ثواب 💜 ( روايات ليبية ) مكتملة

الحلقة 11 💜

ثواب ح 11 💜
اقروا ح 10 اكيد نسيتوا الاحداث💔
.
.
سالم : عطيتك كان الله عطاك خليها تشد صحتها و بإذن الله ماصير الا كل خير
محمد "الحمد الله حمل و انزاح من على قلوبنا "
يوسف :أسأل البنت قبل
سالم: من امتى البنت هي يلي تقرر ؟! ( مع الاسف في اباء هكي 💔)
يوسف : بالله كلمولي العويلة تو بكرا نردوا لما تطلع ثواب
سالم : قعمز هدرز مزال الوقت
يوسف : و الله هضك هو هي سلم مجاب كلمهم
مجاب : حاضر ( و ناض خش قعد ينادي في امه طلعتله )
امه : نعم ؟!
مجاب : كلمي نساباتنا عمي يراجي ( مبردهم هالنوعية يلي ماتنبت في فمهم فولة )
امه : بسم الله نسابات شن ؟!
مجاب: بعدين بعدين
امه : ربك يستر منكم ( وخشت كلمت عت سلفها و طلعوا و بعدها خشوا الاولاد و بوهم للصالة) ، احكولي شن قصة نساباتنا ما نساباتنا ؟!
بوهم : يوسف طلب ثواب لمنذر و انا عطيته
امه: كلا منذر مشاء الله اخلاق و علم بس لطفية ( مرت يوسف ) مجابتش سيرة
بوهم : يوسف تكلم خلاص ليش الصبايا من امتى في يدهم القرار ؟!
الام سكتت
.
.
في حوش يوسف ؛
لطفية : كييف ادير هكك في ولدك قالك منبيهاش حرام علييك هضا ولدك الوحيد
يوسف،: لانه ولدي الوحيد نبي نتطمن عليه
لطفية : لو رفض ؟!!!
يوسف : معاش يلي يرفض كلمتي
منذر : السلام عليكم
ردوا : و عليكم السلام
منذر يشوف لبوه: كنه صوتك عالي  ان شاء الله خير !
يوسف : خير خير نوضي يا لطفية حطيله العشاء و خلينا نتكلموا كلمتين
(لطفية ناضت و عطاته نظرة امتاع تحمل ما يجيك )
اول شيء نعرفكم على منذر :
هو الابن الوحيد ليوسف و لطفية مدلعينه و يخافوا عليه من الريح الهابة مواليد 92 دكتور قلب شاطر شخصيته عصبي لابعد الحدود و لو تعصب ميعرفش شن يقول بس حنون مع بوه و امه .
يوسف : يسلم عليك عمك
منذر : سلمك و سلمه تعرف اليوم بين العيادة و المستشفى مفضيتش
يوسف : اي مستشفى اليوم داومت ؟!!
منذر : مستشفى ...
يوسف : نفس يلي فيها بنت عمك ثواب
منذر : مكنتش نندري
يوسف : مش هضا موضوعي ، كيف ما تعرف ياولدي ان انا و امك حصلناك بعد 10 سنوات و عندنا مصلحتك في الدنيا و انا وياها مش دايميلك ..
منذر : بعد عمر طويل ان شاء الله
بوه : ان شاء الله بس هذي سنة الحياة و ياولدي اليوم كلمت عمك على بنته ثواب
منذر " اكيد مقلب او يشوف في ردة فعلي مستحيل يديرها فياااا " تبصر !!!
يوسف : عليش المواضيع هذين فيهن بصارة ؟!
منذر علا صوته: كيف ادير هككك فيااا من قالك نبيهااا شوفها شوف خوتها جاهلين معندهمش منطقق
يوسف : كييف تعلييي صوتكك عليااا كييف ؟؟!
منذر خدا شهيق و زفير : ليششش درت هكك؟
يوسف : لانها مش زي بنات توااا صح خوي جاهل الفكر هو و اولاده بس هي لاا كنت نمشيلهم لما انت في بريطانيا اتجيني و تهدرز عليا ذكية و مؤدبة مش زي خوتها
منذر: متحاولش ( و ناض خدا مفاتيح سيارته و فونه جاي بيطلع )
يوسف: لو مخديتهاش حوشي يتعذرك معاش يلي يكسرلي كلمتي
( منذر فتح الباب و طلع و امه وراه )
لطفية : وين ماشي في هالليل سلم ولدي كل شيء حينحل و الله
منذر: مش مطول ( ركب السيارة مش عارف وين بيمشي و لا كيف يدير  كلام بوه يتردد في وذنه لين لقى روحه قدام مستشفى يلي فيه ثواب ) ، اووف لاازم نحكي معاها مع اني مش متذكرها لليا 9 سنوات مشفتهاش ( لما كان في بريطانيا امه و بوه هما يلي يمشوله كل بعد فترة ، خش للريسبشن )
الممرضة: د.منذر في حاجة ؟!
منذر: لالا غير قالولي بنت عمي هنا قلت بنشوفها ، اسمها ثواب و النبي شوفيلي اي رقم غرفتها
الممرضة: حاضر لابأس عليها ان شاء الله ، رقم غرفتها 30 الطابق الثاني
منذر : شكرا ( و مشى و هو خايف !!!) " ليش خايف ؟! ممكن خايف ان نجرحها ؟! باهي و جرحتها المهم انا مش حنتخلا على البنت يلي اختارها قلبي " ( وقف قدام غرفة ثواب طقطق عليها )
ثواب حطت الوشاح على رأسها : تفضل "من هضا بسم الله"
منذر : السلام عليكم
ثواب : وعليكم السلام
.
