أسرار الزمان

الجزء 13

 
النسيم .. اترددت شديد قبل ماتجاوب خالها على السؤال ده .. بس قالت ليهو حاشا وكلا.. براي طلقتو .. لافي امير قال لي لاقاولتو .. ود الحداد مابدورو مو على كيفي؟
قال ليها وانتي عارفة الامير دايرك بعد تكملي العدة دي .. قالت لي ايا خابرة .. قال ليها ورايك شنو رضيانة يعني .. ؟؟ قالت ليهو ايا رضيانة .. لا انتو ولا ابوي مافيكم زول يدخل في الشي ده .. قال ليها نحن دايرين نرجعك لي اب خوسة صادة.. قالت ليهو ماني دايراهو .. الا الامير يقول خلاني براهو ..
بعد شوية هي بتتكلم معاهو كدي سمعت صوت اب خوسة برة جا .. وقال السلام عليكم .. وصوتو الجهوري المعروف .. البت تم قطعت كهربا وسكتت .. وبقت ترجف زي القصبة .. وقدام خالها رمت ليها دعات تذوب الحجر ..
خالها عطية قال ليها يا النسيم ماتعذبي روحك وتعذبينا معاك .. نحن الامير ده قادرين عليهو .. وقادرين على ابوهو ..
قالت ليهو انا ما ني دايرة ينسل سيف بين نفرين عشان خاتري .. هي النسيم هي شنو.. عشان شنو يتكاتلو فوقها الرجال .. كان ود الوشاش وكان الامير .. البسويهو الله علي انا راضية بي حكمو ومرادو .. بس انت ياخالي ماتدخل في الكلام علا انا اقول لك حوبتك جات .. قال لها سوي الفي راسك يابت اختي وانا واخوالك جاهزين نموت فوقك حرم مايفضل فوقنا واحد .. لكن عاد انا ماني داير.. اجبرك على شيتا ماك دايراهو ..
ود دار الزين جا داخل لقى عطية بنضم مع النسيم .. قال لهو ياعطية البت طلبت الطلاق من ابخوسة .. وابخوسه طلقها تاني مو من حقنا نجبرها عليهو الا تطلب .. وانا هسع على حسب ماها دايرة ربطت لساني مع السلطان .. براي اسوقا اوديها لي ولدو عزيزة مكرمة ..
قال ليهو ياود دار الزين .. وين بتمشو من ظلمكم لي اب خوسة؟ ..
قال ليهو والله غصبا" عننا .. ومادايرين نسوي لنا فتنة بي سبب النسيم ..
انا اكتر حاجة كنت خايف منها ياعطية ..وعاملها حساب .. انو الامير يجي يسوق بتي قبل ماتم المدة الشرعية في الكتاب .. لكن بعد ده تاني ماعندي مانع .. الا هو ياباها براهو ..
عطية عاين لي ود دار الزين كدا معاينة غريبة ومرق بره للرجالة.. ولقاهم بتونسو بالقصة الحصلت للنسيم .. وابخوسة قاعد ماسك سيفو ويرجف .. ويعرق ويجف .. حاصلة عليهو حالة اصلا مامفهومة .. لكن انا .. حاسي بيهو الزول بس داير يشوف النسيم مرة واحدة.. ويطمن عليها .. الزول محروق حشا.. والله محروق حريق شديد خلاص .. بس مافي يدو حاجة يسويها ..
لكن على كل حال ..اب خوسة فرحان بي انو النسيم جمعت.. وطيبة ماعندها عوجة .. اتغدا في الكرامة وداير يمشي .. على اهلو طبعا ماشاف النسيم
النسيم كانت متأملة تشوفو .. ماشافتو ..وهو كان طمعان يشوفها.. ماشافها ..
وكت داير يمرق . نادى ود دار الزين .. قال ليهو انا جبت ليك فرسك
وربطتو ليك في الشاية البرا .. قال ليهو والله ياب خوسه الفرس هدية من الامير .. اكان مو كدي انا تاني مابسوقو منك ..
قال ليهو انا يا عمي تسلم لي حمارتي الحمامية.. لا نكرتني ولا فاتت خلتني .. قال ليهو ان شاء الله مايجيها البجبرها تفوتك .. ات ماك راجلا" بتنفات .. (طبعا انتو فاهمين الالغاز دي) ..
اب خوسة مرق .. بي كرعيهو على اهلو .. وخاتي عصاتو في اكتافو وماشي .. ويدوبي سااااي .. قال..
احي ياوحــيح قلبي المولع جوفي ..
