شر انتقام

الحلقة 17

#شر_انتقام * الحلقة 17 *

#الكاتبة_وعد_الخضر

وصل سالم لأستراحة عزيز ولقاه مقعمز ع الارض وحاط راسه بين رجليه قرب منه سالم و قعمز جنبه و ربت عليه

سالم : هذا حال الدنيا ياخوي نسأل الله يتقبلها برحمته

رفع عزيز راسه

عزيز : علاش صارلي هك ياخوي علاش البنت الوحيدة الي حبيتها وتمنيت نكون معاها اتدير فيا هك و تطعني في ظهري عطيتها حبي و ثقتي و في النهاية طلعت اتخون فيا علاش بس قولي

سالم : قضاء الله وقدره واكيد الي صارلك حكمة من ربي مش من فراغ مرات رايدلك الخير

غمض عزيز عيونه وتذكر البنات الي لعب بيهن والي ضحك عليهن و كسر قلوبهن الي خدا منها غايته وخلاها ملوحة ومشا الي فضح بيها قدام اهلها لأن رفضتله طلب الي شوه سمعتها لأن رفضت تتكلم معاه وتذكر الي داره في سحر والي كان ناوي يديره في اختها وتذكر كلمة سراج ليه " كما تدين تدان " وعرف ان الحكمة من يلي صارله العقاب !

فتح عيونه و بكى من كل قلبه ، حاوطه سالم بأيديه وقعد يسكت فيه

عزيز : ربي عاقبني ياسالم نسيت كل الي درته ونسيت ان ربي ح يعاقبني عاجلا ام اجالا

سالم : استهدى بالله ونوض معايا ورانا الف حاجة خليك قوي ماتنكسرش ، مرتك ماتت لازم توقف في عزاها واتدير الواجب

عزيز : ماتت بسببي اني الي خبرت خوتها ع خيانتها بس يشهد عليا ربي ماكنتش ناوي ان القتل خبرت خوتها في لحظه غضب بيش يعاقبوهاا بس لكن هم قتلوها 💔

سالم : نوض معايا انت بس و بعدها ح ناخدو حقها

عزيز : كيف ؟

سالم : بعدين ح تعرف ، هيا

مشو البيت ودارو العزاء ومرت الايام صعبه ع الكل

عزيز كان متحطم من كل النواحي جسديا ونفسيا كان ضميره يأنب فيه ع موتت حنان بكل لحظه ومش عارف شن يدير بيش يصلح غلطته الفادحة

في يوم كان عزيز قاعد في شقته و الحزن مغيم عليه خش عليه سالم

سالم : هي نوض دوش و بدل ورانا مشوار

عزيز : مش قادر نمشي لإي مكان ياسالم خليني في حالي

قعمز سالم جنب عزيز

سالم : ح نحاولو نصلحو الغلطه الي صارت ولو ب اقل شي نقدرو عليه بيش معاش تتعاود ومعاش حد يحلل قتل النفس بحجة الدم يغسل العار الدم يزيد العار لازم نقضو ع هالعادة الجاهلية وانخلو قصة موت حنان عبرة لمن اعتبر

عزيز : وشن بنديرو يعني ح نردو حنان للحياة و نمنعوها تغلط بيش ماتموتش ؟

سالم : لا لأن هالشي في يد ربي بس لكن ح نديرو الشي الي في يدنا والي يمنع الموت بسبب غلطه