#نبي راجل
الحلقة(1)
بقلم .. القطة الشريرة
--------------------------------------------------سند.. نزل ولحق ادم وعطوه طريحة وجوهم الناس قعدو يحزو فيهم
رواسي .. اركبو ف السيارة بسرعة ياعليك عار
سناء.. رعشني يابنات قلبي طايح ف سرتي وبدل ماجسمي يكوش شعري الى كوش
ابتهال .. اسسس ادم وعمي جايين
سند.. فتح باب السيارة اخر مرة تعفسو امه السوق
سناء.. نحنا شن دخلنا باه
سند.. بعياط ولاكلمة
أدم .. هدي روحك ياعمي ماتعصب ع خاطر كلب زي هذا
---------------------------------------------------
ف الليل
خولة.. سناء باش تنوضي تغسلي البساط الصبح
سناء.. ووواك ياريتني جيت ولد 😭😭
خولة.. هو لو نحنا مش اهلك وشفناك ف الشارع راهو قلنا عليك ولد
رواسي.. ههههههه قصفاتك
سناء.. وكانكم انتو مش اهلي وشفتك ف الشارع والله ماني معكساتك وبنقولك ياجتي وياجديدة
رواسي..هههههههههه انها الحرب
خولة.. معناها بتغسلي حتى بساط المربوعة
سناء.. ليش يما والله نظيف
خولة.. تم الكلام
سناء.. تبي يجيني الغضروف قبل مانتزوج
خولة.. مايجيك شي وطلعت
سناء.. تنقز وتضرب ف راسها ليش الا انا
رواسي.. حقا يافرخة شن صار ف عبدو
سناء.. نتصل بيه ورقمه مقفل من بكري
رواسي.. غريبة وسمعو صوت مسج وصل ع هاتف سناء
سناء.. فتحت المسج حي ياحي نهاري المغبر
رواسي .. خيرك
سناء.. الدينصور الى يلحق فينا بكري طلع عبدو اسمعي شن كتبلي بارك الله فيك ع الموقف متع اليوم عمري ف حياتي ماتعرضت للإهانة زي اليوم معقولة تهربي مني لهدرجة نخوف وفوقها ننضرب حسبي الله ونعم الوكيل فيك ربي ياخد فيك الحق
رواسي.. ههههههه مسكين
سناء.. وووه عليا قريب دبست فيه هوا تقول ملعب كورة شفتي بطنه نحس فيه لما ياكل الأكل يقعد حاير يمشي يمين ولايسار
رواسي.. المهم فتكيتي منه وربي يرزقك بأحسن منه
سناء.. امتى بس نجرب شعور الزواج ونحظر صحباتي ونصبغ شعري اصفر ونبدا زي الشعلة ونطربق ف اللبان ونقول راجلي جابلي وراجلي دارلي ونفتن بين سلفاتي 😭💔
رواسي.. تمرقدي خلاص غدوة عندي عمل
سناء.. كله من أمك الى جايبتني وهيا ملبوسة جايبة عرم مفرخ وتقولك ياريتني ماتزوجت مالا كان ريتك تزوجتي قداش جبتي😤😤😤 ينرفزو فيا النوعيات هدي تلقيها جايبة جيش تبعته لفلسطين يحررها وتقولك بنطلق ولاياريتني ماتزوجت وكان سمعت وحدة تدعيلك بالزوج الصالح تقولك لاخليها هكي خير شن ينفع الراجل باهي كان ماينفع جايبه منه 8 ليش ع المهم تصبحو ع خير
------------------------------------------------
ف الصبح
خولة.. تخض ف سناء الى فاتحة فمها وتشخر تي نوضي ياهمي شوف كيف راقدة تقول جدك فرج مسكين الى بياخدك والله بنقعد نطلب منه السماح دنيا وأخرة
سناء.. ماهو خلي يجي بعدين انا مسامحتكم دنيا وأخرة
خولة.. نوضي اغسلي البسطات
سناء.. هذا الى فالحين فيه نوضي اغسلي نوضي ضمي نوضي ولعي المولد نوضي ولعي المضخة نوضي لبسي اوباما سرواله حتى لما بنموت نوضي ضمي المربوعة خيرك يما رأهو بتعقديني الشي هذا بيأثر ف جيناتي وصغاري بيجو مجانين نوضيني بشوية بنتي الحلوة صباح الورد اميرتي النائمة صباح الرمان مع بوسة مع حضن معقولة القردة احن منك ع صغارها
خولة.. قرصتها من وذنها هذا عقابها تقارنيني بالقردة حتى بساط دار القعاد بتغسليه
