#نبي راجل
المقدمة
بقلم .. القطة الشريرة
----------------------------------------------
رواسي .. سمعتي يا سناء مروة بنت خالتي اليوم دوروها
سناء.. يعطيني قزن انا أخرتي حطوني بدال ثمتال الحرية وبدل الشعلة نمسك شعري الى بدا يطيح زي دموع كاظم الساهر
رواسي.. هههههه الفال عندك
سناء.. وهيا تمشط ف شعرها الى مش شايف هواء ربي ليه أسبوع ااااي والله قاعدة نتعذب فددني هالشعر اسلاك شائكة مش شعر
رواسي.. سناء غريبة يابنت انتي قبل لما تسمعي بوحدة من العيلة نخطبت تزعلي وديري العار خيرك اليوم
سناء.. نضجت
رواسي .. كذابة وبعدين شن خطر عليك تمشطي شعرك
سناء.. اللطف حاسبيني حتى ع دخول الحمام الصراحة يعني انا خاطري نمشي بالحديث الى يقول واقضو حوائجكم بالكتمان بس نعرف روحي متع شهدرة
رواسي.. قولي هيييي
سناء.. اليوم العشية بنشوف كبيدتي
رواسي ..بوجه مصدوم امتى وكيف
سناء.. اليوم الفجر تعرفت عليه
رواسي .. يعطيك مايرفعك تعرفتي عليه الفجر ودرتيه كبيدتك
سناء.. والله انا بعد صليت دعيت ربي يبعتلي ولد الحلال واول ماكملت صلاتي لقيت منه طلب صداقة توا عمرك ريتي حد يلوح النعمة
رواسي .. بنمشي معاك
سناء.. اي لكن تعالي رقدي معاي شعري لأنى لو خليته هكي ولبست الوشاح الراجل حايهرب
رواسي .. ليش
سناء.. ماهو بيقعد منفوخ وهوا مرات يحسابني داسة الغام
رواسي .. ف هدي صدقتي بس كيف بنخش فيه هذا
سناء.. اسمعي جيبي المقص واي عقدة قصيها
رواسي .. وانتي ليش تقعدي لين توصلي للمرحلة هدي ربي يهديك وخلاص
سناء.. نشين ف روحي لأن الشينة ياخدها واحد قنين ويحبها ويموت فيها
رواسي..🤦♀️🤦♀️
------------------------------------------------
خلينا نتعرفو ع بعض وياريت اي وحدة مواليد ال2000 ومخطوبة حطوها بين قوسين كلمة مخطوبة تعطيني الطريقة 😂😂😂😂
اسمي سناء وحياتي كلها داء وابتلاء وعزباء ووباء وبكاء وغباء ولواء 💔😂 مواليد 95 موصفاتي الله لاتروعكم ههههه نبصر طويلة وعيوني ناعسات مقبولة الشكل شعري مكنسة حرشة لدرجة مرة أمي كانت بتغسل بيا البساط 💔ههههه كذبة قوية صح بس اقرب مثال هذا والصراحة انا الوحيدة الى هكي طلعت ف خواتي الحمد لله كملت قرايتي هذا الإنجاز الوحيد الى مفتخرة بيه طبعآ تخرجت من معهد ميكانيكة اكيدا حاتستغربو هذا ياحناتي ايام الثانوية شنباتي كانو اطول من المراة الى حاطين صورتها ع زيت دبر املا وللأسف اعتبروني ولد وحطوني ف المعهد هههههه بصرت عليكم مرة تانية متخرجة من معهد حاسوب وحضرت الماجستير ع سطح المكتب😂😂😂 اخر مرة
عندي 3 خوات وأخ واحد وتنين بيبسي و4شاورما🥰😂
امينة.. مواليد 88 متزوجة وعايشة ف أمريكا وعندها بنتين الوقحة مشت لأمريكا ونست عاداتنا يعني معقولة ليبية تجيب زوز صغار بس يعني عندنا اقل شي 6 ويجيبوهم عند الناس ويعدولهم للثلاتة ويطلقوهم الى فوق التلفزيون والى فوق الدولاب والى فوق الصور وتلقى امهم تشوفلهم وتضحك لاوتقولك صغاري بسلامتهم عاقلين وتجيك فرخة شعرها تقول ضاربها الضي وتقولك عطيني خبزة وتنوضي انتي زي العبيطة تعطيها ومزال مارجعتي لمكانك يهجمو عليك كلهم ويقولولك حتى نحنا نبو ولا يشرطو يبو الراس متع الخبزة طبعآ ونحنا اصلآ شارينها باش نتعشو بيها ولما نحطو العشاء ونطلعو الخبزة المنتوشة نحصلو هزايب من بابا ونرقدو من غير عشاء😭😭😭 نحكي ع فئة معينة وخليكم مع الموضة الجديدة الى طالعة تلقيها فرخة عمرها 10 سنين مدايرة حلوى حمرة ع فمها ع اساس روج وتجي تسلم عليك وتبوس فيك وانتي تحسابيها جاية بتطلب سكر ولابزار لأمها تقولك لاجاية بنهدرز عليك تي وين الطفولة بس انا ف عمرها ديما ف الشارع ومسميني عطية وقريب نخش الثلاتين ومانعرفش نتكلم ونبوس ف نفس الوقت يانمشيها امممواه اامواه ياشن حالك وشن اخبارك شن مدايرة شن الجو ع عدد البوسات اما نشدها اموواه وشن حالك والله نتلخبط 😅😁
طولت عليكم صح ههههه شن بندير حبيتكم تصدقو
احمد.. مواليد 89 متزوج وأعزب ف نفس الوقت يعني يفطر ويتغدا ويتعشا عندنا وكان جوه صحابه يجيبهم عندنا وكان عنده سيارة عاطلة يجي يصلحها عندنا وكان لقى نملة ميتة يجي يدفنها عندنا ومرته ندكر من يوم المحضر معاش ريتها اكيدا عرفتوها من أما نوعية صح مزيتة وخوي هذا زمان كان يلبس فينا ثلاتة وشحات لدرجة لما نحولولهم نلقو ف شعرنا واقف يتحسب علينا ومرته شعرها ع الشارع هما خصلتين متبلتهم بصفار بيض+ ميشتهم ولونهم برتقالي من غير العدسات ماتقول سحلية ضاربها جن لا وتقولك عيوني التبعيات طبعآ كلامها كله بالتاء ع اساس رقيقة وناعمة خلونا منها دراه الكبد
وبعدين ياحناتي امي خشلها جن ولتبست وجابتني انا وخلوها ف سركم مانحبش نشكر روحي 🥺🥺🥺
رواسي .. م 97 متخرجة وتخدم وعندها مرتب وتوقع ف شيكات تخيلو وانا نشحت منها وزيادة شعرها طويل ومخطوبة وخطيبها احلا مني😭😭😭😭
وأمي .. خولة وبابا .. سند
وهدي عيلتي
--------------------------------------------
خولة.. هيا وينكم تعالو حطو الغداء لخوكم
سناء.. ووواك شن هالهم ليش مزوجينه كان كل يوم عندنا
رواسي .. اسكتي توا تسمعك أمك وتقلبها ع راسك
سناء.. فندق هذا معاش حوش طبعآ انا المديرة وانتي مجرد عاملة نظافة اوكي
رواسي .. قهرتك عاوديها كان مازال عطيتك تاخدي مزيل عرق
سناء.. انتى الى بتندمي بعدين 🥺😂
رواسي .. خلاص ضمي فمك وهيا للمطبخ
سناء.. جبدت المصلية ولبستها وقعدت تشوف للمراية منظري زي خيمة العزاء المفروض يأجروني الصراحة
------------------------------------------------
أحمد.. فاتح الثلاجة ويتفرج شن فيها
رواسي .. أحمد شن حالك
احمد.. ساعة امتى بتبطلو البرادة
سناء.. كانت خاشة لما تبطل تتلصق وقالتها بصوت واطي
أحمد.. شن حسك قلتي
سناء.. الجو جميل والسماء صافية
احمد.. هيا بسرعة حطو الغداء وطلع
سناء.. وهيا تنقز قاهرني هيا مخليها متريحة ونحنا زي الشغالات بس بنمشيلها تعلمني والله المفروض يديرو كتاب كيف تصبحين مزيتة ف أسبوع
رواسي.. حقا قوليلي هوا الولد الى بتقابليه شن شكله
سناء.. مش عارفة امالا ليش بنطلع بنشوفه لكن كان تشوفي اسلوبه يهبل اقسم بالله وقالي يبي يزوج
رواسي .. ان شاء الله خير
خولة.. خفو يديكم بوكم جاء
------------------------------------------------
أمينة.. طارق استاحشت لليبيا خاطري نروح
طارق.. تحملي هما شهرين ونروحو
أمينة.. اوووف والله مليت من الغربة
طارق.. حتى انا مليت لكن الله غالب شن بنديرو هييييي
----------------------------------------------------
ف العشية
سناء.. واقفة ع المراية وهيا لابسة سروال ابيض وبلوزة صفرا اسمعي كأنه شعري منفوخ وباين
رواسي .. هوا شن خلينا فيه كلها نتشناه بالمقص
سناء.. اي عادي المهم تشد مع هذا وبعدها نديرله زيت الفلفل
رواسي .. اي عاد انتي كل مشكلة عندك ليها حل
سناء.. اهو يتصل
رواسي .. قربت جنب اختها وحطت ودنها ع الهاتف
سناء.. بصوت رقيق الووو
رواسي.. حاطة ايدها ع فمها وماسكة الضحكة
---------------------------------------------
عبدو.. تي وينك يا ماريا طلعتي ولامزال
