واحد من مجموعتها فتح يوتيوب :
_ هو والله هو مش شبهه
_ مين دا
لف الفيديو ليهم : روك دانس "حازم عادل " قربت "تميمه" من الفيديو
_ حاززم عادل (بصتلهم) يعنى هو هنا للمسابقه ؟
ملامحهم اتغيرت بعد ما كانت حماسيه اتكلم واحد منهم بملامح يأس :
_ كده ضمنا الخروج من قبل ما ندخل ...
قعدوا كلهم فى حاله من الذهول ,, "حازم عادل" ليدر جروب " روك دانس" من المجموعات المعروفه ع اليوتيوب ومشهوره فى الرقص ودخلت كتير مسابقات واغلبها كسبهم ,,فكان الشباب و منهم "تميمه" بتهتم بكل تحديث ل حساباته ومعجبه جدااا ب حركاته ورقصه وكانت سعيده ان اشخاص مصريين ماهريين فى الرقص ومعروفيين نوعا ما ,,, صدمتهم بوجوده لانه صاحب خبره عنهم بمراحل وان التصفيات هتكون من جمع المتقدمين للمسابقه ان 3 فرق بس اللى هتسافر "دبى " تكمل المسابقه مع فرق التانيه من بلاد تانيه ,, فكان اقصى طموح "تميمه" و مجموعتها انهم يسافروا "دبى" كخطوه بدايه .. ولكن وجود "حازم عادل" اعتبر عقبه ليهم بتهددهم بنسبه 90% انهم مش هيكسبوا ومش هيستلموا تذاكر "دبى" ...
خلصوا قعدتهم وهما فى ذهول وصدمه وان الحلم اتحول لكابوس ورجع كل واحد ع بيته وقعدت "تميمه" تفكر وفتحت فيديوهات "روك دانس" وتتفرج عليهم راودها فكره مستحيل انها تتغلب عليهم واكيد مع الفرق التانيه نسبه نجاحهم ضعيفه ,, ف قفلت الموبيل واتنهدت وفتحت الشباك وبصت للسما وغمضت عينيها للحظه وفتحت عينيها تانى ونظره تحدى تملكتها انها هتكمل مهما كانت النتيجه ,, شافتها "نرمين" وقربت منها :
_ انا اسفه يا "تميمه" ,,
_ اسفه على ايه ؟
_ دايما بحس ان انا حمل عليكى انا لا بعرف اتكلم ولا ادافع عن نفسى ودايما انتى بتاخديلى حقى ,, اسفه انى حطيتك فى موقف ضايقك و ..
قاطعتها تميمه : بطلى استهبال ,, من امتى فى فرق بينا احنا اخوات فاهمانى واللى يدوسلك ع طرف اكله بسنانى وانتى مش غلطانه هى اللى مش عندها ذوق هى واللى معاها دا ..
_ ماهو دا اللى مضايقنى ان حصل تصادم بينكم وانتوا اصلا متقابلتوش فى المسابقه وع كلامكم احتمال كبير مش هتكملو و ..
_ ايه كل البؤس دا ,, هو مين علشان يحدد نكمل ولا لا ,, احنا اخدنا قرار وهنشترك حتى لو مش هنكسب ونسافر ,, مهما كان مين مش هيرجعنا ورا ,,دى فرصه وخطوه واخدها
_ انا مبسوطه انك لسه عندك اصرار ومخفتيش
_ واخاف ليه ,, منه ولا من الفرق التانيه ولا المسابقه نفسها ,, انا هعمل كل اللى اقدر عليه ولو خسرت مش هزعل مفيش داعى للخوف انا اخدت قرار اننا ندخل يبقى هنكمل ان شاء الله
_ طيب بقولك ايه ؟
_ ها
_ فى فكره كده ما تحاولى تتعرفوا عليهم هيفيدوكم يعنى وانتم مصريين زيه
_ يعنى تتخيلى انه هيوافق يساعدنا لما يعرف اننا هنتنافس معاه انتى عجيبه بجد
_ يا بنتى جربى انتى كلمتيه قبل كده ؟
_ لا
_ جربى كده ومنها تكون تصفيه نفوس وتكون منافسه شريفه من غير حد ما يحط حد فى دماغه ,, اصل سمعت من الواد "ماندو" ان فى المسابقات اوقات المكسب او الخساره بيكون ب اتفاق يعنى فرق معينه بتتفق مع بعض ويكسبوا بعض ولو مش حابين فريق بيطردوه بره المسابقه مع بعض ,,,
_ يعنى ,,
_ يعنى قدمى السبت علشان تلاقى باقى الاسبوع ,, بدايه خير وخليكى انتى صاحبه اول خطوه علشان تشاركوا وانتم مطمنين
_ طيب نامى ويحلها ربنا
_ بس اقولك حاجه ومتتحوليش عليا ؟
_ ها
_ اللى اسمه "حازم عادل" كاريزما جامده واثق من نفسه كده وصوته صوته تحسى بخشونه وكلها رجوله و ايده لما مسك دراع البنت ,,
قاطعتها : ناقص تقوليلى ناعمه وطريه وكلها حنيه
_ انا بكلمك بجد
_ كاريزما تنحه ,, بارد ومعندوش دم ولا احساس دا حتى مفكرتش يعتذر عن تصرف اللى معاه رغم ان العصير وقع عليكى ولو "شرم" لمت تبقى لمتهم هما ؟
_ ايوه احنا ملاك المنطقه الحره
_ والمجاوره كمان
_ احنا ملوك الارض فوقها وتحت ولا تزعلى ,, تاكلى معايا
ضحكت تميمه وحضنت "نرمين": يخرب عقلك بتفصلينى ناكل مناكلش ليه هتعوكلنا ايه ؟
_ مكرونه مترمرمغه بالجبنه انهارده عملتها الشيف كان هيدينى بوسه
_ ما تلمى نفسك
_ قولتلك كان كان وبعدين هو متجوز وانا مدخلش ع ضره انا زى الفريك
_ يلا يا فريك ...
قامت تميمه ونرمين اكلوا وقضوها هزار وضحكك ...!
" تميمه" محكتش ل "هشام" فى مكالمه الصبح ع الموقف اكتفت به لنفسها وحكتله انها احتفلت واتعشت مع اصدقائها ك احتفال ووعدها ب احتفال تانى لما يسافر شرم ,,, فى سوم قابلت "ماندو" وهى خارجه من فندق كانت عندها كلاس زومبا مع مجموعه من الفندق وهو كان شغال فى الامن هناك :
_ صباحو يا "ماندو"
_ صباحو يا "توما"
_ ايه الاخبار ,,
_ كله تمام
_ متتاخرش انهارده
_ لا متقلقيش هخرج بدرى ,,
_ اشطاا
_ مش انا شوفت "روك دانس" هنا فى الفندق دول نزلاء هنا وسألت وعرفت انهم قدموا فى المسابقه فعلا ,, هما محتاجين ايه علشان يقدموا فى المسابقه دى دول حياتهم كلها مسابقات بره مصر ..يسيبوها للغلابه اللى زينا
_ ماهو احنا بقى نبينلهم اننا نستحقها ولا ايه ؟
_ تمام يا ليدر ...