تاني سواد عليك ياروحي وين ماتشوفي..
مشتولة القرير . اللنكرت معروفي.
فرقها نشف الطايوق وكمل دوفي..
.
حاس بالخوسة تنحر في الكبد جلافه .
تهرد قلبي عقبان للضلوع تتلافا..
مهيوبة الحشوم رايقه وكرام اسلافا.
خلت عيني لي وسن المنام عوافه. .
اها يازول الناس اتفرتقو من الكرامة السواها ود دار الزين لي بتو في نفس اليوم الجات فيهو .. والفرحة دخلت بيت ود دار الزين من جديد..
تاني يوم جاتها الرسالة اخت اب خوسة وامها.. راكبات حمير عشان يحمدن لها السلامة .. والنسيم وكت شافتن انقدت بالبكاء .. واتسالمن جنس سلام .. يبكي الزول البعاين ليهن .. الرسالة قريبة جدا من النسيم.. دخلت معاها وبقن يتونس الاتنين.. ويتوسوسن .. الرسالة قاالت ليها.. انا يا النسيم ماني رضيانة منك ..
كيف بتفوتي اب خوسة ؟ مالو لقيتيهو فسل ولا موناجح؟؟ .. فسل يعني بخيل ..
قالت ليها وحات الله يا الرسالة مكمل الجود والرجالة .. لكن حكم العبد عند سيدو .. قالت ليها انتي قولي لي وانا بسكت ساااكت ..
مالك ابيتيهو؟؟ عليك الله يا النسيم ..
قالت ليها اليوم داك انا مرقت فوق البير وحصل حصل .. حكت للرسالة الكلام الحصل من الامير بالتفصيل .. وبي كل صراحة ..
الرسالة دي زعلت زعل لامن وشها انقلب احمر ..
وده الكلام الكانت النسيم داساهو على اي زول.. كلمت بيهو الرسالة بس ..
اها يازول يوم السبت .. ود دار الزين مشى المجلس عادي.. زي عادتو
دخل جلسة مجلس الشوري.. الجلسة كلها كانت مناوشات ومناقرات.. بين
بين الفونج والمكوك .. وطبعا .. السلطنة دي فكرتها عاملة زي اتحاد حزبين في السلطة .. لكن القبلية والتمييز العنصري مسيطر على الوضع .. اصلا ابا يتلاشى من نسيج الشعب السوداني من الله خلق السودان الى يومنا هذا .. والسلطنة دي مصيرها تتفرتق وتضعف .. اختلافات ودسايس وظلم .. ومحاباة .. وضرايب .. ورقيق .. واستبداد السلاطين واولادهم على العامة .. ومعاملة غير كريمة لي لسلطة الدرجة التانية .. المتمثلة في مكوك ومشايخ العبدلاب .. ومن هم تحت امرتهم كالجعليين والميرفاب والشايقية واهل الشمال .. الكان مركزهم في الحلفايا . وايضا هناك تعدي سافر على نظارات الشكرية والبطاحين .. وجمع الضرايب بالاهانة والتعذيب .... يعني الظلم واقع على عنصر معين بطريقة واضحة .. ممايدل على عدم صحة المعلومة البتقول الفونج اصلهم بنو امية..وتصدق مقولة الفونج اصلهم اما من الهضبة الاثيوبية واعالي النيل .. والاقرب ان اصولهم من اعالي النيل من الشلك كما ذكر جيمس بروس السائح الاسكتلندى فيما حكاهو له الملك احمد سيد القوم .. وهو القول الراجح عندي .. بعد مقارنة الاقوال ولكن واضح الاختلاط والمصاهرة بينهم وبين الاعراب .. وانتاج جيل أقوياء البنية شداد البطش طوال القوام ضخام الجثث ..
اما السلاطين.. فكان يختارهم مجلس الشيوخ من شتى القبايل .. ولكن غالب الاختيار هو مايختاره الفونج ..
اها يازول اول ما انتهت الجلسة دي الملك نادى ود دار الزين وسأله نفس السؤال المعتاد .. النسيم ماجمعت ياود دار الزين؟ ..
قال ليهو والله الحمد لله قبال تلاتة يوم النسيم اصبحنا الصباح لقيناها فوق عنقريبا ..
