_ انا عندى حل لمشكلتك وارجوكى مترفضيش ؟
_ لو اقدر عليه هعمله اكيد
_ نتجوز ...!
اتفاجئت "تميمه": ايه ؟
_ نتجوز ووقتها محدش هيقدر يقولك اى كلمه ولو قلقانه ع "نرمين " هتعيش معانا و...
_ ايه اللى بتقوله دا لا طبعا
_ لا
_ ايوه ,, ازاى اتجوزك علشان احل مشكلتى ,,انت ايه ذنبك استغلك علشان غرض شخصى
_ "تميمه" انا ..
قاطعته "تميمه": "هشام" ان لا هتجوز هروب ولا خوف ولا استغل حد علشان نفسى ,, الجواز معناه اكبر من كده وانا مش هتستهر به مهما كانت ظروفى ولو هو الحل الوحيد اللى قدامى انا اعيش لوحدى ارحم ,, ميربطنيش مع الشخص اللى هتجوزه مصلحه انا عاوزه اللى يربطنى به مشاعر لانى عاوزه اعيش حياه وولادى يعيشوا احسن منى فى بيئه ساويه دا حقهم عليا ,,انا مش هقدر اظلم اى شخص معايا ولا اظلم اولادى بعدين بسبب انانيتى علشان انقذ نفسى اغرق الكل ,,
_ انا مقصدتش كل دا بس صدقينى انا قول الحل دا علشان ,, ,,
قاطعته: انت بتقولها اهو ,, حل ,, وانا الجواز عندى مش حل ,,الجواز عندى حاله اعيشها ودا الفرق ,, وانا هلاقى حل لمشكلتى انا ونرمين ,,
_ "تميمه" انتى بتعاندى ليه ,,انا راضى وبقولك استغلينى انا موافق
_ لا يا "هشام" لا ,,انت بالذات لا مش هينفع استغلك مهما حصل ,,انت اللى فاضلى من اللى حواليا ومش هخسرك
سكت "هشام" وبصت "تميمه" ع الزرع وبتاخد نفس لفت نظرها "فراشه" :
_ طيب متتهوريش فى قراراتك لغايه ما نشوف هتعملى ايه ؟
_ فراشة ,,
_ ايه ؟
(شاورتله ع الفراشة )
_ الفراشه علشان توصل لهيئتها النهائيه كانت دوده قز دخلت شرنقتها لوحدها وحاربت وصممت وصبرت وخرجت منها طايره ,, كان ممكن تستسلم لظروفها وتموت لكن هى عاوزه تعيش متضيعش فرصتها فى الحياه ,, احنا كبشر حياتنا كده مفيش حياه خاليه من الازمات والمشاكل والحزن ولا حياه كلها فرح ,, وعلشان نوصل للفرح ونستمتع به لازم نمر ع الحزن والوجع وهنوصل لما منستسلمش ونحارب ونقاوم ظروفنا ,,هى دى الفراشة كائن ضعيف فى الاصل هيئته ضعيفه لكن ارادته صعب انهزامها ,, اغلب البنات هنا استسلموا لظروفهم وخوفهم زى دوده القز لما تثبت مكانها وتعمل شرنقه هما خافوا واستسلموا لغايه ما الشرنقه قفلت عليهم وخنقتهم وماتو لكن انا هحارب وهقاوم ومش هتستسلم وهخرج من شرنقتى واطير هتغلب ع ازمتى ومشكلتى وهخرج من شرنقه الدنيا واطير هخطف نظر الكل لكن ولا حد هيقدر يمسكنى ولا يقضى عليا هطير فوق واوصل السما واندمج مع لونها الازرق واوصل لبر الامان مش هضيع فرصتى فى الحياه علشان خوف واستسلام وضعف طول ماانا قادره ..!
ابتسمت "تميمه" ل "هشام" وحس من كلامها بطاقه ايجابيه وتحدى لمواجهه ظروفها ومشاكلها ومتستسلمش وحس بندم انه عرض عليها الزواج فى وقت غلط بطريقه دى ,,, !
_ اللى انتى عاوزاه يا "تميمه اعمليه وانا معاكى فى اى قرار
_ هو طلب واحد مفيش غيره
_ ايه هو ..؟
_ الدار ,, رجع الدار وحافظ عليه دى امانه ووصيه "بابا جلال" و"ماما سميه" مش عاوزه سيرتهم تنتهى كل ذكرياتهم وذكرياتنا معاهم هناك واللى كان بيحصل فى حياتهم نعملوا بعدهم تخليد لذكراهم
_ الدار هترجع متقلقيش والبيت دا هيفضل ومش هتخرجى منه اوعدك
_ الدار اهم ,, الاطفال ملهمش مكان تانى يروحوه وياعالم لو دخلوا دار تانيه هيحبوهم ويهتموا بيهم زى الدار ولا لا لو اتحطيت فى اختيار بين الدار والبيت اختار الدار ,,الدار يا "هشام"
سكت "هشام" وجواه رغبه ملحه انه يحافظ ع الاتنين ...!
مر اسبوع اخد "هشام" قرض كبير علشان يشترى الفيلا والدار وفعلا اشتراهم من عمته "رجاء" وحس "هشام" ان المشكله اتحلت و"تميمه" مش هتخرج من الفيلا ونفذ وعده انه حافظ عليهم وطمنها وطمن "نرمين" وفرحت "نرمين" ,, سافر اسبوع شغل ورجع ع مشكله اكبر مما يتخيل فى الشركه .. مشروع كان داخله اتنصب عليه من شركه تانيه اخدت فلوس القرض واختفىت و"هشام" اتصدر انه لازم يدفع القرض يا اما هيحجزوا ع ممتلكاته والشركه تعلن افلاسها وطبعا من ممتلكاته الدار والفيلا ,, بسبب الازمه الماليه دى محبش "هشام" يقول ل "تميمه" عليها ,,مر شهر وهو بيحاول يدبر فلوس القرض وهو مكنش معاه فلوس لانه دفع كل فلوسه بالقرض الجديد للفيلا والدار ودفعهم ل "رجاء" ,,من الصدمه فعلا حس "هشام" انه لوحده و واحساسه انه ضيع تعب "جلال" فى لحظه كان تاعبه نفسيا ,, وهو فى المكتب قاعد بيحاول يدور ع حلول خبطت ع باب المكتب "رجاء" ودخلت قعدت :
_ لسه ملقتش حل ؟
_ اكيد فى حل اكيد
_ البنك الشهر الجى لو مدفعتش جزء من الفلوس هيبتدوا الاجراءات
_ هلاقى حل ان شاء الله
_ واللى يلاقيلك الحل اللى تنقذ به الشركه والدار فى نفس الوقت ومتخسرهمش
_ ايه هو ..