اتجهت "تميمه" ل المطعم واستلمت الشفت وهى وسط زملائها بتضحك ومع الزباين وكان فى اتنين من اصحابها كانوا بيمروا ف وقفوا معاها علشان ياكدولها ميعاد البروفه ,, وهى واقفه معاهم ظهر قدامها "حازم " وهو داخل المطعم ومعاه "ندى" كانت ملامحه صلبه خاليه من اى تعبير خطواته ثقه وغرور شافته دخل قعد قبل "ندى" واول ما قعد حط رجل ع رجل ومسك موبيله معجبش "تميمه" التصرف ,, وهى واقفه زميل ليها فى المطعم قدملهم المنيو وطلبوا فطار مهتمتش "تميمه" وكملت كلام مع اصدقائها :
_ خلاص يا "توما" فى ميعادنا
_ ان شاء الله ,,
_ بقولكم ايه ما تيجو نروح نسلم على " روك دانس " واهو يبقى بدايه سلام ونشوف فاكرنا ولا لا ونتعرف عليه وناخد منه نصيحه او اتنين كمبتدئين يعنى يحفزونا
_ تفنكر
فى اللحظه دى كلام "نرمين" تذكرته "تميمه" انهم يتقربوله ويتعرفو عليه كبدايه تعارف بين المجموعات طبيعيه ,,:
_ اوكيه ,, اسبقونى انتم وانا هجيب عصير ليهم وهاجى بعدكم
_ اوكيه
اتجهت للمطبخ وطلبت ليهم عصير وخرجت وهى بتقرب شافت ملامح اصدقائها متغيره قربت اكتر وسمعته بيتكلم :
_ وانتم فاكرين علشان حافظين كام حركه يبقى وصلتوا لمستوى المسابقات الدوليه مش علشان بتعملوا عروض فى الساحه تكونوا بروفيشنال ,, انتم محتاجين سنين علشان تاخدوا خطوه المشابقات مش 3 سنين بس ,, اعتقد احسن ليكم تنسحبوا وتستفادوا بالفلوس احسن لان خسارتكم اكيده بلاش تكون فلوس ولا وقت ليكم ..
اترسمت ملامح احباط ويأس ع وجوه اصدقاء " تميمه" اضايقت "تميمه" لان كلامه احباطهم قربت وحطت العصير ليهم وبنبره كلها هدوء وثقه :
_ مع الاحترام الشديد ليك ولكلامك ولخبرتك ونجاحك ,, مش معنى انهم هواه ومبتدئين وبيحاولو يعملوا حاجه بيحبوها ومتحمسين تحكم عليهم بالطريقه اللى كلها يأس واحباط كده ,, المتوقع من شخصيه ليها مكانتها فى مجال اللى بيحبوه انك تشجعهم وتحفزهم انهم يعملوا اقصى ما عندهم علشان يحققوا حلمهم حتى لو فشلوا كلامك مهما كان لو بسيط هيكون تحفيز ليهم انه يحاولوا تانى وتالت علشان ينجحوا ,, انت فى بدايتك اعتقد مكنتش بروفيشنال دانسر غير بالتدريب والجهد والمحاولات واكيد فشلت لغايه ما وصلت لمستوى دا ,, عاوزه اقول ببساطه مفيش حد بيتولد جاهز لكن بنقع ونفشل و بنتعلم وبنحاول كذا مره علشان نكون جاهزين ,, هتقول هيفشلوا ,, طبيعى يحصل الفشل بس دا مش معناه انهم فاشليين معناها انهم يحاولوا تانى وتالت للوصول لهدفهم ,, كلمه واحده بتساعد ونفس الكلمه ممكن تهدم نفسيه شخص محتاج اى مساعده حتى بكلام يحفزه .. المطلوب انك تشجعهم خصوصا انهم شايفينك حاجه عاليه اوى ليهم ,, لكن اللى انت قولته ليهم يدل ع غرور وانانيه وفى اعتقادى دا فشل مش نجاح يتحسبلك ,,
_ ردت "ندى":انتى ازاى بتتكلمى كده ,,انتى مين ؟
_ انا بتكلم كده علشان انا ليدر مجموعتهم ومحبش حد يقلل او يهين او يحبطهم مهما كان هما مش فاشليين ولا اى فرقه متقدمه فاشله الفشل هو اننا منحاولش ونخاف ودا مش هيحصل ,, فى مسابقه بينا اه نسبه نجاحكم اعلى بكتير لكن هنعمل اللى نقدر عليه ولو خسرنا مش هنزعل بالعكس هنحاول تانى وتالت الخساره هتكون حافز لينا نكمل ,, (بصت ل حوده واللى معاه ) يلا انتم واحنا ع ميعادنا ( وحطت العصير قدامهم) ودا حاجه بسيطه مننا ليكم ,,,
مشيت "تميمه" وهى مضايقه من طريقه كلام "حازم" واسلوبه معاها ومع مجموعتها لكن حست براحه لما اتكلمت ,, قعدت "ندى" تتكلم و"حازم" بص ل "تميمه" للحظات وتجاهلها ورجع بص ع موابيله ,, مر وقت وهما قاعدين "تميمه" تجاهلت وجودهم اعتبرتهم مش موجودين اساسا وعاشت يومها و لفت نظر"حازم" تصرفات "تميمه" وحركاتها الراقصه والملفته موبيله رن ومشى واللى شافه من "تميمه" 5 دقائق ,, بليل اتقابلت مع اصدقائها وخلصوا البروفه :
_ بكره فى نفس الميعاد تمام
_ هو كل يوم يا "توما" انا برجع فاصل صحه
_ انت يا "حوده" فاصل صحه من زمان
_ بس انهارده ابهرتينا رسيتهمله صح ( بص لباقى المجموعه وحكالهم اللى حصل فى المطعم ) و "توما" ايه ماشاء الله رستهم .. داانا قولت فرصه نطلب منه كام نصيحه اصله كتير دخل مسابقات كتير وعنده خبره واكيد هيساعدنا
اتنهدت " تميمه": ودى كانت تفكير غلط ,, او اختيار غلط لان اكيد مش كلهم "حازم عادل " واحنا مع بعض هنساعد بعض هنعمل اللى علينا والنتيجه ع ربنا ..
رجعت "تميمه" ع السكن وكانت متغاظه شافتها "نرمين" : مين اكل اكلك انهارده ؟
_ انا متغاظه
_ ليه ؟
_ الشخصيه اللى اسمها "حازم عادل" حسسنى بندم انى كنت مهتمه وبتفرج ع فيديوهاته كده حسيت ان اللى فى الشاشه حاجه والواقع حاجه تانيه خالص للاسف
_ اللى كنتى معجبه برقصاتهم اكتر من اى حد ,,
_ تخيلى انه يطلع بالتناحه دى
_ فعلا النت خداع بس مخدعش فى شكله دا طلع حاجه حلوه بزياده ايه دا يخربيت طوله ولا دقنه الخفيفه ولا العروق اللى فى ايده ايه دا بيرقص دا ولا بيرفع حديد
_ اروح اطلبهولك للجواز
_ لا لا مش هرتبط بعدو حبيببتى بس بجد محظوظه اللى هتمسك ايده ياااه
_ نرمين
_ سورى اندمجت بس ابعدى عنه ولا اكنك تعرفيه اقطعى علاقتك به
_ هو انا بقولك كنا مرتبطين ,, اللى ضايقنى انى كل السنين دى اعجبت بحد كده
_ متفكريش كتير بقى انتى مهم عندك ايه المسابقه وتعدى ع خير
_ ان شاء الله
تانى يوم بليل اتجمعت مع اصدقائها واتكلموا على خطتهم وانها استاذنت صاحب صاله الجيم انهم يتدربوا فيها مقابل مادى بسيط بعد وقت العمل الرسميه ووافقوا اصدقائها وابتدت تظبط الجدول ... فى يوم كان مطلوب من كل الفرق المقدمه فى المسابقه الحضور للقاء صحفى واعلان عن تاريخ بدايه المسابقه ,, اتجمعت" تميمه" واصدقائها وحضر "هشام" علشان يكون معاها وجود "هشام" بيعطى ل "تميمه" احساس انها مش لوحدها وكان بيطمنها ,, وهما واقفين شافت "تميمه" مجموعه "حازم" داخلين تجاهلتهم :
اتكلم واحد من اصدقاء "تميمه": عندى احساس رهيب اننا مش هنوصل لسلم الطياره
بصتلهم "تميمه" وبنبره جاده واصرار : ايه اللى بتقولوه دا هما ولا غيرهم يفرقوا ايه عنكم هما اشتغلوا ع نفسهم لغايه ما وصلو للى وصلوه مقالوش لا مش عاوزين او خافوا وانسحبوا ولا ضعفوا كده ,,, كل فريق هو اللى بيثبت نفسه واحنا تعبنا فى التدريبات وجهزنا نفسنا ومش هنقصر بلاش كلام يأس وركزوا على هدفكم على هدفنا على حلمنا كلنا ولا هما ولا غيرهم يقدروا يخطفوا مننا الحلم بتاعنا سامعين احنا ايه ..
ابتسموا : هاى ستار
ابتسمت" تميمه" ورجعت وقفت وبصت ل "حازم" اتقابلت نظراتهم لاحظت "تميمه" غرور منه لكن نظرات "تميمه" كلها تحدى واصرار ان مفيش حاجه تغلبها ,,, خلصوا الموتمر ومشيوا ورجع معاهم "هشام" وصلهم للبيت استاذنت "نرمين" ووقفت "تميمه" مع "هشام" :
_ انهارده كان يوم مرهق عليكم ضغط اعصاب اول مره تكونوا وسط ناس كتيره كده
_ مش هيكون حاجه قدام الايام الجايه
_ متحمسه اوى انتى ؟
_ احساسى ان حلمى وبيقرب ليا حاجه كانت زى ما بيقولوا سابع مستحيلات تحصل وبتحصل والاكبر هتحصل ,, عارف معنى انك تحس ان حلمك اللى بتحلمه بيقرب ليك واول خطوه كمان اسبوعين انا حاسه انى فعلا فى حلم ,,
_ الاحلام مع الاصرار والاراده بتتحقق
ابتسمت "تميمه": ميرسى يا "هشام" وجودك فى حياتى مش محسسنى انى لوحدى ابدا
_ انا تحت الخدمه دايما والوعد اللى وعدته ليكى ظهرى هيكون فى ظهرك ومعاكى فى اى قرار مهما كان
_ انت من اسباب ان انا عاوزه اكسب المسابقه دى اردلك جزء من اللى بتعمله
_ طول ما ابتسامتك دى مبتغبش وبتعملى اللى بتحبيه كده انا بيرجعلى كل اللى انا بعمله وبزياده
_ ربنا يخليك ليا
_ ويخليكى ,,
_ تميمه ..
_ ايوه
_ ان شاء الله وكسبتى المسابقه دى وهى ع مدار سنه مخططه لحاجه تانى ولا كل حاجه كده اتظبطت فى حياتك
_ انا حاليا تفكيرى فى المسابقه حلمى وحلم الشباب اللى معايا ولو حصل وكسبتها هيكون اخدت شوط كبير من الاستقرار اللى بسعى احققه لنفسى ...
_ يعنى انتى مأجله اى حاجه لبعد المسابقه ؟
_ ايوه ..
_ طيب تمام ,,
_ فى حاجه ؟
_ لا لما المسابقه تخلص ع خير اكيد هيكون فى حاجات كتير لكن انتى مبتحبيش تفكيرك يتشتت ف ركزى ع مسابقتك دلواقتى
_ اوكيه ...
_ انت مسافر بكره القاهره الصبح ؟
_ اها ع الساعه 6 الصبح عندى مقابلات كتيره بكره بالاضافه للى كان انهارده وأجلته
_ متعملش كده تانى شغلك اهم متأجلش حاجه
_ كذا مره اكررلك انتى اهم
_ وانا هكررلك ان تعب وعمر بابا "جلال" فى الشركه اهم انها تستمر وعلاقتك مع اهلك اهم و الدار اهم ,, فى حاجات اهم كتير فى حياتك ولو اتحطت حاجه مقارنه معاهم متختارش غيرهم
_ انتى اساس كل حاجه فى حياتى يا "تميمه" تشجيعك ليا ووقوفك معايا اللى مخلينى احافظ ع كل ده
_ وانا هكون جنبك ومعاك نحافظ عليهم متخسرهمش مهما حصل
_ اهو انت بتحافظ عليهم بالظبط اكنك بتحافظ عليا معاهم لانى مش شايفه انهم ااقل منى علشان اكون الاولى ,,
_ "تميمه"
قاطعته "تميمه" بابا "جلال" علمنا اننا مينفعش نكون انانيين نفضل رغباتنا الشخصيه ع حساب حاجات تانيه اهم ممكن اوى تاثر فى حياتنا بعدين
_ يعنى عاوزانى اهملك واكبر دماغى منك انسى ..
ضحكت "تميمه": وهو انت بتعرف تهمل ,, بجد من اهتمامك مش عارفه اعملك ايه ,,
_ يعنى لو طلبت هتنفذى ؟
_ اطلب اى حاجه وهتتنفذ وعد
اتحمس "هشام": اى حاجه ..اى حاجه
_ اى حاجه
بصلها للحظات وكان هيتكلم ويعترفلها بحبه وانه عاوزها توافق ع زواجهم رجع فى كلامه فى اخر لحظه :
_ هما حاجتين ومفيش تالته ,, حاجه دلواقتى وهى انك تركزى ع المسابقه وتكسبيها
_ والتانيه ؟
_ لا التانيه بعد المسابقه اتفقنا
_ اتفقنا ,, بالنسبه لطلبك فى الاول ف انا هعمل اللى اقدر عليه وزياده وواثقه ان تعبى مش هيضيع هدر
_ وانا واثق فيكى ,, يلا اطلعى ارتاحى و كمان اسبوع هتلاقينى هنا وهقعد معاكى 20 يوم مش هتكونى لوحدك يوم المسابقه
_ اتفقنا ...
_يلا اطلعى ارتاحى بقى
_ وانت كمان
_ تصبحى على خير
_ وانت من اهله
وقف "هشام" وشاف "تميمه" بتدخل السكن وقفلت الباب ركب العربيه واتجهه لفندق .. طلعت "تميمه" ودخلت الغرفه وكانت "نرمين" صاحيه قعدوا يناقرو بعض وبعدين نامت "تميمه" ... !
