إنعدام الثقة💔
السلام عليكم
يابنات نبي نحكي قصتي بأدق تفاصيلها
اني متزوجة حالياً و قبل مانتزوج كنت نحب راجلي و اول ماتعرفت عليه كنا كبار مش صغيرين اني عمري 22 و هوا 25سنة
قالي موضوعي نبيه جديات و نبيك تقولي لأمك قتله تمام تو نحكيلها احكيتلها و مااعترضتش و تعرفت عليه و عجبني و حبيته و هوا راجل كويس و الحمدلله وقف معاي راجل في كل شي و ماصار الا الخير اعطيته الثقة الكاملة فيا لان الحمدلله اماليا ربوني افضل تربية و كملنا مع بعض كويس كانت في بعض مشاكل بسيطة متاع علاش ماقلتيش طلعتي مع صاحباتك و الكلام هادا و مافيش مشاكل خيانة و الجو هادا لان بجديات واثق فيا احسن ثقة و كنت فرحانة الحق
برا برا مشت بينا الايام على حالنا الكويس اللي كل يوم و يوم نحبو بعض اكثر و نتعلقو ببعض اكثر و نزيدو نحترمو بعضنا اكثر لين وصلنا مع بعض 3سنين علاقة و كانو احلا سنين في حياتي هوا كمل حوشه و الحمدلله من الاول كان واضح معاي قالي من اول ماتعرفنا مش حنلقى بنت عيلة و ناس زيك و اني بالكثير حوشي بأثاثه بكل يبي 3 سنين و قعدنا ال3سنين هادو ماعمري جبدتله سيرة حوش و لا خطوبة و لا زواج كل اللي كنت خايفاته نخسر راجل هكي..
خلي نقوللكم تفاصيلي:-طبعاً اني في الطول باهية مانعتبرش قصيرة طولي كويس و لا سمينة لا ضعيفة باهية و بيضة و شعري اصفر و عيوني عسلي و لبسي عباية ووشاح و مش معقدة لكن محترمة
و هوا:-طويل طبعاً و جسمه رياضي و ابيض لكن مش زيني و عيونه خضر و شعره اسود
باهي نكمللكم جاب اماليه خطبوني عجبتهم و حدد فضانية و درناها و حددنا عرس طول بدون بيان خدينا فترة 7شهور وتيت فيهم بين صالة و فيلو وعشي و حاجات السهرية و الحنا و الحاجات هادي و كل مستلزمات العرس المهم في يوم قلبلي حياتي فوقي لوطي طلعت اني بسيارتي مشت معاي امي ل بن عاشور بناخد التاج اللي موصية عليه لان مزال اسبوعين بس على عرسي حاجزة في صالة ڤرزاتشي و العشي من فاطمة اللبنانية و العصير و الشكلاطة جوني هدية و البكلاوة هدية و الفيلو من محلات الشريف
بعد ماروحت اتصل بيا خطيبي محمد قالي
محمد:-ايوا وين انتي؟
اني :-في الحوش كيف روحت
محمد :-وين كنتي؟
اني:-مش قتلك بنمشي نجيب التاج
محمد :-ايه صح قلتي
اني بتسهويك :-شن بديت تنسا و الا واخدتلك عقلك بنت تانية
محمد:-واخدلي عقلي عملك
اني:-خيرني شن درت؟!
