الحلقه الاوله
#اليتيمه_برنيه
برنيه..
قصة برنيه قصة من واقعنا هي بنت جميله جدا لكن الحياة اللي تعيشها محت ملامح الجمال فيها.. بداية من اسمها ..برنيه اسم غريب معانيه غريبه اطلقو عليها الاسم كنايه بحنتها ام بوها ..وقصة بطلتنا عااسمها الغريب...
برنيه بنت عمرها 17 سنه حرمت من التعليم مبكرا لكن حبها للدراسه خلاها ماتسيبش القرايه كانت كل ماتلقا ورقه ولا كتاب ولا مجله ولا اي شي مكتوب عليه تستهج وتقراء وهالشي خلاها تعرف تقراء وتكتب رغم انها بطلت من الصف الرابع😔..
المهم نعرفكم عابطلتنا والعالم المحيط بيها..
برنيه عمرها 17سنه امها ماتت وبوها مات ماتو في حادث وهي عمرها سبع سنوات . عندها اربع خوت ولاد اكبر منها وبنتين اكبر منها هي اصغر وحدة..
بعد ماتو الاب والام جت حنتهم قعدت معاهم تزوجو كلهم وكل واحد سكن بروحا الاب كان ميسور الحال خلالهم رزق كبير ..طبعا الجدة كبرت وقعدت بروحها هي وبرنيه وكل مايجيها عريس ترفضه طلع في حجة فيه وكل هذا باش ماتتزوجش وتقعد بروحها..
المهم.. برنيه قعدت تعول في حنتها القاسيه اللي توصل بيها ان تحرم في برنيه باليوم الكامل من الاكل ..ومن كثر ما العزوز واعرة وشريرة معاش كناينها يجوها ولا احفادها .. بعدو عليها يتصلو او يجي كل اسبوع واحد منهم يجيب قضيه ويمشي بسرعه...
عاقد مانوصفلكم وعارة العزوز مش حاتصدقو ..
المهم .. مرور ايام عابرنيه زي بعض مافيهمش فرق مع حنتها .. نين جي هداك اليوم..
كانت برنيه تسيق في الجنان ويوم صقع زي السم واصرت حنتها عليها تسيق ..
المهم من كانت لاهيه برنيه في التسيق رن الجرس كانت الساعه عشرة الصبح استغربت برنيه مافيش حد يجيهم بكري هكي اصلا قليل نادر من يجيهم من وعارة العزوز جفلت الناس معاش يجو الا في الاعياد ..
المهم برنيه جت للباب وقالت ..منو
رد صوت راجل ..بالله يااحتي لو احمد موجود..
برنيه..من احمد ياخوي بالك غالط
طبعا برنيه عندها خو اسمه احمد اللي هوا اصغر خوتها بس هوا تزوج من سنتين وحول بروحا..
الرجل.. احمد رمضان يااختي هوا كان ساكن هنا..
برنيه هذا اسم خوي..
برنيه.. تقصد خوي احمد
الرجل.. مانعرفش هل هوا خوك او لا اني ليا سنتين مسافر كيف روحت واحمد صاحبي قلت نجي نشوفه..
برنيه.. اي اي احمد خوي تزوج من سنتين وحول حوش بروحا..
الرجل.. اي اي مبارك صح صح اخر مرة شفته كان خاطب ومن سافرت خليت عرسه قريب. باهي ممكن رقمه.
برنيه..اي لحضه نجيب التلفون مانحفظاش.
وخشت برنيه جابت تلفونها .
برنيه.. هيا ياخوي خود الرقم
الرجل.. يااختي تلفوني فصل شحن نعطيك رقمي واعطيهولا او ابعتيلي رقمه في مسج افضل خل نفاجئه اني باتصالي نكون شاكر ليك..
برنيه.. تمام هات رقمك.
ومل عليها الرقم وسجلاته خشت عالمسجات ونسخت رقم خوها وبعتت الرقم للراجل..
وسلم الرجل ومشي بعد ماشكرها..