ابتدت "تميمه" تركيزها فى تصميم العرض اللى هيشاركوا به وكانت بتتدرب حتى لو لوحدها وكل مره ترجع متاخره ولاحظت" نرمين" انشغالها واندماجها واستعدادها التام ل اول مرحله من المسابقه ,,, قبل المسابقه بيومين لاحظ "هشام" الاجهاد والتوتر على "تميمه" من غير ما تتكلم فحب يعملها مفاجاءه يخرجها من الجو التوتر فعرض عليها هى واصدقائها يعزمهم على العشا فى مطعم ووافقوا وخلصوا اشغالهم واتجهوا لهناك وابتدوا يتكلموا ويهرزرو وهما قاعدين شافوا ان فريق" حازم" دخل وقعدوا على ترابيزه مجاوره ليهم ,,تجاهلتهم "تميمه" لكن احدى اصدقائها لاحظ نظره الاستقلال ليهم وانهم بيتوشوشو عليهم :
_ انا واثق انهم بيتكلموا علينا
ردت "تميمه": تجاهل وجودهم متديش حد اهتمام اكبر من حجمه
_ اه فعلا تجاهلهم احنا جايين هنا نفصل مش نتكدر
,, لاحظ "هشام" بعد ما كانت "تميمه" بتضحك وتهزر اتغيرت ملامحها :
_ فى ايه ؟
_ لا مفيش
_ تميمه
_ مفيش يا هشام
بص "هشام" على ترابيزه "حازم" وسمع تخاطيف كلام من اصحاب" تميمه" ان دا "حازم عادل" مشترك معاهم فى المسابقه وان نسبه فوزهم فى التصفيات ويكونوا من ال 3 ضعيفه جدا بوجودهم ووجود الفرق التانيه التقيله ,, فحس ان وجود "تميمه" معاهم فى مكان واحد مسببلها ضغط ومخليها مش مبسوطه طلب منها يغيروا المكان ورفضت ,, وهما قاعدين احد اصدقاء "تميمه" حب زى ماهى دايما بترفع من معنوياتهم يشجعوها :
مسك كوبايات العصير : فى صحه "توما" اجمد مصممه رقصات شوفتها
ابتسموا : فى صحه "توما"
سمعت" ندى" واستفزها الكلام وردت بصوت عالى :
_ بقى اى حد حافظ حركتين يبقى ليدر ومصمم رقصات كمان ,, لمت فعلا
رد صديق" تميمه" بعصبيه : بدل ما انتى بتتكلمى كده تعالى نشوف مين اللى حافظ ومين اللى فى دمه
بصتله ب استصغار : ومين بقى عندكم يقدر ينافسنا انت مش عارف احنا مين ؟
حاولت "تميمه" تتجاهلها لكن مقدرتش وقفت وبصتلها : عارفين ,, لكن لا احنا ولا انتم عارفين النتيجه لان فى مسابقه هتقول مين (ان) ومين (اوت)
ضحكت "ندى": شور معروفه النتيجه (شاورت على فرقتها ) ان ومين هيكون اوت(شاورت ع فريق "تميمه")
اتكلم احدى اعضاء فريق "حازم" : ايه رأيكم نعمل منافسه صغيره هنا هنشوف مين اللى هيكسب واهو نتسلى
ردوا اعضاء "تميمه": احنا موافقين
ردت "ندى" : اوكيه مين من عندكم هيجى قصادى
وقفت "تميمه": انا ..
خرج "حازم" من سكوته ووقف وبكل ثقه : : لو هتعملو منافسه تبين اتقان ومهاره كل واحد فيكم ف هتكون ب "تراك" واحد هتسمعوه مره واحده وبعدها تصمموا ليها رقصه موافقين
استفز "تميمه" : اوكيه موافقه
وقف "حازم" وبص ل" تميمه" نظره تحدى : هيكون "التراك" اختيار عشوائى تتسمع مره واحده وبعدها تبدؤء
"تميمه" : اوكيه
بص ل "ندى" : جاهزه
_ انت عارف انا ع طول جاهزه يا زوم
وقف "هشام" : وعلشان الحياديه لا حد منكم ولا منا يختار الاختيار العشوائى ,, صاحب المطعم يختار
ضحك" حازم": اوكيه ,,
اتكلموا مع صاحب المطعم وواقف قاموا ووسعوا المكان وابتدت "ندى" والكل الموجودين انتبهوا ,, ول حسن حظها كان "تراك" هى عارفاه وكانت بترقص عليها قبل كده فكانت سهله ,, اشتغل "التراك"وابتدت "ندى" ترقص ولفتت انتباه الموجودين بحركاتها ,, خلصت وصفق ليها الجميع ,,, دور "تميمه" ولحظها كان "التراك" اول مره تسمعه وشروط المسابقه انها ترقص ع اى كان غمضت عينيها وسمعته بتركيز وفتحت عينيها وابتدا "التراك" وابتدت "تميمه" ترقص عليها ول اتقانها الحركات واندماجها مع الميوزك اللى يشوفها يقول انها مدربه عليها اندمجت "تميمه" مع الميوزك وعاشت الحاله ولفتت انتباه "حازم " كانت مفاجئه له واستغرابت "ندى" و"اعجاب هشام" ,,, خلصت وكان التصفيق اعلى من تصفيق" ندى" والكل اعجب بيها ل اتقانها وقفت وقربت من "ندى" و"حازم" وبنظره كلها ثقه :
_ كده اعتقد مفيش نتائج ثابته ولا ايه
مشيت ل اتجاه الترابيزه واصدقائها احتفلوا بيها واترسمت ابتسامه على وشها ونظر ليها" حازم" نظره استغراب من ثقتها فى نفسها .. خلصوا قعدتهم ومشيوا وقعدت مع "هشام" ع البحر :
_ ايه الثقه الجاحده دى يا "توما"
_ عجبتك صح
_ بجد كنتى ممتازه اومال يوم المسابقه هتكونى ازاى انا مش متخيل
_ انا قررت انى افوق توقعات اى حد حتى انت هتتفاجئ بالعرض
_ بس كنتى تخوفى يا" تميمه" ومشدوده كنت قلقان عليكى
_ محبتش نظرتهم لينا واننا قليليين فى نظرهم لمجرد انهم مشهورين شويا على السوشيال ميديا واحنا لسه فى الاول ,, انا اخدت عهد لنفسى انى مش هسمح ل اى حد يستصغرنى ولا يقل من مكانتى لان مفيش حد احسن منى ولا انا اقل منهم فى حاجه
ابتسم "هشام": صح ,,
_ وبعدين انا مغلطتش فى حد ستيب ب الستيب والدانسر الكويس ابقى ولا ايه
ضحك "هشام": ايه المثل دا ؟
ضحكت "تميمه": مثل دانسر بقى
ضحكك "هشام": المسابقه كمان يومين
_ ايوه ان شاء الله
_ هتخلص المسابقه وهتنزلى معايا القاهره
_ ايوه اخدت اجازه عيد ميلاد ماما "سميه" واحتفل به مع اطفال الدار زى كل سنه
_ عمرك ما نسيتى
_ ولا هنسى اللى ادتنى الحب والحياه واللى انا فيه دا كان هى ودايما كانت بتقول جمله الموت بياخد جسد مبياخدش روح عايشه جوانا ودا اللى حسيته بعد وفاتها لكن وانا بعمل الحاجات اللى كانت بتعملها وبتحبها بحس انى بسعدها افضل كتير ما احزن عليها
_ الله يرحمها
_ وانت ماماتك عامله ايه ؟
_ كويسه مبسوطه فى جوازتها رقم 5
_ مامتك بتتجوز وانت قاعد كده عانس الحق نفسك
_ لما اطمن عليكى الاول ولو زنقت اتجوزك وامرى لله
ضحكت "تميمه": لا كده انت فعلا ملبوس يا ابنى غير التغيير حلو
_ ومين قالك انا زهقت انا بزهق لما برجع القاهره ومبشوفكيش
_ وانا كمان بفتقد وجودك اوى ,, انت يا "هشام" احلى حاجه الدنيا سبتهالى مااخدتهاش منى ومش هسمح انها تاخدها
ابتسم "هشام" : مش هيحصل متقلقيش
ابتسمت "تميمه": اكيد
_ المهم شدى حيلك كده وعاوز دانس ماشين على الاستيتج
_ متقلقش كله تحت السيطره ...
