تحت الارهاب

حلقة 4

#تحت الارهاب ☠

حلقة 4

بقلم محمد مالك

نفتح باب الدار

منذر: راكان لحظة لو سمحت
راكان..تعفلق لانه طلب محدش يقاطعه
طلع بالكرسي: مش قلت محدش يخش عليا
منذر...مد تلفون لي راكان
راكان..خدا التلفون:الو
مصعب: ليك وحشه
راكان..سمع صوت مصعب توتر وبدا يتنفس بسرعة وساكت
منذر لاحظ التوتر وقعد يشوف لي راكان : افتح المايك
راكان حول التلفون من وذنه وفتح المايك
مصعب: الووو راكان قاعد معاي
راكان: وين صغاري
مصعب: مزال عندي 25 ثانية ونسكر ياريت نحكو كلام منطقي فيهم
راكان: منبيش نتكلم معاك نبيك تعرف شئ واحد بس ان اني وراك لحد اخر يوم في عمري وحنلقاك
مصعب: تمام حلو توا دوري نتكلم صغارك بخير لحد الحظة هادي ! نبي علي كل حد منهم 250 الف دينار !
السبت حنتصل بيك ونشوفو شن صار فيك الوقت كمل

سكر المكالمة

منذر..يتكلم معا واحد من الشرطة: قدرتو تحددو مكان المكالمة !
شرطي: لا للاسف مكالمة كانت اقصر من دقيقة ملحقناش
منذر..حط يده علي راسه وشاف لي راكان الي ساكت وشاد التلفون و كان سارح

المدير قرب اتجاه راكان وشاف لي منذر : راكان
راكان..فاق وتلفت للمدير: نعم
مدير: كمل شغلك معا راجل لانه بعد ساعة حيطلع لو ما عرفنا شئ !
راكان: تمام جيبلي امياه لو سمحت
منذر..اشر لي حد وجابوله امياه بسرعة
راكان شرب الطاسة وخش الغرفة من جديد

ورجعو يتفرجو من علي الشاشة عليه

راكان: اسف تاخرت عليك
فتحي: طلعني من اهنى اخر مرة نقولك
راكان..خبط بيده علي الطاولة: المكالمة الي جتني قبل شوية مهمة بالنسبة ليا وانتا مهم اكثر تعرف ليش مهمة ؟!
فتحي: منبيش نعرف
راكان..بعياط: لان صغاري مخطوفين
فتحي: اني شن علاقتي بالموضوع ؟!
راكان..يتحرك بالكرسي وقرب من فتحي..وحط يده علي وشم الي عند فتحي: هاده علاقتك بالموضوع !
فتحي: وشم هاده درته لان ناس يخافو منه بس معنديش علاقة بيه
راكان..يهز في راسه:معندكش علاقة بيه وتخوف في الناس فقط يعني عارف علاش يخافو الناس منهم !
فتحي: لانهم عصابة
راكان: وشن ثاني
فتحي: يخطفو في الصغار ؟!
راكان..كان متوتر من مكالمة مصعب وكل تفكيره كيف يجمع المبلغ خلاه يفقد اعصابه لحظتها وعطي فتحي بوكس في وجهه وقعد يضرب فيه..ويعيط: عارف انهم يخطفو فالصغار صاار عاارف

منذر.. والمدير يجرو للغرفة وشدو راكان طلعوه البرا

المدير..طلع راكان..ويعيط: شن الاستهتار هاده
منذر: اني الغالط يا مدير خليته يخش يساله
المدير: شوف راكان انتا مليكش اي علاقة بالتحقيق او القسم هاده صح صغارك بس هادي خدمتنا توا منبيش نشوفك فالقسم ثاني
راكان:مدير
مدير: ولا كلمه الي عندي قلته
راكان: بعد اذنك كلمة بس
مدير: شن الجوهرة الي حتنطقها !!
راكان: سمعت صوت مراوح هلبا
مدير: مراوح شن متخليش الواحد يبدا يعيط توا اتكلم بوضوح
راكان: المكالمة فيها صوت مراوح ! او مكينات
مدير..شاف لي منذر: شغل المكالمة ترا ( سجلو المكالمة )
فتحو المكالمة وسمعوها كاملة ملاحظوش صوت مراوح
راكان: قووي الصوت اكثر وركزو في جملة ليك وحشة اكثر مكان المراوح واضحات فيه !
منذر: رسمي سمعتهم يعني في مصنع هوا !
مدير: يعني لازم المروحه في مصنع ! مرات في حوش
منذر: اكثر من وحدة يا مدير الصوت خفيف وبعيد عن مكان الي يتكلم فيه بس فيه صوت خفيف واجد
راكان: مدير انتا تعرفني اكثر واحد خدمنا معا بعض سنين وعارف القضية الي نمسكها تنحل بسرعة
مدير: انتا عواطفك متحكمة فيك لان الموضوع حساس اكثر من الازم
راكان: عارف ومننكرش الشئ هاده بس نفس العواطف هادي حتخليني انطلع كل قدراتي مش نحل القضية لاني اكثر انسان يستنا في الحل ليها لو سمحت تردني للخدمة وبعد هالقضية حنرجع للقسم !
مدير..سمع كلمة يرجع للقسم : موافق
راكان..ابتسم
مدير: انتا ومنذر بتخدمو علي القضية ومنذر حيكون المشرف عليك
راكان: معروفك مش حننساه والله
مدير: خليك قد كلمتك وارجع للقسم بعد ما ينتهي الموضوع
راكان: امتا راكان قال كلمة وتراجع من عليها
مدير: شئ ثاني فتحي انسوه حيطلع دورو من وين تبدو ثاني