_ ﺑﻌﺪ ﻃﻠﻌﻨﺎ ﻣﻦ ﺍﻟﺼﺎﻟﻪ ﻫﻮ ﺍﻟﻜﺎﻥ ﺳﺎﻳﻖ ﺍﻟﻌﺮﺑﻴﻪ ﺗﻘﺮﻳﺒﺎ ﻛﺎﻥ ﺟﺎﺭﻱ ﺑﺴﺮﻋﺔ ﺍﻟﻒ ، ﻗﺎﻝ ﻟﻲ ﻛﻠﻤﻪ " ﺍﻧﺘﻲ ﺍﻻﺧﺘﺮﺗﻲ ﺍﻟﺪﺭﺏ ﺩﺍ " ، ﻭﺻﻠﻨﺎ ﺍﻟﺸﻘﻪ ، ﻓﺘﺢ ﻟﻲ ﺍﻟﺒﺎﺏ ﻗﺎﻝ ﻟﻲ ﺍﺩﺧﻠﻲ ﺭﺯﻉ ﺍﻟﺒﺎﺏ ﺑﻄﺮﻳﻘﻪ ﺧﻠﺘﻨﻲ ﺍﺑﻜﻲ ، ﺍﺗﺨﻴﻠﻮ ﻗﻔﻞ ﺍﻟﺒﺎﺏ ﻭﻣﺸﻰ ، ﻭﺍﻧﺎ ﻋﺮﻭﺳﻪ ﻭﺍﻓﻘﻪ ﻓﻲ ﺑﻴﺘﻲ ﺍﻟﺠﺪﻳﺪ ﻣﺎﺳﻜﻪ ﻭﺭﺩﺗﻲ ﻭﻻﺑﺴﻪ ﻓﺴﺘﺎﻧﻲ ﺍﻻﺑﻴﺾ ، ﺑﺮﻛﺘﺎ ﻓﻲ ﺣﺘﺘﻲ ﺑﺘﺬﻛﺮ ﺍﻭﻝ ﺳﻨﺎﺭﻳﻮ ﺣﺼﻞ ، ﺍﻧﺎ ﺯﻭﻟﻪ ﻋﻔﻮﻳﻪ ﺷﺪﻳﺪ ﻭﺷﺪﻳﺪ ﻛﻤﺎﻥ ﺑﺤﺐ ﺍﻟﻀﺤﻚ ﻭﺍﻟﺼﺤﺒﺎﺕ ﻭﺍﻟﻤﺠﺘﻤﻊ ﻭﺍﻟﺤﻴﺎﻩ ﻣﺴﻤﻴﻨﻲ " ﺍﻟﻤﺒﻬﺠﻪ " ﺑﺘﺬﻛﺮ ﺍﻟﻤﺮﻩ ﺍﻟﻜﺒﻴﺮﻩ ﺍﻟﻼﻗﺘﻨﻲ ﻭﺍﻧﺎ ﺭﺍﺟﻌﻪ ﻣﻦ ﺍﻟﺠﺎﻣﻌﻪ ﻛﺎﻧﺖ ﺑﺘﻔﺘﺶ ﻋﻠﻰ ﻋﻨﻮﺍﻥ ﻭﺑﺎﻳﻦ ﻋﻠﻴﻬﺎ ﺟﺎﻳﻪ ﻣﻦ ﻣﻜﺎﻥ ﻏﺮﻳﺐ ، ﺳﺄﻟﺘﻬﺎ ﻣﺎﻟﻚ ﻱ ﺍﻣﻲ؟ ! ، ﻗﺎﻟﺖ ﻟﻲ ﻭﺍﻟﻠﻪ ﻱ ﺑﺘﻲ ﺍﻧﺎ ﺷﻜﻠﻲ ﺿﺎﻳﻌﻪ ﻭﺭﺗﻨﻲ ﺍﻟﻌﻨﻮﺍﻥ ﻋﺮﻓﺘﺎ ﺍﻧﻮ ﻣﺎﺑﻌﻴﺪ ﻣﻦ ﺍﻟﺤﺘﻪ ﺍﻟﺴﺎﻛﻨﻪ ﻓﻴﻬﺎ ﺍﻧﺎ ، ﻣﺸﻴﺖ ﻣﻌﺎﻫﺎ ﺑﻘﻴﻨﺎ ﻧﺴﺄﻝ ﻟﻤﻦ ﻭﺻﻞ ﻟﺪﻛﺎﻥ ﻭﻭﺻﻠﻨﺎ ﻟﻠﺒﻴﺖ ، ﺣﻠﻔﺖ ﻋﻠﻰ ﺍﻻ ﺍﺩﺧﻞ ﻣﻌﺎﻫﺎ ، ﻗﻠﺖ ﻟﻴﻬﺎ ﺑﻀﺤﻚ ﺍﻧﺘﻲ ﺿﻴﻔﻪ ﻱ ﺍﻣﻲ ﻛﻴﻒ ﺍﺟﻲ ﻣﻌﺎﻙ ، ﻗﺎﻟﺖ ﻟﻲ ﻻ ﺩﺍ ﺑﻴﺖ ﻭﻟﺪﻱ ، ﻭﺍﻧﺎ ﺟﺎﻳﻪ ﻭﻫﻮ ﻣﺎﻋﺎﺭﻑ ، ﺍﻟﻤﻬﻢ ﺩﺧﻠﺖ ﻣﻌﺎﻫﺎ ، ﻛﺎﻥ ﻓﻲ ﺭﺍﺟﻞ ﻇﺎﻫﺮ ﺍﻧﻮ ﻓﻲ ﻧﻬﺎﻳﺔ ﺍﻟﺨﻤﺴﻴﻨﺎﺕ ، ﺍﺗﺨﻠﻊ ﻟﻤﻦ ﺷﺎﻓﻪ ﺍﻟﻤﺮﻩ ﻭﺟﺎ ﺟﺎﺭﻱ ﻭﺑﻘﻰ ﻳﺴﻠﻢ ﻋﻠﻴﻪ ﻭﺑﺎﺳﻪ ﻓﻲ ﺭﺍﺳﻪ ، ﻗﺎﻝ ﻟﻴﻬﺎ " ﺍﻧﺎ ﻛﻢ ﻣﺮﻩ ﻗﻠﺖ ﻟﻴﻚ ﻭﺭﻳﻨﻲ ﻟﻤﻦ ﺗﻜﻮﻧﻲ ﺟﺎﻳﻪ ، ﺍﻧﺘﻲ ﻋﺎﺭﻓﻪ ﺍﻟﺒﻠﺪ ﺩﻱ ﻗﺪﺭ ﺍﻳﻪ ﻣﻤﻜﻦ ﺗﻀﻴﻌﻲ ﻋﺎﺩﻱ ، ﺍﻧﺘﻲ ﻗﺎﻳﻠﻬﺎ ﺩﻱ ﻗﺮﻳﻪ ﺍﻟﺸﻴﺦ ﺍﻟﻔﻴﻬﺎ ﺣﻠﺘﻴﻦ ﺑﺲ " ﻗﺎﻟﺖ ﻟﻴﻬﻮ ﻱ ﻭﻟﺪ ﻫﻮﻱ ﺧﻼﺹ ﻣﺎﻟﻚ ﻭﻣﺎﻟﻪ ﻛﺎﻥ ﻣﺎﺭﺑﻴﺖ ﻓﻴﻬﺎ ﺑﺲ ﻣﺎﺗﻜﻮﻥ ﺍﻟﺒﻠﺪ ﺩﻱ ﻏﻴﺮﺗﻚ ﺧﻼﺹ ﻭﻧﺴﻴﺖ ﻧﺎﺳﻚ " ﻗﺎﻝ ﻟﻴﻬﺎ ﺍﻣﻲ ﺧﻼﺹ ﺧﺸﻲ ﺍﻟﺸﻤﺲ ، ﺍﺗﻠﻔﺖ ﻋﻠﻰ ﻗﺎﻟﺖ ﻟﻲ ﺗﻌﺎﻟﻲ ﻱ ﺑﺘﻲ ﻭﻗﺒﻠﺖ ﻋﻠﻴﻬﻮ ، ﻗﺎﻟﺖ ﻟﻴﻪ ﺍﻟﺒﺖ ﺩﻱ ﺍﻟﻠﻪ ﻳﺤﻔﻈﻬﺎ ﻓﺘﺸﺖ ﻣﻌﺎﻱ ﻟﻤﻦ ﻭﺻﻠﻨﺎ ، ﻗﻠﺖ ﻟﻴﻬﺎ ﻻﻻ ﻱ ﺍﻣﻲ ﺍﻧﺎ ﺑﻌﺪ ﻛﺪﻩ ﺍﻣﺸﻲ ﺍﻫﻠﻲ ﺑﻴﻘﻠﻘﻮ ﻋﻠﻰ ، ﻗﺎﻟﺖ ﻟﻲ ﻗﻠﺘﻲ ﻛﺪﻩ ، ﻗﻠﺖ ﻟﻴﻬﺎ ﺍﻳﻮﻩ ، ﻭﻟﺪﻫﺎ ﻗﺎﻝ ﻟﻲ ﻛﺘﺮ ﺧﻴﺮﻙ ﻭﺑﺎﺭﻙ ﺍﻟﻠﻪ ﻓﻲ ﻱ ﺑﺘﻲ ، ﻗﻠﺖ ﺷﻜﺮﺍ ﻱ ﻋﻤﻮ
ﻭﻣﺸﻴﺖ ﻛﻤﻠﺖ ﺑﺎﻗﻲ ﻃﺮﻳﻘﻲ ، ﺍﺳﻠﻢ ﻋﻠﻰ ﺑﺘﺎﻉ ﺍﻟﺪﻛﺎﻥ ﻣﺮﻩ ، ﻭﺍﺷﻮﺕ ﺍﻟﻜﻮﺭﻩ ﻣﻊ ﺍﻟﺸﻔﻊ ، ﻭﺍﺧﺶ ﻓﻲ ﻧﺺ ﺍﻟﺤﺠﻠﻪ ﻣﻊ ﺍﻟﺒﻨﺎﺕ
ﻣﺮﻩ ﺗﺎﻧﻴﻪ ، ﻟﻤﻦ ﻭﺻﻠﺖ ﺍﻟﺒﻴﺖ ...
ﺑﻌﺪ ﺷﻬﺮ ﺗﻘﺮﻳﺒﺎ ﻟﻘﻴﺖ ﻧﻔﺲ ﺍﻟﺤﺒﻮﺑﻪ ﺩﻱ ﺳﻠﻤﺖ ﻋﻠﻴﻪ ، ﻛﺎﻧﺖ ﺟﻮ ﺍﻟﻌﺮﺑﻴﻪ
ﺳﻠﻤﺖ ﻋﻠﻴﻬﺎ ﻭﻣﺸﻴﺖ ﻉ ﺍﻟﺪﻛﺎﻥ ﻛﺎﻥ ﻓﻲ ﻭﺍﺣﺪ ﻃﺎﻟﻊ ﻣﻦ ﺍﻟﺪﻛﺎﻥ ﻣﺴﺘﻌﺠﻞ ﻭﺍﻧﺎ ﻣﻠﺘﻔﺘﻪ ﻋﻠﻰ ﺍﻟﻌﺮﺑﻴﻪ ﺍﻟﻔﻴﻬﺎ ﺣﺒﻮﺑﻪ ﻭﺑﺘﻜﻠﻢ ﻣﻌﺎﻫﺎ ﺍﺗﻠﻔﺖ ﺍﺻﻄﺪﻣﺖ ﺑﻴﻪ ﻗﺎﻝ ﻟﻲ ﺍﻧﺘﻲ ﻋﻤﻴﺎﻧﻪ ، ﻗﻠﺖ ﻟﻴﻪ ﺍﻧﺖ ﺍﻟﺒﺘﺸﻮﻑ ﻣﺎﺗﻤﺸﻲ ﺳﻤﺢ ﻃﻴﺐ ، ﺣﻤﺮ ﻟﻲ ﻭﻣﺸﻰ ﻭﺭﻛﺐ ﺍﻟﻌﺮﺑﻴﻪ ﺍﻟﻔﻴﻬﺎ ﺣﺒﻮﺑﻪ ﻭﻣﺸﻰ ﻭﺍﻧﺎ ﺑﻌﺎﻳﻦ ﻛﺪﻩ ، ﺑﻌﺪﻭ ﺑﻴﻮﻣﻴﻦ ﺍﻧﺎ ﻭﺍﻣﻲ ﺟﺎﻳﻦ ﻣﻦ ﻧﺎﺱ ﺧﺎﻟﺘﻮ ، ﻟﻘﻴﻨﺎ ﺣﺒﻮﺑﻪ ﺩﻱ ﺯﺍﺗﺎ ﻃﺎﻟﻌﻪ ﻣﻦ ﺍﻟﺒﻴﺖ ، ﺟﺮﻳﺖ ﺳﻠﻤﺖ ﻋﻠﻴﻬﺎ ، ﻭﻗﻠﺖ ﻟﻴﻬﺎ ﻣﺎﺷﻪ ﻭﻳﻦ ﻗﺎﻟﺖ ﻟﻲ ﻱ ﺑﺘﻲ ﺍﻧﺎ ﺯﻫﺠﺖ ﻣﻦ ﺍﻟﺒﻴﺖ ﺩﺍ ﻗﺎﻋﺪﻩ ﺑﺮﺍﺍﻱ ، ﺑﺲ ﺍﻧﺎ ﻭﺍﻟﺤﺒﺸﻴﻪ ، ﻗﻠﺖ ﻟﻴﻬﺎ ﺩﻱ ﺍﻣﻲ ﻭﺳﻠﻤﻮ ﻉ ﺑﻌﺾ ﻭﺣﻠﻔﺖ ﺍﻻ ﻧﺸﺮﺏ ﻣﻌﺎﻫﺎ ﺍﻟﺸﺎﻱ ﺩﺧﻠﻨﺎ ﻣﻌﺎﻫﺎ ، ﻭﺳﻮﺕ ﻟﻴﻨﺎ ﺷﺎﻱ ، ﺍﻛﺘﺸﻒ ﺍﻧﻲ ﻃﻮﺍﻝ ١٩ ﺳﻨﻪ ﻣﻦ ﻋﻤﺮﻱ ﻏﺎﺷﻪ ﻧﻔﺴﻲ ﺍﻧﻲ ﺑﺸﺮﺏ ﺷﺎﻱ ﺳﺎﺩﻩ ، ﻛﺎﻥ ﻃﻌﻤﻮ ﻣﺨﺘﻠﻒ ﻭﻣﻌﻤﻮﻝ ﺑﺤﺐ ﻳﺦ ،، ﺍﺗﻮﻧﺴﻨﺎ ﻣﻌﺎﻫﺎ ، ﺍﻣﻲ ﻗﺎﻟﺖ ﻟﻴﻬﺎ ﻣﺎﻋﻨﺪﻙ ﺍﻭﻻﺩ ، ﻗﺎﻟﺖ ﻟﻴﻬﺎ ﻋﻨﺪﻱ ﻭﻻﺩ ﻭﺍﺣﺪ ﻣﺮﺗﻮ ﺍﻟﻠﻪ ﻳﺮﺣﻤﻪ ﻭﻳﻐﻔﺮ ﻟﻴﻬﺎ ، ﻋﻨﺪﻭ ﻣﻨﻬﺎ ﻭﻟﺪ ﻛﻤﺎﻥ ﻭﺍﺣﺪ ﻭﻫﻮ " ﻣﺤﻤﺪ " ﺍﻣﻲ ﻗﺎﻟﺖ ﻟﻴﻬﺎ ﺍﻟﻠﻪ ﻳﺮﺣﻤﻪ ﻳﻯﺮﺏ ﻭﺍﻧﺎ ﻛﻤﺎﻥ ﺩﻱ ﺑﺘﻲ ﺍﻟﻮﺣﻴﺪﻩ ﻟﻲ ...
ﺍﺗﻮﻧﺴﻨﺎ ﻣﻌﺎﻫﺎ ﺯﻳﻴﻦ ﻭﻃﻠﻌﻨﺎ ﻭﻭﺻﻔﻨﺎ ﻟﻴﻬﺎ ﺑﻴﺘﻨﺎ ، ﺍﻣﻲ ﻗﺎﻟﺖ ﻟﻴﻬﺎ ﺧﻼﺹ ﺑﻜﺮﻩ ﺯﻭﺑﻪ ﺑﺘﺠﻲ ﺗﺠﻴﺒﻚ ، ﺣﺴﻴﺖ ﺑﻴﻬﺎ ﻓﺮﺣﺖ ﺷﺪﻳﺪ ﻭﺍﻧﺒﺴﻄﺖ♥