قامت "تميمه" ورجع "هشام" الفندق ,,, وليله اللى قبل العرض سهرت "تميمه" بتتدرب كذا مره مسكت شنطتها طلعت منها نوتس وفتحتها وكان فيها ورده "سميه" اخر ورده كانت موجوده يوم وفاه "سميه" قربتها "تميمه" وشمتها وابتسمت ورجعت حطتها فى النوتس وحضنت النوتس ورجعتها فى شنطتها واتجهت ل وردتها الزرقا اللى فى البلكونه ولمستها وابتسمت ,,شويا وخرجت كان الصبح اتجهت للبحر ووقفت وهى ماسكه النوتس ومبتسمه معاها 3 حاجات بتحبهم ,, البحر والسما و"سميه" من خلال وردتها ,, حست انهم بيدوها طاقه ايجابيه وقوه بيشحنوها وكانت متفائله رغم القلق ,, يوم العرض اتجهت "تميمه" ومجموعتها لمكان المسابقه وكان معاها "هشام" و "نرمين" وقفوا يتفرجوا عليها وبصت "نرمين" ل "هشام" وكان مركز ع "تميمه" خبطته :
_ ايه يا اتش
_ ايه يا نرمو
_ قولها ياابنى بقى قطعت قلبى كل ما اشوفك كده انا تعبتلك انت متعبتش
_ بتتكلمى ع ايه ؟
_ بتكلم عن قيس وليلى المستهبله ,, عنتر وعبله المطنشه ,, روميو وجوليت الراقصه ,, عليك انت و"توما" انت هتفضل كده نظرات نظرات وبس .. اتحرك خدلك موقف كده
ضحك "هشام": يخرب عقلك
_ يخرب عقلك انت ,, ازاى مستحمل وكاتم كل دا .. اعترفلها بحبك يا "هشام" متوجعش قلبى معاك
_ هو باين اوى كده ؟
_ دا رمل الشاطئ عرف اى حد بيشوفكم بيعرف ,, لكن "تميمه" اللى متعرفش او عامله نفسها متعرفش او مش عاوزه تعرف او خايفه تعرف ,, ف انت ازنقها وجيب اخر الكلام وطمنها
اخد نفس "هشام": انا نويت فعلا افاتحها فى الموضوع
_ امتى فى سن الستين
_ كل مره بختار توقيت غلط او ظروف غلط ,, ودلواقتى هى مشغوله فى المسابقه تخلص المسابقه وهفاتحها اكيد
_ هتستنى سنه ؟
_ ماانا مستنى سنين ,, "تميمه" محتاجه تطمن ونجاحها فى المسابقه دى هتكون دافع ليها انها تبدء حياه جديده او تسمح لحد يشاركها حياتها ومتاكد ان وقتها ردها بالرفض الدايم هيختفى ,,
_ ع الله مترجعش فى كلامك
_ لا ان شاء الله ,,,
_ طيب يلا ندعيلها تاخد تذاكر "دبى" وتطير
ادربت "تميمه" تانى مع اصدقائها وكانت مستنيه عرضهم وكان عرض "حازم" قبلهم وكان عرض مبهر لف انتباهها خرج هو وفريقه وبصلها بنظره ونبره كلها غرور ( بيست اوف لاك ) ومشى من غير ما يستنى ترد ,, كان دور "تميمه" دخلوا ووقفوا ع المسرح وابتد عرضها وكان ممتاز واعجب لجنه التحكيم ومن فضول "حازم" عرضهم عامل ازاى وقف بعيد واتفرج عليه واعجب به جداا وخصوصا خطوات "تميمه" المتقنه ولما عرف انها هى اللى صممته اعجب ب افكارها شدت انتباهه اكتر ,,, خلص اول يوم والنتيجه كانت تانى يوم ووسط التوتر والقلق فتحت" تميمه" الايميل وبتبص فى قلق شافت ايميل من المسابقه بتفتحها وكلها قلق شافت كلمه مبروووك
شفتها ومكنتش مصدقه نفسها قامت اتنطتط وحضنت "هشام "وكل اللى موجودين وفريقها واحتفلوا انهم من ال3 اللى اتأهلوا ل مرحله "دبى" ومعنى كده انهم هيسافروا كمان شهرين ,,, احتفلت مع اصدقائها ونزلت هى القاهره و"نرمين" مقدرتش تاخد اجازه ,, وطول الطريق كانت سعيده ومبسوطه و"هشام" كل اللى بيعمله انه بيبصلها وهو مبتسم طول الطريق ,, اول حاجه عملوها اتجهوا للمقابر وقفت "تميمه" تقرا الفاتحه خلصت وابتسمت :
" ماما ,, بابا ,, انا فى اسعد ايام حياتى حلمى حسه انه بيقرب اكتر مما اتخيل كنت اتمنى تكونوا موجودين لكن انتم معايا دايما ,, بحبكم,, ماما .. انا دايما حاسه انك معايا وايد ماسكه ايدى تشجعنى وتقوينى ,, انا متفائله خير الفتره الجايه ,, " خلصت كلامها ونزلت ع وسط البلد اشترت هدايا مع "هشام" وهما فى الطريق مرو من امام فيلا الشيخ زايد وقفت العربيه وبصت" تميمه" على الفيلا وكانت مقفوله وابتسمت :
_ مقفوله
ابتسم "هشام" : ازاى تتفتح وانتى مش موجوده فيها انا قولت مش هتتفتح غير ل" تميمه" و"تميمه" اللى تفتحها
_ انا قولتلك مش هرجع
_ مفيش حاجه اكيد فى حياتنا الغيب علمه عند ربنا ,, والبيت دا هيفضل موجود ل اى لحظه تحبى ترجعى دا بيتك
_ ان شاء الله ,, يلا بينا ,,
اتجهوا للدار واحتفلت "تميمه" مع الاطفال ووزعت الهدايا انها من ماما "سميه" وقضت اليومين معاهم فى الدار .. عرف "حازم" النتيجه وانهم من ال 3 وكان رد عله طبيعى لان دى حاجه كان واثق منها وعرف ان فريق "تميمه" كمان اتاهل وابتسم لما عرف لانه حس انهم يستحقوها فعلا ,, قبل ما يرجع القاهره يجهز للمرحله التانيه وسفر دبى مر على المطعم مشفش "تميمه" وشاف احدى اصدقائها فى التيم :
_ هاى
_ معقول :مستر حازم"
_ مبروك ع التأهل
_ ميرسى ليك ,, عرفت بقى ان احنا عندنا اراده ومفيش مستحيل
_ اه طبعا ,, تصميم العرض كان جميل
_ هى دى "توما" لما تركز فى حاجه تبهر الكل
_ هى موجوده ؟
_ لا هى سافرت القاهره ل قرايبها هناك يومين وهترجع ,, فى حاجه ؟
_ لا خالص انا كنت بمر من هنا عادى ,, يلا سى يو فى "دبى"
مشى "حازم" وكان عنده فضول يتكلم مع "تميمه" فى سؤال محيره اجابته عندها ,, فى اليوم اللى سافر فيه "حازم" القاهره رجعت "تميمه" شرم ونسى صديقها يقولها ان "حازم" سئل عنها ,,وابتدت تفكر هتعمل ايه فى المرحله التانيه . مر ايام قبل السفر ل "دبى" فى القاهره "حازم" قعد يتفرج على عرض" تميمه" ع الموبيل من موقع المسابقه ويخلص ويعيده من الاول شافته "ندى" وهو مركز :
_ عاديين يعنى
_ مين دول ؟
_ الفراشه الزرقا
_ لا خالص ,, دول بيرقصوا بروحهم مش جسمهم وبالاخص هى
شافته "ندى" بيشاور على" تميمه" : انت مكبر الحكايه ليه كده فى غيرها كتير
_ اكيد فى غيرها ,, لكن انا مشفتش غيرها شوفتها هى
_ يلا نتغدى
بص لموبيل : لا روحى انتى انا مش جعان
مشيت "ندى" وسمعت احدى اعضاء فريقها :
_ "حازم" قليل اوى لما حد يلفت انتباهه ويهتم بحد كده
ادخلت "ندى" بعصبيه: يعنى ايه يهتم مجرد بنت بترقص كويس وخلاص
_ "ندى" دى مش اى بنت ,, دى من مجرد ما تسمع اى ميوزك بتصمم عليها حركات دى اكيد موهوبه وحد مدربها كويس اوى
_ اهو "حازم" مش هيسيبها غير لما يعرف ,, انا واثق ان "حازم" مش هيسكت
_ ليه ؟
_ انتى ناسيه لما شافك من 5 سنين وصمم انك تكونى شريكته فى عروضه ,, نفس الاحساس موجود دلواقتى انتى شوفتيه اهتم بحد ال 5 سنين اللى مرو دى اول مره حد يلفت انتباهه لدرجه دى ,, ف انا متاكد ان "حازم" مش هيسكت ...!
