عشق في بلاد حروبها لا تنتهي 3 (جبار)

البـــ{الــتاسع}ـــارت

فتحت نور عيونها وهيا تاخد في نفسها لحساته كان حد جبده منها مع دموعها لبدو ينزلو زي لمطر ، مسحت عيونها وهيا تحاول تصفيهم من الدموع وتشبح لصورت رائد:الله يرحمك
واول ماحست بـ باب الحمام انفتح دست الصوره وهيا ترشف في دموعها لماعاش قدرت توقفهم .
ضيق جبـار عيونه اول ماشافها مقعمزه قدام قزاز البلكونه ، قرب ووقف وراها وحط يديه في جيوبه من غير مايتكلم .
حست نور بيه لقالت من غير ماتتلفت وهيا تشبح للقطوسه وتحط في يدها علي لقزاز :جعانه
وسكتت شوي وقالت من بين دموعها وصوتها لواضح مليان بـ العبرة لنتبه عليه جبـارر :يناري تراهو مستاحشه صغارها
جبـار: وشن عرفك عندها صغار
نور :هنيده
قعمز جبـار جنبها :ها نطلعها
مسحت نور دموعها بكم تي شرتها وتغير صوتها طول وهيا تقول :لالا
جبـار:نجيب صغارها هنا
نور شبحتله برفعت حاجبه:هدا ماناقص
جبـار بتسم شبه ابتسامه :ها والحل باه
رفعت نور كتافها ورجعت شبحت للقطوسه :مانعرفش
ورجعت شبحت لجبـار لتلفتلها وهوا يشبح لعيونها لمدمعات وحمر زي خشمها وخدودها ، ضيق عيونه وقال :شن لمبكيك
نور نزلت عيونها مع دموعها لرجعو نزلو :شخص ميت
جبـار :ها كان الدموع ترجع غالي من قبره ره الناس اجمع مع احبابها
نور :ماترجعش بس تصبرنا علي لفراق
جبـار :مش عدل علي صبرك تعدبي عباد راقده في قبورها محتاجه لدعوه
مسحت نور دموعها وخدت نفس :مش بـ يدي
ورجعت شبحت قدامها وتشبح للقطوسه وهيا حاسه بنظرات جبـار لماحولش عيونه منها لدقايق حستهم هيا طوال اما هوا حس بيهم تاواني قصااار ، واول مارجعت نور تلفتتله نزل عيون وكان بيوقف بس نور قالت :حقا نبي نكمل قرايتي نبي نخش في جامعه هني
جبـار شبحلها بـ طرف عينه وتجاهل كلامها ووقف وهوا يقرب من السرير خدي تليفونه .
ضيقت نور عيونها ووقفت وقالت :سمعت شن قتلك
حط جبـار تليفونه في جيبه وخدي باكو دخانه وولاعته وتلفت تخطاها .
نور رفعت حواجبها بستفزاز منه وقالت بصيحه وهيا تتلفتله:انطرشت انت تي نكلم فيك اني
وقف قدام الباب وكيف كان بيفتحه وقفه صوتها وهيا تقول :صهيب
تلفتلها جبـار طول وضيق عيونه وقال بنبره خوفتها :جبـار ها جبـاار
وطلع وقربع عليها الباب لخلها تدفل عليه :تفوه عليك تفوه كلب مجرم
ونفخت وهيا تشبح لسرير بنعس :طالعه اطلع روحك اصلا احسن شي في عصبيتك تمشي وتخليلي في الدار
وتلفتت قربت من شنطتها وهيا تحط في صورت رعد وفوقه شالها ومشت لسرير رقدت وهيا تتغطه وتشم في ريحته علي لمخده واليرغان ، غمظت عيونها وهيا تهمس :حتي ريحته مجرمه
.
.
.
تــاني يــوم ....
نفخت هنيده وهيا تلبس في شنطة الضهر علي كتافها وتلفتت لأية :سعدودهم ياربي يروحو علي رجليهم مش حني مخنوقين من اول مانطلعو من باب المدرسه نلقوهم قدامه مره تانيه نلقوهم مدرسين السياره قدام الفصل
ضحكت أية وهيا تتلفت :شوفي نسرين جت
هنيده تلفتت شبحتلها :اكيد يعني مش حـ نمشو نسلمو عليها ههههههه تخيلي حمدالله علي سلامت خوك من ضربت ولد عمي هههههه
أية :تنقز علينا تنتفنا بـ سنونها ههههه بس والله كويسه هيا
هنيده :ايه بس كويسه بعيده علينا حني غير قابليين لصداقه
أية :هيا اطلعي خير مايخشونا الداخل زي امس يدورو علينا
هنيده دفتها :غباره اطلعي اطلعي مانبيش وجهي يتزلط زي امس
طلعو أية وهنيده لجرت لي الباب التاني وهيا تشبح لباب المدرسه وتأشر بـ يدها لصاحباتها لأشارولها بـ معني باي بتسمت هنيده وشبحت لنسرين لطلعت من المدرسه وهيا تنزل للبركيدجو، قعدت هنيده تشبحلها شوي وركبت وهيا تسكر في الباب وتتلفت لأية لتشح فيها من التجيلي وتوشوش :شوفي مؤيد هني
تلفتو هما الزوز وشبحو لمؤيد لنزل من سيارته وهوا يقص في الطريق ويمشي للمدرسه ، ورجعو شبحو لبعض بستغراب .