_انا طلبت من المحامى بتاعى يتكلم مع البنوك ووصل لحل معاهم انهم يمدولك فتره السماح سنه او اتنين تسدد فيهم القرض وكده ولا هيحجزوا ع الشركه ولا اى حاجه تخصك .. ايه رايك؟
ابتسم "هشام": بجد يا عمتو ؟
_ طبعا انا عارفه مكانه الشركه والدار عندك كفايه انهم ذكرى من "جلال" وانت عاوز تحافظ عليهم بعده
قام من المكتب وحضنها وباسها وقعد :
_ هتكلم مع المحاسبين دلواقتى و ,,
_استنى استنى
_ ايه؟
_ هما عندهم شرط انك لازم تتدفع جزء من الفلوس الاول علشان يوافقوا
_ ايه .. منين ماهو دا اللى كنت بفكر فيه ؟
_ صدقنى لو الفلوس اللى اديتهالى معايا كنت رجعتهالك لكن "عبد الله" جوزى دخلنا مشروع كبير وودفعته حصتى
_ وانا هدفع منين المبلغ يعنى ما كده رجعنا للمشكله ؟
_لا فى حل وانت مش شايفه ؟
_ ايه هو ؟
_ فيلا الشيخ زايد تتباع,,, لان طبعا لا هتضيع الشركه ولا الدار ولا البيت اللى بناه "جلال" ولا ايه ؟
سكت "هشام": لا مينفعش و"تميمه" و "نرمين" لا انا وعدتهم ارجعه وحياتهم استقرت
_ حبيبى هو علشان تستقر حياتهم تدمر تعب عمك وحياتك ,, الفيلا انا اعرف حد هيدفعلك سعر عالى اوى انت نفسك مش تتوقعه ,, تدفعه للبنك وتاخد فتره السماح لتسديد وكده هتحافظ ع الدار وع الشركه وبيت "جلال"
سكت "هشام" وهو حس انه اتزنق تانى والمرادى بعيد عن "رجاء" البنك اللى زنقه بسبب القرض اللى اخده واتنصب عليه ..
قعد "هشام" مش عارف يرد وقفت "رجاء": انا كده عملت اللى عليا واللى فى مقدرتى عملتهولك اللى اقدر عليه هتكلم مع البنوك لكن لازم دفعه من الفلوس تتدفع الاول غير كده كله هيروح يا "هشام" ,, فكر والقرار فى ايدك لكن متطولش لانى بعلاقاتى باعده البنوك عنك لكن مش هقدر اطول عن كده ,, وانا واثقه انك مش هترضى ان تعب وشقى وذكرى "جلال" تضيع بسبب فيلا ,,
قعد "هشام" فى حيره انه مقابل حفاظ ع الدار والشركه هيبيع الفيلا ولو تمسك بالفيلا البنك هيحجز ع كل حاجه منهم الفيلا,,, مر يومين و "هشام" مش قادر ياخد قرار محدد فى يوم بعد تدريب "تميمه" "رجاء" اتصلت بيها وعرفتها الاوضاع والازمه اللى "هشام" بيمر بيها وتردد "هشام" ,,, تانى يوم الصبح اتجهت "تميمه" لشركه ل "هشام" :
_ ايه النور دا ؟
_ ايه اخبارك يا اتش ؟
_ انا الحمد الله تمام وانتى ؟
_ الحمد الله ,,ايه اخبار الشغل والمشروع الجديد هتبتدى فيه امتى
_ ها ,, قريب قريب البنك بس يوافق ع القرض والدنيا هتمشى
_ مش لما توافق انت الاول
_ اوافق على ايه ؟
_ ان فيلا الشيخ زايد تتباع
_ "تميمه" ايه الكلام دا ؟
_ مينفعش يا "هشام" علشان فيلا تضيع دار والشركه مع بعض فى المقابل انك لو بعت الفيلا هتحافظ على الاتنين ,,
_مفيش حاجه من دى هتحصل متقلقيش
_ لا هيحصل يا "هشام" فى قرارات فى حياتنا رغم وجعها بيبقى ضرورى ناخدها ,, ,, انا عرفت كل حاجه يا "هشام" وقولتهالك لو خيروك بين الدار والفيلا اختار الدار ,, الدار والشركه هما اهم حاجه تحافظ عليهم الذكرى الوحيده للغاليين مينفعش ببساطه نضيعها
_ انا مش هسيبك يا" تميمه"
قاطعته فى الكلام : انا مش صغيره يا "هشام" وهعرف اتصرف كويس لكن الاطفال ميعروفش,, وانا ولا انت عاوزينهم يعيشوا ببهدله بعد ما كانوا عايشين كويس ,, نفكر بعقل وبلاش انانيه ومصلحتنا ,,و مش جزاء اللى ضيعوا عمر من حياتهم يربوه فينا نضيع ذكراهم لغيرنا الله اعلم هيحافظ عليه ولا هيعمل ايه ,,
_ وانتى و"نرمين" ..
قاطعته "تميمه": انا جيت علشان اقولك انا و "نرمين" فى خلال اسبوع هنخرج من البيت ..