_ انتوا هتقعدوا ترغوا كتير يلا من هنا
مشسوا واتغيرت ملامح "ندى" لغضب وغيره من "تميمه" ...!
ابتدت" تميمه" تجهز اورارق السفر وجواز السفر وكانت "نرمين" ساكته مبتتكلمش كتير وهى شايفه "تميمه" سعيده لاحظت "تميمه" سكوتها دخلوا ناموا بليل كانت نرمين" بتعيط قامت "تميمه" من ع سريره ونامت بجانب "نرمين" وحضنتها :
_ بتعملى ايه يا نرمونتى
_ بنام ,,
_ يعنى مبتغلسيش عليا زى كل يوم
_ علشان انت رايحه القاهره الصبح علشان تعملى جواز السفر
_وفيها ايه ؟
دموع نزلت من عين نرمين : هتوحشينى
_ ماانا قولتلك تيجى معايا وانتى رافضه
_ انا مبسوطه ليكى يا" تميمه" لكن دى اول مره ننفصل مده عن بعض ,,انتى لما بتنزلى القاهره يومين من غيرى مبعرفش انام
_ انتى هتخلينى ارجع فى كلامى ومسافرش
_ لا يا حبيببتى سافرى وحققى حلمك انا هشغل نفسى مع رفقاء الاكل هنا وهتمر الايام ع خير
سكتت "تميمه": نرمين ..
_,,انا والله مبسوطه علشانك وعاوزاكى ترجعى بتيكت لوس انجلوس
حضنتها "تميمه": طول ماانتى بتدعيلى بقلبك الابيض دا ان شاء الله هكسب
نامت" تميمه" وهى حاضنه "نرمين" ,,, وتانى يوم سافرت القاهره هى نزلت من السوبر جيت كان مستنيها "هشام "واتفاجئت بوجوده لانه قالها انه مش موجود فى مصر :
_ ايه المفاجاءات دى
_ قولتلك كذا مره انا ملك المفاجاءات يلا علشان نلحق نخلص الاوراق
_ يلا بينا
_ يلا
اتجهوا ل الجوازات وعملت جواز سفرها وخلصت اوراق بسيطه وكان فى وقت اتجهت ل الدار قعدت مع الاطفال شويا وقعدت فى الحديقه :
_ النسكافيه
_ ميرسى يا بشمهندس
_ كده كل حاجه جاهزه
_ اها الحمد الله
اتنهد : "تميمه" فى حاجه عاوز اقولهالك
_ ايه ؟
_ انا احتمال كبير مقدرش اسافر معاكى ,, المشروع الجديد فى دهب واخد وقتى والاستلام كمان شهر اللى هو وقت سفرك لكن هحاول
ملامح "تميمه" اتغيرت : لالا متضغطش ع نفسك اكيد مشروعك اهم ,,ومتقلقش عليا ان شاء الله هرجعلك بتيكت لوس انجلوس
_ مش زعلانه ..
ضحكت تميه : لا خالص لان فى وصيه بابا جلال وماما سميه اللى فضلت تحارب الفتره اللى فاتت علشان ترجع الشركه تقف ع رجلها و الدار تانى ويكون تحت ايدك ,, ودى حاجه متزعلنيش بالعكس يا "هشام" دى تفرحنى جداا لما نعمل حاجه هما كانوا بيعملوها وكانت بتسعدهم مجرد احساسى انها بتسعدهم دا كفايه عندى لانهم يستحقوا سعاده كلها ,,
_ بس اوعدك هحاول
_ حاول فشلت المحاوله متضغطش ع نفسك ولا تزعل تمام ,, وكده كده انا عارفه انك مش هتسيبنى هناك هتكون معايا دايما اتصالاتك
_ اكيد اومال اسيبك كده ثرى عربى يغريكى ولا حاجه
ضحكت تميمه: معتقدش ان العرب ليهم فى نوعيه رقصى ليهم فى البلدى وانا فاشله فى البلدى
ضحكك هشام : تروحى بالسلامه وترجعى وانتى مبسوطه ولو حصل عكس توقعاتنا متزعليش انا ع طول فخور بيكى يا "تميمه"
كلمات "هشام" الحماسيه كانت بتطمن" تميمه" ان فى حد دايما فى ضهرها حتى لو مش موجود معاها ,,,
فى المطار اتجمعت هى واصدقائها وركبوا الطياره واتجهوا ل دبى ,, نزلوا من الطياره كان فى عربيه مستنياهم دى كانت من اتفاق "هشام" وطلبه ليهم ,,اخدتهم واتجهت ع الفندق وكان باقى الفرق موجوده ,, و"تميمه" داخله هى واصدقائها كان "حازم" قاعد فى الريسيبشن وشافها لكن هى مشفتهوش ,, بصت "ندى" شافت عينه كانت ع " تميمه" :
_ هالووو يا زوم روحت فين ؟
_ بفكر هتكون النتيجه ايه.. هتكون زى مصر ولا ..؟
_ انت عارف ان كل لجنه بتكون مختلفه عن اللى قبلها واللجنه هنا متشدده انت ناسى مستر جان صعب يوافق ع اى تيم ودرجاته دايما قليله
_ لكن انا حاسس ان ممكن النتيجه تتعكس
_ احنا هنكسب شور يعنى
_ وهى كمان تستحقها
_ بتقول ايه ؟
_ لا ولا اى حاجه ... ورينى كده كان مكتوب ايه ...!
عرفوا "تميمه" واصدقائها اماكن غرفهم وكلهم طلعوا غرفهم وعرفوا اماكن تدريبهم ومكان المسابقه ,, كانت "تميمه" ع طول بتتدرب حتى لو لوحدها لما بتتعب بتعيد تانى التدريب احساس سيطر عليها انها فرصتها وعاوزه تعمل اقصى حاجه تقدر عليه والنتيجه مفكرتش فيها المهم انها تجتهد ,, كانت بتتجاهل "حازم" وفرقته ولو لمحت "حازم" وكان بص عليها بالصدفه حرك راسه كتحيه بسيطه حركت راسها ردا لتحيه وكملت طريقها ,,, اغلب وقتها كان مع فريقها وتعرفوا ع افراد من الفرق التانيه كان فى منهم عرب وفى اجانب لكن اللغه كانت عائق ,, ففى مره وهما فى المطعم وكان الاكل اوبن بوفيه فكانت "تميمه" بتتدرب ووصلت المطعم متاخر واتجهت على الترابيزه وشافتهم بياكلو :
_ يا اندال مش تستنانوى انا الليدر
_ "توما" انتى الليدر فى الرقص لكن الجوع الليدر هو المعده
ضحكت" تميمه": فكرتنى ب نرمين وحشتنى ,, يلا هقوم اعملى طبق وجايه
قامت واقفه وبتحط اكل فى طبقها ,,قرب منها شاب من فرقه تانيه فرنسيه وبيتكلم معاها لكن هى بتحاول تفهم مش عارفه ففى الوقت دا ادخل "حازم" ورد عليه بالفرنساوى ومشى افتكرت "تميمه" انه ضايقه :
_ انت قولتله ايه ؟
_ كان بيسالك الاكل دا سبايسى ولا لا قولتله لا راح هناك يشوف اكل سبايسى
_ اها ,, طيب
ولسه هيتكلم سابته "تميمه" ومشيت اتجاه ترابيزه فريقها وقعدت معاهم وابتدت تاكل ,,,!
