الحلقـة 7♥️
______
مُراد وقيس خدو سند للمزرعة وخلوه راقد وطلعوا مشو لـ عمر
قيس : اهلين اهلين وسلم عليه
عمر : اهلاا شن جوكم
مراد : كويسين الحمدلله
عمر : ها شني يا قيس ؟
قيس : والله شن بنقولك يا عمر راه ناجي ومعتز رفعو قضية على سند بأنه يبيعلهم ف حشيش وصوروه لما كان يعطيهم فيه
واحد ف القسم صاحبي وقالي على كل شي والشرطة دور في سند لكن اني حكيتلهم على كل شيء وقلتلهم خلو الموضوع عليا لو ماترباش اني حنسلمه بنفسي
مراد : الحق ي عمر حاولنا معاه هلبا تي قريب نضربه بس الله غالب خوي مانقدرش
عمر قرن حواجبـه : صار هكي ! ناجي ومعتز خليهم عليا
مراد : شن في بالك ؟
عمر : منورين والله صحيتو
قيس : شن بدير ي راجـل راه مش ساهلين
عمر : حتى اني عُمر الـ... ومش ساهل وغمزله .
هي تصبحو على خير وصحيتو منورين
مراد : ولا يهممك يا عمر تبي شي كلمني
عمر : وينه هو الفرخ ؟
قيس : خليناه ف المزرعة راقد
عمر : ردو بالكم عليه ماتخلوش يطلع اليوم بكلل
مراد : تم تم
عمر : هي سلام
قيس ومراد : سلام
______
طلع عمر ركب ف السيارة وكلم عمار
عمر : ها ياطيري نبيك ف موضوع
عمار : تم ياعشيري معاك لنهايـة
عمر ضحك : غير اهدا ي راجل واسمعني كويس وفكني من جو الأكشن متعك
عمار : نسممع فيك هي
عمر حكاله كل شي ع سند وناجي وشن دارو فيه
عمار : تي معقولة سند يدير هكي
عمار بحداه مُعاد خنب التاليفون منه
معاد : ها ياعشيري شن نسمع فيه هدا يقول معقولة شن في ؟
عمر : توا يحكيلك عمار نتلاقو غدوا هي وصكر عليه
مُعاد : ريته كيف صكر عليا الكلب
عمار : تستاهل مافيش حد قالك اخنب التاليفون
معاد : به غر قولي شن صاير ؟✌🏻
عمار حكالـه كل شي وكيف عمر بينتقم منهم
معاد : احيي قصدك الموضوع فيه ضرب وهكي
عمار ضحك : او ضرب واجدد 😂
________
ثاني يوم الصـبح :
عندي أنـي درت دوش ع السريع وبدلت وخليت شعري يجف وقعمزت بحدا جُهينة ونوض فيها
أنا : جوجو سادك نوم خلااص
جهينة : تي خيرك الزح خليني
انا : لااا نوضي هي
ناضت جهينة : ها شن تبي فيا 🙃
انا قعدت انابش فيها ونحرقلها ف دمها
جهينة : مهما كانت غلاوتك عندي ماتحاوليش تبصري معاي واني كيف نايضة 😒
انا : ههههههه تم نوضي هي باش نفطرو
ناضت جُهينة للحمام أكرمكم الله دارت دوش ومشطت شعرها وجتني
جهينة : وين عمر ؟
انا : وين نندري عليه انا خوك ولا خوي ؟
جهينة : هاهاها خليني نكلمه وشدت تاليفونها
حي امك متصللة هلبا
انا : كلميها اكيد مشغولة عليا
جهينة كلمت ماما وطمنتها عليا وصكرت
انا : تعالي نفطرو
جهينة : هي
مشينا فطرنا ولمينا الكوجينة وقعمزنا ف الصالة
جهينة : هي قوليلي شن صار معاك امس مانبيش نضايقك لكن اليوم بتقوليلي
انا : حكيم دار هكي ومش عارفة اعلاش اساساً كنت ف الكوجينة شوي ولقيته يضرب فيا 🤭😓
جهينة : كسرة في ايديه يارب
انا : اممييين
خش عُمر : هئحم السلام عليكم
اني من الخلعة كان في طرف على الطاولة نحيته وحطيته على شعري
عمر ضحك : سامحينيي معليشي وطلع
انا في بالي " ي قلبي ع الضحكة "
CITEȘTI
عوضي من الله انتَِ♥️
Ficțiune generalăرواية من قلمي أول روايـة ليا 🧡 رواية تحكي عن فتاة من زوارة و شاب من مصراته🧡 القصة من وحي الخيال ممزوجه بالواقع😍