آيه :لي من جاي
هنيده رجعت قعمزت زين :اكيد مش لينا
آيه رفعت كتافها :ربي يستر
.
.
.
نزلت نسرين لبركيدجو المدرسه لكان ديمه فاضي وهيا ترد علي تليفونها وقالت :وينك
مؤيد نزل التليفون وقال :وراك
تلفتتله نسرين لوخرت خطوتين وقالت :اني جيت بس علي خاطر حلفك بس بعد اليوم ماعاش نبي نسمع ولا ندوي شي معاك
مؤيد قرب خطوه وقال :باه شن دنبي اني علاش تعاقبي فيا علي شي اني ماعنديش يد فيه
نسرين دموعها نزلو :حتي كان انت من العيله اللي دمرونا عيلاتنا يامؤيد مستحيل يوافقو علي علاقتنا واصلا لو عرفو ح يقتلوني ويقتلوك
مؤيد:نهربو من هني نخلوهالهم بـ ثارها ودمها وسلاحها ونمشو بعيد عليهم اني نحبك يانسرين رايدك بالحلال علي خاطرك مارفعت سلاح ولا درت رقبه في رقبتي وخايف فيك ربي
زادت عبرت نسرين لرفعت عيونها فيه وقالت وهيا تهز في راسها :مستحيل مانقدرش نوطي راس عيلتي مانقدرش ، علاقتنا فاشله من الاول اصلا غلط من الاول مفروض ماغلطناش وقربنا من بعض حبنا غلط وحرام
مؤيد ضيق عيونه وقرب منها :عمره ماكان الحب حرام
نسرين :لكن حبنا حني حرام وغلط وانت عارف ماحد ح يقبل بيه
مؤيد:بتستسلمي من البدايه وين كلامك مش علي اساس مستحيل تاخدي غيري وانك ليا اني بس
مسحت نسرين دموعها وقربت شدت يده بداها الزوز :ايه مستحيل ناخد غيرك بس نفس الوقت مانقدرش نوطي راس عيلتي مانقدرش نعاندهم وندير شي فوق إرادتهم
ورفعت عيونها لعيون مؤيد لمدمعات وهوا يحبس فيهم بقلب مجروح وكملت :مشاكل عيلتنا مش ح تم وجبـار بجرمه حرمنا من بعض وكان بـ يحرمني من خوي ويقتله زي ماقتل ولاد عمامي
مويد :جبـار ياخد في تاره وكلنا نعرفو لداروه بوك وعمامك فيه
نسرين طلقت يده وبعدت :وشن دخل خوتي و ولاد عمامي علاش يقتل فيهم علي دنب داروه عمامي وبعدين بابا مادار شي عمامي هما المدنبين
مؤيد :كيف مش مذنب وهوا ساكت وراضي باللي صار ومناصرهم علي فعلهم وخوتك لو ماقربونا ره جبـار مامسهم لا قربهم
نسرين :ها ريت من توا تعاير فيا بـ بوي و عمامي من توا تحط في اللوم علي عيلتي
مؤيد :انتي عارفه كويس كلامي مش معايره واني بدات نحاول قد مانقدر الموضيع هدي مانفتحش فيها بينا بس انتي لي مصره تفتحيهم ومش راضيه تنسي وتخلي مشاكلهم بعيده علينا ومش قادره تفهمي يابنت الناس انه اني رايدك بالحلال نبيك مرتي و ام صغاري علي خاطرك حافظت علي روحي وعلي يديا اللي مانبي نوسخم بالدم بس مادامك طلعتي حبنا غلط وحرمتيه وتبي تنهي اللي بينا خلاص انتي في طريق واني في طريق وخلينا بين التارات اللي ماليها نهايه
وتلفت مشي وخلاها تبكي ...
.
.
.
اكرام :شن خطر عليك البيتزا توا
قربت نور منها بوجها :قيمي قيمي قصتي ورا ودني
رجعتلها اكرام قصتها ورا ودنها ورجعت نور تحط في السالسه علي البيتزا وقالت :ماتبوش ماتاكلوش حلوه هدي شن خطرها عليا تي عيت من مكرونه كسكسي رز بازين فاصوليه لكل يوم تعلف فينا سكينه بيهم
ضحكت هنيده وهيا تشبح لأية والاء لخشو .
