سأصل ولن تكسرني(باللهجة الجزائرية)

🖇🌾الجزء الاول🌾🖇

صح فيها شوي مصطلحات تاع لي يقراو دومان مديكال سمحولي مي لي بارت الجايين مكانش كاين بزاف حماس كملوها وعطيوني رايكم
_________________________________________

السلام عليكم انا تسنيم عمري23انتارن مدسين الحمد لله وحققت حلمي مزال عام ونتخرج طبيبة 🌻
انا الكبيرة تاع ماما وعندي زوج خاوتي صغار طفل إلياس مزال فاليسي والطفلة انصاف مزالها فالسيام عندي ماما هي كلش طويلة170عينيا كباااار و بني وشوافري غاثيين وطوال الحمد لله هوما اجمل حاجة فيا كلش تاعي جاي فلكحل زين عرب ههههه فمي مرسوم من عند ربي مجاش منفخ بزاااااف ومجاش صغير بيناتهم ونا خمرية خشمي جا مسلوب وصغرون مي مديفورمي شوييتح 😂😂وجهي بيضوي الحمد لله عندي لطاي من عند ربي وزاد مع السبور والمشية تخدمت على الصح متحجبة ونلبس لعريض الحمد لله هداني ربي قوية الشخصية باردة مع بزاف ناس طيبة الحمد لله مهبوووووولة وفضييييييحة متسرعة وتقدرو تقولو شوي مسترجلة بيسك عندي السبتة النوار فالكاراتي 🥋منطولش عليكم نبداو ديراكت فالقصة 🌻
سارة:تسنيم ختيتو نا صحبتك ونا لي نوقف معاك ونا لي عشرت ست سنين..
تسنيم:علبالي تحبي نحكم لغارد في بلاصتك ليلة غير متحلميش لازمني نروح وديجا مقلتش لماما دوك تقلق 😑
سارة:هيا برك احكميهالي برك خي علبالك ماما صباح كامل تعبانة على الأقل نروح نطيبلها لعشا ونفطر خياني كان انا جيت بلاصتك ني حكمتلك😟🥺
تسنيم:من لول قولي ماماك تعبت اليوم اذا هك ايه اجري اي عليا اليوم الخدمة ربي يشفيهالك اصحبتي
سارة:عمورتي لحنينة منعرف واش كنت حا ندير بلا بيك 😋ربي يزوجك😁🤣
تسنيم:روحي لا نبطل قالو ربي يزوجك😑
سارة:علاه لدوك منيش فاهمة علاه كي ضد الفكرة هك كاملو نقلك نتي معاقة عاطفيا تاع الصح هيا في لمان ني رايحة ربي يعاونك😙
تسنيم تحكي:منعرف علاه تشتي تنارفيني بربي يزوجك تاعها معلبالهاش بلي جامي راح نلقا لي يوالمني غير لا جابو ربي مي الرجال كامل وحوش صراحة مستحيل نبدل رايي🙂🙆‍♀️🤷‍♀️ونا نخم هكاك حتا نشوف فالحالة تقلبت فليزيرجونس .