سناء.. ياربي ضاقت بيا الدنيا وانقطعت بيا السبل فزوجني حتى لبوبريص ياقادر
ياكريم
----------------------------------------------------
نبيل .. صباح الخير يام
نسيبة.. صباح النور
نبيل.. ليش متعبة روحك ومدايرة الفطور
نسيبة.. لاتعب ولاشي
نبيل.. توا يام مش قتلك معاش تبدري ف الأكل ليش الشكشوكة درتي دحي بروحه بس ومعاش تكثري يام بالله عليك هوا مافى حد الا انا وانتي دحية وحدة تسدنا باهي يام
نسيبة.. الخير فيه ياولدي غير بيقعد ويفسد
نبيل .. التبدير مش باهي يام مش باهي
نسيبة.. باهي إن شاء الله وتوا قولي امتى بنفرح بيك زي باقي خوتك وخواتك
نبيل.. كنت بنفتح معاك الموضوع خلاص قررت نتزوج
نسيبة.. يبشرك بالخير عندك وحدة ولانشوفلك
نبيل.. لاانتي شوفيلي
نسيبة.. عندي صاحبتي عندها بنت عاجبتني الحق ونحس فيها مناسبة ليك
نبيل.. خلاص توكلي ع الله
----------------------------------------------
سناء.. تخبط ف المكنسة باهي شن حاطة الكرسي وتتفرجي عليا بري خشي
خولة.. تعالي للجيهة هدي وحكيها كويس نبيها تلمع
سناء.. يما خلاص والله مزال نلحسها بلساني
خولة.. هكي باهي العيد السنة هدي عندنا تبي نساوين عماتك يديرونا مضحكة
سناء.. حدفت المكنسة وانا علاش نتعب ف روحي ماهو بيطلقو فروخهم وبيوسخو نغسولهم بعد العيد
خولة.. مسكت الطوبو كملي وانتي ساكتة
سناء.. متأكدة انكم مالقيتوني قدام جامع ولامحل خضرة
خولة.. للأسف طلعتك من بطني
سناء.. بصوت واطي ياريتك عقمتي 😒
خولة.. هيا كملي شن تفنصيلي ورن هاتفها
----------------------------------------------------
نسيبة .. السلام عليكم كيف حالك ياخولة
خولة.. وعليكم السلام مرحبتين الحمد لله وإنتي
نسيبة.. ف نعمة الحال وينك عاش من سمع صوتك
خولة.. تعيشي وتسمعي والله ف الدنيا يانسيبة
نسيبة.. اي هوا هذا لكن الفترة الجاية ممكن بنتلاقو هلبة
خولة.. كيف مافهمتك
نسيبة.. اليوم ولدي نبيل قالي شوفيلي بنت حلال وانا الحق عاجبتني بنتك سناء
خولة.. شافت لبنتها وهيا مصدومة سناء عاجباتك
نسيبة.. اي شفتها ف عرس بنت سلفك وهيا تعول وتساعد ف العزايز وموسعة بالها والله عجبتني
سناء.. جت تجري لأمها انا من عاجبة جايني عريس كأنه ف منو تكلمي ماتقوليش هذا عزوزتي
خولة.. تضرب ف سناء وتبعد فيها
سناء.. هاتيها الغالية ام الغالي
خولة.. قرصتها وفنصت فيها
نسيبة.. قوليلي شن رايك
خولة.. نشاور بوها ونرد عليك واكيد مش حانلقو احسن منكم
نسيبة.. إن شاء الله هيا بسليمتك توا
خولة.. تسلمي يارب وسكرت
سناء.. ليش ماقلتيلها موافقين
خولة.. ارزني يرزيني فيك بعدين ولدها هذا راهو يابس
سناء.. انا نسمنه انتو مادخلكم
خولة.. يعني قفاص فقري ديما تحكي عليه
سناء.. عاد انا جاية من البيت الأبيض يما وافقي بالله مليت وانا ديما اخت العروس وبنت عم العروس وام العروس
خولة.. يعطك قهرة تقهرك الكلمة الأخيرة لبوك ولخوك
سناء.. وواك كان مادخلتي ولدك ماتهني ماعنده علاقة هوا تزوج وجاب فروخ ع حاله
خولة.. مزال تتكلمي ع خوك هكي نهارك الأحرف وحقا دكرتيني امشي طلعي الأنبولات الى شريتهملهم توا قريب يوصلو
سناء.. ان شاء الله جايين هما
خولة.. اي انا عزمتهم ع الغداء
سناء.. انتي لازم تنسحب منك الجنسية الأمومية
خولة.. كملي الفراشات وديري شن قتلك