_ هتخرجوا ..ع فين ؟
_ مش بعيد هنكون فى الشيخ زايد ,, بنت من اللى كانت بتاخد دروس "زومبا" عندى اتصاحبنا ولما عرفت الحكايه عرضت عليا شغل وانا و"نرمين" عندهم
_ هتشتغلى ايه انتى و "نرمين" ومين دول انت تعرفيهم كويس علشان تقررى كده ؟
_ ماهو انا لما هشتغل هعرفهم لانى ببساطه معرفش علشان مجربتش
_ وهتشتغلى ايه انتى وهى ؟
_ باباها عنده محل ملابس فى مول قريب هشتغل هناك و "نرمين" هتكون فى المطبخ وانا هكون معاها
اتفاجئ "هشام": هتشتغلى بياعه وخدامه انتى و "نرمين"؟
_ وفيها ايه .. هو عيب ولا ايه مش شغل دا وبعدين دا الموجود ..
_ تعالى الشركه انتى و "نرمين" واقعدى فى بيتى وانا متخافوش هقعد عند اى حد اعرفه لو حكمت هقعد فى الاستراحه هنا
_ رجوع الشركه لا ,, انا هعتمد ع نفسى ومتقلقش عليا .. المهم كده الفيلا هتكون فاضيه وانقذ الدار والشركه تمام
خرجت "تميمه" و "هشام" حس بوجع انه مش عارف يلاحق ع المشاكل منين وتصميم "تميمه" انها تشتغل بعيد عنه ,,, ابتدت "تميمه" تجمع فى حاجتها هى و "نرمين" ونزلت قعدت فى مكان درورس الزومبا وشغلت الميوزك ورقصت كتير بدون توقف كل ما تتعب ترجع تقف وترقص تانى بدون فواصل ,, خرجت رمت نفسها ع الارض وباصه للسما ورددت " قوينى يارب " ,,, فى اخر الاسبوع جهزت "نرمين" و "تميمه" وقفلوا الفيلا وبصوا عليها من بره و"نرمين" دموعها نازله ابتسمت ليها "تميمه":
_ ايه احنا اتفقنا ع ايه (مسكت ايديها) منخفش ولا نقلق طول ما احنا مع بعض تمام
_ تمام
اتجهوا لفيلا صاحبه "تميمه" اسمها "رغده" كانت فى انتظارهم هى ومامتها ,, دخلوا وكانت فيلا فخمه وفيها خدم :
_ هى دى "توما " يا مامى "تميمه" اللى خلتنى احافظ ع جسمى وحببتى فى الرياضه عن طريق الرقص
ابتسم مامتها : مش عارفه اقولك ايه اللى عملتيه خليتيها مبهجه كده ميرسى بجد
ابتسمت "تميمه" : انا اللى بشكركم ع انكم وافقتوا اننا نشتغل هنا
ابتسمت "رغده": متقوليش كده احنا اصحاب ,, اعرفك يا مامى بالشيف "نرمين" احلى واطعم حلويات هتدويقها منها
ابتسمت "نرمين" : مش اوى كده
_ دى يا مامى ليها بيدج ع الففيس وبيجلها اوردرز كتيره شويه وقت وهتكون فى التليفزيون
ضحكوا : يلا يا "رغده" وديهم اوضتهم وعرفيهم الشغل ايه
_ حاضر
مشيت " تميمه " مع "رغده" هى و"نرمين" وصلتلهم لغرفتهم وكانت كبيره وجميله مفرقتش عن غرفتهم فى البيت اللى كانوا فيه وعرفتهم ع كبيره الخدم وعرفتهم شغلهم ان "نرمين" هتساعد فى المطبخ وشغل البيت و "تميمه" الصبح هتساعد فى شغل البيت لانها بليل هتكون فى المحل ,, واتفقت معاها "رغده" انها يومين فى الاسبوع هتعمل دروس "رومبا" ليها ول 3 من اصحابها كمساعده دخل ليها ,, رغم ان الشغل هيكون كتير وضغط عليهم وخصوصا "تميمه" كانت متحمله الشغل الاكتر لكن فكره انهم قعدوا فى بيت طمنهم وحست ان "نرمين" اطمنت خصوصا ان معامله "رغده" لطيفه و مامتها وباباها حسوا انهم طيبين واخوها الاصغر فى اولى ثانوى عسول وليها اخ اكبر لكن مسافر ,,,!
استلموا شغلهم وابتدت مرحله جديده من حياتهم وكانت دايما "تميمه" مهتمه ب "نرمين" وتطمنها و"هشام" كان يوميا بيتصل يطمن عليهم وسط انشغالاته وكان بيخطف ساعه ويشوف "تميمه" فى شغلها لكن تخاطيف ,,, باع "هشام" الفيلا وكان حزين جداا انه باعها و"تميمه" خرجت منها ودفع الفلوس للبنوك وسمحولك ب 3 سنين فتره سماح لتسديد القروض وركز "هشام" ع انه يخلص القرض ويحل مشاكل الشركه ويرجع يقف تانى ع رجله ,,,مره و"تميمه" فى المحل لحظت تصرفات عجيبه من والد "رغده" مع بعض البنات البائعين ضحك كتير ومياصه حست ان الصوره اللى شافتها فى الاول اهتزت الوقار بيختفى ,, حاول مره يهزر معاها مسمحتش "تميمه" بكده وابتدا يتجنبها ,, لكن فى البيت "نرمين" باقى الخدم حبها لخفتها رغم جسمها المليان وضحكها وحبوا حلوياتها ,,فى مره طلب والد "رغده" شاى وكيك فى اوضه المكتب فى الدور التانى وطلعت "نرمين" بصفاء نيه دخلت وقالها يقفل الباب استغربت وقفلت طلب منها تحط الصينيه قدامه ع المكتب لفت وهى بتحط الصينيه حست ب ايده ع ضهرها بعدت ع طول واتوترت ونزلت ,, اتكرر معاها كذا مره الاول كانت بتقول ميقصدش لكن لاحظت انه بيطلبها بالاسم واتاكدت انه بيتحرش بيها وهى علشان سكتت فى الاول هو كمل ,, مقدرتش تتكلم "نرمين" خصوصا انها شايفه "تميمه" بترجع من الشغل هلكانه واوقات بتنام وهى بتاكل فقررت متقولهاش حاجه لان حياتهم شبه مستقره وانها هتستحمل ,,, فى يوم و "تميمه" فى الفيلا حاطه سماعات الهاند فرى وبترقص فى كورنر فى الحديقه ضلمه محدش شايفها شافت اخو "رغده" خارج وبيبص حواليه كتير بصت ع الساعه كانت 1 بليل استغربت مشيت وراه شافته خرج من الفيلا ومشى خطوتين ودخل عربيه مع اصحابه قربت منهم واتفاجئت انه طلع فلوس كتير اداها لواحد فى العربيه واداله كيس صغير فيه بودره اتخضت وقربت من العربيه خبطت ع الازاز ونزل اخو "رغده" والعربيه اتحركت بسرعه وحاول يدخل الفيلا مسكته "تميمه ":
_ انت كنت بتعمل ايه يا "عماد" ؟
_ انا .. مفيش مفيش
_ هات اللى فى جيبك دا
_ مفيش فى جيبى حاجه ؟
_ هات بدل ما امد ايدى واطلعه انا
بعصبيه: بقولك مفيش وسبينى
شدته "تميمه" وطلعت الكيس البودره ومتفاجئه: بودره يا "عماد" داانت صغير ع الحاجات دى انت فى اولى ثانوى ايه اللى بتعمله فى نفسك دا
_ مش هعمل كده تانى بس متقوليش ل "رغده" ولا ل اى حد فى البيت علشان خاطرى يا "تميمه"
_ تعالى معايا ..
