سجين و روح

الحلقة الثامنة عشر

بدر >> اها كم قعدتي مخطوبه ؟

فاطمة >> ست شهور
بدر >> وكنتي تبيه
فاطمة >> لا كانت دلالة هل
بدر >> اوكيي تمام
فاطمة>> و سيبنا عشان خشت صقر للحبس بس كويس انه ماكانش في نصيب وجت خشت صقر للحبس ورتني انه هو مش ليا
بدر >> ربي يعوضك خير
فاطمه >> ان شاء الله ، شن جوك بعد الطلعه من الحبس
بدر >> تمام اهو قاعد ندور علي حوش
فاطمه>> عليش ؟؟

وقعد بدر يحكي الفاطمه في قصتة ويهدرزو مع بعضهم

//
//

ثاني يوم روح فالمكتب قاعده حايسه فالقضية اللي عطاها لها استاذ محمود و شبه كملتها وقاعده اتوتي في اوراقها وتسمع في صوت تلفونها كل شوية يدير في صوت ... مسكت التلفون تشوف شن فيه لقت الفيسبوك منقلب عالبوست اللي هي منزلته

روح >> ليا كم يوم منزلته ليش توا فطنوله

قعدت تبرم وادور لقت الصفحه منزله انه الجثه مش جثة هيثم

رفعت التلفون ورنت علي الهادي

روح>> الو طلع التقرير ؟
الهادي >> اه من شويه طلع تو يدزولك ورقه
روح>> من اللي سرب الخبر للفيسبوك ياهادي
الهادي >> عيب يا محاميتنا
روح >> ياهادي ليش تسرب فيه القاضي لو يعرف من سربه ويعرف انك من طرفي حانريحو فيها
الهادي>> مااتخافيش ماحدش حا يعرف نعرف شغلي كويس
رح>> معش ادير حاجه مره ثانيه بدون ما ترجعلي الجلسة قربت مانبيش غلط

الهادي >> تم تم حاضر

صكرت روح من الهادي وكانت فرحانه انه الرآي العام مع صقر بس برضو خايفه انه يعرفو من سرب الخبر ، قعدت تشوف فالتعليقات و تقرا فيهن بعدها صكرت التلفون و ردت للاوراق اللي كانت ماسكتهن

مع دقة باب المكتب

روح >>تفضل ؟

خشت عليها ولية كبيره فالعمر

روح >> تفضلي ياحاجه قعمزي
هي >> يزيد فضلك يابنيتي
روح>> تقضلي كيف نساعدك
هي >> انا ام هيثم
روح انصدمت
ام هيثم >> الله يربحك اسمعيني
روح >> نسمع فيك احكي
ام هيثم >> اسمعيني ك ام مقهوره علي ولدها
تخيلي اني ما شفتش ولدي ليا ثلاث سنين وكل يوم يقولو حاجه مره مخطوف مره مقتول واخر حاجه قالو محروق
روح>> بس نزلو خبر انه الجثة المحروقه مش لولدك
ام هيثم >> عارفه بس نسبة موته اكبر من نسبة حياته وانا ك ام نقولك قولي الصقر كان يعرف حاجه يقولي
روح >> صقر بريىء من كل شي منسب له
ام هيثم >> وانتي كيف عرفتيه بريء؟
روح>> ياحاجه انا محامية وهذي شغلتي
ام هيثم >> كان هو بريىء امالا من المتهم ؟؟
روح >> مانعرفش هذي مش شغلتي هذي شغلة القاضي
ام هيثم >> قوليله بس يعترف ويقول المكان وانا حانخلي عوض يتنازل
روح >> كيف ؟؟ شن تقولي انتي لو واثقه انه صقر هو المتهم ف ماتخافيش القانون حاياخذ مجراه انا حالفه القسم ونخاف بدري اكيد مش حانطلع واحد متهم ولا نحط واحد بريء عشان نرضي حد
ام هيثم >> حسبي الله ونعم الوكيل لو ولدي صارتله حاجه
روح >> انا محترمتك عشانك وليه كبيره ، لو كملتي كلامك ياريت اتفضلي عشان عندي شغل