وورد العشاق ما تذبل على الطاري

بارت30

إن كان ودك في عذابي عطيتك
يفداك عمري قبل العين تفـــداك

وقف مع فكرك وفكري فديتــــك
لاحظ قدرنا نجتمع انا ويــــــاك

بهديك روحي والعمــــر ما نسيتك
أنسى فؤادي ياحياتي ولا انســاك

وأقطع حشاي وعلقه وســـط بيتك
كل شي يهون وخاطري حيل يهواك

ياليتني كل ما بغيتــــــك لقيـــــتك
وياليتني اقدر أناظـــــــر محيــاك

"" الفصل الثالث عشر ""

المكان من حوله يعيش حاله صمت..عيونه معلقه بالسقف مرر نظراته حوله بالسقف ونزلها لوعد إلي نايمه بعمق ابتسم وسحب شعرها لخشمه استنشق ريحته بحب وبباله الف كلام وكلام لو بس ماظروف إلي يمر فيها كان عرف وشلون يوضح حبه لها أكثر وأكثر لكن يكفي بالوقت الحالي انه اعترف لها

نزل شعرها من يده وهو يسمع صوت أذان الفجر يتردد بالمكان حس براحه مو طبيعيه رغم ان قلبه كان يتخلله بعض المخاوف جلس بهدوء وصار يردد ورى الأذان لحتى خلص المؤذن رفع رأسه بسرعه جهة الباب وهو يسمع صوته ينفتح

ضيق عيونه وصار يترقب مين خلفه توسعت ابتسامته من وضحت له جدته وهي واقفه عند الباب وكأنها تنتظره يطلع لها

وقف بهدوء وصار يمشي بكل ثقه وقف قبالها و عيونه تحاكيها بصمت

تنهدت ام سلطان وسندت ذقنها على عصاتها :ماطاوعني قلبي تبقون أكثر من كذا خذ زوجتك و روحو لغرفتكم وبعدين نحكي مع بعض

ابتسم بحزن :ما فيه شي نحكي
عشانه

عقدت حواجبها :لا فيه حياتك يا سعود ما يصير تدفنها عشان ماضي كنت طفل فيه

حرك يده على وجهه بتوتر :يمه تكفين ماابي شي يذكرني بالماضي

هزت رأسها بحزن :ما ابي اذكرك لكن ابيك تفك عقدتك وتشوف حياتك مع زوجتك صحيح هي طفوليه وحساسه لكن لو حبتك من قلب ماراح تتخلى عنك مهما صار وكان وانت ادرى فيها

بلع ريقه الجاف وهمس ببحه :اعرفها أكثر من نفسي يمه انتي ما تعرفين وش الخافي بقلبي

حركت رأسها بالإيجاب والابتسامه تعلو ثغرها :اعرف اعرف نظرة الحب الي بعيونك ماتخفى علي انت تحبها صح يا سعود

ابتسم سعود بحزن :احبها..احبها فوق ماتتصورين

توسعت ابتسامتها وتكلمت بنبره حنونه :قلت لها هالكلام

حرك رأسه بالإيجاب وعيونه تلمع :طلعت إلي بقلبي اليوم وبهالمخزن

ضحك بصوت خافت وكمل كلامه :حبسك لنا طلع إلي بقلبي من سنين

بادلته الضحكه بصوت هادي : يعني جابت نتيجه خطتي كنت عارفه ماراح تحكي الا بهالطريقه