🚑🚑🚑🚑🚑🚑🚑🚑🚑🚑🚑🚑🚑🚑🚑🚑
الممرضة:الملاد قلبها مش يخبط دكتور واش حا نديرولها حكمتها كريز كاردياك(سكتة قلبية) من قبيلة رانا نضغطو على قلبها والو 💔
دكتور:طلعوها الفوق ني جاي دوك بعد وجدولي جهاز الصدمات ني جاي
1 2 3اطلقي زيدي الضغط 1 2 3 اطلقي طلعي الظغط راح نخسرو الملاد 1 2 3 اطلقييييي
الممرضة :دكتور خسرناها💔🥺😟😟😭😭😭
تسنيم نا غير نشوف ملقيتش وا ندير هو قال خسرناها نا تشوكيت 💔يعني اول مرة تموت مريضة بين يديا مزالني صطاجار برك 😭😭 هو حط الجهاز نا عاودت هزيتو ونقلهم انبوسيبل عاودو وزدتلها فلادوز فالبرة وكملت 1 2 3 اطلقي أطلقييييي ............. ---\/\/~~
الممرضة:دكتوور المريضة مازالها حية فكتها الحمد لله 😲
دكتور:صحيتي تسنيم كنت حا نحبس هي كانت تحتاج صدمة وحدة وتفيق يعطيك الصحة فكيتيها 🙂
تسنيم:مزالني مش مصدقة بلي ناضت فرحت من قلبي وحتا تشوكيت الدكتور يشكر فيا 😲😲😲الحمد لله اليوم حسيت صح وعلاش ني طبيبة فرحت من قلبي كان خليناها راي ماتت صح بلاك ربي كتبها حياة وحدخرا مي الموقف هذا مش حا ننساه 《لا تيأس مهما حدث قد تحدث المعجزة في اللحظة الأخيرة》
خرجت باش نبشر أهلها طليت لقيتها جات وحدها مكاين حتى واحد من عايلتها حرت رجع وين كنت بكري هزيت عيطت لماما خبرتها بلي بايتة فلوبيتال بقيت ندور مع الملل تاع لغارد وتعابعا بقيت ندور فل الكورلوار حتى سمعت لعياط خرجت لقيت جان ماشاء الله طوييييل أسمر وعندو لحية كحلة وجهو مكشر ومشنف وشعرو مطولو كامل وجاي مكشرد وتاه هيهيههيهيهيهي😅 لابس سيرفات اديداس نوار كامل⚫ ويعيط يقلهم وينهي يما ستنيت تاع الاستقبال يريبوندي عليه لقيتو مكانش فالبيرو تاعو بلاك راح يرتاح بسك جا على 2تاع اليل رحت عندو
تسنيم :السلام عليكم خويا كيفاه نقدر نعاونك ؟🙂
هو:يما ويييينهي واش هذا وين راكم متخدموش فخدمتكم 😤وينو يخدم هنا واش بيه البيرو فارغ 😠
تسنيم:خويا معليش تنقص صوتك بسك هذا اولا اوبيتال وثانيا تقدر تقلي ديراكتومو اسم ماماك نشوفلك عليها وديجا مش وقت الزيارة دوك 😶(عييت نحكم فمي واش حاسب روحو جاي يعيط عليا)
هو:اسمها جميلة*****
تسنيم: بعد ما شفتلو هزيت راسي في وجهو كاين باين ميت خوف في وسط القلقة هذيك قتلو لشومبر 50
هو: ايه اوك منين نروح
تسنيم :متقدرش تروح بسك ماماك حكمتها سكتة قلبية كانت حا تموت بين يدينا والحمد لله فكيناها فالثانية اللخرة وراي تحت المراقبة قلبها ضعيييف بزاف وراي مزالها راقدة بسك درنالها منوم ترتاح غدوة تفيق نشوفو ليزاناليز تاعها واش يقولو نفهمو السبة.
