Sinta C Koliput

Part 1

~ Sinta C Koliput ~

By : Tescy Descy

Cerita Rekaan

~ Part 1 ~

*** Pada Tahun 2000 ***

Bukkkk....

"aduiiii... silaka!!!."

C koliput lumpat dari atas puku jambu batu yang ada di siring-siring jalan raya saja. Masa c koliput lumpat dari atas puku tu, c koliput to'injak gia kayu yang ampai-ampai di atas rumput di bawa puku jambu. Ngam-ngam c koliput to'injak gia di hujung tu kayu, tu kayu to'bodiri gia dia pigi pukul pantat c koliput, tu lah c koliput maradang.

Ciri-ciri c koliput ni kan kurus, kurus karing, kici lagi tu badan dia, maka tahun 6 sudah mahh. Pindik bah c koliput ni, macam budak tadika saja tinggi c koliput, itam lagi, rambut c koliput macam rambut c ampal, rumpang (tiada gigi) lagi gigi dia di dapan tu, atas bawa bah rumpang. Tu gaya kan kala cicak kubin kalau di darat, kalau di sungai kala gaya rokot (sejenis ikan di sungai yang suka ma'lakat di batu).

Budak kampung saja bah c koliput ni, tapi anak jkkk kampung lah. C koliput kana kasi nama koliput ni dari mama c koliput sendiri juga bah ni, pasal kan, masa c koliput kici lagi masa baby lagi bah, c koliput punya perkataan pertama kunun keluar dari mulut dia masa baru mau balajar cakap "koliput.. koliput.. koliput.." bilang gia c koliput, jadi sana lah mama c koliput panggil c koliput dengan nama panggilan koliput.

Nama butul c koliput hensom bah, nama urang putih lagi kama, c Edward bah nama c koliput yang butul-butul, yang sana dalam surat baranak dia bah. Tapi koliput lah bah juga dia kana panggil, nasib baik lah c koliput ni okey saja, buli lagi kontrol macoh.

C koliput ni kan kuat butul mansau (jalan), dia jalan-jalan satu urang satu urang koliling kampung, dia ni ada juga bah kawan tapi kan, c koliput ni suka jalan sondiri-sondiri kalau mau pigi cari buah-buahan macam jambu kah, mangga kah, limau kah atau apa-apa saja lah yang buli dia makan, dia tidak mau bawa kawan tu, pasal kan, dia takut kana rabut makanan dia.

Masa mau pigi mandi sungai baru dia pandai toriak-toriak panggil-panggil geng tubal dia mau pigi tarajun sungai. Ramai kama geng tubal c koliput ni, pominat dia pun ramai biar pun rumpang, tapi c koliput pandai kama pilih mana sumandak dia mau, maka bo'kudis kama kaki c koliput ni pasal suka masuk utan satu urang, sudah tu mau lagi kakah cari sumandak yang lawa-lawa sama tiada kudis.

"ohhhhh!!!! kau di cni pula koliput!!!."

Bahhhh... tiba-tiba mama c koliput tulak pinggang sana balakang sambil tingu c koliput. Koliput mau sodia-sodia sudah kama mau lari pasal takut kana rutan. C koliput sonyum-sonyum kakah sama mama dia, sonyum ada maksud bah, sambil juga tu mata mau tingu mana tampat dia buli lari.

"oliputtttt!!!! mati sudah tu ayam sana kabun kau bulum pigi kasi makan lagi kah?!!!!."

Bahhhhh... ma'cari sudah kama mama c koliput mau bikin rutan c koliput kama. Bila c koliput ingat dia lupa pigi kasi makan ayam yang kana suruh dari pagi lagi kan, bahhh.. apa lagi... terus c koliput lumpat-lumpat saja lari pigi masuk sana utan. C koliput tidak sudah poduli ada ular kah, ada boruang kah, ada harimau kah, ada hantu kah sana samak-samak tampat dia pigi lumpat, asalkan dia buli kunun lari.

Kamu pikir... sitaring bah ni anak jkkk ni.

"bahhhh... lari lah kau pigi sana!! lari lah kau ahh oliputtt!! kau awas kalau balik!! mama tidak kasi masuk kau dalam rumah!! biar kau tidur sana kandang sama tu kambing aki kau ahhh!!! lari lah kau ahh.. oliput!!."

