المغرورة و الأعمى

بارت الثامن والعشرون

ود... يلا نروح لأن حجزت يم الدكتورة الحد منوصل البنات يم عمتي يجي دورنا

ايلول .. وصلنا البنات وطلعنة للدكتورة 

دخلنا للعيادة جان اكو مراجعات قبلي بقينا ننتظر دورنا

صاحت السكرتيرة اسمي دخلنا اني وود
وثنينا جان وجهنا ميتفسر من الخوف

الدكتورة تعرفني وتعرف ود لأن دائما نراجع عدها
شرحتلها حالتي فحصتني كتبتلي على كومة تحاليل وسونار

أخذت التحاليل وطلعت رحت اول شي سويت سونار

دكتورة السونار ... عندج كيس حمل

أيلول... اني و ود بقينا  وحدة تباوع بوجه الثانية

لا دكتورة انتي اكيد غلطانة اني صارلي سنوات ميصير عندي وهسه جاية اريد اعرف الورم البصدري شنو

الدكتورة.. هذا مو ورم هاي تغيرات بسبب الحمل

أيلول... بقيت اناقشها وممصدكة كلامها
اخير شي ضاجت مني

الدكتورة ... يا ماما داكولج هذا واضح يمي كيس حمل شنو دتعلميني بشغلي واذا بعدج ممتأكدة روحي سوي تحليل دم

رحت بسرعة للمختبر سويت تحليل وبقينا اني و ود كاعدات على نار ننتظر

طلعت النتيجة اني انربط لساني مكدرت اسئل عن النتيجة ود سئلت

طلعت النتيجة ايجابية يعني حامل

أيلول.. عمري مبجيت  كدام احد غريب بس من كالت حامل حضنت ود وصرت ابجي بصوت وشهكة الناس كلها بقت تباوع عليه
ود جانت تبجي وياي

من فرحتي حتى نسيت ارجع للدكتورة أخذت نتيجة التحليل ورجعت البيت ود

جنت كل شوية المس بطني وابجي  رحت للدكتورة واني خايفة ويأسه رجعت واني ابجي من الفرح سبحانك ياربي اشكد كريم

ود... شنو رايج نخابر اهلي انفرحهم

ايلول.. لا لا خليها من اروح اني ابشرهم واشوف فرحتهم بعيني خصوصا ماما

ود.. زين وإياس شوكت تكوليلة

أيلول... جريت حسرة طويلة هو وينة إياس من يوم الطلعت من البيت مكلف نفسة يدزلي لو مسج

ود... مو كتلج زعلان ومأخذ على خاطرة منج

أيلول... هو منو الأزم يزعل اني لو هو منو انهان وانجرحت كرامتة اني لو هو 

ود.. حقج بس هو هم خطية معندة حظ ويا اهلة وثق باخوة بس اخو للاسف محفظ السر

وهسه بعد راح يصير بينكم طفل لأزم تتنازلين شوية وتنسين الصار

أيلول.. اني جنت فعلا اريد ابتعد عنه بس بعد ما أكدر  الخاطر البطني واني اعرف إياس هم جان ينتظر هذا الطفل بفارغ الصبر بس مجان يحجي شي كدامي حتى لا انقهر