Aqua .. ကျွန်တော် ခင်ဗျားကို မေ့လိုက်ပြီ
အရင်လို ကော်ဖီခါးခါးတွေ မြင်ရုံနဲ့ သတိမရတော့ဘူး။ မဟုတ်ဘူး၊ သတိမရချင်ယောင်ဆောင်နေတာ။ ဘယ်လိုပြောပြော ကျွန်တော့် ဒဏ်ရာတွေကတော့ သက်သာနေပါပြီ။
အနာပေါ် တုတ်ကျလေခြင်းပေါ့ Aqua ရယ် .....
Aqua နဲ့ မမျှော်လင့်ဘဲ ပြန်တွေ့ရပြန်တယ်။ အရင်လိုပဲ ခင်ဗျားက လှနေတုန်း။ ဩော်.. ခင်ဗျား ချစ်သူလေးကလည်း သိပ်လှနေပါရောလား။ Aqua ကျွန်တော့်ကို ပြုံးပြတယ် ... ဘာမှမဖြစ်ခဲ့သလိုမျိုး။ ကျွန်တော်လည်း ပြုံးပြမိတယ် မနာကျင်ခဲ့သလို ...။ ခင်ဗျားကို ကိုင်ဆွဲထားတဲ့ လက်တစ်စုံရဲ့ပိုင်ရှင်က ကျွန်တော် မဟုတ်တော့ပေမယ့် ကျွန်တော်က ဖမ်းဆွဲထားချင်နေတုန်းပဲ။ မေ့ပျောက်ထားတဲ့ အတိတ်တွေပြန်မြင်ယောင်ရင် ဘယ်လိုခံစားရမယ်ထင်လဲ Aqua... ဒီကလူက " ကိုယ် မင်းကိုချစ်တယ် " ဆိုတာကစလို့ " လမ်းခွဲရအောင် " ဆိုတဲ့ စကားတွေကို အတိအကျမှတ်မိနေတဲ့အခါ...။ အချို့ conversation တွေက ဖျက်လိုက်ပေမယ့် ဦးနှောက်က မေ့ခွင့်မပေးခဲ့ပါဘူး။
" စောစောအိပ် " ဆိုပြီးစိတ်ပူပေးနေကျ Aqua က မျက်ကွင်းနေမည်းနက်နေတဲ့ ကျွန်တော့်ကို အခုကော စိတ်မပေူတော့ဘူးလား၊ အင်းလေ.. ကျွန်တော်တို့က ဘာမှမသက်ဆိုင်တော့တာ။ ကျွန်တော်တို့ အတိုင်းအတာတစ်ခုထိ နီးခဲ့ကြတယ်... ခုတော့လည်း အားလုံးဟာ အတိတ်ပါပဲ Aqua ရယ် ..
အတိတ်က အမည်တစ်ခုကိုကြားရုံနဲ့ ဒီလူက ပြုံးလေ့ရှိတယ်ဗျ
ကျွန်တော်က ခင်ဗျားနဲ့မှမဟုတ်ရင် ဆိုပြီး ပြောချင်သေးပေမယ့် နားထောင်ပေးမယ့် ခင်ဗျားက အဝေးရောက် ...။