رواسي .. بعدت ع أختها وقعدت تضحك
سناء.. تفنص فيها باش تسكت اهو كيف بنطلع
عبدو.. تمام حتى انا طالع هييييي
سناء.. أوكي باي وسكرت
رواسي .. ماريا وووووك عليا هههههههه بنموت
سناء.. ياريت باش خطيبك يتزوجني
رواسي .. يالاااااا عاد الا صلوحي
سناء.. اصلآ مانبيه هيا نوضي مانبيش نتأخر ع عبدو حبيبي
---------------------------------------------
ف السيارة
سند.. بتعطلو
سناء.. اي انت برا ونحنا توا لما نكملو نكلموك ولانروحو لحوش خالتي
سند.. لاااااا بنراجيكم خودو حاجتكم وروحو
رواسي.. شافت للسناء
سناء.. بابا نحنا بنعطلو معقولة بتقعد تراجي فينا ساعتين
سند.. مافيش داعي تقعدو ساعتين خودو حاجتكم وروحو
رواسي .. باهي وقف ف السنتر هذا
سند.. وقف سيارته انزلو هي
سناء.. كله من وجهك خلي يوصلنا بابا باش نوصلو بسرعة قاطعة الرزق
رواسي .. باهي ضمي فمك وخليه يشوفك من بعيد وبعدين ساهل
سناء.. نخشو للمحل هذا نبعتله رسالة باش يزبط مكاني وين
----------------------------------------
عبدو.. فتح الرسالة ورد عليها
----------------------------------------
سناء.. قال هوا قريب
رواسي .. ابعتيله بابا معانا وقوليله تشوفو بعضكم من بعيد
سناء.. قلبي الصغير قاعد يتقطع خلي نبعتله سمايلات الدموع باش يعرف انى زعلانة
-----------------------------------------
عبدو.. قرا الرسالة وتصل بيها
سناء.. الو
عبدو.. ها ماريا
سناء.. والله متحشمة منك لكن بابا صكر راسه
عبدو.. ماعنديش مشكلة المهم نشوفك وبعدها نديرو موعد تاني
سناء.. ياحليلي وخلاص
رواسي .. سكري بسرعة ادم ولد عمي
سناء.. لما تنخلع وتخاف معاش تعرف تتصرف طيحت التلفون وحطت عليه رجليها
رواسي.. تي مش هكي ياحمارة ابعدي بسرعة وقامت التلفون ودساته
سناء.. خشت ف بعضها
رواسي.. جايب معاه إبتهال اخته
ابتهال .. هاااي
رواسي .. أهلين
ادم .. وانا نقول ليش عمي البرا
رواسي .. اي قبل شوي كيف جينا
ابتهال .. سناء كيف حالك
سناء.. كل عام وانتي بخير قصدي البقاء لله ووواك شن دخلك
ابتهال .. خيرك العفو
ادم.. خيرها هدي
رواسي.. لاشي غير تبصر شن معقولة ماتعرفوهاش سناء هيا والبرادة
ادم .. المهم انا نمشي نكسد مع عمي وانتي 5 دقايق ماتفوتيهم وطلع
ابتهال.. خيركم وجهكم اصفر
رواسي.. اسكتى رعشة ركبتنا ف جرتك انتي وخوك
سناء.. مش صاير منه الموعد
ابتهال .. فهموني
رواسي.. حكتلها القصة
ابتهال .. ساهلة توا نديرو رواحنا ماشيين للعطار الى ف الجيهة التانيةوقوليله انتي شن لابسة وتشوفو بعض
رواسي .. كلميه بسرعة
سناء.. كلماته وطلعو
--------------------------------------------
أدم .. شافهم طالعات وجاهم وين
ابتهال .. للعطار توا نرجعو
ادم ..بسرعة هييييي
ابتهال.. تمام ومشو
رواسي .. ردبالك تمسكي التلفون بوك مقابل
ابتهال .. اي حتى ادم راه فكونا منه
سناء.. تمام وقعدو ماشيات
رواسي.. تي وينه هذا
سناء.. اسمعو يابنات امشو بسرعة لأن ف واحد سمين ورانا ومنظره مش عارف كيف من بكري ورانا
ابتهال.. مني هذا
رواسي.. توا يشوفوني اصحاب صلوحي ويقولوله خطيبتك يلحقو فيها
سناء.. تسرع ف خطواتها هيا والبنات
ابتهال .. يمي هذا حتى هوا يسرع ف خطواته معانا
سناء.. بدت تجري والبنات وراها والناس تتفرج عليهم
ادم.. يشوفلهم وجاهم يجري خيركم
ابتهال .. هذاك السمين يجري ورانا
سند.. نزل ولحق ادم وعطوه طريحة وجوهم الناس قعدو يحزو فيهم
يتبع
هلا حبايبي ليكم وحشة كبيرة ❤❤❤
وزي العادة رايكم يهمني نكمل ولانوقف