الملك قاليهو .. انا افهم شنو ياود دار الزين؟؟ غير انو النسيم كانت مدسوسة في مكان.. لغاية ماتنتهي عدتها .. الفكرة واضحة .. لكن اقول لك كلام .. كان انت كان غيرك ..الزول العمل العملية دي زول فاهم وذكي وزول اصلاح .. وانا كان عرفتو بديهو منصب في السلطنة ..قال ليهو اريتنا يامولاي لو عارفتو .. المهم يا ود دار الزين انا هسع بمشي ببشر الامير واخليهو يحدد يوم زواجه .. ونحن بنجيك بالموكب الملكي في بيتك ونسوق البت .. تاني عندك مشكلة في حاجة؟ .. قال ليهو ابدا والله ماعندي مشكلة في اي حاجة..الملك ابتسم وقالهو . خلاص انا بحدد المواعيد وارسل لك بالمفيد في الخمس يوم الجايات ديل .. ان شاء الله ان شاء الله واتفقو ..
الملك مشى للامير في جناحه الخاص.. لقى معاهو تلاتة من بنوت الذوات اجمل ماخلق الله .. اعوذ بالله من شرو .. قايمات على خدمتو زي الخدم .. لكن شكلهن حراير ..
وهو اول من شاف ابوهو قعد يتعاور زي الشافع.. يابا انا داير النسيم . يابا انا موش ولدك ؟ يابا جيب لي النسيم ..
قال ليهو ياولدي انت مستمتع بي حياتك على احسن حال مالك ؟ عليك ماتدخلنا في مشاكل مع المشايخ .. الناس ديل بتهم مابترضى ..
وهسي البنات ديل من وين ؟ قال ليهو الصيدة البجاي دي بت فلان الفلاني من القبيلة الفرتكانية .. ودي كدا .. كلهن ساقن من بيوت اهلهن سواقة النعاج .. بقول نحن دايرين البت دي تخدم في القصر .. قالو في بت اخوها انتحر بي السبب ده .. والامير ماعندو كبير اصلو وولد جاهل ومغفل .. عشان كدا ود دار الزين كان حابس النسيم في البيت من عمرها 12 سنة .. ماطلعت الا هي متزوجة ..
اها هسع الامير قعد يتلايق وقال لابوهو انا داير النسيم تاني ماداير اي بت .. قال ليهو لو اديناك النسيم .. تاني ما بتشوف غيرها نهائي ؟
قال ليهو ما بشوف غيرها .. قال ليهو خلاص النسيم لقوها ودور الليلة بنمشي نعرسها ليك وتجيبها ..
الامير فرح فرح بقى ينطط زي القرد .. لكن هل ح يتوب من البسوي فيهو؟ الله اعلم .. ياخي ده بعمل عمايل تقشعر لها الجلود ..
اها هسع في حادثة متزامنة قصة في زمن قصة النسيم .. وهي انو في بت .. قبل فترة مشى الامير يسوقها من اهلها .. ابوها وقف ليهو واعترضو .. ابوها اسمو ود المريود من الفرسان .. قام الامير قال للحراس امسكوهو .. مسكوهو .. والامير طعنو بالسيف المسموم .. طعنو قدام ناس الحلة .. وقدام بتو وولدو الصغير اسمو القاسم .. والامير ساق البت وخلا الولد بارك فوق جنازة ابوهو ومشى .. والحرس قالو للناس الحاضرين .. البمشي يشتكي للملك نحن بنحرقو حي في بيتو .. مع انو الملك عارف ..وولدو كلمو .. بس قال اتكمو ..
اها قام الامير جاب البت عدا معاها اسبوع .. ورفضت تخليهو يقرب منها .. وكانت كالنمرة الغاضبة .. قام جلدها بالسوط وحلق ليها شعرها.. ومشى دخلها في حوش الرقيق .. وباعوها .. قبل ماتكتمل بيعتها ..شالت ليها سهم من زول قريب منها ..وغرستو في قلبها وماتت .. اهل البت دي اعمامها واولاد عمها .. حاقدين على الامير حقد شديد .. والمشكلة الكبيرة في اخوها الصغير الاسمو القاسم ده .. قالو ليهو اكتر من شهرين يجهر زي التور الهايج .. عمرو 17 سنة .. وحدو في البيت لا ام لا ابو لا اخت ..
.. اها قام القاسم ده الليلة جاء راكب ليهو ناقة.. ولقى الرسالة بت الوشاش في الخلا .. سارحة بي غنهما.. قال ليها انا عطشان وجيعان يابنية .. قالت ليهو حبابك .. انزل نزل سقتو موية .. وحلبتلو لبن شربو .. بعد شرب قعد يبكي في جنس بكاء ..
قالت ليهو مالك يا ود العم؟ .. حكي ليها القصة الحصلت عليهو .. وقال ليها انا كان ماكتلت الامير وشربت من دمو الله لا بارك فيا ..