محمد:-شي شي اني بنصكر تو نهدرزو بعدين
اني:-تمام باي
صكرت ماعدلتش على كلمته قلت اكيد ماعجباش الفيلو و الا سعره لان عليه هوا المهم ماعدلتش فوتتها برا برا قرب موعد عرسنا و جي الاسبوع الاول من العرس درنا يوم الاثنين سهرية العيلة و الثلاثاء الحنا و سهرية كبيرة و الاربعاء الفاتحة و الخميس الحفلة تم كل شي كيف مانبي و حلو عجبني اني و الناس كلهم الحمدلله روحت لحوشي الجديد و الامور تمام فاتو اسبوعين و احني في تالت اسبوع مقعمزة معاه على سفرة الفطور قتله
اني:-محمد
محمد:-نعم
اني:-شن عندك اليوم؟
محمد بنتوير:-عندي ماندير
اني سكتت و تحشمت على وجهي
يمشي فوتلي يومين و قالي
محمد:-منتهى
اني من الدور الاول:-نعم
محمد:-وتي روحك اليوم بنطلعك ناخدو حاجات و نتعشو برا
اني فرحت ووتيت روحي طبعاً لبسي مااختلف فيه شي الا بديت نلبس في شاربات و مش هوا اللي شرط اني خاطري فيهم بدلت و نزلت قالي
محمد:-وين خاطرك نمشو؟
اني :-وين ماتبي اني نمشي معاك للموت😍
محمد:-بعيد السو عليك شن رايك نمشو لكودو؟
اني:-عادي
محمد باستغراب:-جديات؟
اني:-ايه امالا بكدب
محمد:-تمام هي نمشو ناخدو حوايج بعدين نمشو لكودو
اني:-براحتك هي
مشينا و شرينا حوايج و طول لكودو خشينا محمد شاد في ايدي و عيونه ع الاولاد اللي يخدمو غادي كلهم استغربت اني المهم قعمزنا و جانا السفراتجي و محمد عيونه فيا و في الولد اني مستغربة من تصروفات محمد المهم تعشينا و روحنا ماسألتاش لانه عصبي و قلت فكيني منه مانبيش مشاكل فوتت تالت يوم اتصل بيا رقم غريب جيته قتله
اني:-محمد شوف الرقم هادا يتصل بيا
محمد:-انتفض هاتي رديتي😡
اني:-تي كيف رديت
محمد :-رد و طلعت مرت خوي رقمها جديد عطاني كلمتها و فوتلي اليوم هادا و الاسبوع اللي بعده قالي اني بنسافر لتونس اسبوع و ردي بالك تفتحي لحد و الا تطلعي من الحوش اهو قتلك اني قتله حاضر و تسقد و الحمدلله اللي درت شن قالي بالحرف لان طلع يراقب فيا و مش مسافر بعد اسبوع روح سلم عادي و ارتاح و قعمز معاي قالي انتي بنت مش مزبوطة و قبل مانتزوجو كنتي تخوني فيا مع ولد و تطلعي معاه و هلبا كلام اني قعمزت مصدومة و قعدت نبكي قتله شن تقول مستحيل الكلام هادا كيف تصدق دوة زي هادي و من قالك ناض ضربني و خبطني لين عيي و قعد معيشني في الظلم الفترة هادي كلها للاسبوع اللي فات طقطق على باب حوشي ولد صغير جاية بنفتح الباب قالي قعمزي ماناقص غير تفتحي الباب اسكتت و قعمزت فتح الباب قاله الولد فيه امرأة تبيك خش قالي اقعدي اهني تو نجي سكتت
جي خش قالي جاية معاي امرأة خششها و قعمزت قتلي بالله نبيك تسامحيني و قعدت تبكي قتلها خيرك قعمزت تحكي قالت اني كنت نحب محمد قبل و سامحيني نقول فيها قدامك قتلي اني العب في راسي الشيطان و غيرتي لما سمعت عرس محمد قريب مشيت اجرت بنت فتنت و عبت راس محمد قبل العرس ب اسبوع و فنتله عليك و مااستفدت شي نحساب روحي طلع اهو لين مخليك زرقاء و حابسك في الحوش و اني معاش مشيت القدام بكل و ديما متلقية و خلاني نجيك اهني و نتأسف منك توا طلعو تحاليلي طلعت مريضة بمرض خطير البعيدة عليك و بندير عملية يابال تنجح يابال لا نبيك تسامحيني و يامحمد مرتك كويسة و كله كذب عيشو مع بعض و ماتسمعش للناس قتلها اني صح دعيت قلت حسبي الله و نعم الوكيل في اللي كان السبب لكن كان محمد صدق ان اني بريئة اني مسامحاتك ناضت تغمرتني و قعدت تبكي و اني بكيت قتلها ربي يشفيك و روحت
و محمد رجع كيف ماكان قبل و حياتنا ولت تهبل والحمدلله🤗😍
و نصيحتي ليكم ماعمركم تسمعو كلام الناس على شخص اعطيتوه الثقة في يوم لين تتأكد بعينك و ماتظلم حد في حياتك لان لو في يوم المظلوم قال (حسبي الله و نعم الوكيل)فربي بيرد عليه (لأَنصُرنكَ و لَوْ بعد حين)
و السلام عليكم و رحمة الله وباركاته
✍🏻Hadeel Ahmed🥰🥰
