كروموسـوم💜(منقووووله )

1

#كروموسـوم 💙
الحلقـة 1
للكاتبة : Meme Ali
واقعـية "
فتحت أسيـل عيونها ع صوت المنبه ، مدت ايدها من البطانية الدافية وطفاته ، وبعد دقايق خش عُمـر للدار ، شافها قاعدة راقدة فـ اتجهلتها ونحا من ع وجهها الورغان وقال بسعادة : نوضي ياسرك نوم
اسيل جبدت الورغان وغطت وجهها وقالت بنعاس : حبيبي صقعع خليني بنرقد
عمر نحا تيشرته واتجه للدولاب وهو يفتح فيه قاللها : ماتبيش تشوفي وليد ولا بنية ؟
اسيل قعمزت وهي تمسح ع وجهها وقالت : نسيت ان اليوم الموعـد
عمر طلع سوريته السماوية ونحاها من العلاق وهو يلبس فيها قال : اثاريه الحمل مش مأثر علي هرموناتك بس طلع مأثر حتى علي ذاكرتك
اسيل شافتله بنعاس : قاعد خاطري نرقد
عمر وهو يسكر في البطم : روحي من المصحة وطيحيلها نـوم !
اسيل تكسلت وقالت : هذا يلي بيصير !
ناضت من السرير بـ بطنها يلي بدت بارزة نوعاً ما ، وطلعت من الدار متجهة للحمام
وبعد سـاعـة ونصف كانو في المصـحة ، متكية ع السرير وواقف جنبها عمر وهو يشبحو للجهاز بسعادة ، والدكتورة تحرك في الجهاز ع بطنها
شافت اسيل بسعادة لـ عمر يلي كانت مبتسم ونظرات الحُب ًالسعادة مالية عيونه ورجعت شافت للدكتورة وقالت بفضول : شنو دكتورة ؟
الدكتورة شافتلها وابتسمت : ولـد !
زادت ابتسامة عمر بسعادة وطبس باس ايد مرته ورجع ووقف وهو الفرحة من سايعاته وقال : الحمدالله ، شني صحته ؟
الدكتورة : بخير تمام
رن هاتف عمر فـ طلق ايد أسيل حتى يطلع الهاتف المركون في جيب سرواله ولما شاف المتصل قال لـ اسيل : شوي وجايك
وطلع من الغرفة ، شافت اسيل للدكتورة يلي كانت ملامحها نوعاً ما ما اطمنش وقالت بإستغراب : دكتورة ! فيه حاجة ؟
الدكتورة شافتلها وقالت بحزن : بصراحة ايه
اسيل قعمزت بعد ما كانت متكية وقالت بخوف وقلق : شن فيه ؟
الدكتورة : الجنين متلازمة داون !
انصدمت اسيل وقعدت ثواني ومندهشة وهي مش مصدقة يلي سمعاته وقالت بصعوبة : ش شني ؟
الدكتور نحت الجهاز من بطن اسيل ونزلتلها سورياها وقالت : من المرة يلي فاتت بانلي انه متلازمة داون ومابيتش نقولك لن نتأكد ، لكن توا واضح جداً
اسيل بصدمة والدموع متجمعة في عيونها شافت ناحية الباب وين ما كانت عمر ماشي جاي في الممر وهو يتكلم في الهاتف ورجعت شافتلها وقالت بحزن : الادوية يلي خديتهم السنتين يلي فاتت هما السبب ؟
الدكتورة هزت راسها بالنفي وقالت : لالا هو نتيجة خلل في الكروموسوم 21 ، يعني ماليشي علاقة بالأدوية !
أسيل شافتلها بترجي وقالت بعفوية : مافيش ادوية او حاجة نقدر نسعف بيها ويجي طبيعي ؟
عقدت الدكتور حواجبها من كلام اسيل الغير منطقي وقالت : لالا مستحيل الجنين تكوّن وفات فيه ، يعني حالات المتلازمة داون يجهضو فيهم او يولدو فيهم ومافيش حل تالت !
عقدت اسيل حواجبها بإستنكار وانزعاج وقالت : فيه حد يجهض كبده ؟
الدكتورة : فيه ! يلي عندها هلبا صغار ويلي راجلها يجبرها وهلبا حالات من غير حن ولا رحمة
مسحت اسيل دمعتها يلي قريب نزلت من حافة عينها واستجمعت قواها وقالت : يلي جي من ربي مرحبتين بيـه !