قبل يوم المسابقه ب اسبوع قررت اداره المسابقه كيوم ترفيه للفرق نظمت ليهم يوم رحله سفارى يومين ليهم لكل الفرق ,, اتحدد اليوم والوقت واتجمعوا واتجهوا الى رحله السفازى صحراء "دبى" وكان الجميع متحمس ليها ,,وصلوا وقعدوا وسط الصحرا ولان عددهم كبير المسئول عن الرحله اقترح عليهم يلعبوا لعبه هيقسهم فريقين الفريق اللى هيكسب هينام فى الفندق والفريق الخسران هينام فى الخيمه فى الصحرا ,,البعض خاف والبعض انزعج والبعض فرح ,, وابتدا يطلب منهم يدورو على 25 علم مدفونين ف اتحمسوا وابتدوا يتوزعوا لتفتيش والبحث عن الاعلام ,,, "تميمه" مهتمتش لان مش فارق معاها تنام فى فندق ولا صحرا بالعكس هى فضلت نوم الصحرا بتحب الشروق والهدوء اكتر شئ ,, ف قامت من مكانها واتجهت بعيد عنهم وهى ماشيه شافت علم قعدت بجانبه لحد يجى ياخده ,, كان "حازم" بيراقبها بنظراته وكان ماشى وراها ولما شافها قعدت استغرب من تصرفها ف قرب منها يفتح معاها كلام وضحك :
_ انتى بتحافظى ع العلم ولا ايه ؟
بملامح حاده : لا خالص لو عاوزه خده
_ وانتى مش عاوزاه
ب لامبالااه: لا ..( مدت ايديها ) امسك ,,
استغرب "حازم: ودا بجد ولا بتلعبى معايا لعبه ؟
قامت" تميمه" وهى ماسكه العلم وقربت من "حازم" ومسكت ايده وحطت العلم فيه وقفلت ايده ورجعت قعدت وهو واقف مكانه بصتله شافته لسه واقف :,,
_ انت واقف ليه ؟
_ انتى مستعده تنامى فى الصحرا عادى
_ ايوه عادى ؟
بص ع "ندى" كانت بتدور ع علم ب استموات علشان بتخاف من الصحرا وبص ل "تميمه":
_ عادى ,, بنت وتنام فى الصحرا
_ وايه يفرق بنت ولا راجل فى النوم صحرا ولا فندق ,, وبعدين دى لعبه فيها خسران وكسبان واحتماليه خساره البنات متساويه مع خساره الاولاد الفرق اللى بيجتهد اكتر فى التدوير هو اللى هيعدى مرحله الخساره وانا مش عاوزه ادور متنازله يعنى وموافقه بالخساره
وقف" حازم" باصصلها وللحظات قعد بجانبها بصتله :
_ انت بتعمل ايه ؟
_ مدام مش فارق خساره ولد من بنت والنسبه متساويه مينفعش بنت ب ارادتها تقرر تنام فى الصحرا وولد بجبن يدور ع علم علشان ينام فى الفندق ..
_ يعنى افهم من كده انك هتنام فى الصحرا
_ ايوه
_ اخر قرار يعنى
بكل ثقه : اكيد ,,
بصتله "تميمه" ب استغراب ومدت ايديها : طب هات العلم ممكن ؟
_ اتفضلى شوف حد محتاجه بقى و ...
قامت "تميمه" وقفت ومشيت خطوتين : انتى رايحه فين ؟
بصتله بنظره ثقه : متبقاش الفرصه قدامنا كده ولمجرد للعند وان مينفعش بنت تتفوق على ولد فى حاجه هو شايفها صعبه نضيع الفرصه ,, الصحرا مستنياك.. انجوى
اتفاجئ " حازم" بتصرف "تميمه" وخداعها له وطريقتها وانها مشيت ولما رجع كان علم "تميمه" اخر علم وكده هى من المجموعه اللى هتنام فى الفندق وهى ماشيه كان "حازم" بيبص عليها بنظره غضب وهى مهتمتش وتجاهلته ومشيت ,, طول الليل "حازم" كان مضايق جداا من تصرف" تميمه" معاه و"تميمه" فى الفندق نزلت قعدت قدام البيسين وحاطه سماعات الهاند فرى ,, اتصل بيها "هشام":
_ ايه يا "توما" الاخبار
_ الحمد الله
_ انتى فين كده
_ فى الفندق
_ مش قولتى انك طالعه سفارى ؟
_ ايوه كنت هناك وعملوا لعبه كده فيها كسبان وخسران ورغم انى كنت عاوزه اخسر بس بسبب العند كسبت
_ انتى لسه بتعاندى
_ مبحبش اللى يعاند فى حاجه عاديه وهو شايفها خارقه للطبيعه
_ واضح ان الموقف ضايقك
_ عادى انا كبرت دماغى
_ المهم ,,خلى بالك ع نفسك ,,تمام
_ تمام ,,انت فين ؟
_ انا فى البيت عمتو "رجاء" جت زياره وبشوفها
_ طيب تمام ,, استمتع بوقتك بقى معاها
_ وانتى كمان
قفلت معاه ورجعت حطت سماعات الهاند فرى وغمضت عينيها ,, وفضلت فى مكانها لتانى يوم الصبح ,, كان المجموعه الفندق احضروا الفطار لمجموعه الصحرا وبعد الترحيب بيهم وتحضير الفطار قعدوا مع بعض واتحركوا كل واحد حر فى تصرفه فكانت "تميمه "قاعده مع فريقها بيضحكوا وبيهزرو وكانوا اتصاحبوا على فريق ارجنتينى ,, كان مجموعه اللى نامت فى الفندق بتجهز علشان ترجع وتسيب مجموعه الصحرا ,, وقت تجهيزهم وبيتحركوا انهم يرجعوا الفندق كان فى بنت من الفريق الارجنتينى تعبت فبدلت مع "تميمه" تروح الفندق و"تميمه" تقعد مكانها فى الصحرا ,,, قعدت" تميمه" وكانت طول الليل حاطه سماعات فى ودنها و"حازم" طول الليل عينه عليها لاحظ هدوئها وقله كلامها غير مع مجموعتها ,, سهرت" تميمه" لوقت الشروق خرجت من الخيمه واتحركت بعيد عنهم قلق "حازم" وقام هو كمان وراها من بعيد شافها نامت على تله رمل وباصه اتجاه السما وهى مبتسمه ووقف "حازم" ومستمتع بالمنظر وهو باصصلها ,, طولت "تميمه" فى قعدتها والشمس ظهرت وهى كانت مغمضه قام "حازم" علشان يعرفها افتكرها نايمه يصحيها لان النوم كده غلطعليها لو حاجه ظهرت عقارب او ثعابين ,, قرب منها ولسه هيكلمها شاف ثعبان بيقرب منها ولسه هيلدغها زقه ب ايده لدغه فى دراعه اتخضت "تميمه" وزعقت ل" حازم" :
_ انت بتعمل ايه ؟
اتفاجى" حازم" من رد فعلها : متخافيش انا كنت بصحيكى علشان ...
