كروموسـوم💜(منقووووله )

4

#كروموسـوم 💙
الحلقة 4
واقعـية
الكاتبة : MeMe Ali

وقف عمـر وقال : يتقعدو انتو تنقو فوق راسي ، نركب ارجلي
نادت عليه امـه لكن ما ردش وركب ..
فات اليوم وثاني يوم طلعت اسيل وايوب وعمر للسوق حتى يشرو بعض النواقص
كان ايوب بيطير من الفرحة لأنه عارف ان السوق مكان الحلوة والتشبيس والدلع كله
نزلو ، خدي عمـر كروصة وخش ومعاه أسيـل وفي ايدها ايوب كالعادة وهما يهدرزو وجوهم حلـو
عمـر : ترا تأكدي يتعاملو بالبطاقـة ؟
اسيل : ايه مكتوب البرا
عمر : نبيش نعاود عملة السنة يلي فاتت
اسيل ضحكت : مقلب هديكا هههههه سلة معبية رديناها اخي منظرنا
عمر : تي عادي تحدث في ارقـى العائلات
اسيل ضحكت : ههههههه ايوب حبيبي امشي ما تقعدش تتفرج ع كل حاجة
خشو من قسم الحلو ، لقسم اغذية الفطور لقسم المنظفات يلي طلعو منه بصعوبة بسبب ايوب يلي عيو وهما يقنعو فيه ان كُرات المعطر الملونات صابون مش حلوى !
وقفو في طابور الكاصة ، مكانش طويل هلبا ، رن هاتف عمر ، طلع هاتفه وشاف المتصل انه زميله في الخدمة يلي يرغي هلبا ، مد لـ اسيل البطاقة وقاللها : عندي مكالمة كان عطلت وجي فيك الدور خلصي
اسيل : تمام !
رد عمر وباعد شوية ، وماهي الا ثواني حتى وقفت مـرا ومعاها بنتها يلي حاملة حلوة مصاصة مسكرة في ايدها
شاف ايوب للبنت بالرغم انه شاد في ايد امه ، مد ايده الثانية وخدي الحلوة من ايد البنت يلي ناضت تعيط بصوت عـالي
ما تلفتتش اسيل لان مكانش في بالها ان ولدها سبب بكي البنت
لن حست بـ صبع نخصها بـ عنف ف تلفتت وقالتلها المرا بإنزعاج : ولدك خدي حلوة بنتي يا ابلة راه
شافت اسيل لـ ايوب يلي دس الحلوة في جيبه وهز بالنفي
طبست وهي تحاول اطلع الحلوة من ايده المركونة في الجيب وهي تقوله : اطلقها ماما هاتها اهو شريتلك وحدة ثانية حبيبي هاتها عيب امتع البنت
المرا بإنزعاج ونفاذ صبر وبنتها تعيط ع طول حسها : اني مش عارفة علاش يلي عندها عيل ماغولي اطلع فيه معاها
وهني اسيل انصدمت ووقفت وقالت : نـعم ؟
المرا بغضب : ولدك مريض ما تمرضيش عباد ربي معاك واطلعيه !
اسيل بإنزعاج : ولدي المريـض اقرب لـ ربي منك ومن بنتك الطبيعية ، وبنطلعه وين ما نمشي اني حـرة وماليكش علاقة بيه
المرا بإنفعال : ماليااش علاقـة بييه ؟؟ اماله ربيه كويس يا ماما ولدك ايده واخده ع الخنبة الباين ، فوق ما انه ماغولي ومنظره يخوف وزيادة خناب ومش متربي
انصدمت اسيل وتجمعو الدموع في عيونها من وقاحتها ، وهني تلفتو الناس يلي واقفين في الطوابير وشافولها متاعين الكاصة بإنزعاج
وناض شيباني من الطابور التاني قاللها : عيب الكلام يلي تقولي فيه يابنتي هذا خلق ربي
وحدة ثانية واقفة وراها قالتلها : حرام راه
خدت اسيل الحلوة من ايد ولدها ورمتها في سلة المرا ودموعها يلمعو وسيبت للناس الرد ع الموقف ، 
بسرعان ما وصل فيها الدور شاف الشاب امتع الكاصة لـ ايوب ومدله شكلاتة وشاف للحزن يلي في عيونها وقاللها : مدوريش ربي يحفظه !
ابتسم اسيل وضغطت ع ايد ولدها وقالت : قول لـ عمو شكراً
شافله ايوب وقال ببراءة : شكراً عمو
كملت تخلصها وجي عمر ولاحـظ وجهه وملامحها المنزعجة وسألها وهو مطلع الاكياس في ايده
اسيل حكتله الموقف فـ وقف وشافلها : وينها ؟
اسيل : فوتها بينها وبين ربها
روحو للحوش ، فات اليوم
ثاني يـوم ناضت اسيل ع صوت طقطقة البـاب بقوة
ناضت وخشت للحمام وطلعت فتحت الباب ولقتها عزوزتها وقالت : صباح الخير
عزوزتها بإنزعاج : صبح شنو يا ماما الساعة 12 توا !
اسيل مسحت ع وجهها : انشالله خير ؟
عزوزتها : انزلي ضمي الحوش عندي عزومة غدي بنت خالتي مفيدة وبناتها جايين
اسيل : شن المناسبة ؟
عزوزتها : مافيش مناسبة ، هي كان بتنزلي سلفتك تتوحم حتى هي بنقوللها تنزل تتغذا معانا !
اسيل : باه نفطر ونجي
عزوزتها : ما تعطليش
ونزلت وسكرت اسيل الباب وهي اتمتم لنفسها " كل ما تشوف خليقتي لازم تفكرني بسلفتي يلي تتوحم باه فهمنا انها حامل خلاص "
خشت لدارها شافت الساعة يلي كانت تأشر ع الـ 10:30 وقالت لنفسها " المبالغة "
وفطرت ع السريع ونزلت بـ ولدها يلي ما تقدرش تخليه بروحه في الحوش
وزي الفرارة وهي ادور من دار لدار ، من حمام لحمام ، للجنان ، لكل شي وخلال ساعتين كان الحوش زي الشمامة
خشت للمطبخ غسل يديها ولقت عزوزتها تقرض في اللحم : بنديرو كسكسي وعصبان وطاجين
اسيل : عمتي امتى بنلحقو انديروه هذا كله الساعة طناش ونص !
عزوزتها : كانك تسكتي وتبدي ، نلحقو !
وفعلاً هكي صـار ، ساعة ونص وكان كل شي جاهز ، فتحت اسيل  كسكاس العصبان وشافاته وقالت : هذا طايب خلاص
وطفت عليه وقالت : خلاص عمتي بنركب ندوش ونبدل حوايجي ونجـي !
عزوزتها : ما تعطليش
وهي طالعة قالتلها عزوزتها : اتصلي بـ عمر يجي يتغذا معانا
اسيل وقفت وتلفتتلها : محمود خوهم بيجيبهم وله ؟
عزوزتها : لالا بتجيبهم بنتها الكبيرة تسوق !
اسيل : معناها مع مني بيتغذا هو حتى عـلي مش قاعد
عزوزتها : يتغذا معانا من البراني
اسيل : بيتغذا مع بنات بنت خالتك ؟ بعيدة !
عزوزتها : متربيين مع بعض وواخذين ع بعض كان ما تبيش تتصلي بيه تو نكلمه اني
اسيل : لالا خلاص
ركبت اسيل ودوشت واتصلت بعمر وقعمزت تحط في لمسات الميكب الخفيف ، وماكملت حتى سمعت صوت الباب يشرين
نزلت وفتحت الباب للأخوات التلاته ، سلمت ع مفيدة وبنتها كريمة الكبيرة والمتزوجة وبعدها ريـان ومن بعدها رهـف الصغيرة
سكرت الباب وراهم وخشو هما
خشت اسيل للمطبخ حتى تجهز الضيافة ، خشلها عمر من باب المطبخ الخارجي امتع الجنان وقاللها : مانبيش نقعمز معاهم حطيلي بروحي
اسيل شافتله : وامك ؟
عمر : فوتيها !
سمعو صوت باب المطبخ انفتح وريان خاشة وتقول : نعاونك في حاجة اسيل ؟
وماخشت للمطبخ الواسع حتى لقت عمر واقف فـ سلمت عليه بإيدها وهي تقول : اهلين عمر كيف حالك شن الاخبار
عمر : الحمدالله كيف حالك انتِ ؟
وطلق ايدها
ريان ابتسمت : الحمدالله ! تفكرتني ؟
عمر : رهف وله ؟
ريان : لالا ريـان !
عمـر : قاعد نتخبط فيكم تشبهو بعضكم
ريان ضحكت : هههههه صح اي
وأسيل واقفة بيناتهم وتشوف كل مرة للشخص يلي يتكلم
ريان : تتفكر فيها زمان كنت نجي مع امك وتلاعب فيا
عمر عقد حواجبه : شن نلاعب فيك اني حكم نديدك ؟
ريان رفعت حواجبها وقالت : لالا اني اصغر منك بـ اربعة سنين خيرك ! انت عمرك قداش توا ؟
عمر : 30 !
ريان : ايه واني 26 ! كريمة نديدك
عمر : يمكن ايه نسيت !
ولما لاحظ الانزعاج واضح ع وجهه أسيل وهي تجهز في صفرة العصير حب يوزع ريان وقاللها : باهي اماله اني طالع توا
ريان : تعالى خش سلم علي ماما وخواتي ، مافيش حـد براني
عمر يحاول يتهرب : عندي وليد صاحبي يراجي فيا قدام الباب مانقدرش نعطل عليه
ريان بإلحاح : اوك سلم واطلع مش ح تاخذ منك دقيقتين
طلع عمر وراه ريان واسيل تشبحلهم بإنزعاج ، قامت الصفرة وطلعتها
سلم ع العيلة وطلع
نزلت منى بصغارها وهما لابسيت ومتكمين
وبعد ما سلمو ع منى وصغارها
تلفتت كريمة لـ اسيل وقالت : حقا وين ولدك ؟
اسيل : يتفرج ع التلفزيون الفوق
ريان : ناديلنا عليه خلي نسلمو عليه ونشوفوه
تلفتت اسيل لـ قيس وقالت : حبيبي قيس تلقا باب الشقة مزين ، خش وقول لـ ايوب انزل تبيك ماما
ركب قيس يجري حتى ينادي ع ولد عمه ونزل هو وياه
خش قيس ومن ثم وراه ايوب الخجول من الدوشة والاصوات الغريبة يلي سكتو كلهم لما خش هو
اتجه لـ امه وقعمز جنبها فـ قالتله : نوض سلم عيب
ناض سلم بإيد باردة زي برود ملامحهم لما شافوه ورجع قعمز
كريمة بتردد : منساحباش ماغولي !
اسيل بإنزعاج : متلازمة داون !
ريان : معاش جبتي بعده ؟
اسيل : لالا ربي ما رزقش
رهف : ربي يرزقك انشالله
اسيل : أمـين يارب
رهف ابتسمت لما جت عينها في عينه وقالت : اول مرة نشوف متلازمة داون شكله حـلو !
اسيل ابتسمت ومسحت ع شعره وقالت : متلازمة داون كلهم شكلهم حلو غر احني نشوفو فيهم بعيونا مش بقلوبنا ❤️ 
وناضت حطتلهم الغدي ، سألو ع عمر ف قالتلهم انه متغذي مع صاحبه
فات اليوم وروحو
ركبت لعمر وهي متعبة من الوقوف والتظييف وغسل المعين وارمت ع السرير بقفطانها امتع الاستقبال
شافلها عمر : عطيك الصحة
اسيل قعمزت وقالت بعتاب : عجبك الجو مع الانسة ريان الباين ؟
عمـر : هي عشش
أسيل : عشش وانت تاخد وتعطي معاها وتساير فيها ؟
عمر ابتسم : غيرتي عليا  ؟
اسيل بإنزعاج  : لا لكن ما يجيش هكي تسلم وهي خاشة من غير وشاح وطالقتلي شعرها شن جايينها خطابة
وسكتت لما شافت اشعار هاتفها برسالة من مركز الكورس يلي بشروها بنجاحها ودخولها ع السمستر الرابع طول !
ابتسمت وقالت : بيدخلوني ع الرابع
ابتسم عمر ع تصرفاتها الطفولية ، لـ لحظة كانت تعاتب وجوها متعكر ، كيف لـ رسالة بسيطة ترسم البسمة ع ثغرها
عمر : الف مبروك ، امتى تبدي ؟
أسيل شافت لهاتفها : مكتوب يوم السبت ، يعني بعد غدوا ! واخيـراً
عمر : باهي مبروك
ومـر اليوم ، تاني يوم مع جو العشيات نزلت أسيل لكن بدون ولدها يلي خلاته يلعب في داره
لقت مـنى وصغارها كالعادة مقعمزة وتهدرز مع عزوزتها
قعمزت أسيـل معاهم ، ف شافتلها عزوزتها وقالت : يوم الاحد عندكم عرس عبير جارتنا
اسيل : في الصالة ؟
عزوزتها : إيه ! ومدابيك ما ترفعيش ولدك معاك مش ناقصين احراجات مع الناس
اسيل : مانيش ماشية اصلاً
عزوزتها : وعلاش ؟
اسيل : عندي قراية !
عزوزتها ضحكت بإستهزاء وقالت : قراية شنو العفو ؟
أسيل بـ جدية : عُمـر سجلني في كورس معتمد امتع لُغات ، ويوم السبت اول يـوم ، ماعنديش نية نغيب من ثاني يوم
عزوزتها زالت ابتسامتها وقالت : بالفلوس ؟
أسيل : إيه 
عزوزتها بإنزعاج : بكم ؟
اسيل : ما نعرفش يمكن السيمستر بـ أربعمية
عزوزتها تلفتت لـ جهة منى وقالت : هذا فاش فالحة كان في سلان الفلوس
اسيل ابتسمت بثقة : هو يلي سجلني اني ما طلبتش منه !
عزوزتها شافتلها : راك تنوضي تاخدي حب رشاد ع عمرك وانتِ هذا فاش فالحة طول اللسان وقلة الحسان
أسيـل : مانبيش ناخد حب رشاد وكان ربي رزقني اللهم بارك وكان ما رزقنيش ايوب سادني !
شافت العزوز لـ منى وقالت : ريتي ريتي
اسيل كذلك شافت لـ منى وقالت : شن صاير فيك حقا وفي صيانتكم ؟
منى : اهو قريب نكملو
اسيل : باهي ربي يعاونكم
فات اليوم ، واليوم يلي بعده ، وجي يوم الكورس
جهزت اسيل حقيبتها بـ مذكرتها وبيروها الوردي ونزلت بسعادة لـ عمر يلي كان يراجي فيـها وهي شادة في ايد ايوب ، ركبت للسيارة وحط ايوب في اهلها القريب من الدورة وحطها
وقفت ع الريسبشن ، خلصت حق كتاباتها وخشت للكلاس يلي لقاته شبه باديين
طقطقت وقالت بخجل : السلام عليكم !
شافلها الأستاذ وكان نفسه زيـاد "الاستاذ" يلي عطاها الورقة وقاللها : وعليكم السلام ، تفضلي !
خشت اسيل وقعمز في المقاعد الاخيرة الفاضية وباشر الاستاذ وقال : , so let’s start everyone is here now!
- الجميع هنا الأن ، اذاً لنبدء!
شاف لـ اسيل وأشر عليها بـ ايده باش تعرفهم ع نفسها وقالت بإرتباك : my name is aseel , I’m 25 years Old!
-اسمي اسيل ، عمري 25 سنة
الاستاذ : welcome Aseel !
- مرحباً اسيل !
واستمرو الطلبة في التعريف بأنفسهم ، كانو اغلبهم في جيل اسيل
خدت حصتها ، جي وقت البريك طلعو الشباب ، قعمز الاستاذ ع طاولته وفتح هاتفه ، وقعدو البنات يتعرفو ع بعض ويهدرزو
كانت اسيل فرحانة بالكلاس وعجبها الجو وتفكرت ايام الجامعـة ، ايام صاحباتها والمحاضرات الطويلة ، ايام الضحك والتهدريز مع البنات ، ايام كانت الأيام فعلاً حلوة ومليانة بالنشاط !
فات الوقت ، وطلعت من الكلاس ، وصل عمر فـ اتصل بيها وطلعتله وجوها حلو
ركبت السيارة وهي تحكيله بحماس : الله يا عمـر وين كنت اني ، توا كيف حسيت روحي بنادمة وعايشة ، يهبل جو الكورس والتيتشر شرحه محلاه ، البنات شكلهم كويسات وجوهم حلو ، عجبني الحو هلبا ، محلاها لما تطلع وتتعلم حاجات جديدة وتمارس يلي تحبه. 
عمر ضحك وهو يسوق : باهي جايبك تتعلمي وتقري مش باش تهدرزي مع البنات
اسيل قعدت تشبحله ثواني بـحب وقالت : بجديات احلا هدية درتهالي واحلا مفاجأة في حياتي كلها ، شكراً عُـمَري
عمـر شافلها وابتسم  : قداش عندي اسيل اني !
اسيل ابتسم كذلك : يا قلبي انت
عمر : نحبك
روحت للحوش ويـن ما لقت عزوزتها تراجي فيها وهي تكنس في الدروج
شافتلها عزوزتها وقالت : انتِ اطلعي وادهوري واني نكنسلك وسخك !
خش بعدهم عمر وقال : السلام عليكم
امه : وعليكم السلام والرحمة خش راك تعفس ع التراب جهدي طاح واني نكنس فيه
اسيل : سيقته امس يا عمتي منين جي هالتراب كله
عزوزتها شافتلها وقالت بإنزعاج : اكيد اني جبته معاي ، راهو سلفتك يلا عندها جهد لصغارها ما تعبيش عليها الدروج انتِ تكنسيه !
عمـر : خليه يما العمر يتم والضمان ما يتمش
امه : تبيني نخليه لن يطلع الزقرلو والعقارب ؟ تبي الناس يضحكو علينا يقولو كميلة حوشها خامر وكنتها فوق منها يوماتي طالعة تتهور ، مرة سوق ومرة مكتبة ومرة حوش اماليها وتوا بدت في القراية وبرا عاد
عمـر : شن تقولي ؟
امه ضرباته بعصاك المكنسة ع كتفه : برا سلم وليدي برا شكلك واكله بريشه !
انصدمت اسيل من الكلمة ، وركبت بخطوات مسرعة والعبرة خانقتها
عمر بإنزعاج : حرام عليك في رقبتك الكلام هدا
امه  بإنفعال : والله الا مسحووور ، ساحراتك اني نعرفها
عمر : ماعندي ما نقول غير ربي يهديـك حاطة راسك من راسها
وركب للشقة ، فتح الباب وهو يسمع في صوت بكاها بـ هستيريا زي الصغـار
خشلها ولقاها حاضنه رجليها لصدرها ودافنة راسها
قعمز جنبها وقال : أسيل لو بتقعدي ع كل كلمة تتحسي معناها مش ح ترتاحي بكل
أسيل شافتله بوجهها المحمر من البكي : اخر حاجة طلعتني ساحراتك ؟
عمـر : شن يفرق الحُب ع السحـر ؟
أسيل : امك ما تعرفش حاجة اسمها حُب ، امك ما تعرفش تحب تعرف تكره بس !
عمر : خلاص باه امسحي دموعك
اما عند العزوز يلي كانت متصلة بـ امتنان : مكبش فيها تكبيشة الله لا تروعك ، تعالي ديرلها حل اني معاش قدرتهم !
امتنان : خليهالي اني كان ما لفقتها في مشكلة هكـي كبرها دقيهالي وشـمة
امها : باهي خلاص ديري يوم وتعاليلها
امتنان : تم خلاص
وفاتت اليوم وتاني يوم جت امتنان ع اساس تبي تمكيج في حوش اماليها مع منى الماهرة في وضع المكياج
نزلت اسيل حتى تسلم ، لقت قيس يلعب لوطة ووقف عليها وقاللها : قولي لـ ايوب ينزل يلعب معانا
اسيل بلطف : لالا حبيبي ايوب خليه يلعب فوق احسـن ، اركب العب معاه انت
قيس بترجي : لا نبو في الصالة هني نزلت سياراتي معاي بالله عليك بالله عليك
اسيل : يا حليلي يا قيس فكني من جداك
قيس بإلحاح : بالله عليك بالله عليك كساد بروحي
اسيل : باه خلاص اركب قوله تبيك ماما
ابتسم قيس وركب يجري ونزل ايوب معاه ونزل
خشت اسيل لـ امتنان يلي مقعمزة في غرفتها سابقاً وتمكيج وسلمت عليها وقعمزت معاها وهي تهدرز ع  حسن نية
نادت عليها عزوزتها في المطبخ فـ مشتلها
ومجرد ما خشت للمطبخ سمعت حماتها تنادي ع ولدها ايوب ، استغربت أسيل وكانت تبي تمشي تشوفها شن تبيه الا ان عزوزها كلمتها وحاولت تلهيها
بعد ثواني سمعت أسيـل صوت حاجة طاحت وتكسرت
يتبع ..