شدته ودخلوا الفيلا وقعدوا فى الحديقه بعيد :
_ ممكن اعرف ايه الحكايه وليه بتعمل كده ؟
_ انا مش مدمن
_ بس هتبقى مدمن يا "عماد" لو كملت ,, من امتى وانت بتجيب الهباب دا ؟
_ من اسبوع جربته انا واصحابى وعجبنى
_ وعجبك فيه ايه ان شاء الله ؟
_ بيفصل يا "تميمه" بيفصلك من الدنيا ,,بتهربى من اى حاجه معاه
_ وانت عندك ايه عاوز تفصل او تهرب منه ,, عايش وسط اهلك فى فيلا كبيره مليانه خدم ومش محتاج حاجه ايه مشاكلك ؟
بصلها "عماد" وسكت: الفيلا الكبيره المليانه خدم دى انا شايفها فاضيه مفيهاش حد ,,انا حاسس انى عايش مع اشباح فى البيت لا حد بيهتم بحد ولا بيتكلم مع حد كل واحد لوحده ,, حبيت اهرب من الفراغ اللى عايش فيه دا وجربت وعجبنى
_ بس دا غلط ,, مش معنى ان حياتك مش مرتاح فيها تقوم تدور على حاجه تدمرها اكتر
_ كنت بجرب بقولك
_ بتجرب ايه يا عبيط انت بتأذى نفسك ,, بتجرب وبعد كده هتدمن انت بتدمر نفسك بنفسك
_ انا مخنوق فى البيت دا مفيش روح فيه وملل
_ ملل تروح تشد بودره مين المتخلف اللى قالك كده ,, عندك ملل اشغله بحاجه بتحبها ,, برياضه تمارسها ,, اقرا .. اخرج مع اصحابك لكن مش الضريبه دول ,, فى كذا حاجه غير كده ,, الملل سهل يدخل حياتك ويسيطر عليها وبيبقى صعب يخرج منها لانك وسط ما بتعمل حاجه هتحس بملل ,, مدتيش فرصه لحاجه تسيطر عليك تأذيك ,,
_ هحاول
خبطته ع راسه : مفيش هحاول فى هعمل ,,
_ طيب هاتى وانا مش هعمل كده تانى
_ لا انسى الكيس دا ( فتحته ودلقته فى مايه ع الارض ) اهو الزرع يعمل دماغ
_ حرام عليكى انتى عارفه دافع فيه كام
_ بعد كده متعملش كده تانى واعرف انى هراقبك ومن بكره بما انك حاسس بفراغك هشغلك الفراغ لدرجه انك هتنام مقتول فتره الاجازه دى اعتبريها انك دخلت الجيش لكن معايا
_ هتعمليلى ايه ؟
_ اولا اعمل حسابك انك الساعه 7 هتصحى كل يوم وهتعرف وقتها ,,ويلا ادخل نام لانى هفرمك بكره
_ هتقولى ل "رغده"
_ لا دا سر ولا اى حد هيعرف لكن لو قفشتك تانى مش هخلى حد فى الشيخ زايد ميعرفش وانا كفاءه
_ خلاص ,,
قام "عماد" ودخل الفيلا وبتبصله "تميمه": ياما البيوت شكلها جميله لكن جواها خراب ,, يلا يا "توما" ادخلى نامى علشان مفرمه بكره
تانى يوم صحت "تميمه" "عماد" وفى الحديقه ابتدت تعمل رياضه هى وهو ساعه وجريوا ساعه مع بعض وكانت فتحت الانترنت وشافت طريقه عمل كشك ورود فى حدائق الفيلا بمكونات بسيطه ,, نزلت مع "عماد" ومن مصروفه اشترت الحاجات ورجعوا ع الحديقه وطلبت منه يعمل واحد زى دا كشك صغير فيه ورد يزرعه ويراعيه ويهتم ب الجنينه مع الجناينى فى النهار ويروح معاها المحل يقف مع باباه بليل وكده هو تحت عين "تميمه" حاول الاول يهرب لكن تصميم "تميمه" خلاه يركز ومع الوقت حب اللى بيعمله وفعلا بليل بيرجع غرفته يترمى ينام وعلاقته بقت كويسه مع "تميمه" ,, استغربت "رغده" لكت عجبتها انها شغلت "عماد" ,,, بعد فتره و"تميمه" مستنيه "رغده" علشان درس الزومبا مع اصحابها بعتت "نرمين" تقولها انها مش هتقدر ,, خلصت وطلعتلها وشافتها قاعده متغيره وبتعيط :
_ مالك يا "رغده" فيكى ايه ؟
_ مفيش
_ مش انا صاحبتك ولا ايه باين فى مشكله ايه بقى ؟
بتبصلها "رغده" ودموعها نازله " : انا ضيعت يا "تميمه" ضيعت استهتارى ضيعنى
اتفاجئت "تميمه" : مش فاهمه فهمينى ؟
حكتلها "رغده" انها كانت مرتبطه بشخص وكتبوا ورقتين عرفى واتجوزها وشاكه انها حامل وهو بيتهرب منها ومش عارفه تتصرف
_ مش عارفه اعمل ايه ؟
من المفاجاءه "تميمه" حبت تجمع : انتى متاكده انك حامل ؟
_ شاكه معرفش
_ طيب معملتيش فحوصات ليه وتعرفى
_ انتى عاوزانى افضح نفسى بنفسى
_ مش انتى قولتى قبل كده تعرفى دكتوره صاحبتك فى مستشفى الدكتور عبد الرحمن قوليلها تخلى الموضوع سر
