أحببت ظابط شرطة 2

الفصل الأول

الفصل الأول:

في أحد البنايات المطلة علي شاطئ البحر في مدينة الإسكندرية...

في إحدي الشقق بالطابق الثالث،،

صدح صوت "جميلة " عاليا و هي تنادي:إياد...يلا عشان تفطر...

إياد و يخرج من غرفته:أيوة يا حضرة الظابط أنا خلصت خلاص...

جميلة:أقعد افطر يلا عشان متتأخرش علي الشغل..و نظرت إلي الطفل صاحب الخمس سنوات الذي يشبه والده في الشكل و لكن يحمل لون عينيها الأخضر و كان يجلس بجانبها و هي تقول:خلص فطارك كله يا مازن يلا عشان أنا و بابي منتأخرش علي الشغل....

مازن:حاضل(حاضر) يا مامي...هو أنا هلوح (هروح) معاكي الشغل...

جميلة و هي تمسح علي شعره بحنو:لا يا حبيبي...إنت هتروح تقعد إنهاردة مع تيتا نادية و تلعب مع سارة شوية عشان أنا عندي إنهاردة تحقيقات مع مجرمين و بابي عنده عملية مهمة..

مازن بحماس:هتضربيهم يا مامي!!

جميلة بضحك:لو لزم إني أضربهم بعمل كدة..

إياد:صباح الخير يا حبيبتي...و قبل جبينها..صباح الخير يا ميزو..

جميلة بابتسامة:صباح النور يا حبيبي...

مازن:صباح النول(النور) يا بابي...

جميلة:عندك عمليات كتير إنهاردة في المستشفي؟؟

إياد:اه معرفش إيه اليوم الغريب دة...هخلص و أعدي عليكي في الشغل..

جميلة:اشطا يا إياد...

إياد:أنا هقوم بئة عشان متأخرش علي العملية...سلام يا قلبي...و قبل وجنتها ثم قال بمرح و هو يوجه نظره لمازن:حبيب بابي فين الحضن بتاعي...!!

قام مازن من الكرسي الخاص به و ركض ناحية أبيه ليضمه ثم قال له بصوت منخفض حتي لا تسمعه جميلة:
بابي متنساش نبقي نجيب هدية لمامي عشان عيد ميلادها..

إياد بهمس:أنا فاكره اكيد بس لسه 3 أسابيع يا مازن...

مازن:أيوة انا بفكرك

إياد بهمس:حاضر...أي أوامر تانية يا مازن باشا؟؟

مازن:لا مفيش يا بابي..

جميلة باستغراب:انتوا بتتكلموا بصوت واطي كدة ليه؟؟؟

إياد:بنقول كلام رجالة ملكيش دعوة انتي..