تهزمني السمراء وانا نّد الفرسان

بارت

«البارت الثاني والاربعين»
.
.
في بيت ثنيان
دلال اللي كانت تحاول قدر المستطاع تدخل شوق بالجو رغم انطواء شوق والترف اللي كانت متجنبه ام ثنيان بشكل نهائي دخل ثنيان وهو ينزل البنات
ولف لدلال بهمس: دلال حاولي تقنعين امي تخف على الترف
دلال: وش اسوي يا ثنيان تعرف امي انت
ثنيان: المشكله عجزت افهمها عجزت
دلال : اصبر فتره وبتهداء وترضى
ثنيان اللي يشوف الترف تسولف مع البنات : والله مدري ليش امي ماحبتها للحين
دلال ابتسمت: مب كل القلوب قلبك ولا كل العيون عيونك
ثنيان ابتسم وهو ينادي : الترف
لفت الترف: سم
ثنيان: عطيني قهوه لا هنتي
الترف : ابشر
ام ثنيان حزتها كان ودها تكفخهم الاثنين
دلال: ابوي راح
ثنيان: اييه بيروح يتقهوى عند جارنا تعبان
ام ثنيان: قومي يا دلال بنمشي
ثنيان: جالسين يمه
ام ثنيان بغضب: اجلس بلحالك
طلعت واخذت دلال وشوق ولف ثنيان بضيق وهو ياخذ القهوه من الترف اللي جلست
ثنيان: هاه نوف وصلك المهر
نوف: وصصل ياخالي
ثنيان: الله يوفقك وانتي رهام قضيتي من اشغالك
رهام: يعني نركض فيها
ثنيان: الله يعين بيت ابوي اللي بيفضى
الترف : الله يعينا احنا بعد بنطفش
مشاعل: اي والله تعودنا نتجمع
رهام: ما بنروح اخر الدنيا بنجي ونتجمع
ثنيان وهو مبتسم : والله مدري بتجين ولا نصير نعطي عشان نشوفك عشرين الف
انقلب وجهه رهام احمر وانحرجت وضحك ثنيان ولف لترف : بكره اجهزي بنطلع بدري مع عجاج واحتمال يملك
الترف : قول والله
ثنيان: واللله
منيره: ليه وش فيه عجاج
ثنيان: ابد بيتزوج
الكل فرح لعجاج لكن محد قدر يفرح بصوت عالي خوفاً من ثنيان اللي حس بسكوتهم
رهام : يلا بنلحق على امي قبل تعصب
ثنيان: اجلسي بدري
رهام: لا احسن نروح حتى مشاعل ترتاح
منيره: يلا يا عيال نوم وراكم دوامات
محمد: يمه بنجلس مع الصغار
عمر: ايه تكفين ما لعبنا معهم
ثنيان: تعالوا معكم 10 دقايق وبعدها نوم
اخذ ثنيان البنات وهو جالس بالنص والتوأم قباله وعمر ومحمد جالسين جنبه والترف ومنيره على يمينه كان ثنيان فرحان بالبنات تقريبا نفس فرحة محمد وعمر
................••............
من بكره في قرية الترف تحديدا في بيت نوره
كانت الترف عندهم وهم يسمعون الرجال اللي كانوا يطلبون نوره من عمها
ابو الترف : وانت تدري يا مسفر ان نوره مثل بنتي وما اعطيها الا واحد كفو ويعلم الله ان عجاج كفو
مسفر : اكيد يا ابو الترف اكيد دام انك تشهد له اجل عطيناه والمعطي الله
ابتسم ثنيان لعجاج وعجاج ابتسم بفرحه مكسوره ان ابوه رافض يجي
قال مسفر: بس انت ابوك عايش
عجاج بضيق: ايه عايش بس مريض شوي
ابو الترف : واذا ماعندك مانع يملك اليوم
مسفر : ابد ما عندنا مانع لكن خلنا نشوف البنت وامها
ركضوا نوره وسلوى والترف وام نوره وجلسوا ودخل مسفر ينادي ام نوره ونوره اللي بغوا يترددون بس وافقوا
ضحكت الترف بفرح: الله يا زين عرستس سهالات يا نوره
ضحكت نوره بتوتر : والله خايفه
ام نوره : الله يكتب لتس الخير يا بنتي
دخلت ام عايض وهي تنادي: يا ام نوره
ام نوره راحت لها وكان هذا المتوقع ان الخبر ينتشر ان عجاج خطب نوره وبيملك عليها
.................••............
في المجلس
عند عجاج اللي ما صدق يوقع وتوقع البنت ويملكون وينتهون وقف وهم يسلم عليهم بفرح
وثنيان اللي يحس بالفخر انه مزوجهم
عجاج بهمس لثنيان : مايمديني اشوفها
ثنيان: جرب تقول عشان تموت قدام عرسك
عجاج: ما يمزحون والله
صالح : مبروك يا عجاج
عجاج: يبارك فيك وعقبالك
ضحك ثنيان: يا ويلك لو تسمعك سلوى
صالح: انا خارج المسؤوليه من الحين
عجاج : بما انهم خارشين صاالح وخارشين ثنيان اجل الله ينصرني
صالح: يعني تقدر تقول فيه خرشه شوي شوي لكن حنا الخوال نقدر على بعض الضايع ثنيان
ضحك ثنيان: انا والله مستسلم لكم
طلعوا متجهين لبيت ابو الترف بعد ما تغدوا عند اهل نوره وعجاج اللي توه يحس ان قلبه ارتبط بشي ما يقدر يخليه وراه كان شعور انه يفكر بأحد يبسطه رغم انه مايعرف عن نوره الا ضربة الصحن
اما عند البنات اللي كانوا في قمة فرحتهم ووقفت الترف لما قال صالح: يالترف ثنيان بيمشي يلا
طلعت الترف تركض لثنيان: تكفى ثنيان اصبر
ثنيان: وش فيتس وش اصبر له ملكنا وخلصنا وش نبي
الترف : ياخي الحين اهم فقره بيجون الحريم يباركون لنوره وامها
ثنيان: يباركون لنوره وامها انتي وش عليتس
الترف: تكفى يا ثنيان بتجي دويده وام شوشه وبتجي نوير وبتجي عبسه كلهم بيجون تكفى مابي افوت اللحظه
ثنيان ضحك : يابنتي انتي مالتس صاحب كلهم كارهتهم وكارهينتس وبعدين من عبسه جديده علي !؟
الترف: كذا الحياه شسوي وعبسه اعلمك سالفتها بعدين بس تكفى طلبتك
ثنيان ابتسم : ابك انتي تطلبين وتبشرين
الترف ضحكت وهي تدق كتفه: والله لو مافيه احد لا اخمك
ثنيان سحبها للبيت بسرعه وهو مبتسم: هذا حنا ماعندنا احد
ضاعت علوم الترف وارتبكت لكن اخيرا تشجعت وهي تحضن ثنيان بفرح وتركته وركضت لبيت نوره بخجل
كان هذا الحضن احسن مكافاه لثنيان اللي طلع هو مبتسم جلس جنب صالح
صالح: وين ما بتروح
ثنيان: بتتظر شوي
عجاج: اجل انا بروح انا وعيد
ثنيان ابتسم بهمس : ايه اركض وراك عرس
عجاج: ما كأنه بدري بعد اسبوعين
ثنيان: بعد زواج محمد بيوم بس
عجاج: واضح اني بنكرف
ثنيان وقف وهو يبعد بعجاج : قول تم
عجاج: وش عليه !
ثنيان: قول تم
عجاج: تم
ثنيان: شقتك هديه عرسك مني وطلاق ما تحلف
عجاج: ثنياااان
ثنيان: حلفت يا عجاج ياخي خلني اسوي شي انا صديقك الوحيد لا تصير نفسيه واوعدك بينا
عجاج : الله يهديك
ثنيان ابتسم : لو تبي عيوني يا عجه والله ما تغلى عليك
عجاج اللي مايحب العاطفه كثير ضحك بفرح: مابي عيونك تذبحني عليها الترف
ضحك ثنيان وهو يودعه راح عجاج ورجع ثنيان لصالح اللي ابتسم : من متى تعرف عجاج
ثنيان: اوووه سنين يعني قول من المتوسط 17 سنه تقريبا
صالح: حلو انك تحصل صديق معك بالخير والشر
ثنيان: هذا عجاج والله ، انت لك صديق مثله؟!
صالح: كنت اتمنى بس مع الاسف
ثنيان: انا متاكد ان اللي يعرفك يا صالح لازم يكون لك صاحب وافي
صالح ضحك: هذا انت تقوله لكن الناس تختلف
ثنيان: ليش تقول كذا !؟
صالح : واجد اللي يغدرون يا ثنيان
سكت ثنيان اللي حس ان صالح مكسور من ذا الموضوع ولهذا السبب كان ثنيان حريص انه يكون له صاحب واحد بس يسوى روحه ................••............
في بيت نوره
عند الترف وسلوى اللي كانو ينتظرون لحظه تاريخيه بالنسبه لهم واخيرا شرفوا الاعداء الموقرين جوا نوير وشلتها وهم مب جايين يباركون جاييين يدقون بالكلام
سلوى اللي اول ماشافتهم قربت وهي تقول بصوت عالي : بسم لله عليتس يا نواره الله يوفقتس وبيعد عنتس عين العانس والحسود
الترف : ايه اقري عليها الشياطين دخلت
ام نوره: سلوى الترف خلاص
نوير: والله ماندري وين الشياطين ، لكن شاطره والله عرفتي تلفين عقل الشايب وجيتي اخذتي نوروه معتس
نوره: اقول ابلعي لسانتس وضفي وجهتس كل ذي غيره يا نوير الدعله
سلوى : اتركيها يا حبيبتي خليها تخثردز من يلومها العنوسه قاتله
الترف : عاد موتس وحياتس تلقين مثل الشايب
سوير : ايييه الله ينصره ذا الشايب ولا وش لاقي بتس اكيد انتس ساحرته
ضحكت الترف ضحكه استفزازيه : ايه ساحرته لكن السحر الحلال اشكالتس انتي وهي مايعرفونه حدتس مع تيوس ابوتس
نوير: تروفوه احترمي نفستس لا ارنتس هنا
نوره: ترنين من يا الدعله اقول انقلعي من ذا البيت
ام نوره: بس انتي وياها ويلا كل وحده بيتها يلا
طلعوا نوير ودويده وعبسه وشلتهم وطلعت الترف وسلوى متجهين لبيتهم كان ثنيان وصالح جالسين بس فجاءه وقف ثنيان وركض طبعا ثنيان اللي سحب الترف وسلوى وراه وشهقت عبسه لما ضربت العصاء اللي معها بكتف ثنيان اللي كان المفروض تكون الضربه بكتف الترف
عبسه اللي كانت ناويه تكفخ الترف هي ودويده ومن سوء الحظ طلع بوجههم ثنيان اللي غمض لما حس بالضربه وفز صالح على صراخ الترف اللي مسكت ثنيان وهي تسب
وثنيان وخرها وهو مايبي احد يشوف انه تألم: اددخلي انتي وهي جوا
صالح : ثنيان ثنيان وش صار
الترف : ملعونه الصير عبسوووه
صالح: عبسووه وش تسوي هنا وشوله تطقه
سلوى: كانت تبي الترف بس طاحت بثنيان
صالح: هاذي مب في المدينه وش جابهاا
الترف: جايين لخالهم تخلخلت عظامها
صالح: ثنيان فيك شي
ثنيان: لا مافيني شي يلا امشي
الترف: وين امشي والله للعن خيرها
ثنيان بغضب وألم: اممممشي احسن لتس
صالح: امشي يلا
سلوى: روحي ماعليتس برويها شغلها
صالح: اقول اجلسي انتي بعد في بطنتس ولد
سلوى سكتت بغضب وثنيان اللي مشى والترف وراه اللي كانت حاقده على عبسوه (عبسه هاذي تكون مرزوقه فرع ديره الترف قششرا قشرررا ما احد يسلم منها وطبعا هي الترف وسلوى ونوره اعداء وهي طبعا من شلة نوير عاداوتها مع الترف اسطوريه لازم يصير مكافخ بينهم وطبعا عبسه ما يهمها احد ولا تفكر في احد مسترجله بالعربي وطبعا محد صدق انها ذلفت للمدينه لكن كان تسجيل رجوعها القوي انها ضربت ثنيان بدال الترف )
ركبوا كانت فعلا العصا قويه على ثنيان اللي احتدت ملامح الغضب وكان يحاول يرفع يده ويسوق بس وقف هو يحرك يده لكن لف لما فتحت الترف الباب ونزلت شافها طايره لوحده ومعاها حجره اخذتها من الارض وكفختها على الراس وهي تقول : مب انتي يا عبسوه اللي بتمدين يدتس جعلها الكسر
طبعا كانت النتيجه فقشه براس عبسه اللي ارتفع صوتها تصارخ بكل قوتها لكن طبيعي ان محد عطاها وجهه لان الكل متفقين ان عبسه دايما غلطانه
ثنيان اللي عصب زياده وهو يشوف الترف راجعه تحرك متجاهل الم كتفه وهو يهاوش : خييير ان شاءالله معاد تشوفين ان وراك رجال تمشين تكفخين وعلى كيفك انا ما قلت امشي وانت ساكته
الترف بنفس الصراخ: لا والله تبيني اسكت لها والله ما اسكت وكل الدنيا تدري ان عبسوه غلطانه
ثنيان: اقول اص .. هذا اللي بتجلسين عشانه مشاكل وقلة حيا خير ان شاء الله عايشين بمافيا وعند يهود
الترف لفت بضيق وثنيان اللي مستمر معصب ويصارخ وندم انه خلى الترف تجلس وهو على باله مكاجرة حريم مايدري ان الوضع جدي
................••............
في بيت ثنيان
عند مشاعل اللي كانت تداري بناتها ومنيره معاها رفعت راسها بهدوء : منيره مب زعلانه مني صح
منيره: ازعل ليش!!
مشاعل: عشان ما سميت بأسمك
منيره: لا يا مشاعل لا تقولين كذا لا زعلانه والله لا يجيب الزعل وبعدين مايفرق على الترف ولاعلي كلنا واحد
مشاعل ابتسمت: ايه هاذي منيره اللي اعرفها
ضحكت منيره بضيق: صح اني تغيرت شوي وغيرني الشيطان لكن الحمدلله افتكيت منه
مشاعل : صح الحمدلله لكن كلنا ندري ومتفقين ان الترف غيرت ثنيان للاحسن وهذا اكبر فضيله سوتها وغير كذا مافي يدينا نتحكم بقلب ثنيان دامه ما يقصر معنا
منيره: اي والله صدقتي يا مشاعل
سكتهم الدخول القوي للترف وثنيان اللي ما زال معصب والترف اللي ترد : خلاص ياخي ماصارت سالفه بعدين انت تدري ان هالمشاكل تافهه
ثنيان : لا والله تافهه انتي مهبوله !في عقلتس شي ؟؟ لو ماتت لو صار لها شي
الترف : ان شاء الله تموت ويبرد قلبي
ثنيان: اييييه ان شاءالله عشان بيديني هاذي اوديتس لساحة القصاص
منيره : لا اله الا الله وش فيكم
الترف : عصبيه على غير سنع وهو يدري السالفه تافهه
ثنيان: على غير سنع !!؟ انتي بتذبحيني كم مره علمتس عن هالعناد كم مره اقول اذا قلت كلمه ما تعدينها ولاتطيعين
تقدمت الترف وهي تحط يدها على كتفه اللي انضرب فيها وتتحسسه وهي للحين تعاند : انا قلت لك دام ما احد غلط علي مانييب قايله شي وبعدين اترك ذا كله وشوف كتفك
ثنيان اللي كان نزل شوي لها عشان تطول كتفه وتشوف وضعه لايكون مفكوك او مكسور او فيه شي ولللحين يهاوش : الحين صار كتفي يهم كله من سببتس
منيره ومشاعل مستغربين مايدرون وش يصنفون اللي قدامهم هوشه ولا اهتمام ولا خوف على بعض
لما شافت منيره ان مافيه مجال مع عنادهم ابتسمت وجلست جنب مشاعل للي كانت تضحك هي بعد
الترف: مافيها شي كتفك ؟ ليه تعورك
ثنيان: كل شي يعورني منتس
سكتت الترف وهي تناظره بغضب وطلعت ولحقها وهو للحين مصر يعرف سالفة ذي عبسووه
دخل: تعالي هنا وش سالفه ذا الجنيه
قربت الترف وهي تساعده ينزل ثوبه ونزلت فنيلته وهي تشوف كتفه مورهم جابت الثلج ورجعت وهي تقول بنفس نبرة العناد والغضب : ابد سلقة ماتستحي على وجهها مأذيه الكل لا صغير ولا كبير ودايماً هوايشها مع الناس ومن ضمن اعداءها انا وعشان كذا كانت بتضربني وجت في كتفك
ثنيان: حسبي لله بس انا مدري وش خليتوا لرجال
الترف وهي تكمد بقوه: ماني بحاجه رجال انا اخذ حقي
ثنيان لف عليها: والله
الترف بعناد: ايه ليه عندك مانع
ثنيان اللي ماكان يدري وش يسوي بها لو واحد غيرها والله ليكفخه من اول لحظه انه ماسمع كلامه وهاذي فوق غلطها تراد وتعاند مسك يدها وهو يبعد الثلج منها ابتسم : عجيب لو امسكتس الحين واكفختس وش بتسوين
الترف وهي تناظره بنفس الابتسامه : تقدر تجرب
ضحك ثنيان وهو يقربها بخقة الدنيا على هالشخصيه المتمرده القويه وكأنها تتحداه يحبها اكثر كان المفروض ثنيان يجرب انه يكفخها ويشوف ردة فعلها بس بالحقيقه انقلب التكفيخ لثورة حب عظيمه كلهم خسرانين فيها عنادهم اللي اختلط بحب عظيم تتبادله قلوبهم ماكان لثنيان قوه على الترف ابد كانت قوته بحبه اللي يطغى على كل شي وياخذهم من الدنيا عشان يكونون مع بعض وبس .... ...🌚 .
.................••............
في ديرة الترف
نتيجه هذا التصادم القوي كان صالح بطبيعة الحال يستجوب سلوى اللي لفت بضيق: ياخي خلاص مشكله وانتهت وانت تعرف ذا الجنيه
صالح: عشاني اعرفها اقولتس وخري عنها يا سلوى يا سلوى افهميني انتي في بطنتس طفل وش بتقولين له بكره بتقولين والله كنت اكفخ انا وعمتك حريم الحاره
سلوى: ايه عشان يعرف ان امه كفو
صالح : ماااش ما ينفع فيتس انتي وهي الا التكفيخ بس من الحين اقولتس ان سويتي شي بدون علمي وان صار بولدي شي يا سلوى مانيب محللتس
سلوى لفت تناظره بأستغراب وش ذا اللهجه الغريبه ! لكن هالوضع الجديد عن صالح طلع من قلة حيلته عجز يضبطها هي والترف مافيه اي حل الا انه يخوفها واذا خافت سلوى بتخاف الترف معها ويهجدون
سلوى: ليش تقول كذا وش صاير
صالح: ما صاير شي بس انتي المسؤوله اذا صار
راح وتركها وفعلا نجحت خطته وجلست سلوى بتردد وخوف .................••............
وفي لمحة البصر مرت اسبوعين وكانت طول هالاسبوعيين والكل مشغول الكل بدون استثناء
نبتدي من بيت ابو ثنيان اللي كانوا العرايس فيه نوف ورهام وهم يعايشون افضل الايام وبفرح وطبعاً دلال اللي كانت معهم وشايله همهم ومن جهه ثانيه شايله هم شوق اللي قررت انها تستغل الفلوس اللي حصلت عليها وتسوي لها مشروع تشغل نفسها فييه طبعا بعد موافقة وتدقيق ثنيان اللي صار مسؤول بشكل رسمي وجدي عن شوق
اما ام ثنيان اللي رغم كل الضغوط و الاانشغالات ما زالت مستقعده لترف وثنيان
اما ثريا مالها اي اثر في زواج محمد الا انها مجرد اخت بس
لكن فجر اللي بقدر استطاعتها كانت تساعد الكل
و امل ما كانت لها حيله مع سيف الا انها تطيعه فرصه عشانها وعشان ولدها وخصوصا ان سيف صاير عدواني معاها
ومن بيت ابو ثنيان للبيت ابو محمد للي على كثر ماكان محمد مضغوط ومشغول ما تخلى عن ابوه كان كل فتره يرجع يشوف ويطمن عليه
ومن بيت محمد لبيت ثنيان اللي كان متقسم منيره اللي كانت منشغله كلياً بزواج محمد ماهي ابد مع العالم حتى حمود الصغير كان من ضمن مسؤوليات الترف
اما الترف كانت ما بين مشاعل والعيال والبيت وثنيان ومن بعدهم فرحتها بنوره
اما مشاعل اللي بالقوه كانت بتحضر زواج رهام وهي مكروووفه من التوأم
لكن ثنيان اللي كان يكرف كرف عالمي ما بين دوام ومساعده عجاج ومحمد ومنصور وطبعا عناد الترف
ومن ذا البيت لبييت نوره اللي كانت هي وسلوى مشغوليييين يرتبون لزواجها رغم اتعاب سلوى الا انها معاها وطبعا الترف اللي تمر وا بين فتره وثانيه
................••............
يوم زواج محمد ورهام اليوم منتظر للكل
عند رهام اللي كانت متجهه للصالون عشان تجهز وطبعا معاها الكل
نواف اللي كان على قد ما هو فرحان رايح جاي فيهم ومسوي زحمه بالشارع ويدق بوري وازعاج وغير اغانيه اللي تبلغ الكل ان في ذا السياره عروس ................••............
في بيت ثنيان
ثنيان اللي كان يفطر وهو واقف
ام مشاعل: ثنيان يا ولدي اجلس مب زين تاكل واقف
ثنيان: معليش يا عمه مستعجل ومابي اطلع جوعان
الترف اللي جات من المطبخ وهي معاها بلاستيكات حاطها فيها فطور لثنيان : وانت واقف مابتستفيد شي خذ هذا افطر فيه وانت رايح
مشاعل: ايه احسن
ثنيان: اي والله احسن
محمد : يبه بنروح معك
ثنيان: وين اخذكم يا ابوي انا رايح لشغل شوي ارجع لكم
لف على مشاعل والترف : خلوكم جاهزين بدري
مشاعل: الحين بيجون الصالون ونخلص
ثنيان زين
طلع ثنيان متجهه لمحمد ويساعده
................••............
في بيت ابو محمد
عند محمد اللي بعد ما اعطى ابوه الادويه هو ومنيره طلعت لصالون مع ثريا وفجر ومحمد طلع للعيال اللي برا وكلهم ينتظرونه
ثنيان : هاااه مستعد العريس
نواف : اشوف دقيقه ايه ايه مستعد
عجاج : وجهه اصفر ، انت هيييه بنزوجك ما بنوديك حرب اضبط نفسك
سيف : محمد عمي وش بتسوي فيه
محمد : ايه يا سيف هاذي مهمتك ابيك تاخذ ابوي عند عمي لين ننتهي
سيف : زين اجل
دخل سيف ومحمد وهم ياخذون ابو محمد عند ابو ثنيان والعيال اللي بعدها انطلقوا يشيكون على اخر امور العريس
.................••............
المغرب في بيت ثنيان
رجع ثنيان بعد ماحلق وترتب دخل وهو يشوف ام مشاعل اللي جاهزه وجالسه والبنات معاها ابتسم وهو يبوس راسها: تعبناك والله يا عمه
ام مشاعل: مافيه تعب يا ولدي
عمر اللي جاء : يبه خلصت انا
محمد: وانا بعد
ثنيان : اجل خلوكم هنا لا تروحون لمكان بنمشي الحين
طلع ثنيان وهو ينادي : مشاعل مشاعل وينك
مشاعل : هنا
دخل ثنيان وابتسم على مشاعل الكاشخه : الله الله
مشاعل ابتسمت : كيف شكلي
ثنيان : عال العال الله لا يضرك
مشاعل : اجل خلني انزل لامي تعبوها البنات
ثنيان: الترف وينها
مشاعل: توها قضت وراحت تلبس
ثنيان: يلا اجهزوا على ما اناديها
طلع ثنيان لغرفه الترف فتح الباب ودخل وهو يسكره: الترف وينتس الناس كلهم قضوا الا انتي
الترف اللي طلعت بعد ما لبست وهو تبخر نفسها : خلاص قضيت
ثنيان اللي لبس ثوبه ولف وشماغه باقي بيده لكن طاح منه لما انبهر وطارت عيونه وهو يناظر الترف اللي كانت تثبت مقوله ‏"خلقَ الجمالُ على الجميلةِ أسمرا" و نُقطة
الترف ابتسمت: ثنيان وش فيك اكلمك
ثنيان اللي ما سمع من كلامها شي وتنحنح وهو ينزل لاشماغه و ياخذه حطه على كتفه ببتسامه : وش قلتي !
الترف : اقول انتظر لين تتبخر
ثنيان اخذ نفس وهو يقول بنفسه( يا ويلك يا ثنيان ويلاه ) تقدم : ما ودك تاخذين رايي في شكلتس
الترف اللي كانت اول مره تتصلح بذا الطريقه دايماً كانت بسيطه لكن هالمره ما كانت مثل كل مره
ضحكت الترف : هذا همك ، ابشر وش رايك فيني
ثنيان ضحك :وش ذا الغرور اللي يخليتس ما تسأليني الا لين اقول
الترف : مب غرور بس انا ما تعودت اسأل احد اخلص وامشي
ثنيان: بس ماعاد انتي بلحالتس
الترف ضحكت : زين بكره بجهز خطوه بخطوه قدام عيونك وش تبي بعد
ثنيان : آآآخ يا قلبي بس آخ يلا يلا بنطلع
الترف : اصبر ما خلصنا
ثنيان جلس : وش باقي بعد ، الله يستر على الناس اللي بتروحين لهم كذا بس
الترف : اتركني انا الحين بننشغل فيك
قربت وهي تسحب شماغه من كتفه وهي تلبسه اخذت العقال و توزنه عليه وجابت المبخر وهي تبخره وثنيان في قمة استسلامه الا كان منسحر انتهت لما حطت له العطر ووقف ثنيان يبوس راسها
دخل عمر : يبه يلا بنروح
ثنيان ابتعد بسرعه وهو ياخذ بشته : يلا انزل بأجيك
اخذت الترف عبايتها ولبست :ثنيان
لف ثنيان اللي كان يشتت نظره عنها بس رجعه صوتها : لبيه
الترف : بطلبك
ثنيان عرف نيتها : ابشري يالترف ابشري
الترف : لا ثاني بعد
ثنيان: وشو
الترف : انت الحين وافقت اني اروح الديره لكن انت تعال بعد
ثنيان ابتسم : ودي بس مضطر اني اجلس مع عجاج
الترف : اجلس انت وياه وفلوها بس ارجع ونام عندنا
ثنيان : اصلا كأني بغير رايي
الترف: لييه !
ثنيان : شوي اقولتس يلا تاخرنا
نزلوا وهم يطلعون للقاعه
................••............
في الصالون
وعند رهام اللي كانت تناظر شكلها برضى وماهي مصدقه ان خلاص اليييوم بتجتمع مع محمد
دخلت نوف وهي تصفر: يا شيخه يا عذابه محمد
رهام ابتسمت: كيف شكلي
نوف : تشلعين القلب
امل دخلت: ماشاء الله تبارك الله عليك
فجر : انا اتوقع ان خالي بيسحب علينا كلنا
منيره : حتى انه سحب من الحين ادق عليه ما يرد
ضحكت نوف وهي تسحب جوال رهام : دقي من هنا يمكن يرد
رهام: نوووف
اخذت نوف الجوال ودقت ولا مرت ثانيه الا رد محمد : هلا الله
منيره:هلابك
محمد: منيره
منيره: محمد
محمد:ليه داقه من هنا !؟
منيره : عشان ترد
محمد: والله ما انتبهت
منيره راحت وهي تقوله وش اللي تبيه
.................••............
في قاعة الرجال
عند العيال اللي كانوا يستقبلون وكلهم كاشخين
عجاج جاء لثنيان: وصلوا
ثنيان : دخلهم دخلهم وقلطهم وقهوهم ننتظر تخلص صلاة العشاء
نواف جاء : عجاج الله على جوك
عجاج ضحك: ما كان ودي اخاطر وانا بالقوه عدلت العلاقه مع ابوك بس ثنيان اصر
نواف : لا ما عليك احسن
ثنيان: يلا يلا المعرس وصل
دخل محمد والكل بأستقباله بالعود والقهوه والكل يسلم عليه بعد تعب وقف محمد جنب ثنيان : ما بغينا نخلص السلام تعبت من كثر ما حبيت
ثنيان بهمس وهو مبتسم : درب عمرك على الحب وراك شغل
محمد ضحك: والله انك قذر
عجاج : لاااا اصبر ما شفت شي لي الجنه انا
محمد : هههههههههههههه ما علينا جبت الفرقه
عجاج: حتى انهم وصلوا
محمد: بنفلها اليييوم
نواف : ابك ايه تكفون
ودخلوا بحالة استقبال ضيوف لما وصل الدور لفرقه السامري اللي بطبيعة الحال لهم حضور قوي
اتجه ثنيان ببتسامه لابوه وهو يطلبه يرقص معهم وطاعه ابوه ودخل معهم بالسامري
نواف : الله يا يبه اثاريك مب هيين
محمد ضحك: مخبي ذا الرقص علينا
ثنيان: اجل ما الومي اطلع احب الرقص
عجاج : كسسسسسر علييييكم
ابو ثنيان فعلا غطى عليهم والكل دخل معه جوا والكل مستانس .................••............
وطبعا في قسم الحريم الكل وصلوا وكلهم مع منيره
وطبعا كل الانظار على الترف لكن ما اهتمت وهي مكتسحه الاجواء
وطبعا الجو يكمل بالرقص اللي يحبه قلبهم وبنفس الموال ونعيد ونكرر
جملة البدايه ( كل ال محمد خياله ) وناهيتكم عن هجوم (😂الخيول الجامحه )
استمر العرس على هالرتم العالي ما بين سامري الرجال وطق الحريييم .................••............
اخر فقره بالعرس كانت الزفه دخل ابو ثنيان وثنيان وسيف ونواف ومحمد
محمد اللي ماشاف رهام ابد ودخل القاعه بزفه له ما بين خواته ثريا ومنيره
ومن الاطلاله تقدموا ابو ثنيان وعياله يسلمون على رهام بحب لكن المؤثر دموع ابو ثنيان الي عمره ما يتخيل بيته بدون رهام
ثنيان تقدم وهو يبعد ابوه وهو فيه غصه بعد تقدم وهو يحتضن رهام اللي بكت هي بعد بالقووه سكتوها ونزلوا على الزفه ومحمد بإنتظارهم
كان قلب محمد يدق وكأن زفة رهام تدق على قلبه كان مب قادر يناظر اي شي غيرها
نزلت رهام متوسطه ابوها واخوانها وتقدم ابو ثنيان وهو يحط يدها بيد محمد اللي باس راسه وقال: محمد ما يحتاج اوصيك
محمد : والله انها بعيوني
رجعوا للكوشه ورهام اللي دموعها اربع اربع همس محمد : تكفين لا تبكين يا رهام كل شي الا دموعك
انقطعت دموع رهام بإرتباك وجات ام ثنيان اللي تقدمت تسلم عليها
كان ثنيان بعيونه يدور على الترف اللي كانت واضحه ابتسم على صوت المطربه اللي بدت تغني لهم وبدت فقرة اهل العروس االلي كانوا يرقصون مع رهام ومن سوء الحظ ان كان الجو هنا بعد سامري اللي كان المفروض من ثنيان الضابط يكون عاقل بس ما تماسك هو ونواف ونزلوا رقص وسيف اللي ناقدهم بقوه
الترف اللي كانت متحمسه وهي تصفق كان فعلا يعجبها رقص ثنيان
ابو ثنيان نزل مع نواف لرقص وثنيان اللي كان يرقص مع امه عطى ثنيان نواف ومحمد وسيف ظهره وهو يرقص لمنيره ومشاعل والترف ودلال وكل اهله وطبعا تفاعلوا معاه
محمد اللي كان يحس باجواء الوناسه بس عقله وعيونه مع رهام
كان وده ثنيان يرقص مع الترف بس وجود العيال كان عائق وقرر يرقص مع الكل وهو مايبي منهم الا الترف مشاعل حاولت شوي تجامل بس ما قدرت وجلست من العمليه ومنيره راحت لمحمد
ونواف وسيف استحوا وطلعوا وابو ثنيان طلع لرجال
وهنا فضى الجو بما ان محمد مشغول مع منيره ومعطي جهة الحريم ظهره دخلت الترف مع ثنيان وسحبت نوف معاها لكن ما استمرت نوف اللي حست انها بينهم مالها داعي خصوصا كل الانظار على الترف اللي كانت ترقص بعبايتها وثنيان ببشته كان ثنيان مسيطر على نفسه لين دخلت معه وبعدها طاار معها وارتفع الصراخ بالقاعه والكل انشغل عن محمد بما فيهم منيره اللي لفت تناظر وشو ذا الصراخ ما كانت تشوف الا قفى ثنيان بس لكن عرفت ان الترف قدامه طالما انها ما تنشاف
في ذا اللحظه حس ثنيان ان الصوت ارتفع ومحمد انتبه قرب وهو يهمس لترف : خلاص هدي يا خاله تعبتيني
ضحكت الترف وهو تمسك ذراعه عشان تثبت وجلست ومد ثنيان لها المويه اللي معاه
ولف طاحت عينه على منيره وتقدم وهو يهمس لنوف : انقزي للمطربه خليها تغني شي يناسب منيره
ركضت نوف وشوي وبدت المطربه وتقدم ثنيان لمنيره اللي كانت فرحتها انه قومها قدام الكل كبيره
طبعا ما قصر ثنيان مع منيره وكان الجمهور عالي وبعدها استاذن ثنيان وطلع
.
.
انتهى البارت✨