بعد اسبوع من جيت الراجل اللي يسئل عاأحمد .. كانت برنيه راقده بعد ماكملت حوستها بتاع الغذي .. فجئه تسمع في من يدوي مع حنتها ناضت ..
مشت للصاله وين ديمة العزوز تحب تقعد ..
خشت لقت خوها احمد ..
العزوز.. ماتجوني كان وراكم مصيبه ياريتها ترفعكم مصايبكم ارزيني فيكم ..
احمد.. ياحناي مصيبة شنو اللطف اني جاي نبي نشوف اختي وهذا حوش بوي حوشنا يعني نجي اي وقت نبي
العزوز.. طيح والله سعدك حوش قهرتك هذا حوشي اني واختك شن عندك فيها ماعندها مادير بخلقتك الكشخه.
احمد.. ياوالله نهار مبارك من هالعزوز الغبره.
وتلفت احمد لقي برنيه متسمرة في باب الصاله.
احمد. برنيه تعالي وخيتي نبيك
وناض مشالها خدها من يدها وطلع بيها للمربوعه ..
خش المربوعه وسكرها من داخل.
احمد.. تعالي نبيك
برنيه.. خير انشاءالله
احمد.. كل خير
برنيه.. باه شنو
احمد .. بنفكك من هالمصيبه اللي برا
هههه ضحكت برنيه
برنيه.. تقصد حناي
احمد .. اي الله يعينك عليها كيف متحمله اني دقيقه ماتحملتهاش تي ماصدقت تزوجت وطلعت من حدا وجها ..
برنيه.. هههه حرام عليك حناك
احمد.. شن حرام تي تجيب الجلطة
برنيه.. شن نلوحها اهو بنتحمل واخلاص ربي يصبرني
احمد.. اهو جاك خلاصك
برنيه.. شنو
احمد.. اي جايبلك عريس من الاخير ملياردير وولد عيله متعلم وجميل بس اكبر منك شويه ..
برنيه.. هههه حناك تو طلع فيه عله زيه زي اي واحد جي خطبني
احمد.. عينها اني قولي موافقه انتي ومادخلكش
برنيه.. كان عليا موافقه بس حناك لمنو بنسيبها كيف تقعد بروحها ماتعرف دير شي
احمد.. تو نجيبولها شغاله ولا حتي زوز تي عادي ماتفكريش فيها الشمطاء...
برنيه.. هههه معاش تقول هكي عيب عليك حناك هاذي وكبيرة العيله...
احمد.. كبيرة عيني تي اكبر شمطاء في العالم تبي الحرق بالبنزينه وعود وقيد
برنيه..😂😂😂 ههههه يعطيك السلامه
وهنا سمعوها تنادي بصوت عالي كاينه حد يضرب فيها..
وووووه تعالولي حي عليا ياناري ووووه ووووه وووه وواااااك واااك
طلعو اللتنين للصاله
لقوها ..قاعدة مافيها شي
احمد.. تو شن يسموه هاذا ياحناي
العزوز.. ههه هكي وين مشيتو وخليتوني ياكل فيا البوم
احمد.. تي وين بنمشو معقوله كان سمعوك الجيران شن هالحاله هادي
برنيه.. وسع بالك عادي الجيران تعودو معاش حد يدور
احمد.. من غير شر كان صاير معاكم شي وناديتو الجيران معناها مش حاينجدوكم يقولو عادي .. ياوالله حاله وخلاص
العزوز.. امشي يافرخ روح معادش تجي امشي
وخدت المالقي معبيه اميه ولو حاته عااحمد بس احمد خوي من الضربه..
احمد.. ياشمطاء اعقلي ولا موتي ارحلي عن سمانا سبحان الله شن يقولك خاطرك بس
برنيه.. احمد خيرك حناك عيب
العزوز.. منين يعرفه العيب هالقهدي هذا
احمد.. ووووواك اسمعي سلم وخيتي فكري في كلامي وسلام توا
طلع احمد وخلا برنيه تفارع مع العزوز...
يتبع.....
وبجديات لو مالقيت تفاعل كبير,مش حانكمل..
تحياتي
