فرطِ الحب

😋الفصل الثامن عشر😋

"فرط الحب"

الفصل الثامن عشر

بعد عدة أيام مرت طويلة للغاية على الجميع، كسر رتابتها الروتينية عمر الراكض في حماسة طفولية إلى الشرف حيث يجلس والده بمفرده سارحًا في أفكاره متأملًا ضوء القمر عسى أن يخفف الحيرة التي تعتمره:

-بابي بابي.

ألقى ريان سيجاره من فوق سور الشرفة بعيدًا عن طفله قبل ان يلتفت نحوه مجيبًا بنبرة حازمة:

-عمر قولت مية مرة متجريش في الشقة.

-سوري يا بابي.

رد عُمر بنبرة خجلة بينما يميل بوجهه للأعلى كي ينظر إلى والده فارع الطول مستكملًا في توتر:

-عايز اتفرج على الكرتون بتاعي معاك.

-أيوة يعني عايز أية دلوقتي؟

سأله ريان في بلاهة غير متوقع مطلبه الغير مسبوق فلما بحق السماء سيشاهد معه الرسوم المتحركة:

-الكرتون بتاعي يا بابي!

-ما أنت عارف يا عمر أنا مش بحب صوت الكرتون روح اتفرج مع ريم.

التفت عمر خلفه في توجس ثم اقترب يجذب سروال والده في غيظ معترفًا من بين أسنانه:

-يا بابي ركز ريم هي اللي قالتلي نادي بابي وقوله انك عايز تتفرج معاه على الكرتون.

-وريم عايزاني اتفرج معاك على الكرتون ليه؟

حرك ريان كتفيه وذراعيه مستغربًا مما يخبره إياه طفله ليخرج سؤاله مخلوطًا بنفس البلاهة السابقة، فضرب عمر بكفه فوق رأسه يكاد يجذب خصلاته من غباء والده قائلًا:

-عشان أكيد عايزة تقعد معاك هي كمان.

اتسعت أعين ريان الذي مال في لهفة نحو صغيره يخبره في نبرة حانقة:

-عمر ركز وفهمني من الأول وبهدوء كده أيه اللي قالته بالظبط ؟

هز عمر رأسه بالموافقة ليسترسل في اخبار ريان:

-أنا كنت بتفرج على التلفزيون ولما انت مكنتش راضي تتغدى هي فضلت متضايقة ومأكلتش كويس،
فبعد ما أكلنا بصتلي وقالتلي أعمل ان انت واحشني واقولك تطلع تتفرج معانا، فهمتني يا بابي؟

سأل عمر بعيون متسعة وتنفس بارتياح حين حرك ريان رأسه بالموافقة ليهمس زافرًا: