#صدفة_أم_قدر
#الحلقة1
#للكاتبةfatoom
💙فاطمة الطاهر 💙
ممنوع نقل رواياتي بدون اسمي
✨✨✨✨
معز/وراس اخيتي لو توا بس تقولي مانبيش نوعدك نفركس امه لعرس
ميس/ساكتة وتفكر...
معز/راك تؤمي انتي نفهم عليك بدون لاتحكي ...عارفك مش راضية عالزواج ومش عاجبك
ميس/خلاص يامعز ياحبيبي الفاتحة انقرت معش فيها كيف
معز/علاش ماقلتيش من الاول علاش خليتيهم يقررو عليك ..ياريتني كنت موجود وقتها بسس
ميس/ماتفكرش ان شااءالله كل شي تمام اهم شي عندي انكم فرحانين
معز/شن الفايدة وانتي مش فرحانة
ميس/بي ابتسامة مصطنعة...لالا فرحانة بس هكي خايفة شوي وهدا طبيعي
يلا انت خش ارتاح كيف واصل اكيد تعبان
معز/اياه شن كنت في المريخ ..طرابلس حدفت رشادة نوصل هههه
ميس/الي هوا بس مسافة وطريق تبي راحة شوي ...
معز/خلاص توا عطلة وكملت امتحاني ان شااءالله حنفضالك ونفضى لي عرسك ههه
ميس/ربي يخليك ليا يانصي 😊
ميس/كنت متأملة نتزوج شخص نعيش معاه اميرة يحترمني ويقدرني وكنت نتخايل في كل شي .كنت نحلم يصير معاي زي في القصص والروايات ونتزوج شخص نحبه ويحبني بس والواقع غير 💔
ميس/كانت خطبتي وزواجي في اسبوعين بسس وماشفتش العريس نهااائي...يوم المقابلة خت فت خشيت ع السريع وكان معاي عمي لكبير ماقدرتش نرفع راسي ونشوف العريس بس كان باين عليه جهاامته طويل وعريض وجهه مربع باين عليه شين واسمر 😢م84...وطبعا مانقدرش نقول لا بعد لاطلعت هكي حيحطو العيب فيا ومعش يخطبني حد ...هدا كلام العيلة طبعا المهم هوا شافك وعجبتيه انتي ان شاءالله تموتي خلاص توافقي بلسيف عليك والا الناس حيطلعو العيب فيك والراجل مايعيبه شي ..فسكتت ووافقت رغم اني مش مرتاحة
اول ماتخرجت من المعهد والناس تسئل خيرها ميس ماانخطبتش خيرها وعلاش اهي كملت قرايتها زعما شن فيها ندادها بصغارهم الي اصغر منها تزوجو ومن هالكلام 💔 رغم اني مزال نبي نعيش حياتي وعندي هلبا طموحات بس للاسف حتى تخرجت ماخلونيش عمامي وبوي اني نشتغل ..طبعا عمامي اتنين كبار وفي السنة والكلام كلامهم والسلام سلامهم
الكاتبةfa toom✨✨✨✨
نجو نتعرفو على بطلتنا
ميس.بنت بسيطة من عائلة عادية جدا عايشة في ضواحي الجبل بدون ذكر اسم المنطقة
مواصفاتها حنطية وعيونها سود وكبار شعرها قصير وطولها وسط وجسمها عادي بس وجها معبي شوي وعندها خدود ملامحها حلوة وكيوت بس شخصيتها قوية
ميس م 96هيا راس بنت عندها خوها توأم اسمه معز في الشكل مافيش فرق بينهم الا انه هوا ولد هيا وياه قرااب هلبا من بعض وخوها الكبير اسمه مراد م89
امها امنة وبوها الهادي
ميس....درنا عرس عائلي بسيط في حوشنا
انزفيت لعريسي يلي ماشفتاش ما نعرف عليه شي غير اسمه وسمعته واخلاقه يلي يحكو بيها الناس
حفلتي كانت بسيطة عبارة عن اهلي وصحباتي وكانت حلوة ونازكة ماخليت شي في خاطري
بما اني لبنت لوحيدة ف كل شي خاطري فيه كان يجي لعندي
طلبت يكون لعرس بسيط لاني مانحبش الشوشرة وبصراحة كنت خايفة من كلام الناس بحكم اني صغيرة وحلوة وكنت متحشمة من العريس انه كبير وشين كنت عارفة الناس ماترحمش وح اطلع الف علة صح الراجل مايعيبه شي بس اني كنت نتمنى عريسي يكون حلو وشخصية وشاب وصغير بس كل شي كان عكس مانتمنى يس اقتنعت ان هدا نصيبي
طبعا خالد الي هوا العريس صدفة تعرف على عم ميس وع اساس راجل محترم وكدا ف عم ميس بعته عشان يخطب ميس بعد لاسئل عليه وطلع من عائلة كبيرة ومستواهم المادي فوق الريح والناس شكرت اخلاقه ف اول ماخطبها وافقو وعطوها بحكم انه نصيب مايتعوضش ع قولتهم 😒
ميس /اول ماقالوالعريس وصل ..بديت نرعش ووجهي بصب عرق ...
توقعته يخش ويطلعني بس قعد في السيارة واني طلعوني خوتي الاتنين
بعد سلمت ع اهلي وودعتهم واني دموعي ينزلو ...ركبت معاه ومشينا
كنا نسكنو في منطقة في الجبل.... وحوشي في طرابلس ....
طول الطريق واني خايفة شادة كاب العرس بيديا ونستنا فيه يقول اي حرف بس طول الطرريق وهوا ساكت حتى كلمة مبروك ماقالها مولع اغاني وبس ...
اول ماوصلنا ...كانو سيارات صحابه والالعاب النارية والاغاني قالبين الدنيا
خالد/انزلي خشي للحوش انا شوي ولاحقك
ميس/في سرها مش مفروض هوا يدخلني او نخشو مع بعض ...بس سكتت وخشت.... كان حوش صغير عبارة عن دارين وصالة ومطبخ وحمام ...خشيت تفتلت فيه وخشيت لدار النوم بروحي ...قعمزت ع السرير واني نستناا ونستنااا ونستنااا...لحد ماقلقت ...وهوا مزال ماخشش ومانعرفش وين مشي ...نضت نحيت الفيلو ولبست روب الدخول ..مسحت المكياج وعدلت شعري ولبست ملاية الصلاة صليت بروحي ودعيت ..ورجعت قعمزت ع السرير ونستناااا حتى تلفون ماعنديش. بش نتصل بيه
.ولانقدر نطلع من الحوش...كان الحوش في جهة حوازة وحوش عزوزتي بعيد ومابجنبي حد ...قلت تو يجي ...استنيت لين نعسني النوم
