فونها وقعدت ساكته واتفكر
رنا:مش داعي اتفكري شكله ايحبك
رانيا بصدمة:من هذا
رانيا:اللي اتصالاته ماايفضنش وديما مشغول عليك ومهتم بيك بكككل
رانيا سكتت
رنا:انا فاطنتله من فترة بس بنعرف من هو وشن قصته
رانيا:قصة طويلة وحتى انها مش مفهومة
رنا:هو نفسه فيصل صاحب سراج راجل سندس اللي تعرفن عليهم في المزرعة
رانيا;اها هو نفسه
رنا بفرحة:كان قلبي حاس ان هو ناعليا يارنوشة ايهبل ومحترم بكككل ياريت لو اتحبو بعضكم
رانيا عصبت;رنا انتي شايفة ان وقت الكلام هذا وبعدين هو مجرد صديق وانا مش حنسمح ان العلاقة تطور اكثر من هكي وطلعت
رنا:ياخية ايهبل ان شاءلله اتحبيه وتاخذيه مكرا فيك
"""
بعد اشوي كملت رانيا الكيكة وحكت الامها ان في صديق يقرا معاها حكتله عالنت انها ادير في كيكة واصر ان يبي منها وقاللها ان بيجيب اخته تعطيه منها وامها وافقت لانها كانت عارفة رانيا كويس وانها ماتكذبش ولانها كانت مش معارضة فكرة الاصدقاء البناتها بس بإحترام
رنت رانيا علي فيصل وقالتله ان كملت الكيكة وايجي عشان تعطيه قرعته وفعلا بعد ربع ساعة دق الباب ولما فتحت رانيا لقتها روان
رانيا;اهلا ريونة
روان:باهي انا ريان ولا روان
رانيا:انتي روان
روان بصدمة:كيف عرفتيني
رانيا تضحك:من السانك
روان:باهي شنو الحاجة اللي قالي فيصل بتعطيها ليا
رانيا:اصبري اشوي وخشت جابت الكيكة وطلعت
رانيا:اهي كيكة وخوذي منها حتى انتي
روان:اكيدة انا اللي تعبت ونزلت وجيت بناخذها ماياكلهش بروحه
رانيا تضحك:ايوا خليك هكي شاطرة
روان اتاشر بيدها بمعنى تعال
ريان:في من اتنادي
فيصل ابتسم:فيا☺
راتيا:فيصل مش هكي راه ماما تطلع
فيصل:اصبري جايبلك هذينا عشان روان ماتقدرش اتشيلهن امسكي ومدهن الها (وكان جايبلها كيس فيه شكولاطات و3كبابي عصير طبيعي)
رانيا انحرجت:ليش هكي مكلف روحك
فيصل:من جدك هذي تحسبي فيها تكلفة تي انتي اللي تاعبة في الكيكة انا مادرت شيئ غير خذيتهن مالمحل
رانيا:باهي شكرا
فيصل:عفوا تبي حاجة توا
رانيا:سلامتك
فيصل خذا روان وركبو في السيارة وروحو للحوش ودار اللي في راسه وكلا من كيكة رانيا 😍
ام فيصل خشت عليه:من هذي اللي جبتو منها الكيكة
فيصل:لحقت الفتانه تحكيلك
ام فيصل:غابي فيها ماادس شيئ
فيصل:ماادسيش الا في اسرار سراج باهي ياروان
روان بضعتله ومشت تجري😜
ام فيصل;قالتلي انها البنت اللي شفناها في المزرعة
فيصل:وااااو عليك ذاكرة الله واكبر ماتنسش بكل
ام فيصل:بلا تغيير مواضيع احكيلي شن قصتها
فيصل:شيئ صديقتي بس مافيش قصة
ام فيصل:متأكد صداقة بس
فيصل:بصراحة هي من عندها معتبرتها صداقة بس انا وسكت
ام فيصل:انت شنو
فيصل:لنقني حبيتها
ام فيصل:كيف حبيتها انت ناسي اني خاطبتلك بنت خالك ولا شنو
فيصل:مش ناسي بس البنت مازال صغيرة وانا اصلا ماحسيتش تجاهها اي شعور
ام فيصل:وتوا اكتشفت انك ماعندكش شعور تجاهعا ليا سنة طالبتلك البنت
فيصل:هذا اللي صار والحب مش بإيدينا ايجي فجأة وانتي عارفة كويس ان انا عمري ماحبيت هذي اول مرة انحب