كان ماسك دراعه وكان فى دم نزل بصت "تميمه": ايه دا ..؟
ابتسم : لا بسيطه تعبان لدغنى
_ ايه ؟
وكان ثعبان سام وداخ "حازم" ااتخضت "تميمه" بسرعه سندت "حازم" لان بان عليه السخونيه وبسرعه فى الخيمه عملوله الاسعافات الاواليه وكانت العربيه لسه مجتش وهو جسمه سخن بسرعه "تميمه" ربطت دراعه وابتدت تمص الدم وتخرج السم منه وسخنو سكينه ومايه سخنه وابتدت تعالج الجرح بالطريقه التقليديه وفى الفطار حضرت له فطار خفيف وتجاهلت اوامر" ندى" ليها ,,, رجعوا على الفندق ,, دخل "حازم" غرفته والدكتور شافه واطمن ان السم خرج,,, اطمنت "تميمه" عليه ورجعت لتدريبات هى واصدقائها ,,, فاق "حازم" وعرف ان اللى انقذته كانت "تميمه" ف اتجه ل غرفتها يشكرها وعرف انها فى قاعه التدريبات بص ع الساعه كان الوقت متاخر ,, اتجه ع غرفه التدريبات بص ع "تميمه" من بعيد ووقف يتفرج ع حركاتها ومن اعجابه بحركاتها وقف مكانه اتحرك خطوه وعند الباب داس ع حاجه بص كانت نوتس "تميمه" مسكها وبص فيها عرف انها ليها واستغرب من وجود الورده لكن مكنش عاوز يفوت فرصه انه يتفرج عليها وع رقصها وحركاتها حط "النوتس " فى درج ترابيزه كانت جنبه ,, شويا وقفت "تميمه" مسكت راسها وحست بدوخه ووقعت دخل غرفه التدريبات ومكنش فى غيرها بسرعه شالها واتجه للمستشفى وكان عندها هبوط فى الدوره الدمويه بسبب اجهاد وسوء تغذيه ,, قعد طول الليل معاها فاقت "تميمه" وبتبص حواليها شايفه المحلول متعلق و "حازم" حاطط سماعات هاند فرى ونايم ع الكرسى قامت وقعدت ع السرير وشالت حقنه المحلول وخبطت "حازم" من غير ما تقصد صحى :
_ صحيتى ,,عامله ايه ؟
بملامح حاده : هو ايه اللى حصل ؟
_ اغمى عليكى وانتى بتتدربى لوحدك و
قاطعته فى الكلام : وانت هنا بتعمل ايه وجيت هنا ازاى وفين موبيلى و ؟
قاطعتها "حازم" بنبره عاليه : بس ..بس ..بس ماهو لو تسمعينى للاخر من غير ما تقطعينى هتعرفى .. انا كنت بتمشى عادى يعنى وسمعت صوت ميوزك واستغربت ان فى حد بيدرب لمتاخر كده وبصيت صدقينى ملحقتش اشوف حاجه لسه ببص لقيتى واقعه ع الارض وطبعا مش هسيبك واقعه واكمل تمشيه ,, شيلتك وجينا هنا والدكتور شافك وقال انك مهمله فى اكلك ودا واضح جداا وقال انك لما تفوقى هتكونى احسن ,, ها بقى انتى احسن
_ الحمد الله فين موبيلى
_ عاوزه ترجعى الفندق يلا بينا
وقف "حازم" ومدت ايديها : موبيلك ممكن
مسكت موبيله واتصلت ب حوده فوصلوا المستشفى وطلبت منهم يحاسبوا لكن "حازم" كان حاسب المستشفى ورفضت "تميمه" وصممت تعرف المبلغ وعرفت ودفعتهوله واستغرب "حازم" من تصرفتها وانها بتقصد تتجنبه وتتجاهله ,,,
وهما ماشين "حوده" بيهزر : مفروض تعزمينا على حاجه بالمناسبه دى يا "توما" ؟
_ عاوزين ايه ؟
_ احنا متغدناش
اتكلم "حازم" : تسمحولىاعزمكم ومنها ارد جميل" تميمه" ليا وانها انقذتنى واتمنى مترفضش ولا هتجوعنا كلنا
قبل ما تتكلم "تميمه" وافقوااصدقائها وخرجوا على مطعم وطلبوا غدا و"تميمه" مكنتش بتاكل غيرضعيف ولاحظها "حازم" :
_ لو محتاج اكل تانى قوليلى
_ لا شكرا
_ انتم اول مره تشاركوا فى مسابقه صح
رد حوده : ايوه وان شاء الله تكون بدايهخير
قامت "تميمه" تدخل الحمام ودارالحوار دا بين "حازم" واصدقاء "تميمه":
_ مخططين لما تكسبوا هتعملوا ايهبالمبلغ ؟
رد "حوده" : اممم ,, الفلوسهتتقسم علينا واكيد هنكمل
_ انا اول مسابقه كسبتها فى مصر فلوسها جددت به الاستوديو بتاعى
_ احنا بما ان المبلغ كبير كل واحد هيكمل به جزء من احتياجاته يعنى فى مننا اللىعاوز يخطب فهيخطب واللى خاطب وبيوضب شقه هيوضبها واللى عليه ديون هيسددها واللىهيساعد اهله
بص ل "تميمه": و"تميمه" ؟
رد حوده: "تميمه" حلمها مدرسه رقص وسكن فى نفسالوقت لكل شخص وحيد مفيش حد يسنده حاسس ان حلمه مستحيل هى هتشجعه وتعلمه وتسانده,,مدرسه ودار مبيت يعنى هى قالت انها هتعيش فيه معاهم ,,,
انتبه "حازم" للكلام والوقت دارجعت "تميمه":: خلصوا اكل يلا ورانا تدريب
بصلها "حازم" وانت لسه تعبانه ؟
بصتله "تميمه" : المسابقه ملهاشعلاقه بالتعب هى جدول ومواعيد محدده وانابقيت احسن ,, وميرسى بجد ع العزومه ,,,
مشيوا الشباب مع" تميمه" و"حازم" باصص عليها وموبيله بيرن لما انتبه لموبيل بص كانت "ندى" بص لموبيل وقفله وبص ل "تميمه" وهى ماشيه,,,رجعوا كلهم ع الفندق و"تميمه" داخله على الريسبشن تاخد المفتاح :
_ انسه "تميمه" فى شخص مستنيكى فى المطعم
_ اكيد "هشام"
لسه هتلف سمعت صوته من وراها : اعمل ايهوحشتينى
فرحت "تميمه" ب انها شافت"هشام" وفى اللحظه دى كان داخل" حازم" ولاحظ فرق ملامح"تميمه" وابتسامتها ل" هشام" وهو ميعرفش مين هو ويقربلها ايهوعلاقتهم ايه لانه غالبا بيشوفها معاه ,,اتجهوا للمطعم و"حازم" باصص عليهم وهو واقف وماسك مفتاحه حس ب ايد عكتفه بص كان "ندى" :
_ فينك يا زوم مبتردش ع الموبيل ليه قلقتنى
_ لا انا تمام ,,
_ طيب يلا علشان نتغدى
_ لا انا هاخد شاور ع السريع وانام ساعه علشان التدريب
_ وانا جعانه طيب
بعصبيه : كلى يا "ندى "ولا انتى صغيره عاوزه ااكلك .. يلاا اشوفك فىالتدريب
اتحرك "حازم" اتجاه الاسانسيرو"ندى" مستغربه من رده العصبى ,, اتجهت للمطعم وبصت ع" تميمه"ومجموعتها ومهتمتش وقعدت تطلب الغدا ,, طلع "حازم" غرفته اخد شاور وقعدع السرير يفكر فى ردود "تميمه" معاها وافتكر النوتس نزل بسرعه مكان قاعهالتدريب فتح الدرج وشافها اخدها وطلع غرفته وقعد ع حرف السرير يقلب فيها وكانت"تميمه" مش كاتبه كل حاجه لكن كاتبه حاجات بسيطه عن الحاجات اللى بتحبها ومسك الورده المجففه وبيبصلها وهو مش عارفهقصتها ايه وبتاع مين قفل النوتس ونام ,,, !
___________________
يتبع ...