ناضت من ع السرير وخش عمر بعد دقايق وخدي وصفة الفيتامينات وطلعو واسيل تحاول تصطنع السعادة قدامه
وروجع بيها للحوش ومشي لـ خدمته ..
في الليل ، كانت اسيل متمددة ع الصالون وهي حاطة راسها ع كتف عمر وياكلو في البوشار وهما يتفرجو ع الفيلم الرومانسي والكوميدي بإنسجام ، اثر في اسيل مشهد من الفيلم بينما كان البطل والبطل مقعمزين ع طاولة العشاء الرومانسية حست البطلة بحد لامس رجلها فـ شافت للبطل بإنزعاج ، بعد ثواني حس البطل بحد لامس رجله ف شاف للبطلة وابتسم
وبعد ثواني من الملامسات طلعلهم الطفل التلازمة داون من تحت الطاولة وهو مبتسم ويضحك وانصدمو هما الزوز
شافت اسيل لعمر يلي كان منسجم وقالت : كيوت الوليد
شافلها عمر بإستغراب : هذا كيوت ؟
اسيل قامت راسها من ع كتفه وقالت : ايه !
عمر رجع شاف للتلفزيون وخدي حبتين فوشار من الصونية الموضوعه في حجره وقال بلا مبالاة : تي اني قريب غيرت القناة باش ما تتوحميش ع واحد زيه
اسيل عقدت حواجبها بإنزعاج وقالت : وكان جبت واحد زيه شن المشكلة ؟
عمر بإندفاع : بعيد السو خير تفاولي ! صام صام وفطر ع بصلة عامين نعالجو ونجرو من مصحة لـ مصحة وفي الاخير تجيبيلي واحد هكي شن مش مشكلة بعدين !
انزعجت اسيل من راي عمر وبان الحزن في عيونها وقالت : علاش تكرهوهم ؟
عمر شافلها ورجع شاف للتلفزيون ولما جت الدعاية بعد سؤال اسيل بثواني شافلها وقال : مش قصة نكرهوهم لكن شكلهم وتصرفاتهم وحركاتهم مزعجة وتسبب في احراجات وبالذات بلادنا هني واخدين فكرة ان يلي عنده ماغولي مسكين ومابعده وحتى في المناسبات مايحبوش يعزموه بسبب الفوضة يلي يسببها ولده او بنته الماغولية
اسيل بإنزعاج : اسمهم متلازمة داون ! مش ماغولي !
عمر عقد حواجبه بدوره وقال : بديت نشك انك حامل بـ ماغولي !
اسيل سكتت ثواني بتردد وجت بتقول فـ تمت الدعاية رجع شاف الفيلم وهو ياكل في الفوشار ، ناضت اسيل من جنبه وخشت للحمام ، وقفت ع المراية ويديها ع الرخامة يلي حاملة حوض الوجهه وهي تفكـر في كلام عُـمر وحايـرة بين تقول له ، او تخليها لن تجـيب لعلـى وعسـى بعد ما يشوفـه بين يديـه يغـير رايه ويتقـبل الأمر الـواقـع !
فات اليوم ، وتاني يوم الصبح كانت أسيل مقعمزه في صالة حوش سلفها يلي يسكن فوقهم ادردش مع سلفتها مُنـى يلي تزوجت بعدها بسنة وعندها وليد مقعمزة بيه في حجرها وهو شاد شكشاكته ومداير دوشة بـ صوتها
منى نحت الشكشاكة بعد ما ازعجها الصوت وازعج تهدريزها مع اسيل وقالت : اي حقا ! مشيتي امس للمصحة ؟
اسيل ارتشفت رشفة من فنجان الشاهي وابتسمت وقال : إيه
منى بفضول : شن قالولك
اسيل : ولـيد !
منى ابتسمت بدورها : باهي مبروك مبروك انشالله ربي ينوضك بالسلامة يارب
اسيل : امين يارب
شافت أسيل لـ قيس يلي مقعمز في حجر امه وقرصتله خده بلطف وقالت : بيجيك ولد عـم يلعب معاك ويونسك
ابتسمت منى وقالت : ايه واخيراً ، حقا سمعتي بـ لطيفة ؟
اسيل عقدت حواجبها : خيرها ؟
منى : جابت حتى هي ، لازم نمشولها !
اسيل : باهي تو نتصلو بيها نباركولها ومش لازم نمشو مش قالت بدير لمة ؟
منى بشفقة : لالا مش ح ادير لمة مسكينة ، بنتها طلعت ماغولية !
عقدت اسيل حواجبها بإستنكار وانزعاج ، وكأنه هالموضوع ح يقعد يطاردها لـ يوم تجيب ، او حتى بعد ما تحيب ، يمكن ح يقعد يطارها طول عمرها وكلمة مسكينة ح تكون لقبها الجديد !
وقالت : علاش مسكينة ؟ وعلاش ما اديرش لمة ؟ المتلازمة داون مش بشر يعني ؟
منى رفعت حواجبها بإستغراب واندهاش : اسيييل ! انقولك جايبة ماغولية وتقوليلي لمة ما لمة ، والله تحكي عليها جارتها سميحة قالت كان تعزيها تقبل العزي ياناري !
تعكّر مزاج اسيـل وقالت بإنزعاج : اسمه متلازمة داون ماغولي منين جبتوها بس ! وبعدين علاش تعزيها تقبل العزي ، مفروض تحمد ربها و تعاني بنتها فيها اجر خير من عشرة صغار !
منى هزت كتافها وقوست شاربها السفلي وقالت بحيرة : ياوخيتي الناس قناعات !
وارتشفت رشفة من كوبها
وفات باقي اليوم عادي جداً
فاتـو شهور ، وجي يوم العملية !
خش عمر للحجرة وشاف لـ اسيل المقعمزة ع الكرسي بزيها الازرق وملامح الخوف والتعب واضحة ع وجهها
اتجهلها ونزل قدامها وحط يديه ع ركابها وشاف لعيونها وقال بحنية : كلها ساعتين وتفتحي عيونك وتشوفي ولدنا يلي نراجو فيه !
اسيل بخوف وقلق : عُمـر اني خايفة !
عمر عقد حواجبه وقال : من شنو؟
اسيل قعدت تشبح لعيونه وملامحه وهي خايفة من ردة فعله لما يعرف ان طفله متلازمة داون ، خايفة من خيبة امله ، حزنه ، غضبه لما يعرف انها دسـت عليه انها حامله بطفل ما يتمناشي ابداً وقالت بعد تفكير دام لثواني : خايفة من الألم بعد العملية !
ابتسم عمر براحة وقاللها : اول يومين وبعدين يبدا يخف وخلال اسبوع تلقي روحك زي الفرس انشالله
خشت الممرضة للحجرة وقالت : استاذ لو ممكن شوية بيخش الدكتور بيضربلها البنج !
شاف عمر للممرضة ورجع شاف لـ اسيل وقال : خليك قوية يا عمري متخافي من شي كله يهون لما تسمعي صوته !
هزت اسيل راسها ب مسايرة ، ف باسها من خدها وناض وقال : تنوضي بالسلامة يارب !
شافتله اسيل وابتسمت بالم ، وطلع هو من الغرفة ، بعد حوالي ساعة كانت اسيل ممدودة ع السرير في غرفة العمليات ، وبنا انه كان بنج نصفي كانت هي فايقه لكن فاصل بينها وبين طفلها يلي اخيراً سمعت صوته هو الستار الاخضر
تنهدت اسيل براحة بالرغم انه حتى صوته في اختلاف بسيط ع صوت الاطفال العاديين ، شافت للممرضة وقالت بتعب : نبي نشوفه !
الممرضة :، استني شوي
وبعد دقايق حطوه ع صدرها زي ما طلبت ، شداته اسل بدمه وهي تبكي بتناقض ، دموع فرح ع دموع خوف من ردة فعل عمر ع دموع تعب ، باساته بالرغم من الدم يلي كان ملطخه وقاموه منها.
بعد ساعة ونصف كانت في حجرتها ، اما عمر اتجه للحضانه حتى يشوف ولده وفلذه كبده ، وقف ع الممرضة يلي كيف طلعت من الحضانة وقاللها بسعادة : لو سمحتي نبي نشوف ولدي !
الممرضة : اسم الام ؟
عمر  بلهفة : اسيل جمعـة
طلعت ممرضة تانية فـ شافتلها الممرضة الأولى وقالت : مولود اسيل جمعة
عقدت حواجبها الممرضة الثانية وقالت : المتلازمة داون ؟
انصدم عمر ونزلت عليه كلمتها زي الصاعقة !
يتبع ..