هو:كيفاه مش حا نشوفها من نيتك نتى نا خليت خدمتي كامل وجيت باش تقوليلي متقدرش تشوفها 😤😤(بشوفة تاع استصغار كيلها وفات )
تسنيم :غير متخمش تفوت وقعدت نعيط لاجون
لاجون سيكيرتي: وي دكتور
تسنيم: معليش تخرج عليا الموسيو راو حاب يطلع للمالاد لفوق والوقت مش وقت تاع زيارة 🙂بكل هدووء قلتها وجيت طالعة 😎
)راح جبدو لاجون وحكا معاه والو قالو
هو:نتا متعرفنيش شكون من نيتك راني في نهار نطردكم كااامل من لوبيتال هذا قتلك فوتني وطلقني متمسنيش 😤😤
لاجون:سمحلي هكذا قانون لوبيتال مش قادر نخليك مسيو اخرج بعقولية احسن وعياطك راو يقلق المرضى
هو: اوك ني خارج مي مدلي برك اسم الطبيبة هذي واش حاسبة روحها وزاد تشنف عليا غدوة تلقا روحها برا
لاجون:راي مزالها سطاجار برك خويا تيسر الله يسترك والله اك درت حس كبير
هو: اوك ني خارج وسمحلي مي وقتاش نقدر نشوفها
لاجون:غدوة على13:00 حتى 18:00 ربي يشفيها
(نعرفكم هذا محمد بطل تاعنا الثاني😋 عندو سلسلة تاع فنادق متوزعة فالبلاد عمرو 29 جاي شوي جابد على الناس ميخالطش 😶عندو فرد صاحبو وعندو يماه باباه مات 😥وخلالو الفنادق هذو وهو طورهم جاي طويييل 😜كلش تاعو فالنوار ويحب نوار بزاف خزانة كامل نوار 👤فيها شويييتح شوميزات بيوضة عصبي واش يحب لازم يديه 😑مكانش لي يعارضو عندو كلمة مي قلبو طيب🌻 عندو جمعية خيرية يصرفو بيها على الأيتام وراو يبني في اوبيتال لمعالجة السرطان للأطفال مجانا متواضع وكاااااالم😌 في العادة مي كي يقلق بركان🌋🌋😕)
محمد:ركبت الطموبيل ونا منارفي من نيتها ني ماشي 300km باش نشوف يما وهي مخلاتنيش وزاد سطاجار مش حتى طبيبة 😤😤😤 ركبت ديماريت رحت لداري لازمني نرقد غدوة ثاني لازم نسافر عندي اجتماع مش قادر نفوتو ويما كيفاه حا ندير وهي مريضة ومعندهاش غيري لازم نعقعد نهتم بيها وديجا مش خلاص متهني على حالتها 😥 الحل نعيط لأيمن نقلو يدير الإجتماع بلا بيا وفرات يما أولى
🌻🌻🌻🌻🌻🌻🌻🌻🌻🌻🌻🌻🌻🌻🌻🌻
(صباح يوم جديد طلع على ابطالنا كيفاه حا يفوت ؟؟)
تسنيم :نضت بكري من الصبح مرجعتش نرقد مقدرتش كي لحقت 7 بديت لبست قشي حجاب أسود وعريض بحكم لريار تاعي البخسة لازم تتغطا ولا تجيبلي لبلا🤦‍♀️
خمار اسود سباط أبيض وكارتابل مام هي نوار نبان كنت فالعزا هههه😂😂مي نحب لكحل نحسو لون فخم طلعت لفاك نجري باش نلحق الكور بسك ديجا لبروف راو شريهالي العام ليفات سابوطاني بسيف طلعت الموديل تاعو ربي يهديه 😠 تلاقيت سارة فالتريق كانت لابسة حجاب ازرق وخمار نوار وصباط نوار مع الساكة نوار هي بيضة وعينيها بحر ماشاء الله وجهها مدور وعندها خدود تزينهم واحد.الفوسات تذوب خشمها صغرون وفمها مرسوم
سارة:اهلا سلااام واش حوالك الكبدة كيفاه فاتت لغارد البارح ؟؟
تسنيم: راحت عليك اول غارد متفوتش سامطة صراو بزاف حوايج مي قبل قوليلي ماماك كيراهي؟
سارة:الحمد لله رتاحت شوي اي تحسنت طول ياخي تعرفيها مع لاطونسيون اهيه ازربي احكي
تسنيم :تشوفي مراة كانت حا تموت وفكيتها فالخر وشكرني الدكتور ايماجيني وقيلة فيها لا نوت تاع الصطاج المرة هاذي😉😂 .......(حكاتلها بالديتاي كااامل واش صرا غير محمد كي جا لبارح)
سارة:شفتي درتي فيا خير عوضك ربي على قلبك لبيض ان شاء الله تماجوريلنا فالريزيدانة العام الجاي ونشوفو شرجيانة تاعنا (جراحتنا)
تسنيم: ربي يوفقنا في زوج ديجا ازربي لبروف ني شفت دخل لفاك قبييل دوك تاني يبقا يعيط
(نروحو عند محمد ناض الصباح صلى الفجر وعاود رجع رقد مناضش ل 11)
محمد:يااا واش هذا راي 11عندي عوام مرقدتش كي هك هذا كامل لعيا لازم نروح نشوف يما دوك عندي الحل لمن نعيط يدخلوني بسيف عليهم
(هز تيليفون وعيط لراجل ).