_ تعالى معايا ممكن مش عاوزه اكون لوحدى
_ انا مش هسيبك متقلقيش زى ما وقفتى فى مشكلتى هقف معاكى ,, قومى البسى يلا
استاذنت "تميمه" وخرجت هى و "رغده" واتجهوا لمستشفى لصاحبتها وطلبت منها تعمل فحوصات الحمل كانت "تميمه" بره بترد ع مكاله "هشام" و"رغده" فى غرفه بيسحبوا الدم منها اتكلمت معاها الدكتوره انهم عاوزين يكتبوا اسم تانى علشان تبعد اى صله ليها علشان الاوراق ولان اهل "رغده" معروفين فبعد تردد كتبت اسم "تميمه" وخرجت :
_ خلصتى انا كنت داخلالك ؟
_ "تميمه" انا عملت حاجه وانا اسفه مكنش فى غيرك قدامى ااامنله ع سرى دا
_ مش فاهمه ؟
_ انا كتبت اسمك بدل اسمى فى الفحوصات ,, علشان مش عاوزه اى حد يعرف ويوصل ل اهلى
اتفاجئت "تميمه" وللحظات : مفيش مشاكل اطمنى انتى بس ومتتوتريش
خرجوا ورجعوا ع البيت وكانوا هياخدوا النتيجه تانى يوم رجعوا ع البيت ,, و"تميمه" فى المطبخ بتاكل شايفه "نرمين" متغيره جسمها بيرتعش وبتهته فى الكلام ولما دخلت خدامه طلبت منها توصل القهوه ل والد "رغده " الطبق اللى فى ايديها وقع اتكسر وكانت بترتعش :
_ مالك يا "نرمين" انتى تعبانه
_ ها .. انا .. انا .. لا لا كويسه
شكت "تميمه" ان فى حاجه وافتكرت تصرفات والد "رغده" مع بنات فى المحل اتخضت فشدتها من ايديها وخرجوا فى الحديقه ووقفتها قدامها :
بنبره حاده : فى ايه يا "نرمين" ,, متقوليش مفيش انتى خايفه ومرعوبه كده ليه فى ايه حصل ؟
بصتلها "نرمين" ومقدرتش تتمالك نفسها انهارت فى البكاء وقعدت ع الارض بتعيط اتخضت "تميمه" :
_ نرمين ... فى ايه اتكلمى فى ايه ؟
بصتلها "نرمين" وحكتلها اللى بيحصلها وان والد "رغده" بيتحرش بيها وايده بتلمس جسمها اتصدمت "تميمه" من الكلام :
_ ايه .. وانتى متكلمتيش ليه من الاول 6 شهور ساكته
_ ماهو انا محبتش اشيلك همى اكتر وانتى حياتك استقرت فى شغلك وعلاقتك مع "رغده" و,,
مسكتها من دراعها: انتى متخلفه ,, انتى سكتى علشانى ,, اولع انا ,,كذا مره اقولك متجيش ع نفسك علشان اى حد اى حد مهما كان مين ,, متهنيش نفسك علشان حد ,, ولا تسمحى ل حد يهينك ولا يقرب صباعه منك وتسكتى كنتى حدفتيه باللى فى ايدك خايفه من اول مره قوليلى كنا نمشى من هنا ,,
_ هنروح فين يا "تميمه" احنا ملناش مكان ولا نعرف حد و "هشام" دنيته متلغبطه و
قاطعتها "تميمه" ووطت صوتها لما شافت "نرمين" بتعيط : "نرمين" ..احنا لينا ربنا مش هيسيبنا لكن استسلمنا هو اللى هيأذينا ,,, احنا هنمشى من هنا
_ "تميمه" ,,
_ متقوليش حاجه ,, وبقولك متسمحيش اللى حصل دا يحصلك تانى مهما كانت الظروف انتى مش رخيصه ولا سهله فاهمانى
_ انا خايفه يا "تميمه"..
حضنتها "تميمه" وضمتها : متخافيش طول مااحنا مع بعض متخافيش انتى غلطتى انك سكتى من الاول متكررهاش تانى و بطلى عياط بقى ,, احنا لازم نمشى من هنا وهنمشى
_ وانتى وشغلك
_ يولعوا انتى اهم عندى من اى حاجه
حضنتها "نرمين" بتمسحلها دموعها : "نرمين" ارفعى راسك متوطيش ل اى حد ولا ل اى ظروف فاهمانى وهى فتره قليله اوى هنكون هنا فى موضوع يخلص وهنمشى ع طول وعد ,, لكن اسمعينى اوعى تروحى له لوحدك انتى مش الوحيده فى البيت وفى كتير وانا لو موجوده هروح مكانك اوديله القهوه ولو مش موجوده اتلككى ب اى حاجه فاهمه اعملى عيانه ,,( بصت ع طرحه "نرمين" وشدت دبوس) ولو حصل واتزنقتى وروحتى امسكى دا معاكى اول ما يقربلك انغزيه شوفتى فيلم نيلى كريم لما بشرى كانت بتعمل ايه ؟
_ ايوه
_ اعملى كده بالظبط ,,, وقريب هنمشى من هنا .. تمام ومتخافيش ,, وانا اللى هطلعله القهوه دلواقتى ,,
دخلوا المطبخ واستعجل القهوه اخدتها "تميمه" وبنظره وملامح حاده طلعت وخبطت ع الباب :
_ ادخلى يا "نرمين "..
