طلعت العماله ملجو الكع طين حر وحفرو رازونتين عدلو الحايط اجه الصباغ صبغ الغرفه بعده اجه النجار سوه رفوف للرازونه والشباك رتبه وصبغه بلون اخضر بلون الباب رتبه من الواح الخشب بعده شاكر علك الكازات النفطيه ودك رف شويه عالي وراها اجه النجار سوه سرير من جريد النخل فرشو بحصير خوص دخلو الحمله والصندوك وخلو مكناسه وره باب الغرفه غنيه وام شاكر فرشن السرير وعلكن مهفايات بالحايط شاكر جاب طبله من جريد السعف خله عليه صينية صفر وفوكاها تنكه وطاسه فافون
شاكر ها يمه شسويلج بعد
ام شاكر اي يمه زين من مرتك خلتك تجينهالي مكلفت روحه تجي تساعدنه
شاكر حس بالبسمار يمه وعيونج اني مخليته تجي هسه الجهال يخبصونه وبعدين انتي ملحكتي تطبخين خليته تسلك جدر باجلا وخبز حار حتى متعبين
غنيه اي يمه دخيلج لاتجيبين الجهال هنا ولد شاكر الصغار قرود دخلف بنيه جان ساعدتنه
ام شاكر اخرسي لج عوده بعينج لاتحسديهم الى ديله يمه شاكر دك البرده على البابمن جوه فرشت فجتين على الحصير ومندر نفر
غنيه يمه ليش فرشتي مندر هنا قابل منو راح ينام يمهم
ام شاكر لا يمه هاذا المندر يكعدون يتريكون ويتغدون عليه واذا جني حبايبه يكعدن عليه يسمو مندر صدر
غنيه يمه من اتزوج تسويلي هيج ام شاكر شمرت عليه المكناسه انجبي ولج عيب البنيه تدور زواج اجي افرك حلكج طلعي يله عينج طالعه تزوج الغمه
شاكر شبيج يمه البنيه اشكالت
ام شاكر اسكت لو اخليه على دلالك جان سوت الاكبر
شاكر اسمالله وشنو الاكبر
ام شاكر مو بعيده توايك من الشباج لو تمد راسه من الباب
شاكر لا يمه نعرف شربينه متوصل الهالحال
خلو سلبجه بزاوية الغرفه ورتبو هدوم مسعود بالصندوك
دخل مسعود شايل واير وكلوب يمه يمه شيلي الكازات مانحتاجهن
ام شاكر يمه ميصير بالضلمه
مسعود لا يمه بيت المختار الورانه من سمع بيه راح اتزوج كلي جيب واير اطيك كهربه
غنيه شنو كهربه مسعود هوه اني مفاهمه طوبه كزيز ويطلع منه ضوه بس بلا دخان ولا ريحة نفط
ام شاكر يا خاف يخلوله نفط اسود
مسعود يمه متفهمين الى اسويهن بس خل اروح لجواد الكهربنجي هوه يدكهن
ام شاكر الله اليستر شراح نشوف
مسعود يمه راح اجيبلج كلوب بالحوش حتى انتي هم يضوي بيتج يكلك كل البيوت راح يسووله كهربه
صفنت ام شاكر وضربة دالغه طويله تريد تستوعب شلون ضوه بلا نفط رتبو الغرفه وسدو الباب
ام شاكر يمه مسعود بعد غرفتنه الك راح ننام يمك لما تتزوج
مسعود خو انام بغرفتي الجديده
ام شاكر لا يمه ميصلح الى بيوم عرسك واني باجر رايحه نحدد يوم الزفه اسبوع الجاي
مسعود ردت روحه شاوره يمه عندي حجايه وياج
ام شاكر كول يبعد امك
مسعود طلع من جيبه شيشه ريحه يمه هاي انطيه الكرجيه
ام شاكر نزول عليك شبسرعه عشكت ولك اثكل شويه
شاكر والله يمه سكمتينه لاتحب لاتحجي لاتمشطين بنص الحوش لاتخافين يمه تره انتي ربيتينه وتعرفين منغلط دكومي ارتاحي راح يجي الغده
مسعود حضن شاكر فدوه اروحلك عضيدي وتاج راسي
شاكر لك انته المدلل والله الى البسك صاية عرسي وعباة ابويه بيوم عرسك وضاملك فرد سبحه يسر جتني مالحجاز فضه
مسعود ماقصرت وامي عده شماغ وعرقجين ابويه تغدو ساعه البنات يهلهن وساعه ام شاكر تبجي لو ابوكم عايش جان فرح علكو بخور وطكو حرمل الصبح اجه ابو الكهرباء يشد كلوبين واحد بالحوش وواحد بغرفة العرسان
