قَتَلتني الثورة

البارت الرابع(الحقيقة)

ضليت هواي افكر بالموضوع
صفنت وصحيت على صوت خالي
رحيييم اليوم نطلع للجيران عازمينه ع العشه
رتب روحك
كتله ماشي

خالي راح للسوك واخذني ويا
اشترالي ملابس تخبل
حيل فرحت بيهن
جنت فرحان واني اسمع صوت اليبيعون حسيت اكو حياة
سماعات ال"بقالة" رغم صوتها العالي
لكن جان الشعور حلو
بعدما عشت وي اصوات الرصاص بالبصره بذيج الايام
صرت افرح لمن احس اكو ناس عايشه حياتها الطبيعية

حيل حبيت الاجواء بالموصل وفرحت بحنية خالي وحبه الي

رجعت للبييت سبحت ولبست ملابسي الجديده

وخليت عطر بس مو ماركه جان عادي ابو الف😂

وكتله يلا خالي نروح

خالي كلي رحيم ماوصيك! دير بالك تذكر شنو مذهبك يمهم! دير بالك ! دير بالك!

كتله خالي شسالفه لاتخاف شني مربيلك اثول ههه

كال لا من حشى الاثول هههه

كتله بضحكه شكرا شكرا ما تقصر

ورحت وياهم لبيت جيرانهم

اول مادكينه الباب طلع رجال جبير ابوهم جان
رحب بينه ودخلنه بيتهم
جانو مسويلنه اكل حيل طيب

بعدما اكلنه وخلصنه
كعد يمي (بكر) ابنهم الجبير الي تقريباً بنفس عمري

بكر: اعرفك بيه اني بكر اي شي تحتاجه هنا اني بالخدمه
رحيم: اريدك سالم والنعم منكم. اي والله اني هنا ماعرف احد زين عرفتك
بكر: اعتبرني اخوك وصديقك اي شي تريده اني حاظر

رحيم: رايد عشرين ورقه ماعندك

بكر: منو انت بدون زحمه؟ ههههه

ضحكت وكتله اريدك سالم

جان مبين على بكر كلش انسان اصيل وابو نخوه وغيره
بس مره خالي على طول ما احنه نسولف

ابد ماشالت عينها من عندي وجنت احسها حيل مغثوثه من عدنه ومن كعدتنه سوه!

بكر كال باجر نطلع اني وياك اعرفك ع المنطقه حتى تتعود عليها
اني وافقت واخذت رقمه وهو هم اخذ رقمي كال خاف تحتاجني

رجعنه للبيت واني كلش فرحان لان صار عندي صديق جنت كلش مختنك وحدي وضايج

اول مادخلت للبيت ..

مره خالي صرخت بوجهي بصوت كلش عالي:

احنه مو كلنالك لاتتقرب من الناس هنا!! افتهم انت من غير مذهب ! انت مكروه هنا، الناس تلعب روحها منك الا اكلك هيج، يعتبرونك كافر، هذا الكاعد تسولف ويا اذا يدري شنو مذهبك باجر "يعلسك" والله
واحنه النبتلي بيك! انت راح تسويلنه مشاكل واحنه مابينه حيل..

قاطعها خالي: رحيم رحمة لامك وابوك اكطع هل علاقات واقتنع بكلامها تريدلك الخير تره والله اني بالبدايه هم ماصدكت بكلامها بس بعدين تأكدت اذا تحب امك وابوك لتصادق احد هنا!