.
عند محمد
.
محمد : ابراهيم كمل لامك اجراءات الخروج تو انجيك
ابراهيم : تمام
( اكيد عرفتوا محمد وين ماشي !! يس ماشي لثواب شاف منذر قدام غرفتها و متردد يطقطق قعد يراقب فيه لين خش و هو وقف قدام الباب بيسمع )
منذر : معرفتينيش ؟!!
ثواب : لا و الله من انت ؟!!
منذر :"عارف عمي الجاهل هو و اولاده حتى لو متبيش حيغصبها عليا اللهم نتحلى بالصبر و خلاص بس سبحان الله كيف متغيرة " انا خطيبك كيف معرفتينيش !!😏
(بمجرد محمد ماسمع هالكلمة اوذانه زنن وبعد عن الباب )
محمد " خطيبها !! هي امتى انخطبت امبكري محكتش نهائي انها مخطوبة ولا تلعب !! حتى انتي يا ثواب طلعتي لعوبة ،،، هه بس حنعرف كيف نردها ( ومشى بدون ما يسمع الباقي حكم عليها بكلمة طلعت من مستهتر )
فلاش Back :
بعد طلعت رنا  محمد جاء لثواب :
محمد و في يده باكو كريب و عصير طبيعي : شن جوك اليوم
ثواب: الحمد الله احسن
محمد : هي كولي هذين لان اكيد مكليتيش من وكال المستشفى 🤮 .
ثواب : هههههه و الله صح حشى النعمة
ثواب : كيف لشخص ان يصبح قريب بهذه السرعة ؟!
محمد : انه عصر السرعة يا عزيزتي 😂❤
في ناس يخشوا لحياتنا و يقعدوا قريبين منا و كأن معرفة سنين و كأن الله يعوض فينا بيهم ❤
.
.
محمد : اووي ثواب وين مشيتي
ثواب : لا شيء تذكرت حاجة بس ☺
محمد : باهي كولي الكريب مش حلو لما يسقع
ثواب:  اهو بناكل و حتى انت كول
محمد : كيف واكل انا
ثواب : احلف انك كيف واكل !
محمد : حي على الطفلة 😂 و الله كيف واكل هي
ثواب : خلاص صدقتك ( و بدت تاكل بدون رحمة ولا شفقة 😂😂بعدين تذكرت حاجة ) ، خطرها عندك قريبتك تقرأ معانا في الكلية احم قصدي كانت
محمد حب يلعب بأعصابها : اهاا سوزي هذي بنت عمي
ثواب شافتله: سوزي !!!
محمد شاد صحكته : اسمها سوزان بس تحب لما اناديها سوزي
ثواب "ريلاكس ثواب ليش بتعصبي ردي بالك تحبيه ردي بالك انتي مش قد الكلام اهوا "
محمد : هههههه نبصر معاك لا سوزي لا هم هذي بنت عمي منطيقهاش لله تعالى
ثواب وجها انفرد بروحه : اهاا انا مدخلنيش سألت هك و خلاص بس نصيحة مني رد بالك منها واضح شريرة
محمد : قبل امي تبيها كنتها
ثواب : هي بدات رد بالك امك اديرها كنتها "اووبس ثواب الهيبة ضاعت مالك و مالها ياخدها ولا لا "
محمد : بس شكلي انا بنختار بروحي ( ورن فونه )، ايوا ، تمام تمام جايك هيي لالا اهو جايك ( وسكر)
ثواب : اسفة خليتك تطول
محمد : الوقت معاك فيسع ما يمشي
ثواب : شكرا لانك عطيتني من وقتك
محمد : نبي نسألك سؤال و اجابتك نبيها في الليل قبل لانروح
ثواب : تفضل شن !!!
محمد : لو خطبتك توافقي ؟! ( و طلع و سكر الباب و وراه و فتح بيبان في رأس ثواب )
ثواب "لساني انعقد عمري ما تخيلت ان ننحط في موقف هك خفت "
.
.
نردوا لزمن توا :
ثواب : من وين لوين خطيبي ؟! خيي بلكي غالط في الغرفة
منذر : انتي ثواب سالم .....
ثواب : اهااا بس مش مخطوبة
منذر : لا من اليوم انتي خطيبة منذر يوسف ....
ثواب بصدمة : ا ا انت م منذر ولد عمي ؟!!!
منذر : اها و اليوم باتي و باتك في تقعميزة كملوا الموضوع
ثواب : بس انا منبيش
منذر : ولا انا نبي ، انا عندي وحدة كافيتني على جنس حواء كلهن
ثواب : ربي يخليها ليك ، بس كيف عمي يخطب بلا علمك ؟! منذر : هضا يلي صار 
ثواب : تو انا نرفض
منذر : انتي ادرى المهم هالعرس ميتمش
ثواب : ان شاء الله ، بس من البنت يلي تبيها ؟!!
منذر : ....
ثواب بصدمة : تبصرررر 😦
.
#رواية_ثواب
#rwayat_br0o
.