"amaaaaa... bahhhhh..."

Nahhh.. kotoh.. manangis sudah kama c koliput takut kana suruh tidur sama kambing aki dia. Apa lagi c koliput, dia lumpat-lumpat saja lari mau balik pigi tampat mama dia sambil nangis-nangis. Mama c koliput sonyum-sonyum kambing sudah tingu c koliput sambil juga mama c koliput siap sodia tu rutan di balakang yang dia dapat tadi mau bikin rutan c koliput kama.

Terus kama hilang sitaring hidusan c koliput kalau sudah keluar suara nangis dia sampai tu hingus sana sudah pipi dia. Sampai saja c koliput dakat tampat mama dia kan, c koliput lap lah kunun hingus dia, atukkkk... sampai di tolinga bah tu hingus. Bukan nogi borisi muka c koliput, makin panjang lagi tu hingus.

Pettt... Pettt.. Pettt...

"ama.. ama.. ama.. sakit bah ma.. maaaaaa.... sakit bah!!!."

Siapppp... malakat terus tu rutan sana kaki. Lumpat-lumpat lagi c koliput kana rutan. Mana mama c koliput poduli, c koliput nangis-nangis lagi sampai ta'kancing-kancing lagi bogia c koliput kana rutan. Siap mama c koliput mo'rutan kan, c koliput kana bawa pulang rumah, tapi mama c koliput tarik telinga c koliput sambil jalan.

"ama.. sakit bah ama.. huhuhuuhuu.."

"itu lah!! lain kali kalau mama bilang pigi kasi makan tu ayam pigi lah bah kasi makan!!! Patut lah tu ayam balik-balik saja mati!! kau punya karaja pula tu tidak pigi kasi makan!!."

"ampun ama.. ampun. Sia tidak sudah buat ama. Sia janji sudah mulai sakarang, bisuk sia pigi sudah kasi makan. Ampun ama."

Ba'canda kama c koliput ni, hari ni dia janji, bisuk dia lupa lagi tu. Mana lah tidak mama c koliput mau mo'rutan saja sama c koliput. Tidak sudah kama mama c koliput mau pacaya cakap c koliput, pasal kan, balik-balik sudah bah mama c koliput kana tombirang (tipu), balik-balik kana bagi janji tarang bulan, mana tidak mama c koliput buli kana darah tinggi, c koliput gia yang suka butul kasi naik maradang mama dia.

"kau mau janji sama mama sakarang. Bisuk kau lupa sudah tu! Kau ingat mama pacaya lah sakap kau tu?!."

"ama, butul ni, sia janji mulai sakarang sia tidak sudah lupa. Kosian bah tu ayam kan ma, mati saja, rupanya lapar bah pula tu. Maap lah ma.. sia tau sia budusa (bo'dosa) bah ma. Sia tidak sudah lupa bisuk."

"ahhhh.. kau punya janji ni sama saja macam janji bapa kau tu!! ini lah ni anak c jkkk ni!! sampai anak pun mau waris sudah gaya dia!." (mama c koliput pigi lagi kasi sama c koliput sama bapa c koliput kama)

"ama, kan oliput anak bapa, napa juga mama mau marah kalau sia macam bapa."

Pokkkkk..

"aduiiii... ama, sakit bah." (c koliput gusuk-gusuk kapala dia yang mama dia katuk)

"itu mulut kau buli kah jangan mau manyamuk!!."

Mau panjang sudah kama bibir c koliput mau tahan nangis dia keluar. Sakit bah tu kana katuk kapala, mana lah tidak air mata jantan c koliput pandai mau jatuh. Sampai rumah, c koliput kan toriak lagi kana suruh pigi mandi, koliput jalan saja pigi tarik tuala dia mau bawa pigi tampat mandi.

"kanapa lah nasib sia ni. Hari-hari saja bah c mama marah sia. Tiada pun salah sia. Lupa pigi kasi makan ayam pun macam mau parang dunia sudah c mama."

Atuiii.. pandai kama c koliput memluah sama tu dinding sana tampat mandi.

~ Bersambung ~