Jin Ki Jawaani, Yoongi Ka Budhapa

Ch - 2 - Talli Jin Ka Dukhda

Yoongi's POV:

Log Sunday waale din kya kuch nahi karte. Series binge-watch karte hai, couples date pe jaate hai, kuch log toh indoor ya outdoor games bhi khelte hai par main inme se kuch bhi nahi karta. Main sirf sota hu, jidhar jagah mil jaye udhar. Kabhi bed pe, kabhi couch pe toh kabhi jhule pe. Ek baar toh zameen pe bhi so gaya tha aur gharme aaye hue mehmano ko laga ki main behosh padha hu par fir mummy ne end moment pe mujhe mera hi badbudar moja sunghakar uthaya aur mehmano ko meri aadat ke baare mein vistaar se samjhaya. Meri neend bigaadne koi jaye toh uski aadhi energy waise hi waste ho jaati hai aur agar galti se main uth gaya toh unka bacha-kucha aadha din bhi bigad jaata hai.

Main apni neend ka kota pura kar hi raha tha par logon se meri khushi dekhi nahi jaati. Mere kaan ke paas Sunny Deol ki awaaz goonjne lagi. Sunny paji ke alawa mujhe kisiki bhi awaaz neend se nahi utha sakti thi. "Tarikh par tarikh, tarikh par tarikh, tarikh par tarikh, tarikh par tarikh milti rahi hai ... lekin insaaf nahi mila my lord, insaaf nahi mila ... mili hai toh sirf yeh tarikh" Dhyaan gaya toh yaad aaya ki yeh toh mere hi phone ki ringtone thi. Maine apni neend mein dubi aankhein kholi toh Jin ka call paya. Tabh main maan chuka tha ki Jin ne mujhe pareshan karne ke liye supari li hai. Maine call uthaya toh Jin ki awaaz badli badli si lag rahi thi. Jabh maine socha toh dhyaan aaya ki Sunday hai, zyada peene ki wajahse chadh gayi hogi. Daru ka adda toh humara ek hi tha, uski jawani ka sahara banne main wahi chala gaya.

Jaise hi maine bar mein entry li waha ek kopche mein Jin rota hua baitha tha. Bartender Namjoon, jo mere aur Jin ka accha dost tha, usko peg pe peg bana ke de raha tha. Woh bhi bhala kya karta Jin kuch zyada hi demanding ho raha tha.

"Meri toh zindagi hi kharab ho gayi😭" Jin agar aur rota toh badh aana sambhav tha.

"Arre bhai ho kya gaya? Kaun mara?" Maine jaanne ki koshish ki.

"Main toh lut gaya, barbaad ho gaya😭" Jin ke rone ki awaaz se mere kaano ke parde fatt sakte the.

"Kisne tere gharme daka dala? Ab bata bhi de" Maine fir sach ugalwane ki koshish ki.

Achanak uska rona kam hua aur woh siskiya lene laga. Maine Namjoon se pucha toh use bhi kuch pata nahi tha.

Jin bol padha, "Mini ne mere saath dhoka kiya hai😭..... "

Kisi bhi relationship mein cheating sabse wahiyaat cheez hoti hai. Use dekhke laga nahi tha woh aisa bhi kuch karegi aakhir khud hi ne Jin ke saath flirt karne ki shuruaat ki thi. Mere dost ke saath itna bada game😤. Mere badle ki aag shaant nahi hone waali thi

"Mini ne tujhe dhoka diya? Kaun hai woh ladka naam bata. Main unn dono se nipat lunga😤" Maine apne nidarta ka parichay diya.

"Tum kya bol rahe ho? Usne toh meri blue waali tshirt ko istari se jala diya😢" Jin ne clarify kiya.

"Isme teri zindagi kyu barbad hui aur dhoka kis baat ka tha?" Maine sawal pe sawal puche.

"Woh tshirt meri lucky T-shirt thi, maine saalo se sambhal ke rakhi thi. Woh mere liye kisi bhi keemti cheez se zyada keemti thi😔" Jin ne dheemi awaaz mein kaha.

Mera mann toh kar raha tha ki beer ki bottle khudke sir pe phod du. Main apni neend kharab karke ek rote hue aur nashe mein dhut adult child ko shaant karne ke liye gharse nikla taaki mujhe aake yeh pata chale ki woh apni blue T-shirt ke liye ro raha tha???

"Kaisa ladka hai? T-shirt ke liye kaun rota hai?😒" Maine uski harkaton ko judge kiya.

"Woh koi aisi waisi T-shirt nahi thi, kisi special insaan ne gift di thi😔" Jin ki udaasi dur hone ka naam hi nahi le rahi thi.

"Mini ne hi leke di hogi toh usse fir se ek T-shirt maang le. Simple" Maine practical idea diya.

"Woh T-shirt usne nahi tune di thi" usne dheeme dheeme bataya.

Mere dil ko ek dhakka laga. Mera dost meri di hui cheezon ko itna treasure karta hai. Maine mann ke bhav chehre pe nahi aane diye aur usse kaha

"Main tujhe 10 T-shirt kharidke dunga, ab rona bandh kar tujhpe aansu acche nahi lagte" Maine awkwardness ke saath saath dil se yeh baat kahi. Usne mujhe ek smile di aur bar stool se uthkar mujhe hug karne aaya aur apna pura hi bhaar mujhpe daal diya. Maine usko hug return ki par jabh mujhse sambhala nahi ja raha tha, tabh maine Namjoon se madat ki guhaar lagai. Namjoon thehra humara dimpled waala handsome aur caring dost, turant meri madat karne aa gaya. Iss halat mein Jin ko ghar le jaana mere liye mushkil ho sakta tha isliye maine Jin ko stool pe baitha kar aur usko apne haath ka support dekar waha stable rakhne ki koshish ki.

Time ho chala tha ek performance ka. Namjoon ne mere kaan mein haal hi mein aaye hue performer ka description diya.

Music ke saath uski hero waali entry hui.

I am a disco dancer
I am a disco dancer
I am a disco dancer
Zindagi mera gaana...
Main kisi ka dewaana

Silver coloured outfit mein kehar dha raha tha. Baal uske silky silky, gaal uske milky milky. Naach toh aise raha tha ki yeh uske baye haath ka khel tha. Har ek move ne kuch jaadu sa kar diya.

To jhoomo to naacho
Aao mere saath naacho gaao
I am a disco dancer
I am a disco dancer

Main ganda waala taad raha tha. Usne meri taraf dekhkar ek smirk di aur apna kaala chashmah utaar meri taraf feka. Mera muh khula ka khula reh gaya.

"Muh toh bandh karo uncle" jabh kisine yeh kaha toh maine ghusse se uss awaaz ka source pata lagane ki koshish ki par khair woh nahi mila.

Mera dhyaan uss ladke pe fir ja padha jab usne apne aap ko introduce kiya.

"Hello, you are my hope, I'm your hope I'm Jhope. Main iss bar mein aapke manoranjan ka pura khyal rakhunga😁."

Introduction dete hi woh wahase chala gaya par uska kaala chashmah mere haatho mein hi reh gaya.