#السر_القديم١٧
شهد السلمان
مرات واحد شكد ميحاول يبقى محافظ على املاكة او اولادة او اهلة او محبتة بين الناس بحكم ظروف واقدار و يمكن اسرار تتغير كلها..
و دائما الشي اللي نريد نحافظ علي هو اللي نخسرة من دون حول او قوة
علاقتي بليث و زواجي منة حتى محبتة الي هي من ضمن هالامور اللي اجاها وقت حتى تكون على حافة الهاوية مع انه قررت احجيلة كل شي و شنو يصير خلي يصير حتى لو زعل علية اكيد فترة وحتعدي بالنهاية هذا ماضي وجان
ووجود ليث هو حاضري ومستقبلي و حتى اكون مستعدة كتبت تسلسل الاحداث وحتى ردود افعال ليث على كل شي راح اكولة في سبيل ما ارتبك او انسى شي ويكون عندي رد و جواب واضح لكل شي وكتبت قصتي ويا عمر اللي خلتني انفر من الحب واكره ادخل باي علاقة
بس سهر ومخططاتها وغبائي و خبث عمر جان سابق لرغبتي بالكلام
جنت اتوقعة تهديد بسيط وعابر وممكن لان هي غيرانة واني حاسة عليها تريد تاخذة باي طريقة مني لكن الفيديو اللي شفتة جان واضح لدرجة جبيرة واكيد محد حيصدك واولهم ليث انه ماكو شي بيني وبين عمر غير ماضي تعيس
مكدرت
مكدرت اكمل اللي نويت علي واحتاريت بحل هالمشكلة واكيد اكو هواية شغلات هي تعرفها و يمكن من الماضي بس شون اتخلص منهم هي واخوها
اعرف اللي ديصير وياية هو عقاب و عادل بحقي بس من اصفن بنفسي اكول اني مسويت شي غير حبيتة او اتقربتلة بفترة من الفترات وانتهى كل شي بطريقة بشعة وقبل فوات الاوان
ما انكر اني منسيتة ولا يوم بس مو لان احبة بالعكس لان اكرهة
وهذي هي عادة البشر مستحيل ينسون اللي اذاهم بس ممكن ينسون اللي فرحهم
ما اكدر استسلم شكد ما احاول اخفي هالموضوع راح ينفضح بس ما اكدر اتركها تسلبني حياتي ومستقبلي مثل ما خليت اخوها يسلبني احساسي بكل شي وخلاني اخاف من الحب وكل عطاء ممكن اقدمة لاحد و صرت ابرد من الثلج تجاه اي شي ماكو شي ممكن ياثر باحساسي عدا احساس حقدي وكرهي الة ..
لبست هدومي و رحت لامي اتمشى كل ما امشي الكى متزوجين شابكين ايدين بعض ويضحكون او يسولفون تمنيت رب العالمين ما يتخلى عني بهذي المحنة مثل ما خلاني اتجاوز هواية شغلات
ما اريد اترك ليث دموعي خانتني ونزلت بدون ما الحك عليها استحيت من العالم اللي تباوع علية مسحت عيوني ومشيت بسرعة اول ما وصلت لامي حضنتها وبجيت فزت هي عبالها اكو شي صاير بليث او اهلة واضح من لهفتها وسؤالها بصوتها الخايف عنهم
اكتفيت بشهكاتي ودموعي وكلمة ما بية بس تعبانة ..
الحل الوحيد حتى ارتاح من هذا الهم هو امي لازم احجيلها كل شي وافضفض اريد ينزاح هالثكل عن كلبي حجيتلها كل شي من الاول من بداية ما عرفت عمر لحد تهديد سهر وما خلى كلامي من البجي
ومن نظرات عيونها المفتوحة على وسعها لان ممصدكة اللي تسمعة مني
- هذا اللي صار كلة وما عندي حل وخايفة حيل يا امي شسوي !؟
- ليش هيج يوم هاي حك التربية بيج وتعبي ليش تضيعي
- مو بيدي يوم الصار غصب عني انجريت ورة كلامة وعاطفتي بس وعيت متاخر مجنت اعرف القدر حيجمعني بشي قديم وفات
- يا بنتي ماكو شي يفوت الماضي مثل الاساس اللي ينبني عليه المستقبل شلون ما فكرتي باللي حيصير شون محسبتي حساب وذبيتي نفسج وليش ملجأتي الي جنت اقلها انصحج بوقتها او امنعج او انبهج
- ما اعرف لو عندي عقل ما سلمت كلبي لواحد مثلة وهذا مو موضوعي ولا مشكلتي
- شراح نكلة لرجلج ليث اذا عرف والله يطلكج وميباوع لورة حتى لو يحبج ويموت عليج بس انت اللي سويتي مو شوية
- شسوي كليلي وهاي اختة الحقيرة تهدد بية
- ما اعرف يا ربي دخيلك على هالمصيبة والفضيحة
كافي بجي خلي نشوف شنسوي
- مدا اكدر صعبت نفسي علية انحطيت بموقف ما اعرف شوصفة لو من الاول حاجية لو من اول ما سالني اذا عندج علاقة جاوبتة جان صار اهون وجان صدك بية بس ...
دموعي مغركة عيوني وردت افتح الرسالة اللي اجتني مدا اميز الحروف مسحت دمعي وقريتها من عمر
" مشتاقلج "
شوفتها لامي وكالتلي ردي علي والصمي لا تخلي يتمادى ويتجاوز حدة وياج
" حرام عليك تحجي هالحجي اني متزوجة وانت حتتزوج شون الك نفس تخون بالناس هيج بسهولة ! "
" هاي مو خيانة هذا حب واني احبج الج و بس "
" عمر والله اذا مسكتت وكفيت شرك عني اكول كلشي ليقين وليث "
" ههههههه ومتكوليلهم شمنتظرة "
" يعني مخايف !؟ لهاي الدرجة انت قبيح !"
" وليش اخاف بكل سهولة اكول هي غيرانة من يقين وحبي الها وتريد تتهمني حتى نتفرق واصلا تصرفاتج واضحة ودتساعدني واذا كلش مصدكوني اشوفهم محادثاتنا واكول انت حبيبتي ميهمني "
" محادثاتنا !!! ليش اني شحاجية وياك ؟ "
" شوية من القديم على شوية من الجديد وينتهي كل شي "
" واني هم اكدر استخدم الجديد واشوف هالحجي الهم مخايفة منك "
" تمام والقديم شون ! ؛
" سكتي يعني هههههههههههه بابا لا تتحديني وخلينا نبدي من جديد وبالمناسبة ميهمني اتطلكتي او لا اني اريدج شون متكونين "
" حسبي الله ونعم الوكيل بيكم الله ينتقم منكم "
" احبج هههههههههه بس منو قصدج بمنكم ! "
" الشريفة اختك اللي تدور على رجال وما لكت الا رجلي "
" شكو بيها تريدة بالحلال يا حياتي "
" حقراء " ...
عمر و سهر ميخجلون من افعالهم
السؤال هو شكد ممكن يطول سكوت تمارا بسبب خوفها ؟؟
و حتكدر تكول كلشي لليث او ليقين ؟؟
YOU ARE READING
السر القديم
General Fictionمخطئون فيما قالوه عن الماضي، لقد تعلمت كيف أدفنه، إلا أنه دائماً يجد طريق عودته. اسرارنا وماضينا جزء لا يتجزء منا ..