أم فيصل:والحب كلام فاضي شوف خوك مهند اجوز عن حب ونهايته طلاق بعد 3عيال عكس عماد اللي اجوز اروادة متريح وحياته سمحة
فيصل:انا مادخلنيش بحياة حد فيهم انا دخلني بروحي وكيف نبي حياتي
ام فيصل:بس انا مش حننحرج مع اختي عشان حب وكلام فاضي
فيصل:يعني شنو
ام فيصل:يعني بتاخذ فاتن زي ماكنا متفقين
فيصل:بس انا ماانحبهش انا حاليا نبي رانيا
ام فيصل صبت:انا قلت فاتن يعني فاتن لا رانيا لاحب لا كلام فاضي وطلعت
فيصل غمتله:شكلنا بنبدو في المشاكل من توا وخذا فونه ومفتاحه وطلع
"""
#عند_أبطالنا في المستشفى
سراج طبعا رن عليه فيصل بيعرف وينه سراج قاله عاللي صار وهو جاه وقعد معاه في المستشفى
سراج طبعا كل اشوي ايرن علي سندس بيعرف اخبار امه
سراج:يعني ماوعتش
سندس:قالي الدكتور وعت اشوي وعطوها ابرة منوم ورقدت اخرى عشان مااتعبش قلبها
سراج:باهي تمام وانتي كنك مازال مارقدتي الساعة 2توا
سندس:مش جايني نوم
سراج:ارقدي بكرا ورانا وعية بدري ويوم طويل لازم اتكوني مصحصحة فيه
سندس:بنصلي قيام الليل وندعيلها اشوي ونرقد
سراج:عادي حتى انا انصليه
سندس ابتسمت:اها اكيدة عادي
سراج:باهي كيف انصليه كم ركعة
سندس:عادي زي كل صلاة بس انت حر في عدد الركعات تبي 2/4/10اللي تبيها
سراج:باهي خلاص نمشو انصلو بس بعد اتصلي ارقدي باهي
سندس:باهي وسكرت
صبت سندس توضت وصلت قيام الليل وحتى سراج نزل من سيارته توضى في حمامات المستشفى وجا عند سيارته طرح جاكته وقعد ايصلي عليها
فيصل كان مصدو ماللي ايشوف فيه بس اطمن لان حس ان سراج تغير بجد
اما عمو محمد فهلباته اللحظة التاريخية هذي لان كان مقمعز مع رجالة من عمره علي مقاعد حديقة المستشفى #Koka_Saleh
"""
بعد الاثنين كملو صلاتهم سندس جت تمددت عالسرير وهي في عقلها افكار واجدة ومش عارفة كيف تصرف بعد اتروح مالمستشفى هل حتستمر مع سراج وبذات بعد حست بجد ان متغير واجد او حتسيبه لان مش حتقدر اتكمل بسبب ماضيه اللي قعد ايأثر علي حاظره
""
أما سراج كان في باله خوفه علي امه المريضة وعمليتها بكرا وباته اللي مش حيعيش اكثر من سنة وسندس اللي تبي الطلاق وبتسيبه بعد ماحبها كل هالحب وهدى وحملها والمشكلة اللي مازال مش عارف شن حلها قعد ايفكر في هذا كله وماقدرش يرقد كان فيصل جنبه في السيارة وراقد(وطبعا زي مالاحظتو مازال ماحكى الفيصل قصة هدى)
اما هو عيونه ماعرفن النوم وهو المشاكل فوق راسه بالكوم أول مرة ايحس روحه مسؤول عن كل هذا كله واول مرة مايرقدش من هم فوق راسه
"""
#صباح_ثاني_يوم
كان يوم مهم بكل بالنسبة الهم كان حيتحدد فيه مصير احسن انسانة واطيب انسانه خبرو العيلة كلها عشان ايجو يحظرو العملية وحتى هل سندس من ظمن اللي جوهم عشان يحظرو العملية
عالساعة 9 بزبط لبسو عفاف دبش العمليات وطلعوها مالعناية وخشو بيها الغرفة العمليات
سراج بعد شاف امه هكي وراقدة ومش فاطنة الحد وكان معاها لين خشت الغرفة العمليات معش تحمل وطلع مالمستشفى الوحيدة اللي فطنتله سندس وطلعت ولحقاته لقاته مصبي برا ويبكي
سندس:سراج #Koka_Saleh
سراج لف عليها ودموعه علي خده;خايف عليها
سندس انصدمت من دموعه:ادعيلها بدل ماتبكي
سراج: والله دعيتلها بس خايف اتسيبني العملية خطيرة وهي عندها السكر
سندس:ان شاءلله ربي اينوضها لنا بخير ومااتسيبكش ولا اتسيبنا
سراج:يااااااااارب
سندس قربت منه ومسحتله دموعه;مش حلوة ايحقوك جوا تبكي
سراج مسك يدها وباسها:انحبك ومانبيكش اتسيبيني
سندس فكت يدها منه:مش وقته الكلام هذا تعال نرقو فوق نرجو الدكتور يطلع عشان نطمنو علي اعميمة
سراج:باهي ورقى معاها
"""
وقعدو الكل يرجو في العملية وكانت عملية كبيرة وخطيرة كانو الكل قلقانين علي انسانة عمرها مازعلت واحد وكانت طيبة بكل بس اكثر شخص كان متوتر سراج وكانت سندس اكثر وحدة مركزة عليه وواجعها وكل اشوي تمشي اتهديه واتواسيه
#بعد 6 ساعات من المراجاه سراج معش قدر يصبر وعصب عالاخر
سراج بعصبية وصوت عالي:معقولة 6 ساعات مايطلعش حد ايطمنا مش هكي
فيصل:وسع بالك مش هكي العملية كبيرة وتبي وقت
سراج بعصبية:مش للدرجة هذي الوقت انا لازم انخش انشوف شن صاير معاهم #Koka_Saleh
محمد:وين اتخش ياسراج جوا دكاترة انت مش اعرف منهم
سراج بعصبية:بس اللي جوا امي مش امهم اكيدة مش حاسيين بالنار اللي فيا انا
بعد قال امي كلهم انصدمو وتأثرو من سراج لان عارفين ان عمره ماقالها
سندس:صح مش امهم بس هما هذا واجبهم واكيدة حيديروه بأكمل وجه انت بس اصبر اشوية
سراج بعصبية:تعبت وانا صابر معش نقدر حد ايطمني عليها #Koka_Saleh
محمد:انا بروحي قالق عليها بس لازم نصبرو هما يشتغلو جوا مش يلعبو وهذي عملية صعبة
سراج خبط عالساس:ياااااااارب
مع طلعت الدكتور وجوه يجرو
#يتبع
قولكن شن بيصير في عفاف الانسانة الطيبة اللي كانت ام حنونة وعمة طيبة وزوجة صالحة الانسانة اللي عمرها مازعلت حد هل حيكون مصيرها الموت واتسيب سراج في الدنيا بروحه او حتعيش ويفرح بيها ❤
واذا ماتت شن حيكون قرار سندس هل حتكمل مع سراج او حتسيبه 😞
واذا عاشت برضو شن حيكون قرار سندس هل حتكمل معاه او اتسيبه 😞
وهدى شن حيكون مصيرها بعد كل هاللي صار وهل حملها صح من سراج او مش حامل اصلا أو حامل من شخص ثاني واذا حملها من سراج صح هل بيه حتقدر اتخرب حياة ابطالنا وهل حبها السراج حقيقي او تمثيل😕
ورانيا هل حتحب فيصل او لا واذا حباته شن حيكون مصيرها مع ام فيصل اللي رافضتها من توا
(كلا رانيا هذي بختها عطيب💔)
وفيصل شن حيصرف في كلام امه هل حيطاوعها وياخذ فاتن زي ماتبي او حيكونله تصرف اخرى اذا حباته رانيا كله حنعرفوه في الحلقات الجاية
أسفة لو فيه لخبطة في الأسماء وأكيد رأيكم ايهمني 😉
گـتـابـتـي Koka_Saleh
أنت تقرأ
منحرف واحببته
Romanceكانت تلك الإختلافات سبب جمعنا لنكمل قلوب بعضنا💗 These differences are the reason why we gathered to complement each other's hearts