فتحت الباب ودخلت : "تميمه" اللى موجوده
اتفاجئ بوجودها: تميمه ,, فين "نرمين" ؟
_ اسفه يا فندم "نرمين" الهانم طلبت منها تعملها كريم كراميل وبعدين "تميمه" او "نرمين" ميفرقش مين هجيب القهوه المهم ان وشها يكون مظبوط مش واقع وتكون صايصه ,, تشوفها تحس انها كويسه تدوقها تقرف منها ,, المهم القهوه مش اللى جايبها ولا ايه حضرتك ,,؟
_ حطيها عندك وامشى
_ حاضر
حطتها وخرجت وهو اضايق من "تميمه" افتكر انه فى مره اول ما استلمت الشغل حاول يقربلها فى المحل فى المخزن ع اساس انها تنزل صناديق كان بيحاول يقرب من جسمها فكانت "تميمه" بتوقع الصناديق عليه قاصده واتجرح ومره دلقت عليه الشاى دا غير ملامحها الحاده معاه وقفته وبعد عنها واتجنبها ,,, !
عرفت "رغده" نتيجه الفحوصات انها حامل وانهارت فى البكاء اتجهت للمحل واخدت "تميمه" وقعدوا فى كافيه :
_ انتى متاكده
_ ايوه ,,مش عارفه اعمل ايه ؟
_ تتجوزوا شرعى طبعا هو فى حل تانى
_ هو مش هيصدقنى يا "تميمه" ,, وبيتهرب منى ,,
_ هاتى رقمه وانا هقابله واتكلم معاه
اخدت "تميمه" رقمه ورجعت ع المحل الموبيل كان مقفول ,, قالتلها "نرمين" ان والد "رغده" حاول يتحرش بيها تانى لكن استعملت الدبوس ونجدها فحست انه مش هيبطل غير لما يتهدد بحاجه ,, اتفقت "تميمه" مع واحده من المحل كان بيتحرش بيها ووعدتها انها تساعدها وحبت تردهالها حطت موابيلها فى المخزن وصورت مشاهد "والد "رغده" وهو بيتحرش بالبنات ,, وقت الاستراحه شايفاه "تميمه" بيضحك مع بنت مسكت موابيلها وبعتتله الصور ومقطع فيديو ع الواتس وكاتبه تحتها ,, (نرمين خط احمر لو عديته الصور والفيديوهات دى هتكون فى البيت عرض مباشر) ,, اتفاجئ بالصور والفيديو وبص ل "تميمه" وكانت بصاله بنظره حاده ,, دخل مكتبه وطلبها دخلتله ووقفت وبعصبيه :
_ ايه اللى انتى عملتيه دا واللى اتبعت دا ؟
_ ليه حضرتك هو مش انت اللى فى الصور والفيديو ولا شبيهك ولا انا مركباه ,, المدام بقى والاولاد اكيد هيعرفوا لما يشوفوه انه حقيقى ولا لا ,,
بعصبيه : تميمه الزمى حدودك ..!
بنبره ونظره حاده : انت اللى تلزم حدودك ,, بنت قد بنتك تمد ايدك عليها بأماره ايه ,,دى امانه فى بيتك تحافظ عليها,, احترم الشعر الابيض اللى ع راسك دا ,,ولا علشان فاكرها يتيمه ملهاش حد هتكون سهله ومستسلمه ,, لا انت واللى زيك فاهمين غلط احنا مش ضعفاء ولا مغلوبين ع امرنا وهنسمح لحد يهنا ومش معنى ظروفنا كده يبقى هنكون لقمه سهله فى بوق اى حد يعض فيها ,, احنا غاليين وغاليين اوى ,, لو ملناش حد من وجهه نظركم الجاهله احب اعرفك احنا مش لوحدنا معانا ربنا اكبر منك ومن غيرك واللى يراعيه ربنا عمره ما يحصله حاجه ,,, عندك بنت وانت عمال تتحرش بالبنات بمزاجهم وفى مغصوبين بتستغل ضعفهم علشان الفلوس اللى بتدفعلهم علشان المعيشه ,, اتقى الله علشان ميتردش فى بيتك عندك بنت وزوجه ,, حافظ ع اهل بيتك محتاجينلك ,, خلاصه الكلام "نرمين" لو قالتلى انك قربت صوباع ليها او بنت من المغلوبين ع امرهم هنا قالوا صدقنى كل حاجه بتحصل هتكون ع عينك يا تاجر ,,
_ تميمه
_ مطروده ,, اوكيه لكن هتقولهم اطردت ليه علشان صورتك اوكيه
بعصبيه :اخرجى بره دلواقتى اخرجى
عدلت هدومها : اوكيه ,,انا راجعه لشغلى بعد اذن حضرتك
خرجت "تميمه" وهى رافعه راسها وواثقه من نفسها انها قالت الكلمتين و والد "رغده" قاعد غضبان ان "تميمه" بتهدده ,,, فكر يطردها من المحل والبيت لكن مكنش فيه سبب واضح لان عنده فى البيت بيحبوها وهى مش مقصره فى شغلها ,,, قرر يحطها تحت المراقبه يمسك عليها حاجه يطردها هى و"نرمين"لان وجودها بالنسباله تهديد ,, مر فتره وكان كل ما يشوف وش "تميمه" سواء فى البيت او المحل يلف وشه الاتجاه التانى ويتجنب الكلام معاها ,, ولحظت "تميمه" ان "نرمين" رجعت لطبيعتها المرحه والخوف اختفى من عينيها وهما فى غرفتهم :
_ "توما"
_ ها
_ انا مبسوطه اوى
_ يارب دايما
_ وبحبك اوى
_ لا كده فى حاجه ايه ,,
ضحكت "نرمين" لا ابدا بس حاسه ب أمان وانتى جنبى ببقى مطمنه
_ ع قلبك متقلقيش ,, طمنينى فى حاجه بتحصل ومخبيه برضه
_ لالالا خالص ,, اتغير معايا ولو زنقت وروحت اوديله حاجه بحطها وبمشى مبيبصليش اصلا معرفش هو عقل ولا ايه
ابتسمت "تميمه" : طيب الحمد الله ,, اللى حصل دا ميتكررش تانى يا "نرمين" متسكتيش ل اى حد يهينك ويقلل منك انتى مش قليله فاهمانى
_ ايوه فاهمه ,, وارفع راسى موطهاش وان انا حاجه غاليه واللى يغلط فيا مسكتش ومفيش حد له حق يلمسنى غير زوجى المستقبلى ف الحلال (اترمت فى حضن "تميمه) و "توما" حياتى بس علشان الحضن دا
حضنتها " تميمه"وحست ان تهديدها عمل نتيجه وهى مكنتش حكت ل "نرمين" ع اللى حصل لانها عارفه انها ممكن تحكى ل اى حد ومكنتش حابه صوره والد "رغده" تهتز فى بيته وخصوصا ل اولاده شايفينه احسن حاجه فى الدنيا ,,,!
