عضة فأر (٣)
سامح في عربيات الستات، واقف مصدوم، مش عارف ايه اللي بيحصل، وألف صوت حواليه بيشتم ويزعق ويسأل ويهاجم..
_ انت بتعمل ايه هنا .. ده أكيد متحرش .... لالا ده أكيد حرامي ... واحدة تتصل بالشرطة يا بنات
(واحدة جاية مندفعة من بعيد، شكلها ست شديدة، وشايلة غضب الدنيا كله فوق دماغها، وكانت شايطة من الغيظ، وقفت عنده، وضربته بالقلم على وشه وهي بتزعق فيه، وبتكلم اللي حواليها)
_ ده صرصار، لازم يتضرب، يلا يا ست منك ليها، كله يضرب.
(الستات كلهم اندفعوا عليها، ونزلوا فيه تلطيش)
_ ابعدي ايدك يا ست ... آآآء .. بتضربوني ليه ... وشي وشي ... عيني .. ااااااااااه ... الحقيني يا ماما، حرام يا ست انتي ابعدي عني)
(بنت شكلها طالبة في جامعة، واقفة وسط صاحباتها، بتكلم الستات)
_ اللي بتعملوه ده غلط، ممكن يموت في في ايديكم..
(سامح سمع صوت البنت دي، راح رد عليها وهو بينضرب)
_ان شالله تموتي انتي وأهلك ...
(الستات بيزودوا الضرب)
_ كمان بترد ب قلةأدب ع البنت .. ده انت نهارك أسود
_ حرام عليكم ... انا جيت هنا غلط والله .. مراتي عندها الطاعون في المستشفى ...
(بدأ يبكي ويقول مراتي عندها الطاعون)
الستات وقفوا ضرب، والكل بدأ يهدا، والكل اتعاطف معاه..
_ طاعون ايه؟ ومستشفى ايه؟
_ والله مراتي غادة، عضها الفار، وعندها الطاعون بسببه، وهي في المستشفى، ورحت اشتريت لها لحاف جديد، وهدوم جديدة اهو..
(الستات سكتوا وقالوله خلاص، هنسيبك تنزل المحطة الجاية، وتركب عربية غير دي في المترو، وربنا يشفي لك مراتك)..
***** # سيد_داود_المطعني *****
عند العناية المركزة، شهد ماشية بسرعة، بتدور على خالد، من غير بالطو المستشفى، وماسكة شنطة ايديها .... شكلها نسيت تمضي حضور، وتلبس البالطو الابيض..
الغيرة صعبة أوي .. بتخلي الراجل أو الست يفقد صوابه، ويتصرف بدون حساب..
خالد واقف برة العناية بيكلم الممرضة اللي خرجت من العناية بعد ما قدمت الاكل لغادة..
_ بتعمل ايه هنا يا خالد؟
_ صباح الخير يا شهد ..
_ مين المريضة اللي طلبت لها أكل من برة دي يا خالد..
_ دي حالة صعبة، وأهلها هيتجننوا عليها، كانت المستشفى مقلوبة بسببها..
_ أنا هدخل أشوفها..
_ ايه يا شهد؟ تدخلي لها ازاي كده؟ وتدخلي لها ليه؟ فين البالطو بتاعك؟ وايه الشنطة اللي في يدك دي؟ انت جاية من البيت ع العناية ولا ايه؟
_ ما انا لازم اعرف مين العروسة اللي زي القمر اللي انت مهتم بيها أوي كده يا سي خالد..
(خالد اتنرفذ، وحاول يمسك أعصابه)
_ شهد .. انزلي اثبتي حضورك يا بابا ... ممكن ييجي تفتيش وتحصل مشاكل
(شهد بتبصل له بدون رضا)
_ ماشي يا خالد..
(شهد بتدمع ... ومشيت كاتمة غيظها)
_ أووووف ... مش وقت زعل خالص يا شهد دلوقتي
******** #سيد_داود_المطعني *****
شهد نزلت .. وبدأت تجمع معلومات عن الحالة، وعن اللي حصل من خالد، واهتمامه الشديد بغادة..
شهد راحت العناية وشافتها، وعرفت كل حاجة عنها، واتفاجئت ان خالد مش هيسيب المستشفى لحد ما يطمن عليها..
أم غادة وأبوها بيقولوا لشهد ان موقف الدكتور خالد عظيم، ومش عارفين يشكروه ازاي..
شهد هتتجنن، بيعمل كده ليه؟ موصي كل الأقسام عليها ليه؟
نزلت شهد تسأل كل حد تقابله .. خالد فين؟
المفاجأة كانت من دكتور حسني، صيدلاني المستشفى..
_ خالد قال لي انه هيروح ينام شوية في أوضة الأمن .. ووصاني أتابع حالة غادة اللي عضها الفار مع الأطباء ... واني أبعت له حد يصحيه لما دكتور محمد ييجي..
(شهد هتنفجر بجد ... ايه ده؟ هي وصلت لأنك تنام في أوضة الأمن علشان واحدة مريضة، وأهلها ميعرفوش عنك حاجة غير انك دكتور)
شهد بترن على خالد مفيش فايدة .. تليفونه مغلق..
كده ملهاش غير حل واحد .. انها تتهور .. تتصرف بشكل مجنون ... تروح أوضة الأمن تصحي خالد وتسأله..
مهما تكون العواقب ... مهما يحصل بسبب تركها العمل)
شهد طلعت من مبنى المستشفى .. وماشية بخطى ثابتة ناحية اوضة الامن .. وخبطت على الباب تصحي خالد
***** #سيد_داود_المطعني *****
سامح في المترو ... بينزل من عربيات السيدات .. ماسك شنطة هدوم غادة وشنطة اللحاف..
نزل بيجري عايز يركب عربية غيرها في المترو..
الستات في المحطة رايحين يركبوا عربيات السيدات ... شافوه نازل ..
مسكوه من قفاه .. وصرخوا..
_ يا شرطة .. شرطة ..
أفراد الشرطة بيجروا ناحيتهم
_ الحقير ده نازل من عربية الستات .. وشكله سارق منها هدوم حريمي..
المترو اتحرك ..
والشرطة مسكت في سامح .. وسحبوه على أوضة أمن المحطة..
***"" #سيد_داود_المطعني****
خالد فتح الباب ... شاف شهد قدامه .. وهو مش قادر يفتح عنيه من النوم
_شهد .. حصل ايه؟ جري ايه؟
_ مين غادة دي يا خالد؟ ومهتم بيها كده ليه
انتظروني في الجزء الرابع بعد كام ساعة
عضة فأر
سيد داود المطعني