آيه بتسمت وهيا تقرب من نور :بيتزاااا  الله قداش ليا خاطري فيها بس تحشمت نديرها
نور رفعت حاجبها وتلفتتلها :وعلاش تحشمتي هيا البطن فيها حشم
آيه :هكي قلت عمي متوفي واني بندير بيتزا مرات تزعلي
نور :لا نزعل لا شي الحزن في القلب مش في الدوه وفي البطن العفو
اكرام :هاتي ندير معاك
نور هزت راسها :لالا ماتعرفوش اديروها زيني خليني تو ندير بروحي هدرزي عليا بس
هنيده :اني بنمشي نشوف قطوساتي حبايب ألبي قبل مايجي عمر تو ماعاش يخليني نطلع
ضحكت نور :حليلي منك انتي وعموره ماتخفيش حتي كان كبسك مش حـ يديرلك شي
ضحكو لبنات وهنيده ضيقت عيونها :شن قصدك انتي شن قصدك شن قصدك
نور :ههههههه ماقصدي شي وانتي علقتي
نفخت هنيده وهيا تتلفت لآية لتضحك :سكري فمك انتي وياه وتعالو معاي
الاء :لا برو انتم اني شوي ونلحكم
طلعو آيه وهنيده وخلو نور لتلفتت لاكرام لتشبح من الروشن لبوها :حي بوي جي نسيت ماحطيتلاش سوريته لحدتهاله امس في داره  غر نمشي نعطيهاله
نور :غر تعالي قيميلي قصتي الدراه قبل ماتمشي
قربت اكرام منها وقمتلها قصتها وطلعت تجري وطلعت ألاء وراها وهيا تتلفت لنور لي لاهيه في لعجينه وفي البيتزا  ، ورجعت تلفتت قدامها وركبت بتسلل فوق وهيا تشبح حولينها خايفه حد يشوفها وتسرع في خطواتها علي الدرجات لين وصلت فوق وفتحت باب دار جبـار وخشت وهيا ترد في الباب وتتلفت تشبحلها وعيونها يلودو علي الدار كلها وريحت جبـار لماليه المكان خلتها تبتسم بحب ، تلفتت لشنطت نور لمحطوته لوطه ومفتوحه وباين حوايجها لقعدات فيها ، زادت ابتسامتها لتحولت لحقد ، وقربت من الدولاب لفتحاته وهيا تشم في ريحة جبـار ، خدت جاكيته لمعلق وقربت شماته وهيا تغمط في عيونها لدمعو وتحضن فيه وهيا تهمس بصوت بالكاد مسموع :كان تعرف قداش نحبك ياجبـار كان تعرف
وتنهدت وهيا تحرك في جاكيته علي وجها وبعداته ردت علقاته وهيا تسكر في الدولاب وتقرب من الزيانه لعليها عطره وعطر نور وتوكتها ، ضيقت الاء عيونها ودفت عطر نور وتوكتها وطيحتهم لوطه وهيا تشبح للعطر لتكسر من اثر اطيحه علي الزليز وعطره تناتر مع مرش الشيشه علي الارضيه والسجاده ، ورجعت شبحت لعطر جبـار لقعد بروحه علي الزيانه .
رفعت حاجبها براحه وكأنها بـ بعد عطر نور من علي عطر جبـار حـ يقلب القدر وحـ تكون هيا مرته مش نور ، رجعت تلفتت لشنطت نور وقربت منها وهيا تقعمز علي ركابها قدامها وتحول في شال المحطوت اول شي واول مارفعاته شافت صورة ولد ضيقت الاء عيونها وشدتها بين يداها وهيا تشبحلها قلبت الصوره وهيا ادور علي شي مكتوب بس مالقت شي ، نفخت وهيا تشد في الصوره وتفتش بين حوايج نور واول ماشافت تيشرت رجالي قاماته وهيا تفتح فيه قدامها وتبتسم :هدا علاش ماتبيش جبـار
وضحكت وهيا تاخد في الصوره والتيشرت وترجع في حوايج نور بسرعه وبعدم ترتيب زي ماكانو ووقفت قربت من الزيانه وهيا تفتح في لقجره لين لقت بيرو ، خداته وكتبت علي الصوره من التالي ( حبيبي نحبك ) وتلفتت حطت التيشرت علي السرير وفوقه الصوره بالمقلوب علي الكلمه لكتبتها وطلعت .
.
.
.
#يتبــ(للبـــ10ــارت)ـــع
#اليـَاقُــوت
________________________________
بداء كتابة الرواية في تاريخ 20 / فبــــ2ٰــــراير / 2020
تم انهاء كتابة الرواية في تاريخ 31 / مــــ5ـــايو / 2020