محمد:السلام عليكم عمي واش راك
الراجل : والله الحمد لله
محمد:حاب نقصدك في حاجة والله ايرجون طول علبالك يما راي فCHU (المستشفى الجامعي) مخلاونيش ندخل من لبارح وعلبالك خدمتي ومنا تعيش شوفلي مع المدير يفوتني والل قلبي مش مهنيني كامل وني خايف عليها كانت لباس وطاحت حكمتها سكتة قلبية
الراجل :اوك اي عليا دوك بعد نحكي معاه نتا وجد روحك وروح قابلو راو صاحب باباك الله يرحمو مش حا يحشمك هك باش يعودو ديما يخليوك تفوت واذا تحب تدير غارد ملاد و إن شاء الله ميكون غير الخير .
محمد: الله يسترك جزاك الله خيرا والله فرجت عليا خلاص ني رايح .
(راح لبس سروال نوار وشوميز نوار مع كاسكات نوار وصباط بيض نايك✔ هز طوموبيلو مام هي نوار وفيمي هيونداي فخمة وصل راح هدر مع المدير عطاه لا بارميسيون وفات عند يماه لقاها فاقت كانت معاها ممرضة ثم تهدر معاها هو دخل)
الممرضة:لا راي سطاجار روحت اليوم تجي غير كي تسطاجي
جميلة: معلش تعطيني اسمها ولا وقتاه تعاود تجي وين تسكن لازم نشكرها هي لي فكتني وربي يحفظك كي قلتيلي عليها حتى لبارح كي فتحت عينيا لقيتها عند راسي وقامت بيا البارح كيما يلزم دخلت قلبي مسرارة وحنينة
محمد : الله الله صار اكي لاتية مع هاذ الطفلة المسرارة والحنينة ونستي ولدك 🥺🥺بفاسون تاع حزن كيشغل برك
جميلة: لا ياولدي توحشتك شهرين ما بنتش وين رحت كنت برك نهدر معاها بسك اي كانت راح تروح اقعد اكبدي اقعد حذايا واش تدير علاه ضعفت هك اك تقتل في روحك بالخدمة ارحم روحك شوي لا ماكلة لا رقاد هذا واش قتل باباك 😟
محمد: لا يا يما متقوليش هك هاني قدامك كي لحصان نتي لي واش حالك واش تحسي روحك قوليلي كيفاه حتى صرالك هك واش سمعتي ولا واش شفتي خلعك الخلعة هذي كامل ؟؟
(قعدت مدة هي ساكتة)
جميلة: منعرف يا ولدي وحدها جاتني الدوخه عيطو لي يزيرجونس هزوني
محمد:كيفاه وحدها يايما مالا تعبتي روحك في كاش حاجة ياخي علبالك قلبك من قبل راو ضعيف ونتي تجهدي في روحك شويا هك ويخرجو ليزاناليز ونفهمو واش بيك
جميلة بتوتر :ميكون غير الخير ان شاء الله مي هاك تشوف لبارح شعرة ونروح من الدنيا هاذي ونا لدك مزوجتك ومفرحتش بيك لي قدك راهم بولادهم ونتا مزال متفهمش اذا عندك وحدة في بالك قلي نروح نجيبوها
محمد :سبحان الله متفوتيش الفرصة وتجبديلي السوجي هذا يما والله ني مش لاقي روحي مع الخدمة ومخنوق نشوف العام الجاي
جميلة: لبارح قريب مت ونتا بعيد عليا من الخدمة هذي 💔💔😭وكي نقلك حابة نفرح بيك تقي خدمتي يعني سبحان الله كيما باباك بعد واش دارلنا بخدمتو فهمني علاه راك تدير في روحك وفيا هك خدمتك اهم من فرحتي😭😭💔مطلبت منك والو غير تفرحني في اخر ايام حياتي ومحبيتش 😭😭😭😭😥
محمد :خلاص يما علاه تبكي خلاص والله نعزك وعلبالك لا خدمة لوالو خلاص اخرجي برك من لوبيتال وخيريلي نتي الكفلة لي تحبي نروحو نخطبوها ونتزوجها 😶
جميلة :صح يا وليدي ربي يفرحك ويحفظك من العين ديجا راي تدور في راسي وحدة تخرج عليك غير من هذيك المفارة لي تضال تدور بيك اي باينة طول تدور عليك ونتا نيا تقلي خدمة فرات مي يا وليدي نجيبلك مرة ونص ان شاء الله يخرجوني ليوم بعد 😌😌😌🙂
محمد:في قلبو من نيتها والله اخرتها كان خرجت اليوم غير تزوجزي اليوم بعد ربي يستر وصاي.
(صونا تيليفونو عيطلو أيمن )
محمد : ايمن السلام عليكم قلي واش درتو فيها قلبي راو معاكم
أيمن:خسارة عليك صانع المعجزات تاعك ومتديرش فيه كنفيونس😂فريتها ودينا الأرض وعجبهم المشروع المستثمرين مدو مبلغ هايل في عامين نطلعو أكبر فندق فالجزائر .
محمد : ياودي راك ليزوم بلا بيك منعرف واش كنت حا ندير نستعرف بيك راجل ونص صح صانع المعجزات💪😎 مي كيفاه قنعت المستثمر الأمريكي واستثمر معانا وعطالنا لينا المشروع 🤔🤨
أيمن: بطرقي الخاصة 😎😎😂
محمد:متقوليش هددتو بلوراقي لي عندنا تاع المعاملات الغير شرعية لي ساهم فيه وتبييض الأموال لي دارو فالدزاير 😱😱
أيمن: هكاك بعد والله قريب يبوسلي رجليا وزاد قنع المستثمر الصيني😂😂😂😂😂😎😎😎
محمد:نقلك نتا خماج متسواش واش معناها هك راك حطيتنا كااامل فالدونجي وسيرتو نتا او قادر يقتلك عادي من نيتك دوك كامل عينيهم علينا
أيمن :متخافش جريمتي كاملة خسارة عليك هذي المرة الثانية في فرد نهار متديرش فيا كونفيونس😑معلبالوش كامل بلي انا .بعثتلو لوراقي ورسالة صغيرة خاف 😎😎😎
محمد: الحمد لله راك تخمم نستعرف بيك 😎💪💪اوك مالا اي فاتت على خير ودينا المشروع الحمد لله
أيمن:إيه الحمد لله قلي واش يماك كي راهي؟
محمد:حالتها مستقرة الصبحة هذي دوك يكونو خرجو ليزاناليز تاعها خلي نروح نشوف الطبيب هيا فيلمان ربي يعاونكم
أيمن: في لامان ما يكون غير الخير وربي يجيب الشفاء
(راح محمد عند يماه لقا الطبيب ثم وفي يدو ليزاناليز)
الدكتور:الحمد لله مدام ججميلة حالتها مستقرة دوك مي قلبها راو ضعيييف بزاف لازم تراعيوها متزعفوهاش ومتعبوهاش وملازمش تتعرض لأي ضغوطات بسك راي بنسبة كبيرة معرضة لسكتاتة القلبية والبارح فكيناها بمعجزة من عند ربي سبحانو مسيو محمد لازم تدير بالك على يماك مليييح خلاص الحمد لله تقدر تخرجها لعشية هيا فيلامان ربي يجيب الشفاء
محمد:ايه من اليوم راي قدام عينيا وربي يحفظك دكتور
جميلة:آمين ربي يحفظك دكتور فرحتني ايه مقاتليش قبيل الممرضة هذيك على اسم الطفلة لي فكتني
دكتور:إسمها تسنيم***** اي مزالت متخرجتش
جميلة :الله يبارك ان شاء الله تقدر تجي حابة نشكرها مي مجاتش
دكتور :نورمالمو عندها ستاج من بعد اي راح تجي اذا لقيتها نخبر تفوت عندك (
(طولنا بزاف عندهم نروحو عند تسنيم وسارة كملو لي كور تاعهم وخرجو)
سارة : وأخييييييرا اول مرة نفهم عندو اليوم شرح بيان ومام الدرس كان هايل TPتاعو باين راح يكون مليح
تسنيم :ايه مام نا اليوم هزيت لي نوت بزاف مي فوتنا من لي كور راني مييييتة بالجوع راني نشوف فيك شورما ازربي نروح نتغداو بسك راو عندي سطاج من بعد