تانى يوم صحيت بدرى وشافت "عماد" صاحى وبيلعب رياضه فرحت انها شافته وعملوا ساعه رياضه مع بعض وشافت اخر تطورات كشك الورود وكان "عماد" اهتم به وبيكمل لسه ,,, وهى واقفه موابيلها رن وكان رقم الشخص اللى كانت مرتبطه به "رغده " ردت :
_ الرقم دا لاقيته باعتلى رسائل كتيره ممكن اعرف مين ؟
_ لما هنتقابل هتعرف ..
_ اوكيه ,, فين
_ وقت ما تحدد ابعتلى رساله وانا هكون عندك ,,,
قفلت "تميمه" طلعت الغرفه وطمنت "رغده" وخلصت شغل البيت مع "نرمين" واتجهت للمحل وهى واقفه اتصل بيها وردت بعيد انتبه والد "رغده" ليها رجعت استاذنت ومشيت بسرعه بعت وراها حد يراقبها ,,, وصلت لكافيه وكانت عارفه شكله قربت وقعدت وعرفته بنفسها انها صاحبه "رغده " بصلها من فوق ل تحت شايف بنت عاديه لبسه بنطلون جينز وقميص ورافعه شعرها ديل حصان ابتسم :
_ خير يا صاحبه "رغده "
_ ببساطه وموجز كده "رغده " حكتلى كل حاجه
_ وبعدين
_ هى حامل ,, وطبيعى يعنى الورقه العرفى تكون شرعى علشان اللى فى بطنها
_ نعم ,,
_ نعم ايه ,, مش هى حامل منك ولا ايه ؟
_ ايه عرفنى انها حامل مش يمكن عملت كده علشان تخلينى اتجوزها
_ لا هى حامل وانا متاكده هى عملت الفحوصات واتاكدنا
_ اشوف بنفسى
_ خلاص بكره تعالى نروح المستشفى وتشوف بنفسك ,,
_ اتفقنا
قامت تمشى مسك ايديها و"تميمه" شدت ايديها :
_ طيب استنى اشربى حاجه ؟
_ لا شكرا لان انا مستأذنه ساعه من شغلى
_ وانتى شغاله فين ؟
_ فى محل والد "رغده : عن اذنك
مشيت "تميمه" وكان فى حد صورها ,, رجعت المحل وبعد شويا اتصل "هشام" وكان مستنيها قدام المحل خرجت سلمت عليه ومشى وكان بيراقب تحركاتها والد "رغده ,,, تانى يوم قالت انها هتتاخر عن المحل وقابلت الشخص دا ووصلوا المستشفى طلبت "تميمه" صوره من الفحوصات واخدتها وبتوريهاله وبص ع الاسم :
_ انتى غلطتى اكيد مكتوب "تميمه"
_ اه صح ,, دا اسمى
_ انتى بقى اللى حامل ؟
_ دى فحوصات " رغده" وكتبت اسمى علشان محدش يعرف
حط الفحوصات فى ايديها وخرج ومشيت وراه ومسكت ايده وقفته : انت رايح فين كده ؟
_ همشى ,, مليش انا فى العك دا
_ العك دا انت اللى عملته مش هى ,, ولازم تصلح غلطتك
_ اممم دى مش غلطتى لوحدى هى كانت معايا وبمزاجها وبعدين مكتوب "تميمه" مش "رغده" ,, حتى لو مكتوب "رغده" مش عاوز
_ مش عاوز ايه ؟
_ اطفال ,,
_ هو انا بعزم عليك تتعشى ,, دا ابنك ولا بنتك
_ لو هى عاوزاه تخليهم لكن انا قطعت علاقتى بيها خلاص ومش عاوز اعرفها تانى ,, لان اللى ترخص نفسها وتوافق ع ورقتين ملهمش لزمه متنفعش تكون مراتى اسف
حاول يمشى ومسكت ايده "تميمه" لكن هو صمم يمشى وقفت "تميمه" بصت ع الفحوصات وعلامات يأس ع وشها ,, رجعت ع البيت وعرفت "رغده" والحل انها تجهض الحمل بسرعه قبل اى حد يعرف ,,, وشافتها "تميمه" قاعده ملامحها متغيره وحزينه قعدت معاها :
_ ايه القمر ماله
بدموع نازله من عينيها : حياتى ضاعت يا "تميمه" حاسه انى فى فراغ كل حاجه واقفه علاقتى معاه وقفتلى حياتى
ابتسمت " تميمه": غلط اللى بتقوليه دى ,, انتى اللى بتوقفى حياتك مش هو ..!
_ انا ...؟
_ - _ فى مرحله فى حياتنا لما بنتعرض ل ازمه او مشكله بنحس وقتها ان الوقت بيثبت، عقارب الساعه مبتتحركش ، والسكون بيكون كل حاجه حوالينا ، والكلام بيختفى حروفه ، كل حاجه بتتجمد ، لأنه دا وقت اتخاذ القرار ,,انك تقرر الخوف يكون حياتك و تكون جسد من غير روح زى سنين عمرك اللى فاتت وتستمر فى غلطك ولا تقرر أنك تصلح سوء اختياراتك و تعيش حر بدون قيود ولا خوف - فرصتك
_ فرصه .
_ وقتها بتكون فرصه العمر اللى مبتتكررش ..!