قامت حكت ليهو الحاصل .. وكلمتو بالسر الحكتو ليها النسيم .. وقالت ليهو الامير طلب من مرت اخوي اسمها النسيم .. تطلق اخوي عشان يعرسها هو .. وهسع بعرسها في الايام دي .. لكن النسيم دست الكلام على اهلها عشان مايكتلوهو .. وانا والله بس دايرة لي زول يوصل الخبر لي اهلا .. قال ليها انا بخدمك في خدمة وانتي اخدميني في خدمة .. قالت ليهو اها قول ..
قال ليها انا داير زول يتوسط لي اشتغل في القصر .. وانا بوصل ليك الخبر لي اهل النسيم .. قالت ليهو .. حلك وحلي واحد ..
قال ليها مافهمت الكلام ده .. قالت ليهو ود دار الزين ابو النسيم.. من الناس البحلو وبعقدو في القصر.. اكان داير لك شغل بشغلك .. وانت كان مشيت كشفت له الكلام ده .. بديك جايزة خل يشغلك ساكت .. بس اكان قالك الكلمك منو .. قولو انا كنت فوق البير وكت الاميروحراسو جو نضمو مع النسيم .. قال ليها خلاص بس انتي وصفي لي .. وصفت ليهو ومشى .. في نفس اليوم دق الباب على ود دار الزين .. رحب بيهو احسن ترحيب قال ليهو ياود ار الزين انا جاييك في كلام خصوصي .. قال ليهو احكي .. قال ليهو والله انا عندي ليك كلام سر شديد .. ولكن مابقولوليك .. الا توعدني تشغلني في القصر ..
قال ليهو ده كلام ساهل شديد .. بشغلك .. بس انت قول لي الكلام .. قال ليهو بتك النسيم .. قاليهو مالا بتي النسيم ..؟؟ قال ليهو انا يوم فوق البير وهي كانت بتنشل .. جاء مولاي الامير ووقال لها كيت كيت ..
قال ليهو الكلام ده سمعتو انت ؟ قال اي نعم كنت حااااااااااااضر ..
قال ليهو اوعك الكلام ده تجيبو فوق خشمك.. اخوالها اولاد مختار كان سمعو بالكلام ده .. بسوطو البلد والبلدين .. وبتحصل فتنة .. قال ليهو خلاص بس اوعدني تشغلني قال ليهو جدا بس انت يوم السبت تلاقيني في البوابة الشمالية للقصر . الصباح . القاسم قال ليهو اسمع ياعمي.. لو انت ما شغلتني انا بمشي لي اولاد مختار واحكي ليهم الشفتو..
قال ليهو لالا اووووعا لي بالك .. المهم ود دار الزين جا كلم التاية بي قصة الولد .. قالت ليهو اوعك تدخل الولد ده على القصر ..
وحات الله الولد وراهو مصيبة و يجيب لك مشكلة ..
اها يازول غايتو القاسم مو معروف ناوي على شنو؟ وهل ح ينجح في المهمة ولا يروح ضحية زي اختو في جو القصر الملعون ده ..
ولو دخل القصر وقام بي اي حركة ود دار الزين بروح فيها طبعا"..
ربنا يجيب العواقب سليمة ..
المهم باكر الصباح .. جو جنود موفودين من القصر ودقو باب ود دار الزين .. ونزلو حاجات محملة في جملين ..
يعني دي الشيلة حقة النسيم تقريبا .. ودخلوها جوة وقالو لود دار الزين دي هدية الملك لي الاميرة النسيم ..
ود دار الزين والتاية جو فتحو الحاجات .. شنط شنط .. الملابس الغالية جدا .. والزينة .. والعطور .. والدهب ده كمية خيالية .. بالارطال . ود دار الزين من الله خلقو ماشاف دهب قدر ده .. والنسيم جات عاينت للحاجات كدا.. بطنها طامة ورمت لها دمعتين ومشت ..
ود دار الزين قال للتاية والله بتك ربنا عوضها .. قالت ليهو تراهو موعاجبا .. المهم لملمو الشنط ودسوها ..
اها يازول باكر الصباح بدري باب ناس ود الزين تااااااااني .دق تاني .. يالطيف .. دقة الباب المن الصباح دي ما مطمنة ياربي ده منو؟ مشى فتح الباب لقاهو ده واحد من الحرس الاتنين البمشو مع الامير طوالي.. جاي براهو .. وسال سيفو وعيونو تطاير شرار شرار ..

يتبع.....