سناء.. ريلاكس ياأنا لازم مانخرب فرحتي وأخيرآ جاك عريس وبتتزوجي وتبدي تجيهم كأنك ضيفة تاكلي وتشربي ولما بتجي بتروحي ديري روحك نسيتي مكان الباب توا نوريهم😈😈😈
----------------------------------------------------
احمد.. مقعمز ف الصالة ويراجي ف مرته وصغاره يلبسو
بتول.. طالعة وهيا لابسة قونة ليكرا سودة وجاكة دمية ووشاح اسود وقصتها ع الشارع لأنها مش محسوبة مع الشعر
احمد..هيا ياولاد
بتول.. وبصوت متصنع احمد معاش تعيط بالشوية
احمد.. حاضر
طبعآ .. احمد عنده 5 صغار ثلاثة ولاد وبنتين
رتاج .. هيا كملنا
احمد.. هيييي
-------------------------------------------------
رواسي .. السلام عليكم
سناء.. وهيا تقرض ف البصل وعيونها دموع نقزت ع اختها جاني عريس واسمه نبيل اقسم بالله اسم ع مسمى ياوخيتي بينقصني منكم
رواسي.. غير حولي ايديك عني بصل يافرخة وقوليلي كيف صار
سناء.. هذا ياكبدي نسيبة صاحبة امك الى كلها ذوق وتفهم ف الجمال وطبعآ شافت لجمال روحي لأن جمال وجهي متحلل كلمت امك وقتلها نبيها لولدي ااااااه محلاها عزوزتي تي بنسميها ماما هدي
رواسي.. الله ياسناء واخيرآ جاك نصيبك
سناء.. مالا تحسابيني بنعنس اسمعي بري غيري وتعالي عاونيني جاية السنيورة
رواسي.. لاماتقوليش بتول
سناء.. لابالعرض اااخ وخلاص امك هيا السبب هيا الى عزمتهم
رواسي.. اوووف متعاركة مع صلوحي والله ماعندي ليها خلوق
سناء.. الله متعاركين لو مش مخطوبة راهو ستغليت الفرصة وخديته نيهههههه
رواسي.. مبردك
-----------------------------------------------
أدم .. يما انا غدوة مسافر
سالمة.. حصلت الموافقة
أدم.. ايه ومرات نقعد غادي ثلاتة شهور باش ناخد الجنسية مرة وحدة
إبتهال.. كانت جايبة سفرة القهوة قصدك ف الجزاير تاخد الجنسية ف ثلاتة شهور
أدم.. إيه
إبتهال .. سعدودك
سالمة.. ياريتك تقعد تعيد معانا وبعدين تمشي
ادم .. وين يما بالله العيد مزال عليه أسبوع وانا كان مامشيت غدوة يحطو حد ف مكاني وانا الخدمة هدي ماحصلتها الا بطلوع الروح
سالمة.. ربي يوفقك ان شاء الله ويبعد عليك ولاد الحرام
أدم .. اللهم امين يارب بنمشي لعمامي بنسلم عليهم
سالمة.. تمام
ابتهال.. بتروح ع الغداء
ادم .. لا ماتراجوني
-------------------------------------------------
بتول.. السلام عليكم
سناء.. جت بنت الكلب
رواسي.. اسكتي فكينا منهم
خولة.. اهلين اهلين زارتنا البركة
بتول.. وهيا تتكلم من خشمها أهلين ياعمتي شن حالك
سناء.. شوفي قصتها تقول مصران مجفف هذا ف عاشوراء نديرو بيهم هريسة
رواسي.. هههههه ضمي فمك خلاص
سناء.. والله داهنتها بشحمة الجمل باش متبتتها
بتول.. شن حالكم يابنات وسلمت عليهم
خولة.. ياسناء بري جيبي الأنبولات لصغار خوك
سناء.. باهي يما خلي يخشو قبل
خولة.. شن قلت انا
سناء.. باهي😤😤 ومشت لدار أمها وفتحت الدولاب الهم توا بيشدوهالي ع انفخيلنا وع اربطيها وع طربقهالي ايوا عندي فكرة طلعت الأنبولات وطلعت البرا وكانت ماسكة خلال كبير لونه اصفر هيا ياخلال جداي زي ماكنت تخلل ف القيطون الى تلبس ف جداي خللي الأنبولات وبدت تنقب فيهم كم انا شريرة نيهههههههه والله كان يسمعو بيا ديزني لاند حايندمو لأنهم ماحطوني مكان زوجة اب سندريلا وسمعت صوت تصفيق وراها يارب يكون الجن العاشق ومش احمد
أدم.. هوا انتى تباني عبيطة بس طلعتي خبيثة
يتبع