سارة :سبحان الله جامي حا تتبظلي هيا نروحو لا تبظاي فيا من دوك ههههه اجري لغدا اليوم عليا بسك البارح عاونتيني
تسنيم : متتوقعيش مني نقلك لا خلي برك نسلك وحدي لا ياختي سلكيلي وزيدي قرعة كوكا معليش😁
سارة:طماعة منعرف وقتاه تديري الخير بلا مقابل 😑
تسنيم : ها بنتي اجري اجري ديجا دوك ملقاو لاشان فالريسطورون لي حذا CHU
سارة:يا بنتي راكي حرقتيها اصبري شوي مش حا تهرب
(وصلو لريسطورون)
تسنيم :وايي لقينة طابلة اوغوزمو الغاشي مكانش على الأقل نكمل فيساع نروح شوفي خالتي جميلة واش راهي يكونو ليزاناليز تاعها خرجو
سارة :آااا بيان اوك مام نا نروح نشوفها معاك ونفوتو من بعد لبلوك بسك ياخي علبالك لي قروب تاعنا وراح نخدمو مع ريزيدون
تسنيم:ني نايضة نروحو ندومندي شورمتنا
سارة :نا نجيب الكوكا ههههه
(عند محمد)
محمد : يما شكون الطفلة هذي فهميني واش دارتلك علاه مهتمة بيها هك كامل لي يجي تسقسيه عليها
جميلة : اولدي والله طفلة ربي يبارك ومقبيل حكاتلي الفرملية قاتلي بلي البارح كي حبس قلبي كانو بقا 3ثواني ويرجع انبوسيبل يخبط الدكتور ايس حبس الصدمات تاع القلب هي محبستش للخر حتا عاود خبط بفظل ربي وبفظلها الطبيب كان حا يقول متت وكانو راح يبداو يوجدو لوراقي
محمد:😱😱يما هذا كامل ونا مش معاك سمحيلي تسما صح كنت حا نخسرك 💔ايه مام نا متشوق نعرفها لازمها كادو شباب الحمد لله مزال لي كيفها فالدنيا خوفتيني مكانش علبالي هك كامل💔🥺😥
جميلة : متخاف موالو هاو الطبيب قال نخرج لعشية الحمد لله ونشوف لولدي عروسة تحمر لوجه و ديجا راو وقت لغدا روح تغدا او باين عليك حتى لفطور مفطرتش انا دوك بعد تجيبلي الفرملية غدايا
محمد :اييييه ونا نسيت قصة لعروسة عندك الحق لازم نروح نهرب نتغدا
(هبط محمد لنفس الريسطورون لي فيها تسنيم وسارة بحكم جايا مقابلة CHU وتسنيم سارة حكمو طابلة مع الدخلة تاع الباب فالكوان)
تسنيم:😱😱😱ياااا شوفي سيحت الكارتابل كامل كي نضت اوووف جامي حا نتبظل واصلا كيفاح حتى خليتها مفتوحة نتي عندك لا يكونو سرقوني فتحوهالي فالتريق
سارة وناضت تحب تلم معاها:لا فتحتيها جبدتي تيليفونك متخافيش شكون حا يلحق يسرقك ونتي تجري فالتريق حم بوك😌😂😂😂موسوسة
تسنيم: اسكتي برك هيا لمي معايا اوف الخاتم تاعي هربت
(محمد دخل وهي هابطة باش تهز خاتمتها لقات واحد عفس عليها 💔😂😂😂)
_________________________________________
مرسي بزاف لي قراو وخلاو وفوك ولي كومونتاو نقلهم أي لووووف يووووو👏👏
لي بارت الجايين من الثاث وروح هايلين كملو قراوها ونتمنا تعجبكم