سكتت "رغده" مسكت ايديها "تميمه" وطبطبت عليها :
_ انتى اختارتى غلطت ووافقتى تدخل تجربه صعبه اتوهمتى ان دا الصح انه دا ملاذك لكن اكتشفتى غير كده بعدين دى مش نهايه الدنيا ,, تجربتك دى مش هتهدك بالعكس هتقويكى وتقدرى بعدين تختارى صح وتقررى صح فى حياتك ,, متستسلميش لحاله العزله وان الحياه وقفت لا طول مافى نفس داخل وخارج انتى عايشه وليكى حق تعيشى متضيعيش حقك دا فى سراب ,, تجربتك وجعتك لكن فى المقابل هتقويكى ,,,!
ابتسمت "رغده" من كلام " تميمه" واطمنت وحضنتها واتفقت معاها يروحوا فى يوم واتجهوا لنفس المستشفى وكتبوا كل البيانات ب اسم "تميمه" وعملت العمليه وخرجت "رغده" من المستشفى سافرت ل خالتها بره مصر كتغيير جو ,, بعد يومين من سفر "رغده" و"تميمه" قاعده فى المطبخ بتضحك مع "نرمين" سمعوا صوت زعيق وكانت ام "رغده" خرجوا ع الصوت :
_ فى ايه
بعصبيه: طقم السوليتر اللى اشتريته من اسبوع اختفى ممكن اعرف راح فين ؟
كلهم بصوا لبعض ودخل والد "رغده" : فى ايه ؟
_ طقم السوليتر اختفى
_ طيب متعصبيش نفسك كده ..مين اخده اللى اخده يرجعه وهنعتبر مفيش حاجه حصلت
كلهم بصوا لبعض : يبقى نفتش ونعرف مين اللى مسئول ؟
دخلت والده "رغده" غرف الخدم وابتدت تدور ودخلت غرفه "تميمه" و "نرمين" وشافت فى هدوم "نرمين" الطقم وخرجت واتفاجئوا :
_ ممكن اعرف بيعمل ايه دا عندك يا "نرمين"؟
اتوترت "نرمين" وارتعشت ومكنتش عارفه ترد مسكت ايديها " تميمه ":
_ "نرمين" مااخدتش حاجه يا هانم ؟
_ وانتى ايه عرفك انا لقيت دا فى هدومها فى دولابها هيكون دخل لوحده ,, فى حد بيدخل غرفتكم غيركم مش المفتاح معاكم انتم الاتنين بس
_ بس هى مااخدتش حاجه عمرها ما تمد ايديها ع حاجه
تدخل والد "رغده": وجيبتى الثقه دى منين ,, اهلكم ربوكم ع كده متمدوش ايدكم
حست "تميمه" بالاهانه : ايوه بيت اللى كنا فيه ربونا منمدش ايدنا ع حاجه مش بتاعتنا
ضحكك والد "رغده": والبيت علمكم انكم تعملوا علاقات وتحملوا وتروحوا تجهضوا فى السر
اتفاجئت " تميمه": ايه ؟
طلع ملف من المستشفى فيه فحوصات واوراق العمليه ب اسم "تميمه" وصورها لما قابلت الشخص اللى كانت مرتبطه به "رغده" ورماهم قدامها ع الارض وشاور ع "تميمه" :
_ الهانم اللى عملالنا فيها ست الشرف كانت حامل وعملت عمليه اجهاض فى مستشفى الدكتور عبد الرحمن ,,والله اعلم رقم كام تعمل العمليه دى ,, مستيعدش لان اللى ملهمش اهل يربوهم والشارع بيربوهم اخلاقهم تكون ب الانحطاط دا
_ مش هسمحلك تغلط فينا
_ نعم ,, مش هتسمحيلى ايه ,, واحده حراميه والتانيه ماشيه فى الغلط نفسه ,, ليكى عين تتكلمى
بصت "تميمه" ع الملف والصور وحست انها مهما قالت محدش هيصدق علشان اسمها ومكنش ينفع تقول سر صاحبتها اللى امنتها عليها ,,, مسكت ايد "نرمين" : يلا يا "نرمين "
_ مع الف سلامه (طلع فلوس من جيبه ورماهم ع الارض ) باقى فلوسكم وطوا خدوها
بصتله "تميمه" نظره غضب وسابته ومشيت دخلت ع غرفتها و "نرمين" بتعيط مش فاهمه حاجه : "تميمه" هو ايه اللى حصل ؟
_ هفهمك بعدين لازم نمشى من هنا يلا
_ هنروح فين ؟
_ اى مكان الا هنا يلا
وهما خارجين من الغرفه وقف "عماد" : رايحه فين يا "توما" متمشيش
ابتسمت" تميمه": كده كده كنت همشى ,, اى وقت تكلمنى معاك رقمى تمام خلى بالك ع نفسك
_ مشيت "تميمه" و "نرمين" وحاولت والده "رغده" توقفهم : رايحين فين دول ببساطه كده هطلب البوليس
_ لا سيبيهم يمشوا بعد كده متسمعيش لبنتك تجيب اى حد اهى لمتلنا زباله الشارع فى البيت
بصوت عالى اتكلم "عماد" : "تميمه" و "نرمين" مش زباله يا بابا
_ انت ايه عرفك اطلع اوضتك يلا ,,
بص ع الفلوس وقال للخدم ياخدوها بينهم وطوا اخدوا الفلوس ,, دخل غرفه المكتب مسك موبيله وبعت رساله ل "تميمه ":
_ مجاش لسه اللى يهددنى يا اموره دا درس صغير تتعلمى متتحديش اللى اكبر منك طول ما انتى ضهرك فاضى
مسحت الرساله بعصبيه وهو كان بيضحك لكن ملامحه اتغيرت لما افتكر انه لما دور وراها وسأل الدكتوره قريبتهم بعد الحاح عرف من ممرضه ان اللى عملت العمليه مش "تميمه" كانت "رغده" بنته فدفعلها الفلوس انها لو حد سألها تقول "تميمه" و استغل "تميمه" علشان يطردها ,,, !
خرجت "تميمه" و"نرمين" وقعدوا فى مطعم ياكلوا :
_ هنعمل ايه يا "تميمه"؟
_ بفكر اهو هنروح فين ؟
_ منكلم "هشام" ؟
